Es schlaacht mei Herz glei heicher als,
wanns hääßt, daß in de klänne Palz-
do weer bis heit noch- schää unn sieß
e klännes Stick vom Paradies:
Unn des werd in unsre Breite
kaum e Menschekind beschdreite:
wu d` Äppel wachsen, Beere, Keschde
wu de Wei geroot offs allerbeschde-
wu wachsen die schänste Kerschebääm-
schänner als in de beschde Trääm-
unn Erbse, Bohne, Sparchle, Wersching,
Quetsche, Feige, Mannle, Persching
wu die Bääm sinn dick all- groß unn bräät
unn bringen prima Qualidäd
Fricht, so sieß die dun dort reife
so daß mer grad meecht denooch greife:
dort leewen aach Mensche voll Schwung unn Kraft
dort steht es Leewe voll im Saft
in unserm Land mit große Wälder
dem Land mit viele bunte Felder

Unn doch- des kann kän Mensch beschdreite:
so war es nit zu alle Zeite!
Am Aafang, ich saach`s eich, ehr liewe Leit,
ganz am Aafang- vor de Zeit-
bevor de HerrGott Himmel unn Erd hot gemacht,
do war`s noch nix mit dere Pracht;
kä Plänzel, kä Straicher- unn kä Wälder,
kä Bäch, kä Flißcher, aach kä Felder,
Do war nix do vun all dem Seeche:
Kä Sunn war do unn aach kän Reeche
Unn aach kän Mensch fer de Erdborm se pfleeche
fer Planze unn Diere se ve`sorche unn heeche:

Doch dann- wie de HerrGott die Erd hot gemacht-
wu mer bewunnert in all ehrer Pracht,
do hot er s` Erdreich selwer begosse,
weil Wasser aus de Quell esch g`flosse
So dut`s in unsre Biwel drin schdehe
wie jerer Mensch kann leicht aach sehe:
Im zwääte Kabiddel - Buch Genesis
im erschde Buch Mose- ich mach kää Schbrich
Dort kann vum Paradies mer lese
wie der HerrGott hot erschaffe e menschlich Wese

Glei zwäämool -des will ich nit veheele-
dut uns die Biwwel des vezehle,
Ich denk, s`esch beschdimmt nit uhne Grund:
Es dut en Mensch in mancher Stund
-zum Beischbiel aach beim Trinke unn Esse-
sein Herrgott allzeschnell vegesse
unn esch allää in seinre Frääd
unn aach allää im Herzelääd

Schun im erschde Kabiddel werd uns ve`meldt:
Gott esch de Schepfer vun de Welt
Geeche alle Chaos-Macht
hot er alles gut gemacht
unn Sunn, Mond unn Stern- wie die Biwwel uns lehrt-
hot unser Gott als Licht uns b`schert
Dort wu mer`s Gottesvolk ve`lacht
hänn d` Mensche als gettlich Wese betracht
Sunn, Mond unn Sterne - die als gettlich ve`ehrt
unn so lebt mer grundveŽkehrt-
-So war`s zumindeschd ehr liewe Leit,
bei de Leit vun Babel, zu dere Zeit
Bloß weil die de Kriech gewunne-
hot mer sei Schbottlied sich dort ersunne,
froocht den, wu trauert: "Wu esch dann dein Gott??"
Macht Gott und`s Glaawe mit zu Schbott-
Sunn Mond unn Stern in ehrer Pracht,
die sinn sei Geschepf bloß- vun Gott gemacht
Der hot sei Frääd an dem, was gut
unn Gott am siebte Daach dann ruht
Wie ER mit Lieb sei Werk betracht
esch`s gut fer de Mensch, daß der Pause aach macht
unn aach vun seim Werkle unn Schaffe ruht.
Des braucht en Mensch- des dut em gut:
daß es Leewe -uhne Frooch-
mehr doch weer als Mieh unn Plooch
unn mer nit bloß schafft unn rennt.
Gott uns Ruh unn Friede gennt.

Im zwätte Kabiddel- de älder G`schicht
do werd aus der Perschbektiv bericht,
wu kummt aus de alt` Schdeppe- unn Wieschde-Zeit,
wu Wasser koschdbar esch bis heit-
Wasser, wu aus de Quell sich ergießt,
wu d` Erdbor`m fruchtbar macht, wann `s fließt
Die vezehlt mit großer Begeischderung
unn voll Elan unn voller Schwung,
wie do en Strom sich iwwers Land ergießt
unn in vier Arme es Land dorchfließt
unn wie devor de Herrgott sich hot g`saacht:
Was fehlt, des sinn Mensche: die wern jetzt gemacht
Aus de Ackerscholl sell de Mensch entschdehe:
en Menschkind, wu dut offrecht gehe-
mi`me Kopp fer se denke- mit Herz unn Hand
me gut Gemiet unn mit Ve`stand.-
Des weer fer mich mei Frääd unn Spaß:
ich bloߎem de Lewensodem in die Nas,
so daß er dann voll Saft unn Kraft
in meim Sinn was Rechtes schafft.-
Dem schenk ich im Schatte vun große Bääm,
-e Leewe wie in de schänschde Trääm-
Bääm enner schänner als de annre- mit Fricht gut se esse,
damit der sein Herrgott nit sell vegesse:

Zwä bsonnere Bääm in seinre Mitt warn gewest
-wie jerer wäß, wu sei Biwwel lest-
De Bääm vum Leewe- mit sießer Frucht,
wie weit unn breit mer lang se sucht
unn noch en annre- unn des muß mer wisse:
Des war de Bääm vun dem Gewisse:
an dem mer lernt fer alle Zeite,
was gut esch, was bees esch se unnerscheide
unn beides in de Griff se griege
unn iwwer beides se vefiege.-

So war es Leewe voll Frääd unn Glick
im Paradies, dem Gaardeschdick,
vum große Fluß dort mit frisch Wasser ve`sorgt-
Den Gaarde hot de Herr- Gott gelehnt, geborgt-
dem Mensch, damit der `n bewahrt - bewacht-
ne bepläntzelt, ne schitzt- mit Ve`schdand unn Bedacht.
D en Garde - die Erd- soll de Mensch gut pfleeche-
mit Lieb se umsorche unn umheeche,
dozu hot dem Mensch Gott die Erd aavetraut-
daß der se bewahrt unn mit Sorgfalt bebaut-

Off den Satz kummt mer`s aa- off den wemmer sehe-
damit mer den aach recht ve`schdehe-
Was sonschd noch unser Text vemeld:
iwwer d`Schepfung vun de Welt:
mit de Vechelcher do unnerm Himmel,
unn Diere aller Art- es ganze Gewimmel-
unn wie alles was krawwelt -fliecht unn rennt-
de Mensch mit Name hot genennt-
weil der was sucht, wu gut zu`m baßt
unn wie der nit`s ganze Glick hot erfaßt
-obwohl`s doch war es Paradies
mit Fricht so saftich unn so sieß-
Und fiehlt im Grund sich ganz allää-
so lang er nit aach hot sei Frää:
Des wemmer annermool betrachte

Heit wenn mer bloß des äänd beachte:
Gott dut die Erd uns aavetraue-
daß mer se bewahr`n- mit Sorgfalt bebaue-

Wann unser Glaube uns also saacht
"Gott hot die Welt uns gut gemacht"
Do kann des nit uhne Folge bleiwe.
Dann will des uns zum Hannle treiwe
Daß mer geeche d`Uuvenunft, wu am End alles ze`schdeert
sich nooch Kräfte eewe wehrt

So hemmer uns -wie viele- g`saacht
unn dobei was ganz Besonnres gewaacht:
Weil mer d` Schepfung muß ääfach schitze
drum esch`s so, daß meer ausnitze
vun unsre Sunn die Schdrahlekraft,
wu sauwre Energie uns schafft
uhne alle Emissione,
was die Schepfung drum dut schone.
Dodrum also dut sich`s hannle,
da d` Schdrahle in elektrisch Strom sich wannle
mit Hilf vun Silicium- des esch Es-I-O-zwei
wu esch in Kies unn Sand debei.
Des bloe Zeigs do offem Dach
-unn des esch schlichtweg e klori Sach:
des machd uns Strom do - recht unn gut,
wann als die Sunn droff scheine dut.

Unn was nit schlecht esch- ich saachs glei dezu:
gschbonsert hots uns die DBU-
die Deitsch Bundes- Schdiftung ferd Umwelt.
hot beig`schdeiert faschd es halwe Geld
Unn ich sach dezu unn du mich nit schemme:
die Palzwerke dun uns den Schdrom do abnemme
-unn des off e ganz ehrlich Weis-
unn zahlen uns en färe Preis
Des Umweltminischderium sei doofor gepriese,
des hot do mit seim G`setz gewiese
en Weech, wie mer die Umwelt schitzt
unn doobei aach sei Finanze schditzt,
Die Sach sich werklich ball rendiert
hot in acht Johr schon voll sich finanziert.
Dann -denoch- macht die Gewinn.
Ich hebb gedenkt: Ich drääm- ich schbinn:
E gure Daat, wu sich rendiert?
obwohl mer nit droff schbekuliert?

Kä Sach, wu Schmuh esch, owwerfaul-
nit so wie en Trojanergaul,
bei dem so manches esch ve`schdeckt,
wu mer am End ze schbeet entdeckt,
unn wu em dann raubt de Schloof, die Ruh
` s geht alles mit rechte Dinge zu!

Doch ään Perdfuß war draa an dere Sach:
Es Problem, des war unser Parrscheierdach-
des - loßt de Gemännerat vemelde-,
des deet als Denkmool pletzlich gelte,
alt esch des noch kä halb Johrhunnert
so denkt ich mer so ganz ve`wunnert-

Beinoh hett mer ghabt drum de greeschde Krach
iwwer do des "Denkmools-Dach",
wu mer nit kann dofor nitze,
daß mer derft die Umwelt schitze.

Mer sell die schitze in unserm Land
vor ökologischem Uuveschdand-
Do muß mer haue off de Butz:
Die Schepfung braucht so en Denkmoolschutz
Mer sell die schitze mit Veschdand
nit schitze vor`m Ve`schand es Land.
Wer will- ganz ehrlich- werklich wohne
in e venunftfrei Denkmoolzone!?!
Des weer jo werklich ganz iwwerzwersch!
Zum Glick hemmer noch unser Eesemer Kerch-
aach mi`me Sieedach, wu dofor was nitzt
Unn wie der Gedanke esch offgeblitzt
hot der bei alle gfunne Gfalle
uhne Ausnahm- werklich alle
bei de Fraue unn Männer vum Presbyterium
unn känner esch do, wu uns kummt dumm-
unn aach die Leit vun de DBU
die dun des Ihre mit dezu-
uhne alle Komplikatione.
Was dut des die Nerve schone!

Unn drum hemm mer in Eesem jetzt sozesaache
-ich du des Wort mool ääfach waache
so `was wie e nei Denkmool jetzt erricht,
wu uns vemeldt und uns bericht:
Die Umwelt - die geheert geschitzt.
wu aach ganz praktisch zu was nitzt
Enne vun dene Photovoltaik-Demonschdrationsaalache,
wu zum Offmerke unn zem Bsinne dun beitraache
unn bringen soviel Schdrom aach wie e klää Familie als braucht
Mer sieht, daß werklich die Sach zu was daucht.

Drum sach heit ich "danke!" de Leit vun de DBU
fer ehrn Beitraach do dezu
- em Minischderium wu dut beschdärke
die Palzwerke aach zu gure Werke
- saach Dank vum Presbyterium unsre Leit
wu mich unnerschditzt henn die ganz` Zeit
daß mer Ve`antwortung ferd`Schepfung so demonschdriert
unn daß die Sach sich aach rentiert
- Unn nit zeletschd dem "Pischder`s Armin", wu die hot gebaut
-so wie mer` s ihm hot zugetraut-
Unn weil die Sach gut funktioniert
do gheert em dofor gratuliert!

Mei Wunsch fer ihn unn mich- der weer, ze schaue,
daß mer deet noch viel annre baue
mit dem bloe Zeichs was d`Umwelt schont
-was sich werklich ball schun lohnt

Ach hett mer iwwerall im Land
soviel ökologischer Sachve`schdand!
Fer kinftische Daache, fer die kummende Zeit
esch des mein großer Wunsch, ehr Leit!
Ich bin am End- mach domit Schluß
Länger zu redde, des bringt bloß Vedruß
Was ich will saache hot wohl jerer kabiert.
Zeit esch`s, daß mer s ausprowiert.
Wie`s Schprichwort saachd: Es duts Prowiere
määh dauche als bloß es Schdudiere.

Unser Glaube, der braucht doch Hand unn Fuß
Des esch mein letzschder Satz zum Schluß
-des esch mein letzschder Satz am End:
braucht Kopp unn Veschdand, Herz- Fuß unn Händ!

Mecht mit Kopp unn Herz unn mit Ve`schdand
-iwwerall- im ganze Land
so sich unser Erd vewannle
mit Gottes Hilf- durch unser Hannle-!
Meecht de Friede vun Gott - aus Gottes Hand
bewahre uns unn unser Land!
So sell es sei- in Jesus seim Namen.
Drum saach ich: Amen, Amen. Amen
 

TOP