Joel 3,1-2: Vun de Ausgießung vum Heilige Geischd
Vun de Ausgießung vum Heilige Geischd nooch Joel 3,1-2
mei letschdi Pingschdpreddicht am Be`llplatz unner de Keschdebääm (2004)
3 1 Ausgießung des heiligen Geistes
Und nach diesem will ich meinen Geist ausgießen über alles Fleisch, und eure Söhne und Töchter sollen weissagen, eure Alten sollen Träume haben, und eure Jünglinge sollen Gesichte sehen.2 Auch will ich zur selben Zeit über Knechte und Mägde meinen Geist ausgießen.
Zum letztschde Mool will fer Junge unn alte
die Kerch in Pälzisch ich heit g`schdalte,
am Be`llplatz in Rhodt heit beim Blierefeschd
Do, wu mer feiern mit unsre Gäschd
Heit dun de Kerch ehrn Geburtsdaach mer feire.
Mer bitten unsern Herrgott. Der kann se erneire
mit seim gure Geischd unn seinrer Kraft,
wu neies Leewe in uns schafft.
Wann lewendisch esch es Chrischdedum
-beweecht vum Evangelium-
wann en gure Geischd uns lenkt unn steiert
unn uns -unn mit uns- die Kerch erneiert,
dann esch des -ich saachs eich, ehr liewe Leit-,
en Grund echt, fer zem feire- erschd recht grad heit:
Unn wann off die gut biblisch Botschaft mer lausche,
dort wu d` Vechelcher peifen unn die Bääm dun rausche
do lesen mer bei Joel, dem alde Profet,
die Botschaft, wie se in de Biwwel drin schdeht.
Mer fennen se im erschde -im ald` Teschdament:
-wie jerer wäß, wu sei Biwwel kennt-
Off `s Ve`heißungswort bei Joel 3 do we`nn heit mer achte,
unn we`nn sei Botschaft minnanner betrachte
in unsrer Schbrooch, wu mool laut esch unn deftisch
unn manchmool ganz zart- unn immer als kräfdisch:
Mer we`nn unser Gedanke off des Biwwelwort lenke
unn minnanner in aller Schdill bedenke,
was des will saache- fer uns am Ort-
des alde profetisch Ve`heißungswort:
"Es kummt -so sacht eich Gott- die Zeit
daß ich will alle- alle Leit
-so esch mein heilischer gettlicher Wille -
mit meim gure Geischd erfille
Mein Geischd will ich -Gott- ball ausgieße
wie Wasser off derres Land werd fließe
off alles, was Mensch esch vun Fläsch unn Blut
-mein Geischd, wu macht sem Leewe Mut
Dann fangen e neies Leewe an:
Alde unn Junge - Frää unn Mann
Seehn unn Dechter waachen e klar` Wort-
zu de rechte Zeit unn am rechte Ort
En klare Durchblick dun se gewinne
E Richtung fer ehr Leewe finne.-
unn des wenn se aach alle annere zeiche
Mer kann`s nit länger in sich veschweige:
Die Alde - uhne Illusione- sunschd fer sich dehääm
sinn do voll gurer Hoffnungs-Drääm-
e Welt voll Friede dun se erschaue
Gerechtigkäät, wu dut offbaue
geeche alle Schlechtigkäät
e Welt wu voller Menschlichkäät:
aach fer die Mensche -wu gedrickt unn im Schatte
vegesse sinn sunschd vun de Reiche unn Satte
Mer ahnt e Schepfung, bewahrt unn geacht,
mit Fiersorg unn Ehrforcht unn Lieb betracht-
Mer ahnt e ve`antwortungsvoll - neies Hannle
so daß sich kann alles sem Gure hii wannle
"Iwwer Knechte unn Mägd zu dere Zeit
Gieß ich mein Geischd aus, off alle Leit:
off Alle Mensche in jerem Land
off Mann, Frää, Kind- in jerem Stand.
Wer arm esch- wer reich- wer groß esch unn wichtig
wer ve`gesse, unnerschätzt -wer geschätzt esch unn dichtisch
Dem schick ich mein Geischd- die gettlich Kraft
wu in de Welt es Gure schafft,
die gelt dem, wu alles im Leewe glickt
unn dem wu ganz weit an de Rand esch gedrickt:
Es soll känner uhne mein Geischd misse bleiwe
wu die Mensche zum Gure dut treiwe
Ich gieß aus mein Geischd off alle Leit
Die kummt -so saacht eich Gott- die Zeit"
Soweit des biblisch Ve`heißungswort
Unn wammer`s bedenken bei uns am Ort
will ich domit mool beginne,
daß mer uns off e Geschicht besinne,
wu ich nit in de Biwwel hebb gfunne.
Doch hebb ich se nit selwer erfunne
Um Pingschde dreht sich`s, was se bericht
Unn`s vezehlt uns die Geschicht
wie de Pfingschddaach war kumme, es Wochefeschd,
wu d` Ernt mer feiert mit seine Gäschd
unn mer gedenkt hot minanner an de gettliche Bund
vum Sinai in froher Rund
Mancher war vun weit, weit her geloffe
In Jerusalem hot mer sich getroffe.
vun fern unn nooh- aus Ost unn West
Auch die Freinde vun Jesus warn in der Stadt gewest.
in froher Rund bei Brot unn Wei
froh warn se gewest, bei`nander ze sei
voll Äänigkeit unn voller Seeche
Kä Liftche wollt am Himmel sich reeche
Friedlich warn se ve`sammelt -all an äm Disch
Se warn ganz friedlich unner sich.
Es hot kään Fremmer do se g`schdeert
-unn es hot aach känner zugeheert --
- wer hett se auch schon selle schddeere?
Wann känner off ehr Worte dut heere,
wie se ehr Erinnerunge henn offgefrischt
unn G`schichte vun Jesus se sich henn bericht
in ehrer Sprooch do beinanner am Disch
Känn Fremmer war debei; mer war unner sich -
Bloß geleechentlich, wammer die Fenschder offmacht
zum Lifte - hot mer e bissel mool drauß des betracht,
was sich do sich abschbielt in den Strooße um`s Haus .
Unn was sieht mer als do drauß?
Mensche aus aller Herren Länner
Fraue, Kinner -aach viel Männer
Mensche aus manch fremmem Land
Araber vum Wieschdesand
Elamiter unn die Meder
nit vegesse aach: die Kreter-
Mensche vun de Insle -vum Meeresstrand
Parter aus Mesopotamie, als Zwäästromland bekannt
Leit aus Kappadozie, aus Pontus am schwarze Meer
annre aus de Provinz Asie her
Mensche iwwer Mensche- Fraue Männer
-wie g`sagt - aus aller Herre Länner.
Unn die viele fremme Geschdalte
dun sich iwwer so manches unnerhalte
- manche aach iwwer Jesus und sei Leit.
"Mer heert nichts mäh vun denne - schun e ganzi Zeit
heert nix määh von der Sach. Die hot scheint `s sich erledigt.
Und so wechselt mer`s Thema - unn redd vun de Predicht
vum Rabi Jonatan am friehe Morche
redd aach von dem was noch esch zu besorche
geht weirer, ohne ewwes zu erleewe -
de Pingschddag, en Dag wie jerer annere eewe
...
Ich denk mer grad, ehre liewe Leit
ehr merken `s schun e ganzi Zeit:
Was mer in de Biwel lest
esch ganz annerschder gewest:
Was der Parre und do bericht
esch werklich e ganz annri G`schicht:
Weers so gewest zu dene Zeite,
do weern mer allegar noch Heide:
Unn hett mer Heide bleiwe misse,
do deet mer nix vum Glääwe wisse
unn wißten nix vum Chrischdedum
unn nix vum Evangelium
unn nix devuu, daß Gott uns liebt
unn will, daß d`Neichschdelieb mer iebt
De Pingschddag, en Dag wie jerer annere eewe
hett nix ze dun mit unserm Leewe.
Drum heern mer off des, was die Biwwel bericht
bei St. Lukas in seinre Aposchdelg`schicht
Wie de Gottesgeist erfillt hot `s ganze Haus
mit Feier und mit Sturmgebraus!
Des bringt de Jinger en frische Schwung
entfacht wie mit Feier: Begeischd`rung
ganz annerschd als wie in dere Zeit
wu mer sich frocht bloß: was denken die Leit?
Do bleibt mer nit länger bloß unner sich
mit uuvebindlich-fromme Sprich
Dut nit määh in de letschde Ecke
sich ve`berge, sich ve`schdecke
unn starre - als weer Karfreitaachd noch-
in e finschder, dunkles Loch
-wann Gott nooch seim heilische gettlicher Wille -
dut `d Mensche mit seim Geischd erfille!!
En frische Wind jetzt bei `de Chrischdeleit weht
unn all ehr Ängschdlichkeit ve`geht:
mer waacht sich mitte ins Gedränge
Mer traut sich rei in die Mensche-Menge-
zu de viele, wu sinn zum ErnteFest kumme-,
Unn die henn an dem Pingschde was ganz Neies ve`numme.
En jerer hot g`heert, die Jünger loowe
in Seinrer Sprooch- Im Geist von owwe-
wie se Gott henn fer Sei große Date gepriese-
fer Sei Lieb wu de HerrGott uns hot in Jesus erwiese
Unn doch hot nit jerermann kabiert
was do an Pingschde esch bassiert,
So mancher, der merkt nix vum Geischd aus Gott
- hot nix als Worte bloß voll Spott
"Die sinn bschdimmt voll vun sießem Wei
Des muß Drumänner Speetlees sei
Zwää, drei Schoppe hänn die ganz bschdimmt getankt-
orrer vier orrer fimfe- wann des nit langt-
Des esch en Rausch bloß- der macht se froh
Am nechschde Daach esch nix meeh d`vun do
Do simmer drin Fachleit. Mer kennt sich do aus
Do werd aach bschdimmt nix Rechtes draus
En Rausch, der macht erschd die Mensche froh
Do dann bleibt nix- denooch, do geht`s so:
Im Kopp kloppt dann der en große Hammer
Was bleibt, esch bloß de Katzejammer..!!!
E Loch im Hernn- e Vakuum
am End steht es Dilirium!
Do kammer -wie ehr- dumm Zeich bloß lalle
bis endlich mer ins Grab dut falle.."
Nir annerscherd als in unsrer Zeit
war`s also schun domools, ehr liewe Leit:
Manch en hot Pingschde aageschdeckt
hot Frääd unn Kraft in em geweckt
e neie Hoffnung- en neie Mut
e Ziel -en Sinn- fers Leewe gut
Unn doch hot mer de Chrischdeleit immer schun g`sacht
unn ne -ewig unn drei Daach lang- de Vorworf gemacht:
ehr Glaawe unn ehr ganze Schwung,
weer nix als bloß menschlich Begeischderung
unn uhne jeden ersichtliche Grund-
weer bloß e Sach fer e bsonnre Schdund,
wu dann im Alldaach schnell vegeht
grad wie e Blatt im Wind veweht:
en Rausch, e Schweebe off ner Wolk
Und Religion weer`s Opium halt vum Volk.
Wie gut, daß de Petrus es Wort do ergreift
Daß mer aach alles recht begreift:
Er rickt die Dinge flott zurecht:
Unn er macht sei Sach nit schlecht-
Er zeicht ne, daß er klar denke kann-
er Petrus, en ääfacher Fischersmann
Wu annre de Glaawe ziehn in de Dreck
do hot er`s Herz am rechte Fleck,
Ganz nichtern saacht er ne unn klar
so wie`s esch unn so wie`s war
Er kennt die Botschaft, wie in de Biwwel se steht
wu mer lesen bei Joel, dem alde Profet:
Unn hot die Botschaft frei unn schlicht
des Wort vun Chrischdus ne ausgericht:
Er erklärt ne wie menschlich Begeischderung-
wie`n frischer Wind, en frischer Schwung
wie des nit ääfach alles kann sei:
Pingschde esch nit so wie en Rausch vum Wei
Aach wann die Jinger beglickt- entzickt
wirken im Geischd, wu ne Gott selwer hot geschickt
"Mer sin nit bsoffe, liewe Leit-
So frieh am Morche- esch`s noch nit Zeit,
beduddelt in de Rausch se sinke-
Es esch noch lang nit Zeit sem Trinke
Wann Gott mer lowen mit Herz und Mund-
Des hot in Worhet kän annre Grund:
als daß jetzt esch g`schehe -bei uns unn heit:
was Gott uns hot zug`saacht vor langer Zeit
Unn was mer do bei Joel studiere,
dut de Petrus schlicht-ääfach -kommentiere-
daß jerer es veschdehe kann-
Alt unn Jung, Kind, Frää unn Mann:
"Gott steht fer des grad, was er hot ve`schbroche.
Noch nie hot ER sei Wort gebroche:
Iwwer Knecht`und Mägd zu der Zeit
Gieß ich mein Geischd aus ,-jetzt esch`s so weit
Wie Wasser off derres Land werd fließe:
Mein Geischd will ich -Gott- iwwer all ausgieße
iwwer alles, was lebt off dem Erderund
Unn fer alle sell gelte mein neier Bund
Daß Pingschde nit so esch wie en Rausch vum Wei
aach wie Begeischd`rung nit ääfach alles kann sei!
-des Wort, was do de Petrus dut waache
Ich denk, des hat aach uns heit was zu saache
Geeche alle Menschespott
sprecht der ve`ständlich vum Geischd aus Gott,
wu Alte und Junge will beschenke.
Große und Klänne will der lenke-
der Geist, wu d` Lieb esch unn die Kraft,
wu in uns es Gure schafft-
wu mit Freiheit uns beschenkt
unser Herz zem Friede hii lenkt
In aller Freiheit es Wort er waacht
unn de Mensche, was wohr esch, saacht:
"Wo ner eich auf den Geischd bsinne,
werd eier Leben wie neu beginne-.
Die Lieb vun Christus sich dann regt
de Mensche ehr Herz und Gewissen bewegt-
Vun all ehrm vewirrte, vekehrde Wese
kann aus dem Geischd die Welt genese
Gott will nit daß alles beim alte bloß bleibt:
Drum braucht`s en Glaabe, wu gure Frucht treibt
Es Evangelium will erneire unser Lewe
daß nei mer bschdimmen unser Streewe
Nit bleiwen daab, nit bleiwen stumm
wann mer heere offs Evangelium
unn ännre, was schlimm esch- mit unserm Hannle
so daß die Welt sich zum Gure kann wannle"
Unn drum mindt -es kann gar nit annerschd sei
die Predicht vum Petrus in sei Rufe ei,
umsekehre, umzedenke,
vum schlechte Weeg grad wegzeschwenke,
vum falsche Wech weg hii zum richt`ge ze gelange,
off gurem Weech nei aasefange:
Ich denk des zehlt -ehr liewe Leit-
aach fer uns unn jetzt unn heit:
Daß mer uns nit uhne Ausweg ve`renne
daß aus de Sackgasse mer en Ausgang fenne,
daß dodroff mer richten unser Strewe:
daß mer umkehrn zu Gott hii, umkehrn zem Lewe
weil Gott sein Heilger Geischd uns treibt
unn nit alles bloß ääfach beim alte bleibt
Drum esch`s, daß so zem gure End
de Petrus sich an ehr Gerwisse wend`t
"Ehr Brierer unn Schwestre, kehrn doch um
unn gläwen em Evangelium."
Dreidausend Leit sind do in sich gange
henn ehr Lebe nei aag`fange,
weil Gott sein gurer Heil`ger Geischd
hot ehr Herz aus Stää erreicht.
Dief im Herz drin dun se spiere
Gott will uns so im Leewe fiehre,
daß es nit uhne Richdung muß treiwe
nit uhne Sinn unn Ziel muß bleiwe.-
Die Lieb vun Christus werd in uns sich rege
will Herz und Gewisse in uns bewege-
Es esch nit d`eigne Kraft unn Schwung
nit `s Feier vun d` eigne Begeisterung
-`s esch gleichsam e heilisch` Feier vun owwe -
nit vun d` Mensche - von Gott: vun drowwe
Unn wie`n zarter Wachsdumsreeche
esch`s wann sein Geischt uns dut beweche
Meecht doch bei uns der Geischd uns schenke,
daß mer nit an uns selber bloß denke,
-Meecht doch auch bei uns so en helle Schei
so e Licht in uns aufgehe, ins Herz uns rei
Meecht so en Himmelsschdurm die Welt ve`wandle
e HimmelsKraft -aach durch unser Handle-
daß mer sich mieht um `s rechte Veschdehe
daß mer Schritte zum Friede hii gehe
Es mißten vun domols die Wunner nit sei
Hauptsach, der Geischd kummt aach heit in uns rei,
wu in uns wirkt e neies Ve`schdehe
daß mer die Weeche, wu gud sinn, dun gehe
daß mer, was recht esch, nit länger ve`schweige
daß mer des suche, entdecke unn zeige
En klare Durchblick mer so gewinnt
E Richtung gut fer `s Leewe findīt.
unn Junge unn Alte mit Hoffnungs-Drääm-schaue
wie d`Gerechtigkeit dut e FriedensWelt baue
Wann so Jesu Geischd meecht wirkte fort-
heit unn bei jedem - an jedem Ort,
was kennt des fer e Pingschde sei?!-
So stimmt mit mir in die Bitt`drum ei:
"Du Geischd, wu Liebe esch, wu zu de Wohret uns lenkt,
so daß mer nit an sich selwer bloß denkt-
wu uns helft, recht unser Schritte se gehe
du Geischd vum Friede - wu klar uns helft sehe-
Kumm doch zu uns, du Geischd voller Leewe
Kumm aach zu uns, mach nei unser Schdreewe
Kumm zu uns in`s Leewe, ins alldäägliche Hannle
Kumm aach zu uns -unn du uns ve`wannnle!"
