Sprüche Salomos 24,30-34-
als Gegenbild zu Joh 15,1-8: Vom guten Weingärtner und dem wahren Weinstock

Joh 15,1-8: Vom guten Weingärtner und dem wahren Weinstock
Ich bin der wahre Weinstock, und mein Vater der Weingärtner.
2 Eine jede Rebe an mir, die keine Frucht bringt, wird er wegnehmen; und eine jede, die Frucht bringt, wird er reinigen, daß sie mehr Frucht bringe.
3 Ihr seid schon rein um des Wortes willen, das ich zu euch geredet habe.
4 Bleibt in mir und ich in euch. Wie die Rebe keine Frucht bringen kann aus sich selbst, wenn sie nicht am Weinstock bleibt, so auch ihr nicht, wenn ihr nicht in mir bleibt.
5 Ich bin der Weinstock, ihr seid die Reben. Wer in mir bleibt und ich in ihm, der bringt viel Frucht; denn ohne mich könnt ihr nichts tun.
8 Darin wird mein Vater verherrlicht, daß ihr viel Frucht bringt und werdet meine Jünger.

LUTHERÜBERSETZUNG
Spr 24,30-34
Ich ging am Acker des Faulen entlang und am Weinberg des Toren,
31 und siehe, lauter Nesseln waren darauf, und er stand voll Disteln, und die Mauer war eingefallen.
32 Als ich das sah, nahm ich's zu Herzen, ich schaute und lernte daraus:
33 Noch ein wenig schlafen und ein wenig schlummern und ein wenig die Hände zusammentun, daß du ruhest,
34 so wird deine Armut kommen wie ein Räuber und dein Mangel wie ein gewappneter Mann.

-Einheitsübersetzung:
24:30 Am Acker eines Faulen ging ich vorüber, am Weinberg eines unverständigen Menschen:
24:31 Sieh da, er war ganz überwuchert von Disteln, seine Fläche mit Unkraut bedeckt, seine Steinmauer eingerissen.
24:32 Ich sah es und machte mir meine Gedanken, ich betrachtete es und zog die Lehre daraus:
24:33 Noch ein wenig schlafen, noch ein wenig schlummern, noch ein wenig die Arme verschränken, um auszuruhen.
24:34 Da kommt schon die Armut wie ein Strolch über dich, die Not wie ein zudringlicher Bettler.

Wann heit mer feiern e groß Feschd
mit viele Fremme, mit liewe Gäschd,
weil d` Leit in Stadt un Land sich reiße
um Bizler, Neie, Federweiße-
unn heit mer `s Wort vun Jesus heere,
do wemmer aach de Winzer ehre,
wu de Rebschdock pfleecht unn hegt,
wu Borm unn Landschaft schitzt unn pflegt
bis dann in Faß unn Glas kann sei
ei`gefang`ner Sunneschei-
Kraft vum Erdborm, Sunn unn Reche
eigefangner GottesSeege

De Wei`stock wachst- des esch bekannt
im sonnige und truck`ne biblische Land
Vum Weistock find sich manch en Spruch
vum erschde bis zum letschde biblische Buch
Im erschde unn zwätte Teschdament
-wie jerer wäß, wu sei Biwwel kennt-
im alde unn im neie: vun de Noah - Zeit
bis hie zu d`Off`nbarung- ehr wissen`s ehr Leit .
Seit alders esch dort de Rebschdock g`schätzt,
weil mer an seinre Frucht sich ergetzt:
an de Trauwe unn am Wei.
So esch`s aach bei uns- in de Palz am Rhei,
dem klänne Stickche Paradies
mit fruchtbare Felder unn Trauwe so sieß.-

Unn wann heit mer heern an unsem Ort
vun Jesus des gure biblische Wort,
sei gures Wort fer alle Welt
dann werd uns mit e Bild vor die Aache geschdellt
-e Bild, wu im Grund en Pälzer gut faßt-
weils werklich gut zu uns Pälzer baßt:
Johannes 15, ääns bis acht-
do schdehn die Worte, wie se Jesus uns saacht,
Worte wu hilfreich sinn fer`s Leewe:
Ich bin de Wei`schdock- ehr sinn die Reewe
So lebt, ehr Mensche, em Herrgott zur Ehr,
Unn bleiwen bei meer unn meiner Lehr:

Des Wort, wu mer heern aus Jesus seim Mund,
des saacht er uns nit uhne Grund:
Des esch sein Wunsch unn feschder Wille:
Es meecht en gute Sinn erfille
unser Schaffe, unser Strewe
daß mer nit vegewens leewe
En gure Weech will er uns fiehre,
wu sich nit muß im Dunkel, im Uurecht ve´liere.
Er will daß mer Ihm ve`traue
unn mer ganz off Jesus baue,
Daß mer an IHM uns oriendiere
-vun falsche Leitbilder uns nit lossen ve`fiehre
Was alles esch doch schun bassiert,
weil am falsche Vorbild mer sich oriendiert

Damit mer nit ins Uuglick treibt,
saacht er uns, wer er esch unn bleibt.
Drum saacht ER uns sei Wort, wu uns kann traache
daß voll Mut un Kraft mer `s Leewe drum waache
unn traachen Frucht, wu reift in de Still-
Frucht vun der Art, wie Gott se will.
Frucht, wu`s bringt, wu zehlt, wu bleibt
traacht wer mit Jesus vebunde bleibt
- Frucht, wie se braucht grad unser Zeit:
wu Friede hääßt unn G`rechtigkeit
unn daß mer d` Schöpfung bewahrt unn pfleecht-
se recht umsorcht -se schitzt - umheecht
-aach fer d`Kinder -unn nit jetzt bloß unn heit-
und aach ferd` Enkel unn fer kinfdischi Zeit
So wemmer bedenke, was Jesus uns lehrt,
wann er die Ärwet vum Winzer so ehrt:
Im Bild vum Rebstock- dem Sinnbild fers Leewe
-weil soviel Kraft steckt in de Reewe,-
ladt Jesus uns ei`, unn dut so uns saache:
"Dun doch Vetraue zu mer waache,
daß- wie de Rebstock Worzel treibt,
ehr so mit mer ve`bunde bleibt.-
So sinn Worte, wie se Jesus uns saacht-
Johannes 15, ääns bis acht-
Worte stark, wu uns bestärke
zu gude Date, rechte Werke
Weil soviel Kraft steckt in de Reewe
esch`s Bild vum Wei`stock- Sinnbild fers Leewe

Unn wie er do steht, so voll im Saft!
Was strotzt so`n Rebstock so vor Kraft!
Weil die Worzle, wu mer nit kann sehe
dun ganz schää dief in de Bor`m neigehe
dief im Erdreich drin veborche
dun die de Rebstock mit Wasser ve`sorche,
Unn wann die Biwwel vezehlt vum Bääm dief veworrzelt
denk ich an de Rebstock, wu so veknorzelt
holt dief aus em Erdborm sich Wasser unn Kraft
unn steht drum gut bei jerem Wetter im Saft

Wie dief ve`worzelt im Erdbor`m esch er drin!
Wie strebt hooch noch owwe sein ganze Sinn-
Wie kräftig doch em Licht er sich entgeeche- streckt
in die Freiheit, in die Luft- Richtung Himmel sich er reckt!
Der Rebstock mit dem gure Trank
e Kletterplanz esch rank unn schlank.
- Ich habb dehääm en Äppelbääm
groß unn stark wie imme Drääm
groß ball wie`s ganz Haus- so grad in meim Sinn
E Dornfelderreb, die wachst do ninn
unn owwe an de Spitz bei de Äppel de sieße
do dut e Dornfeldertraub mich grieße
vier Meter oder mäh hoch- ´s esch eh`r unnertriwwe:
Die Traub dort esch jed Johr fer die Vechel gebliwwe.
Jedenfalls saach ich mer als:
Aach ich grieß dich- brechschd nit mer de Hals-
Sell`n die Vechel mer e Lied defor singe
um Kopp unn Kraache duschd du mich nit bringe!"
So hebb an der Traub ich im Äppelbääm
schenner als in de schenschde Träm
als mei Pläsier unn mei Vegnieche-
unn du domit eich nit aa`lieche
Doch wer ernte will sei Rewe
der muß se drum als schneide ewe
Deet mer`dRebstock nit schneide, er deet alles umschlinge!
Doch schneidt mer`n so, daß er viel Frucht meecht bringe
De Rebstock, oft urig wie in`d Trääm
so dick faschd manchmool wie en Bääm
unn stark wie en Bääm unn hart im Holz,
der esch em Winzer sein ganze Stolz,
wann d` Rebschosse treiwe, wachse unn reife
dann die Trauben dran sieß sinn, daß mer meecht greife
unn drin de gute Ernteseeche:
wu drinsteckt die Kraft aus Froschd, Hitz, unn Reeche-
vum Wind- de Sunn- unn wie mer wäß-
vum Winzer viel Mieh unn Sorg- unn Schwäß:
Sein Stolz, de Dank fer all sei Pfleche,
daß er`n umsorcht, dut fleißig hege:
Unn doch liegt nit alles in unsrer Hand:
aach wammer sich mieht- mit all seim Vestand:
Frucht, wu sich lohnt, die kann bloß reife
-wie jerer dut wohl gut begreife-
nit uhne vum Himmel de gettliche Seeche:
Froschd unn Sunn unn Wind unn d` Reeche
im rechte Maß zu d` rechte Zeit
Wann vum Himmel de Seeche uns Mensche geleit
unn vun Hachel unn Uuwetter mer bleiwen veschont
bloß dann hot die viel Ärwet sich werklich gelohnt:
Unn was fer Mieh unn wieviel Schwäß
steckt drin im Weibau- wie mer wäß:
Schun mitte in de Winterzeit
en Winzersmann sei Reewe schneid`t
daß mer nit ve`geblich sucht
an seim Rebstock gure Frucht
um en gure Ertrag ze erhalte
muß ers se schneide, wie gelernt bei de Alte.

Unn dann, wann im März die Sunn äm lacht,
werd Kamme`t im Wingert als gemacht
Unn daß die Ernt aach recht gelingt,
wird nit gegeizt, wann`s Erdreich mer dingt
unn so ab de Pingschde, wann die Reeb dann blieht
do bleibt en Winzer ständisch bemieht,
daß er de Reebstock vor Uugeziffer schitzt
Mer hofft, daß die ganz Spritzerei was nitzt
geeche Spinn, Laus, Pilz unn Worm
Unn es Gras werd gemulcht unn mer zackert de Borm
Dann muß ab Auguschd, noch e paar Woche
in Sunn unn Reeche die Traub drin "koche"
unn soll die Ernt echt gut geroote-
noch in de letzschde Woche "broote",
muß brutzle in de Sunn- dann braucht`s kän Reeche-
Dann endlich kann mer berge de Ernteseeche
Wann mer sich saacht: Nit länger meeh waa`de
`s hot jetzt genung an Öchslegraade
Was dut mer um de Fedderweiße
-um Sießer, Bitzler sich als reiße-
unn nennt ne gern poetisch- fein:
ei`gefangner Sunneschein
Kraft vum Erdborm, aus Wind unn Reeche-
ei`gefangner Gottesseeche
unn wie mer sieht- unn mer hoffentlich wäß-
de Lohn fer em Winzer sei Ärwet, sein Schwäß.
Bloß wann de Winzer Ei`satz bringt
esch es so, daß d` Ernt gelingt
unn es reift en gure Wei.
`s kennt im Grund aach annerschd sei.
Des- so will ich nit veheele-
dut die Biwwle aach ve`zehle-
Die ve`zehlt so ganz aaschaulich
was im Grund nit recht erbaulich
-unn was em geht im Grund geche de Strich
beim Salomo sei kluge Sprich:
Do werd die Faulhäät domit bebildert,
daß mer en lottliche Wingert drin schildert
e Feld unn en Wingert vum me Mann, wu vetrottelt
loßt zu daß sei beschdes Stick Wingert ve`lottelt-
Ich hebb`s jo vorhii vorgeleese
was war mit dem lottliche Wingert gewese:

So saacht -betroffe unn nit froh-
voll Weishäät de Prediger Salomo
"Amme Acker vumme Faule bin ich ve`bei dorchs Land
unn heb bgsehe än Wingert vum e Mensch uhne Ve`stand.
unn was ich hebb g`sehe, des hot mich offgschreckt,
es Land des war ganz mit Uukraut bedeckt,
Segnessle warn iwwerall offgange,
unn schun am Rand hot die ganz B`scheerung aagfange:
Die Mauer aus Stää, die war ei`gerisse
Mer hett se komplett erneiere misse.
Und was ich do g`schaut hebb, was war des en Schmerz!
un heb mer die Ei`sicht draus genumme ins`s Herz
unn hebb mir dodrauß die Lehr genumme:
So esch es unn so muß es kumme:
"Noch e bissel Händefalte, um auszeruhn,
-ich kann jo aach morche mei Ärwet noch dun!-
Noch e bissel Schloof, noch e klää bissel Schlummer",
- unn schneller als de denktschd- kummt schun de Kummer:
und wie `n Landstreicher kummt dei Armut deher,
wie `n uuve`schämter Mann - unn dein Mangel wiegt schwer."
Wer nit mit viel Ärwet sein Wingert hegt
unn nit mit viel Mieh als sein Wei`berg pflegt,
muß sehe wie der verwildert in naher Zeit.
wie`s Uukraut sich schnell schunn schneller ausbreit`t
muß sehe, wie der Wei`berg so gänzlich ve`fallt
Wu Wingert war, do wachst jetzt Wald,
Do wachsen Dischdle, Dorne, Hecke
Es esch ferwohr e groß Ve`schrecke
ein Vielfaches an Ärwet -so esch ze berichte
braucht`s, um so `n Wingert wirrer gut herzerichte

Dodrauß kann en jerer sehe
unn ich denkt, ehr wer`n`s ve`schdehe:
Die Ernt die esch en Gottes-Seeche
in Borm unn Sunn und Wind unn Reche
Doch brauchts dem Winzer sei Schaffenskraft
daß aach en Wingert steht voll im Saft
Bloß wann de Winzer dut fleißig sich reeche,
da kamm mer ernte der Ernt ehrn Seeche

Jetzt muß ich freilich fer unser Daache
dozuu noch zwää Worte saache:
Des änne vum grine Wingert hannelt
Do hot sich werklich in de letschd Zeit was gewannelt.
En griene Wingert- hot lang gegolte
als en Faulenzerwingert- unn gern hot´mer g`scholte
mi`m griene Wingert de Winzer als faul
wie en alder Schockelgaul
Doch wer heit loßt wachse, was do wachst in d` Nadur
wu griiene Wingert hot- Nadur drin pur,
der macht des heit nit uubedacht-
unn hot gut off sein Wingert acht:
Wer mulcht fer`s Erdreich ze belebe
organischi Dingung rei ze gewwe
guckt, daß de Erdbor`m fruchtbar bleibt
unn drum kraftvolle Reewe treibt.
Mer esch do nit faul, mer bleibt aach off Trab
unn schlacht glei`zwää Flieche mit ännerer Klapp:
De Bor`m kann dann d` schwere Maschine aach traache
unn mer kann sich aach dann in de Wingert mit waache
uhne es Erdreich mit zammedricke
unn kann sogar -zu seim Entzicke-
sich aach dann noch mi´me Vollernter drin fortbeweeche
wann `s Erdreich esch offgeweicht vum Dauer-Reeche

Doch was annres macht mer Sorche
- unn drum sell`mer gut hiihorche:
Em Winzer sei Ärwet Mieh unn Fleiß
kriegt nit immer en faire Preis.
Die kriegt nit immer en faire Lohn.
Manchmool esch es grad en Hohn,
was en brave Winzersmann
aus seim Wingert hole kann-
als hett er e lumbischi Brieh
esch des de Preis oft fer all sei Mieh
Unn wann d`Weipreis so ve`fallt,
ve`fallt am End` aach de Wingert mit halt
An de Mosel zum Beispiel kann weithii mer`s sehe
wammer draa ve`bei dut gehe
weil em Winzer sei Ärwet sich weithin nit lohnt-
aach wann sich de Winzer nit schont

Unn mancher statt zu me ehrliche Winzer zu lääfe
dut fer deier Geld lumpischi Auslandsbrieh kääfe-
Wobei ich domit nit gänzlich beschdreit,
daß aach wu annerschd ehrliche Leit
planzen so wie es sell sei
mit ehrliche Ärwet en ehrliche Wei.-
Doch wann e Landschaft ve`schdeppt unn ve`derbt
wann en ganze Berufstand sterbt,
kann und derf des so nit sei!
Drum drinken mit uns en Pälzer Wei!
Drinken mit uns en ehrliche Droppe!
unn däälen -wie `s sei sell- mi`nanner die Schoppe
En faire Preis unn nit en Hohn,
muß sei em Winzersmann sein Lohn,
wu hot in seim Keller gure Wei
ei`gefangner Sunneschein
Kraft vum Erdborm, aus Wind unn Reeche-
ei`gefangner Gottesseeche.
en gure unn gesunder Saft
wu em Mensch gebbt Stärk unn Kraft
Trink Wei mit Ve`schdand- der esch gesund
unn dem esch ze vedanke manch schäni Stund

Es hot de Wei gar so manch en Alde
bis siwwezich, achtzig jung erhalte
unn mancher werd- `s esch werklich wohr:
noch määner als wie neinzig Johr,
wu schweert als off die Stärk unn Kraft
wu aus`em gekelterte Reewesaft.

Unn doch nit uhne Vorbehalt
trefft des zu fer jung unn alt
Weil`s hot sich mancher- unn ich saach`s eich betroffe
in junge Johre schun dootgesoffe:
Hot stark sich erschd g`fiehlt unn ganz famos-
kräftig wie en Leew- mer fiehlt sich groß
Unn die Probleme- ganz klää- faschd wie geleest,
wammer -beduddelt vor sich hii`deest.-
Unn so hot en mancher ve`soffe Lewwer; Milz, Hern-
Hett sei Leewe bloß gschdanne unnerme bess`re Stern-
Unn wie schnell hot dort sich de Eheschdand
gewannelt zu me >Weheschdand<
Wann de Wei de Mensch zum Saufe vefiehrt,
unn die Sucht sei Lewe vun Grund off ruiniert,
dann helft bei`m nix- als wie e Kur-
unn denooch bloß noch Wasser- bloß Sprudel pur-
e Leewe lang kän richt`ge Schoppe!
Kä bissel mehr- nit än änzige Droppe!
De Reewesaft bloß uuvegore-
sunschd esch alles schun velore!
Doch wer des meischdert, wer des schafft:
Respekt: der Mann, die Frää zeigt Kraft-

Drum wammer`s Gewächs heit vum Weistock preise,
dem Winzer so sei Ehr erweise-
fer all die gure Lewenskraft
wu so die Frucht vom Weistock schafft
Do sellen mer de Weistock ehre
unn dobei off die Botschaft heere:
de Wei` esch uns gewwe vum Himmel als Frääd
unn nit als Grund fer Herzelääd-
Er esch zum Saufe viel zu schad
unn macht dich dermlich unn malad.
Drum mach mer nit de Reb`schdock schlecht
du d`Wei genieße gut unn recht:
Was kann de Rebschdock dann dezu,
saufschd` Wei so wie`s Wasser en Gaul- e Kuh!
Genieße sellschd ne- nit saufe- mit Ve`schdand unn Maß
dein Wei, wu in deim Schoppeglas-
unn ne dääle mi`m annre - in froher Rund-
unn nit frieh schun am Morge - zu d`rechte Stund!
Bloß so erhaltschd der -voll Saft unn Kraft
dei Lewenskraft aus Reewesaft-

Unn wammer fer de Rebschdock unn all sei Kraft,
wu strotzt for Leewe, Kraft unn Saft
de Herrgott, unsern Schepfer lowe
fer alles Gute, wu vun owwe
sich nirrersenkt als Himmelsseeche:
Sunn, Wind unn Licht- unn aach de Reeche.-
dann loßt uns bedenke, was Jesus uns lehrt,
wann er die Ärwet vum Winzer ehrt:
Im Bild vum Weistock- dem Sinnbild fers Leewe
weil soviel Kraft steckt in de Reewe,
ladt Jesus uns ei, dut so uns saache:
Dun doch Vetraue zu mer waache,
Daß- wie de Rebschdock Worzel dut treiwe,
mer so mit Jesus vebunde bleiwe.-
Er will, daß mer ganz off ne baue
Unn ihm uns gänzlich aavetraue
unn was des Bildwort vun Jesus uns sacht:
-Johannes fuffzeh -ääns bis acht-
des Wort off des mer heit wenn achte-
dodra sell mer denke , wann mer `n Rebschdock betrachte:
Wie er uns will lenke, sem Gure fiehre-
damit mer stets uns oriendiere
an seim Wille unn seim Wort
iwwerall- an jerem Ort,
so daß uns nix vun ihm wegtreibt
unn mer mit Jesus vebunde bleibt
unn mer dann so wie Jesus uns sacht
in seim Leewe gure Frucht tracht:
aus seim Geischd lebt- sich im Vezeihe iebt,
in de Lieb sich bewährt, weil Gott uns all liebt
-Gott, wu uns annemmt mit `rer Riesegeduld-
vezeiht unser Fehler- vegebbt uns die Schuld-
Ach heit gelt sei Wort uns: Halt dich an mich!
De wahre Weistock, der bin ich-
Unn was mer an me Rebstock sucht,
esch gure, rechte, edle Frucht
De Winzer, wu mit Lieb`sein Rebschdock pfleecht,
esch dein Gott, wu dich liebt unn heegt-
Geiztriewe- Triewe uhne Trauwe
wu me Stock die Kraft bloß rauwe-
die nemmt er weg, die dut er schneide,
so wie `n Winzer muß entscheide:
ob die Reeb treibt gure Frucht,
ob mer Frucht vegeblich sucht:
Drum dun mer gut draa off Jesus se heere
Was vun sich er uns sagt- was er uns dut lehre:
"Wer vun meer lernt, Frucht reichlich treibt-
Frucht, wu geroot, wu wachst unn bleibt-
Lebt doch - en jerer an seim Ort-
in meim Sinn unn nooch meim Wort-
dem Wort, wu eich Oriendierung schenkt,
wu eich off gurem Weech hiilenkt-
des Wort, wu eich offricht, eich treeschde dut-
unn eich warnt, mahnt, geleit, unn sem Leewe macht Mut-
aach wanns mol wehdut, wie e Winzermesser, wu schneidt
wanns uns betroffe macht- befreit:
So hebb ich eich all rausgebutzt,
gepflecht- aach mool serechtgestutzt-
Ich hebb eich gewarnt, unn Mut gemacht,
des Wort, was ner brauchen, die Wohret, eich g`saacht-
E Reeb allää noch ke Trauwe bringt-
E Leewe -uhne mich- eich nit gelingt,
Bloß wer mit mer vebunde bleibt
traacht Frucht, wu`s bringt, wu zehlt, wu bleibt
- Frucht, wu reift in aller Still-
Frucht vun der Art, wie Gott se will
Drum bleiwen bei meer unn meiner Lehr
Unn lewen ehr Mensche so `m Herrgott zur Ehr :
Soweit die Worte, wie se Jesus uns saacht-
Johannes 15, ääns bis acht-
Unn ich denk mer, so Frucht die braicht mer grad heit:
Gerechtigkäät braucht unser Zeit,
unn Mensche, wu `em Friede nochstreewe
-nit bloß fer sich selwer leewe-
wu um d` Schepfung sich sorchen, daß mer se erhalt:
do braucht`s jere unn jeren - jung unn alt-
Ach, deet doch wirke es gettlich Wort
so iwwerall an jerem Ort,
daß mer spiert die gettlich Kraft,
wie beim Rebschdock voll im Saft!
Mensche sinn gfroocht, wu nit bloß redden vum Liewe-
wu werklich in ehr`m Alldaach dun`s Liewe iewe:
Des braucht doch die Welt grad in unsre Daache,
daß all unser Glääwe deet gure Frucht traache,
Frucht, wu wachst unn reift unn treibt,
weil mer ganz bei Jesus bleibt:

Jesus, der ruft uns- jetzt unn heit
-ruft so fer Zeit uns unn Ewigkeit-
zu me Leewe voll Sinn, wu kann bestehe,
wann alles, alles muß ve`gehe.
Lernen vun de Reeb mer die Botschaft fer`s Lewe!
Daß mer all meechten bleiwe als wie d`Reewe
vebunne mit dem Weistock - Jesus esch sein Name-
in de Still breechten Frucht- dozu helf Gott uns all. Amen
Unn de Friede vun Gott, wu esch heicher als unser Ve`stand,
sell bei Jesus uns bewahre- unn`s Dorf, Stadt unn Land