Weise mir Herr, deinen Weg


Weise mir Herr, deinen Weg, ich will ihn gehen in Treue zu dir.
Erhalte mein Herz bei dem einen, daß ich deinen Namen fürchte


Zum letschd mool du heit ich- fer Junge unn Alde
am Waldfeschd vun d`Rietania die Preddicht g`schdalde
Mei Zeit in Rhodt geht die Woch jetzt zu End,
die Parrschdell ball dann in jingere Händ-
Mei Wegschdreck esch zu End jetzt- nach faschd 23 Johr!
So esch`s, ehr Leit- `s esch werklich wohr.
Heichschdens: ich mach ab und zu e bissel mool weirer
wammer als Ve`tretung mich braucht- so als Gaschdarbeiter.
Vielleicht gar beim neigschd Waldfeschd- als eier Gaschd?
Des deet ich nit uugern- des weer mer kä Laschd

Heit- wie kennt`s aach annerschd sei :
do sell de Weech- es Thema sei:
de Weech- es Wannre dorch die Zeit,
weil des wissen alle Leit:
daß mer bei uns gut Wannre kann,
Des wäß jed Kind unn Frää unn Mann
Unn daß mer debei als ve`schnaufe mool misse
des werd wohl aach en jerer wisse
Desweeche hot`s do in unserer Mitt
unser scheene Rietaniahitt
im Klausedäälche am Rand vum Wald,
wu`s uns immer wirrer g`fallt
Dort wu d Vechelcher peifen- unn mer d Kerch heit g`schdalde,
du dut mer gern beim Wannre halte:
So mancher liewe Gaschd macht Raschd
ruht aus vum Lewe seiner Haschd
unn find- des sell mer nit vegesse-
do was Gures se drinke unn se esse.
Unn des esch gut so unn esch wichtig.
Weil, was es Schbrichwoirt sacht esch richtig:
Daß Esse unn Trinke Leib unn Seel sammehalt
unn aach die Gemeinschaft lewendisch erhalt,
wammer an ääm Disch sich als sammesetzt,
minanner plaudert, minanner schwätzt

Doch heern mer heit nit bloß vum Raschde
unn Ruhe vum Lewe seine Laschde
so wichtig des esch, daß mer beim Hetze unn beim Renne
uns aach die needisch Ruh als genne
Desweeche esch jo de Sunndaach uns gewwe
daß mer nit s Ziel ve`fehlt im Leewe

Heit sell die Redd sei vum Wannre- de Weeche,
wu s Leewe uns fiehrt unn aach vum Seeche,
wu im Wannre liecht- als me Gleichnis fers Leewe
fer unser Hoffe, Liewe -Gläwe
Vum Weech unn vum Ziel, wu uns de Weech hii dut fiehre,
wu sich nit im Uugewisse -im Dunkel muß ve`liere

Daß mer nit `s Ziel aus de Ääche ve`liert
desweeche sinn bei uns die Weche markiert.
E Kreiz, ganz rot- en bloo-gääle Strich
dodraa oriendier ich mich.
Die Markierung dut em zeiche
wie mer kann es Ziel erreiche
So kammer dann e Stick weit sehe
wie de Weeg dut weirer gehe
Mer kann sich dodraa oriendiere
unn muß so nit de Weech ve`liere.
Wichtig daß mer bei seim Weech sich nit schnerrt
daß mer nit am End sich uhne Ausweech ve`errt

"Ich du wannre- off meim Weech wannle- ich du mich wannle"
dovuu sell die Predicht heit hannle

Grad jetzt in de Urlaubszeit
sinn Mensche unnerwechs- reisen oft ar`ch weit
Trotzdem- ich des saache muß
viel gehn aach im Urlaub gar nit gern ze Fuß
Doch gut, wer am Wannre zu Fuß hot sei Ergetze
alles annre kann des nit recht äm ersetze.
Iwwerall gebbts was se entdecke
am Rand vum Weech in alle Ecke:
Blumme- Käfer- Schmetterlinge
hunnertdausend kläne Dinge

Wannre war in friehrer Zeit
bsonnerschd was fer junge Leit
Handwerksborsche- unnerweechs als ware
in ehre "Lehr -unn Wanderjahre"
ob in de Nee- o weit entfernt:
Unnerwegs henn die gelernt
es Lewe kenne- ehr Ärwet - die Welt,
henn sich ve`dient e bissel Geld
henn Ärwet sich g`sucht, die Zeit nit ve`gammelt
Ehr Erfahrunge henn se so g`sammelt
Erschd denooch hot mer sich selbschdändig gemacht
E schänes Lied aus der Zeit uns saacht:
>>Auf, du junger Wandersmann,
jetzo kummt die Zeit heran,
die Wanderzeit, die bringt uns Freud. . . <<
Wer kennt des nit, ehr liewe Leit?
Doch heit, do esch manch Junger faul
wie en alder Schockelgaul

Unnerweg sei esch freilich nit bloß Vegnieche
Wer des behaupt, der deet glatt lieche
Schun ganze Gruppe und Velker - wie ner wisse
henn wandre - auswannre - aus ehrm Land als misse
-aus manchem trauriche schlimme Grund:
henn se erlebt e manchi schwere Stund
off ehre weite, weite Weeche
rer uugewisse Zukunft entgeeche
off fremme Weeche fremme Schdroße
Wie viel Volksschdämm henn misse ehr Heimat ve`losse
vun de große Völkerwand`rung aag`fange
-vor 15 hundert Johr rund- Unn unnergegange
sinn die Gote, Burgunder unn Vandale
trotz Rucksack- vepfleechung unn Sandale

Warum es so Wannrunge gewwe hot?
Getriwwe hot se de Hunger- die Not!
Ach, wie gern weer so mancher in de Heimat gebliwwe!
Aach henn Ferschde weeche ehrm Glääwe ehr Leit oft ve`triwwe.
So henn zum Beischbiel nooch viel harte Stunne
die Hugenotte aus Frankreich Heimat bei uns gfunne
Aach die Wallone aus Belgie, die henn als
Zuflucht g`sucht in uns're Palz
Mancher hot fer die Freiheit gekämpft un drum misse fliehe
aus polidischem Grund in e fremmes Land ziehe
Ausgewannert sinn viel von Deitschland weit fort
nooch Amerika, nooch Rumänie ann manch fremme Ort,
sinn um e nei Leewe dort aasefange
nooch Brasilie, ins Baltikum, nach Siedrußland gar gange,.
Die erschd Gen'ration hot dort meischd g`funne de Doot,
die neigschd die Not- die dritte ehr Brot
Wie gern weern se meischd in de Heimat gebliwwe!
Erschd recht aach die Flichtling, wu de Krieg hot ve'triwwe.

So unnerwechs se sei- macht's Herz em schwer:
so e Wannerschaft uhne Wiererkehr.

Doch meischdens hot- wer wills beschdreite
es Wannere aach sei gure Seite
So lang mer leewen, mer ruhlos uns find-
raschdlos unn wie getriwwe vum Wind
Es treibt em 's Wannre dorch die weit Welt
»Wie die Wolke dort wannre am himmlische Zelt. . .«
Wie Bäch unn Schdreem beschdännig dun fließe,
bis se sich endlich in' s Meer dun ergieße,
so sinn mer Mensche wann uns's Fernweh dut treiwe
daß mer nit ruhig dehääm mäh kann bleiwe:

Wannre dun so viel ganz gern
Es treibt unser Herz uns all in die Fern
wu ahnt: daß uns esch nit beschert
ä bleiwende Statt off dere Erd
E zukünftigi dun mer suche- e Ziel erschdrewe.
Nie sinn so ganz mer dehäm- im Leewe ,
weil die Uuruh uns schdeets treibt,
wie so mancher Dichter schreibt

Vun der Wanderschaft -en Seeche
esch die Bewegung- es Bewege
Bewegung, die dut-bekanntlich- not:
Stillstand esch bekanntlich-de Dod.
Aach wammer Ruh sich als manchmool derf genne
dun'er doch all es Sprichwort kenne:
>>Raschd' ich, so roschd' ich<<, unn des will saache
Es derf nit bloß bleiwe bei ruhige Daache.
Daß mer nit uutätig -ääfach seßhaft bloß - bleiwe
dozu will uns des Sprichwort aatreiwe.
Wer sich nit offmacht, den nennt mer "lahm"
Der esch im Grund aach schrecklich arm
Aach wann mer's nit immer gern dut heere .
Ruhe unn`s Uffebreche dun zsamme g'heere

Nadierlich esch nit alle Daach Sunneschei
Doch sollmer dodriwwer nicht traurig sei,
wann off de Wanderstrooß vum Lewe
nit alles geht glatt unn nit alles esch eewe.
Berg und Dal, Fräd und Leid,
die g`heern mit zum Wechsel vun de Zeit
Begeechnung und Abschied - Glick unn Schmerz,
die prägen en Mensch dief drin in seim Herz
Die dun was Wichtiges bedeite
-wer kennt des noch lang bestreite:
fer die inner Entwicklung vun unserem Leewe,
dun ganz entscheidende Impulse uns gewwe
Die dun uns voran im Reife bringe
daß unser Lewe kennt gelinge

Unn aach des esch wert, daß mer's bedenkt:
Als Wannerer bin ich vum Leewe b`schenkt
schun dodrin, daß ich nit allää muß oft wannre,
daß mein Weech ich geh in de Gemeinschaft mit annre

Mensche, wu mich kennen, mer helfe, mich schditze
unn nit -wie manch annre- mei Schwäche ausnitze
- Mensche, wu off meim Weech mich begleite
dorch gure unnd dorch schwere Zeite,
die werrn mer manchmal grad zum Seeche
So Mensche, wu mich begleiten off meine Wege,

Manch änner esch vun de Wannerschaft- wie die Biwwel lehrt
anners - als er esch fortgange- hämgekehrt
Schun's Volk Israel -vun de Knechtschaft befreit
-wu de Mose lange Johr hot durch die Wieschd als geleit-
des hot manch e Not unn manche G`fahre,
hot de Hunger, de Dorschd als misse erfahre
Mer wissen aach, wie de Mose ne gewwe hot
vun Gott offem Berg es gettlich Gebot,
daß mer dodra sich meecht halte,
noch em HerrGott seim Wille es Leewe g`schdalte
unn wie se henn derfe bei allem erfahre:
Gott dut mich leite -off meim Weech aach bewahre

Jesus -so schdehts im Neie Testament
wie jerer wäß, wu sei Biwwel kennt-
esch mit seinen Jinger viel unterwegs als gewest,
wie mer immer wirrer leest.
Als de große Wannrer war er bekannt
iwwerall im ganze Land
Er hot die Mensche in ehrm Leewe begleit
unn mit seim Wort dorchs Lewe geleit
Unn um als Mensch unnerd` Mensche ganz noh ne se sei
hat er mitne gedält als es Brod unn de Wei,
Hot aach- vum äänd Ort unnerweechs zem annre-
mit seine Gleichnisse und seine Rede beim Wannre
zu seim Volk und seine Jünger die gut Botschaft g`sacht,
damit mer's Leewe mit neiem Mut waacht
hot sei Wunner gedan- hot an ne so g`hannelt
daß sich es Leewe wunnerbar wannelt
Hot oft gutem Weech se mit seim Wort all gelenkt
Wie reich hat Er se debei doch b'schenktl
Und immer weiter und weiter sein Weg ER geht
bis zum Kreuz hii :Unn er saacht »Seht,
mer gehn jetzt bergnuff nooch Jerusalem.<<
-en Weech voll Leid unn uubequem
Viel leichter esch`s vum Kreiz se saache
als seiwer es Kreiz im Leewe se traache!!

ER dut -aach heit noch- durch die Zeite
in Seim Geischd aach uns begleite
unn wann Er uns lenkt unn fiehrt
unser Wech sich nit im Dunkel ve`liert


Zu redde esch zum Schluß aach vun glickliche Stunne
wu mancher hat bei seinre Wannerschaft gfunne.
Am Graberand sitze und die Wisse sich betrachte
oft die Blume dort in all ehrer Scheenheit se achte,
vom Berg rab ze schaue oder am weite Meer ze
schdehe
Was gebbts nit beim Wannre doch alles se sehe!

Im Blick off die ewige gettliche Welt
hot Jesus gar g`schbroche vun de Lilie offem Feld,
vun de Vechel als Gleichnis und de Ähre unn de Frucht,
wu mer sät- unn ernt unn nit vegeblich dann sucht,
damit mer sich trotz Not unn Sorche
bei seim Herr-Gott derf wisse getraache- geborche

Manch ääner blickt im Alter voll Frääd serick,
oft de Wannerschaft ehr Lewensglick!
Do wie er unnerweechs war mit de Freinde- mit annre
froh war- im Lewe unn aach beim Wannre
Doch so mancher wu heit fer deier Geld
rausfahrt um die halwe Welt,
um sich mool was ganz B`sonnres se genne,
der kann doch ke Ruh unn ke Glick dort fenne
Der bringt nit -wie er hofft- hääm e diefe Frääd
so'n Mensch- so denk ich- der dut em grad lääd
Viel b`suchen in Idalie 's Kolosseum in Rom
orrer de dortige Petersdom,
die Akropolis in Athen -orrer in Ägypteland
die Pyramide unn die Palme am Meeresschdrand
und rasen gehetzt durch die viele Musee -
und henn doch am End im Grund nix Recht's oft g'sehe.
Unn kehrt im Grund doch leer serick
Vegeßt: Es g'heert zum wahre Glück
daß mer an der Schäänheit vun de Schöpfung sich fräät.
Was zehlt esch nit die Menge, sich d'Qualideet:
des, was mer braucht unn was em gfallt

Da lob ich mer de Pälzer Wald
Die Bääm- so grien- unn Ruh unn Still'
-esch des nit, was mer braucht unn will?
"Wann ich fer mich die Wohret such,
find ich die nit imme schlaue Buch
Ich finde se, wann ich im Wald mich ergeh
denk dort nooch iwwers Leewe -iwwer des, was ich seh"
so saacht die kluge Klosterfraa
Teresa genennt- von Avila

Schließlich will alle Wanderschaft zu me Ziel higehe
nit sich als im Krääs bloß drehe
sondern meecht den Ziel-Punkt erreiche,
wu mit käm annre esch ze vegleiche:
wo mer Ruh unn Friede kann fenne
werd schließlich aach dehääm sei kenne.

Unn desweeche esch wichtig, sich se oriendiere
daß mer es Ziel nit aus de Ääche veliere
Des gelt fer's Wannre dorch Wald unn Flur
unn aach fers'Lewe - fer die menschlich Nadur:

Unn des wääß jed Kind: daß Gott sei Gebot
dem Volk Israel beim Seim Wannre einschd gewwe hot
Die "Zeh Gebote" als Regel fer's Leewe
fer unser Hannle, unser Streewe
als Weechweiser, an dem mer sich oriendiert
damit mer nit`s Ziel aus de Aache veŽliert.
Unn Jesus hat noch gsaacht: 'S deet sich erfille
in de Lieb zum Neigschde de gettliche Wille
Gut, wammer nit redd bloß vum Liewe
unn mer am Neichschde aach s 'Liewe dut iewe.
Des braucht doch grad, ehr liewe Leit-
en Mensch in unsrer heitisch Zeit
Daß mer des aus em Blick nit veliere deet,
des esch unser Wunsch unn unser Gebet:
Mit dem Gebet zum gure Schluß
mei Predicht schließe will unn muß:
Herr -Gott, weis uns fer unser Leewe die Weeche
Schenk uns doch all aach dein gettliche Seeche
Laß uns wannle in Ehrfurcht vor deim heilische Name.
'Heer uns doch all, Herr-Gott! Amen. Amen


Christus spricht: Wich bin der Weg, die Wahrheit und das Leben, niemand kommt zum Vater denn durch mich.«

TOP