Die Speisung mit Wachteln und Manna:(2.Mose 16,1-4),

eine Geschichte von Not und Rettung- von Hunger und Aufbegehren und Verklären der Vergangenheit. aber auch der Grunderfahrung des Glaubens: die Zeichen, daß Gott mit auf dem Weg ist, können so unauffällig sein wie das Manna. Keiner kann Gott den Plan seines Handelns vorschreiben. Wer zu glauben versucht, findet kein Patentrezept für sein Leben und seinen Glauben. -

Erfahrungen von Gottes Treue und Nähe sind sehr verschiedenartig, vielfältig, bunt, gewiß auch irgendwo widersprüchlich.

Menschen der verschiedenen Zeitepochen haben gelernt, Brüche in ihrer eigenen Lebensgeschichte anzunehmen und doch an Gottes Wegen nicht irre zu werden. Die Bibel beschreibt sie bei einzelnen Personen wie z. B. Hiob oder Jeremia oder Paulus und natürlich auch in vielen Psalmen. Bis heute wissen Menschen immer wieder eindrucksvoll davon zu erzählen.

Diese Erfahrungen, so bunt sie auch sein mögen, haben eines gemeinsam: wo Menschen auf den Sinnzusammenhang des Lebens vertrauen, bekommen sie neuen Lebenmut, lernen den Weg zu gehen, der ihr Lebensweg ist: und so anzunehmen, was ihnen zu tragen aufgegeben ist- zu ändern, was gebessert werden kann und soll und die Weisheit zwischen dem beiden zu unterscheiden

2.Mose 16,1-4, Speisung mit Wachteln und Manna

1 Von Elim zogen sie aus, und die ganze Gemeinde der Israeliten kam in die Wüste Sin, die zwischen Elim und Sinai liegt, am fünfzehnten Tage des zweiten Monats, nachdem sie von Ägypten ausgezogen waren.

2 Und es murrte die ganze Gemeinde der Israeliten wider Mose und Aaron in der Wüste.

3 Und sie sprachen: Wollte Gott, wir wären in Ägypten gestorben durch des HERRN Hand, als wir bei den Fleischtöpfen saßen und hatten Brot die Fülle zu essen. Denn ihr habt uns dazu herausgeführt in diese Wüste, daß ihr diese ganze Gemeinde an Hunger sterben laßt.

4 Da sprach der HERR zu Mose: Siehe, ich will euch Brot vom Himmel regnen lassen, und das Volk soll hinausgehen und täglich sammeln, was es für den Tag bedarf, daß ich's prüfe, ob es in meinem Gesetz wandle oder nicht.


Im Klause-eck im Vorrerwald,
wu`s uns- unn viel Leit -so gut als g`fallt
dort, wu es hot in unserer Mitt
unser scheene Rietaniahitt,
wie jed Kind wäß unn Frää unn Mann
unn wu mer beim Wannre gut Raschde kann:
Dort dun mer heit fer junge unn alde
d` Kerch off Pälzisch werrer g`schdalde
Dort dun mer heere offs gettliche Wort
an dem schääne Fleckche, dem gure Ort
wu`d Vechelcher peifen- unn die Bääm dun rausche
Unn wann off die biblische Botschaft mer lausche,
do wemmer uns off de Weech heit besinne
unn so die Predicht mit beginne-
Was de Weech uns bedeit, des wemmer betrachte
Weil off de Weech, do muß mer achte:
En Weech, was des esch, werd jerer wisse
Mer werd`s nit noch lang erschd erkäre misse:
En jerer wäß des, wu nit grad pennt
-erschd recht wanner`s Wannre sei Steckeperd nennt:
Der Weech drum e hilfreich Bild esch fer`s Leewe
fer des, was mer hoffen unn erschdreewe
Dut jerer doch sein Weech als gehe
sein eigne Weech vor d`Ääche sehe
Unn- ob mer jung sinn orrer alt-:
Vielfäldisch sinn unser Weeche ehr Gschdalt: 
Es lohnt sich, mool dem noochzespiere:
Was fer en Weech dut es Lewe mich fiehre?
Manchmool esch der doch so, daß er Kummer uns macht.
Manchmool so, daß mer froh esch unn lacht
Manchmool geht` s steil bergnuff, unn des koschd Kraft
mer wäß nit, ob mer des noch schafft.
Manchmool blick mer rab vun steilem Hang,
do werd`s em grad schier angschd unn bang
Manchmool esch unser Weg im Leewe
leicht unn grad- uubeschwert, eewe,
mer geht ne leicht unn froh-beschwingt
mer fräät sich draa, mer lacht unn singt.
Und dann esch`s wirrer so daß er im Dunkel sich ve`liert,
wißt gern wuhii de neigschde Schritt fiehrt,
unn esch voll Träne- kann bloß noch klage
suchen en Mensch, fer sei Herzlääd se saache.
Off manchem Weg, do fiehlt mer sich gut
e gure G`sellschaft, die macht em Mut.
Off manchem Weech, do vegeht em es Lache
Mancher Weech, der dut einsam uns mache
Off manchem Weg esch sicher mei Schritt
do wäß mer, wu`s langgeht -do esch feschd unser Tritt,
Do sinn ve`läßliche Wegweiser zum Orientiere.
Do muß mer nit`s Ziel aus de Ääche veliere
Offf manchem Weg meecht -wanns geht -mer umdrehe,
am liebschde nochmools ganz vun vorn aa ne gehe
den Weg entdecke, wu zum Ziel uns hiifiehrt.
wu nit sich ziellos im Dunkel ve`liert
Unn des esch aach wichtig, daß mer sich kann oriendiere
unn nit `s Ziel muß aus de Ääche veliere.
Dofor hot`s d`Markierungzeiche
daß mer kann sei Ziel erreiche:
Des gelt fer's Wannre dorch Wald unn Flur
unn genauso fer`s Lewe - fer die menschlich Nadur:
Mer brauchen gure Wegweiser, um den Weech se sehe
Mer brauchen die Kraft, ne aach se gehe.
Mer brauchen Gott Sei Wort unn sei Geleit,
Mer brauchen aach Mensche an de Seit,
wu uns bestärke unn uns schditze
unn nit wie annre unser Schwäche ausnitze
Unn des gelt- ehr liewe Leit-
in gurer wie in schwerer Zeit
Manchmol hat`s Leewe -´s esch nit se beschdreite-
nit bloß schääne- aach wieschde Zeite:
Mit Dorschdstrecke- wu en Mensch dun queele
Weil so manches em dut fehle
was em sunschd helft neie Kräft als se fenne
- mit neiem Schwung nei se beginne:
So war `s aach schun vor vielhunnert Johr
lang, lang vor unsrer Zeit devor
als d`Israelite sellmools dorch viel G´fahre
off ehr`m Weech dorch die Wieschd als ware -
Kaum daß die Freiheit war gewunne
Kaum daß mer aus d`Ägypter ehre Sklaverei war entrunne
do hot se de Hunger unn große Not
off ehr`m Weg dorch`s Wieschde-Land bedroht
Es war e schwere, harte Zeit
wie de Hunger unn de Dorschd se hot begleit`.
Unn wann em do de Maage knurrt
-de Dorschd em queelt- do werrt gemurrt-
do werd gemeitert- `s werd revoldiert-
wann Hunger unn de Dorschd in die Vezweiflung nei fiehrt:
Unn wammer vieles muß entbehre
fangt leicht mer aa aach se vekläre
die alt -bekannt Vegangenheit
-aach wann die war kä gure Zeit-
So jedenfalls esch es aach domols gewest-
so heert mer`s wammer sei Biwwel lest
Do denkt mer voll Sehnsucht -wie bekannt
ann die "Flääschtepp vun Ägypteland".
So schdeht`s im zwätte Buch Mose- Buch EXODUS
-so häßt`s off gut Ladein- ich redd kenn Schduß
Im 16. Kabidel kann mer dort fenne
die G`schicht, off die mer uns heit b`sinne
Wie durch e Wunner, wu kummt vun Gott
warn d` Israeliten in Ägypte entflohe de Not,
henn se off de Weg vun de Freiheit sich begewwe.
Daß in Freiheit mer kennt leewe
und sinn de Ve`folger, dem Pharao entrunne-
Unn als ehr Freiheit se hänn g`wunne
hot d` Mose dorch die Wieschd se gefiehrt,
wu mer de Weech so leicht ve´liert
Doch: Staune, Frääd unn Dankbarkeit -
esch alles ball` Ve`gangenheit.
Und wann in de Wieschd mer dut rumerre
dut`s de Sinn em ball vewerre-
Ob mer d rechte Weeg werd g´fiert
wu nit im Dunkel sich ve´liert?
Des zum Beispiel sinn die Froche
wu in de Wieschd en Mensch dun plooche
-wie in alder Vegangenheit
so aach heit in unser Zeit,
wann e klares Ziel vemisse
uhne Lichtblick mer irre misse
uhne Perspektive gehe
uhne endlich Land se sehe
wu mer kann se Ruh aach fenne
vun dem Hetze, Jage, Renne.-
Des esch jo schlichtweg nit se beschdreite
daß es sinn ganz schwere Zeite
wammer sich im Kräs dut drehe
unn ke rechtes Ziel kann sehe
bei dem Weech, wu unser Leewe
määnt unn unser Suche, Schdreewe
Und schun glei guckt mer zerick
-als weer die grad es reinschde Glick-
unn grad voll vun de schenschde Stunne
off die Zeit, wu iwwerwunne
in die alt Ve`gangenheit.
Unn die alte schlimme Zeit
dud in hellschdem Licht mer sehe
daß mer`s faschd nit kann ve`schdehe
De Mensch - wann er dodroff esch vesesse
esch Welt-Mäschder scheint`s im Verdränge - Ve`gesse
Unn wie off die scheinbar golden Zeit mer sich b`sinnt
es große Hadre, die bitter Aaklag beginnt
wie in unsrer Geschicht, wu d`Mensche stehne
unn nach de alde Zeite sich sehne
Jetzert wu ne de Maache knurrt
do werd revoldiert- gemurrt
unn was schellen se die Leit
in der beese schlimme Zeit
Nadierlich dut se de Hunger schrecke
große Ängschd in ne erwecke
Geweche esch all die Begeischderung
off die folgt e großi Ernichterung
so als weer mer in de Nacht
aus de Drääm uusanft erwacht
Voll Sehnsucht guckt ve`klärt mer zerick
Unn werklich esch`s e starkes Stick,
was es Volk mit Junge unn Alde
dut dem Mose unn em Aaron im Zorn vorhalte:
Do in dene Hunger-stunne
sinn die Schuldige schnell g`funne:
Mose und Aaron gege die werd räsonniert:
"Ehr henn uns aus Ägypte gfiehrt-
henn berufe eich of Gott..
Awwer was esch? Nix als Hunger unn Not:
In de Wieschd- do missen mer all ve`derwe
missen vedorschde - vor Hunger schderwe
Hetten ehr doch nit in die Wieschd nei uns gfiehrt!
Dorthii, wu unser Schbur sich ve´liert
Ehr lossen uns all do ve`derwe
lossen unser ganz Sippschaft am Hunger sterwe!"
Des äne henn se nit vegesse:
frieher, do war immer wennigschdens satt se esse
So drämt mer jetzt in der groß Not
vun Tepp voll Flääsch dort unn vun Brot.
Wie e Krankheit ferd`Mensche- fer jung unn alt
so esch` s, wann d` Zweifel unn Uuglaub äm so iwwerfallt:
Do ve`gleicht mer sich mit de annre ehrm Wohlergehe
unn dut so ehr Glick unn Erfolge bloß sehe
sieht nit ehrn Kummer, ehr Gebreche
unn sieht bloß bei sich selwer die Probleme unn Schwäche
Unn sogleich - wie nit se beschdreide-
dut mer `n annre schnell beneide
Orrer der Mensch vergleicht die jetzig Zeit
zu gern als mit de Ve`gangenheit.
Alles dut mer retouschiere
wammer so dut räsonniere
d`Phandasie jetzt alles ve`klärt
zu `me Leewe uubeschwert
dut "die gut alt Zeit" so roffbeschweere
daß mer`s ball nimmi kann heere
Unn off des Gekreisch unn Murre
weil ne dut de Maache knurre
dun Mose und Aaron schweige - betroffe
unn dun doch noch immer hoffe
Des GottesVolk off alle Fäll
des kummt -o armes Israel -
so schnell nit aus de Wieschd määh raus
Aach wannes Schrecke esch unn Graus
und es ahnt nit, unn es kann`s nit wisse:
daß es den Weg 40 Johr lang werd gehe misse.
Esch des e Geschicht bloß aus alder Zeit?
aus rer ferne, ferne Ve`gangenheit?
Wu sich um annre Mensche dreht?
unn uns im Grund heit nix aageht?
Nadierlich kann mer`s aach so betrachte
unn se nit weirer mäh beachte
Mer kann aach trefflich do moralisiere,
wann die Geschicht mer do schdudiere
kann mi`m Finger zeiche off annre Leit
wie die ve`saachen in ehrer Zeit
- in alde unn in heit´ge Daache
Doch will die alt G´schicht uns ewwes anneres saache:
Im Grund henn se biete die alde Geschichte
wie se die Biwwel uns dut berichte
weit meh` als bloß Gedanke, wu offs Vordergrindige dränge,
wu bleiwen an de Owwerfläch bloß hänge.
`s geht drin um fundamendale Lebensfrooche,
um des, wumit mer uns dun plooche
So esch`s aach do- in dere G`schicht,
wu die Biwwel uns bericht
Des Wort, wu in de Biwwel mer leese
zeigt uns Grundmuschder uns off vum menschliche Wese
So saach ich`s mi`me theologische Satz:
Unn desweche hot aach die G`schicht do ehrn Platz
dort wu`s Gottesvolk dut sein Glaawe bekenne
unn dut Gott sein Befreier nenne
wann`s ve`zehlt vum Auszug aus Ägypteland,
vun Gott seim Geleit -sei gure Hand
wie`s Gottesvolk - er werr`n des wisse-
hot nit in der Wieschd do ve`hungre misse.
Weil se henn in den schwere Stunne
Manna und Wachtle als Nahrung g`funne
Unn mer hot kenne iwwerleewe
mit Wachtle unn mit Manna eewe
Des alles esch -als Himmels-Brot,
wu do wendt so manchi Not,
unn als reinschde Himmels-Schbeis-
kumme im Grund off nadierliche Weis
Unn doch en Grund se danke seim Gott,
daß gewendt esch die groß Not:
Des Wunner werd nit klänner- so denk ich meer
wann ich dozu die Erklärunge heer,
wu uns Mensche vun heit beschafft
vun de Nadur die Wissenschaft,
Daß mer des gut kann im Grund erkläre,
dogeeche muß mer sich nit wehre:
ZugVechel wu vun weit, weit her
fliechen bis heit iwwers weite Meer
die kann mer leicht fange - kann in Schare se krieche
wann se erschepft iwwer de Sinai flieche
unn suchen offem Erdbor`m Ruh unn Schatte
ruhn sich aus vun ehr`m Flug, wu se erschepft- loßt ermatte,
So daß mer Wachtle mit bloße Händ
bis heit so sogar noch fange kennt
Unn`s Manna, wu wendt so manchi Not
als weer`s es reinschde Himmelsbrot
wu do helft zu neier Kraft
kummt im Grund vun Schildlais unn de Planze ehr`n Saft,
wu mer Manna-Tamariske nennt
unn wu mer bis heit noch kennt
Aus de Zweige die Schildlaus sich de Saft als saugt-
was bis heit -wann se`s ausscheidt - als Nahrung noch daucht
in weißlich-gele Kigelcher- wu die Nacht
wanns abkielt als hot hart gemacht;
Lest mer die off vom Erdbo`rm frieh am Morche
dann sinn zu End so manche Sorche:
Kä Wunner- so was loßt mer nit vegammle
so was dut mer fleißig sammle:
Weil so `n eigedrickelter Planzesaft
der macht stark unn gebbt em Kraft
macht em stark unn macht em munner
So was wie Manna esch bis heit wie e Wunner-
Esch noch heitzedags de Beduine ehr däglich Brot
wu do wend so manchi Not
Des alles ve`liert gar nix an Wert,
wammer es so ganz nadierlich erklärt
Es Wunner werd -ehr Fraue unn Männer-
domit kä winzig bissel klänner
Was mer kann ganz nadierlich erkläre
braucht mer nit weniger voll Staune ve`ehre
Wammer beischbielsweis unnerm Mikroskop mool betrachte
was mer sunschd selten dun beachte:
die Wunnerwelt in kläne Dinge,
wu uns im Grund kann ins Schdaune bringe
Wammer so d`Nadur betrachte
lernen nei es Wunner achte,
ob in Kristalle, in menschliche Zelle
wu unsern Horizont erweitre -erhelle:
in Käffer, Blumme, Schmetterlinge
lauter klänne Wunnerdinge:
Grund zum Staune- zu Ehrfurcht vorm Leewe
was de Schepfer do hot gewwe
unn daß mer all des schätzt unn acht
nit gedankelos betracht
unn nit mutwillig zesteert
was geacht g´heert unn geehrt
Doch wennen mer nochmool unsern Blick
off die biblisch G`schicht zerick
Wachtle und Manna gab `s se esse,
Dach fer Dach. Gut, daß`mer `s nit hot ve`gesse
dut in Erinnerung gut behalte:
Dodriwwer staunen Jung unn Alte:
Mer sinn gerett´t! Es gebbt se esse.
Unn Gott hot uns nit vegesse
Unn so hot sich jerer g`sammelt
-daß die Gottesgab nit vegammelt-
soviel er gebraucht hot fer sich unn sei Leit
dorch die ganze WieschdeZeit
nit meh unn nit weniger als es dägliche Brot
Unn es wend`t sich so die Not,
wann in Gott mer die Rettung sehe.
So also esch die Geschicht se veschdehe:
Freilich: Esch`s nit so schweer, off Gott se baue
unn seinre Fiehrung se vertraue,
wann alle Hinnernisse sinn iwwerwunne
die Umweeche iwwerstanne unn die qualvolle Stunne
- so werd mer`s ääfach saache misse-
wann de Weg esch klar umrisse
e Weech wu in die Zukunft fiehrt
unn nit im Dunkel sich ve´liert.
Do esch`s leichter em Herrgott sei Fiehrung se erkenne
unn ne en gettliche Vadder se nenne,
wu`s määnt mit uns unn alle gut
unn wu em schenkt en gure Mut
Doch wu`s an so ner Klarheit fehlt
em allzeleicht de Zweifel queelt
Unn doch: Gott ve`schbrecht sei Hilf am End
wu die Not unn es Elend wend`t
Drum esch jo die alt biblisch Geschicht
aach fer uns unn heit bericht
Drum gelt die aach fer unser Daache
unn kann uns aach bis heit was saache
die G`schicht vun de gettlich Wieschde-Schbeis
off de beschwerlich Wieschde-Reis`.
Die Geschicht will bis heit noch mache Mut.
Mut zum Leewe- unn des esch gut.
Vieltausendfach henn d`Mensche seit dem erfahre,
wie Gott sei Volk hot g`schitzt in G`fahre
hot sei Volk gefiehrt -begleit
in Bedrohung, Not unn Leid
daß se aach in Not unn Sorge
warn in seiner Hand geborge
schenkt Brot für heit, sei däglich Brot-
des was ferd` Mensche wendt ehr Not-
Wu se`s aach hot hiigetriwwe,
Se sinn nit uhne die Erfahrung gebliwwe,
-heilsam fer junge Mensche unn fer Alde-
wie se warn g`führt in ehrm Leewe -gehalte
geeche allen Zweifel unn Schbott
geleit unn gfiehrt vun unserm Gott
Wer off sein HERRGott versucht se ve`traue,
off sei gettlich Hilf se baue
-und wanns aach weer mit halwem Herz
-unn viel se wennig in seim Kummer unn Schmerz -
den hot `s nit off Dauer ins Uuglick getriwwe
der esch nit off de Streck gebliwwe.
Gott hot ne g´fiehrt voll Lieb unn Macht
aach als sein Weg war ganz dunkel -voll Nacht
Gott dut so an uns Mensche hannle,
daß Ohnmacht unn Schwachheit sich kann ve`wannle:
zu d` Gewißhäät, Gott loßt sei Leit nit im Stich
unn denkt mit Lieb an dich unn mich.
Wu Mensche so off ehrn Herrgot baue
unn off en Sinn in ehrm Leewe ve`traue
do ordnen sich die Dunkelheite
und all die schwere Wieschde-Zeite
zu me Weg voll Sinn am End
-aach wenn mer des oft gar nit määnt,
wann de Zweifel uns begleit
unn Ängschde, Not unn schlimme Zeit.
Gut, wammer des rausheern aus der G`schicht
unn aus dem, was se bericht
fer unser Leewe unn sei KriseZeite
wu uns es Schicksal dut bereite:
Es lohnt sich off Gott sei Wort se baue
uns seinre Fiehrung aavetraue
Do wachsen uns Kräfte zu unn Mut
ungeahnt- unn des dut gut
daß offem Wech mer de nächschde Schritt waachen
ne gehn soweit die Fieß uns traachen
Mer wer´n de Weg unn es Ziel nit verfehle
aach wann so vieles uns dut queele.
unn d` Oriendierung mer so manchmool vemisse
unn wu mer aakummen mer des vorher nicht wisse:
Manchmal esch`s dann so, daß mer muß denke
Gott mißt sichtbar unser G`schick so lenke,
daß mer sichtbare Zeiche sehe,
fer die Weche wu mer gehe
Deet er bloß so sichtbar Zeiche gewwe,
in de Widerständ im Lewe!
Was, wu em wahrhaft helfe dut
unn em bringt en gure Mut:
Aber esch nit grad des oft sei Zeiche,
daß nit mer wanken unn trotzdem nit weiche.
Unn wann wankt aach unsern Schritt
ER macht sicher unsern Tritt
loßt uns dorchhalte - dut uns dorchtraache
Gott loßt`s dulde uns unn `s wage.
Unn mer bleiwen bei Gott unn seim gure Gebot,
wu er uns Mensche gewwe hot:
Unn daß mer bleiwen off seine Weeche,
dodrin liegt fer uns sei Seche.-
Daß es dodra nit fehle deet
esch unser Bitt heit unn unser Gebet:
Schenk gure Wegweiser, Gott, um de Weech recht se sehe
Schenk uns die Kraft, ne aach se gehe.
Gebb du, Gott, uns Dei Wort unn dei Geleit,
unn gure Mensche an die Seit,
Unn helf uns, daß mer recht uns bsinne
um immer wirrer rauszefenne
was bei uns zehlt in unserm Leewe
fer unser Hoffe, unser Streewe,
so daß mer wäß in unsre Daache:
"Des do esch gut, des wemmer waache-
unn des esch schlecht- nit se beschdreite
Ich will des Schlechte gern vemeide!
Des loßt sich bessre -des muß sich wannle
-off mich kummts aa unn off mei Hannle-
unn des muß ich trache, `s loßt nit sich vemeire
-meecht recht dezwische unnerscheide!
So sell es sei in Jesus seim Name
Schenk Weisheit unn Kraft uns- Amen -Amen"
 

TOP