Joh 14,6: Christus spricht:
"Ich bin der Weg, die Wahrheit und das Leben,
niemand kommt zum Vater denn durch mich.«

Heit werd wirrer mool Kerch gehalte
fer Große unn Klänne, fer junge unn alde
heit im Wald bei de Rietania ehrm Feschd,
wu jed`Johr mer feiern mit viel Gäschd-
dort, wu d` Vechelcher peifen unn die Bääm dun rausche
dun off die biblische Botschaft mer lausche
in unser Schbrooch -wu mool laut esch unn deftisch
unn manchmool ganz zart- unn manchmool recht kräftisch
In d` freie Nadur -dem scheene Ort,
do heern mer heit es biblisch Wort,
wu Alt unn Jung- Kind, Frää unn Mann
beim Wannre als gut raschde kann:
im Klausedäälche am Rand vum Wald
wu s uns immer wirrer g`fallt,
was gern als lohnend Ziel dut winke
weil do gebbts jo aach was Gures fer se esse unn drinke
Wu mer beim Wannre gern raschde unn halte
dun d` Kerch in Pälzisch mer heit g`schdalde
Heit heern mer freilich nit bloß vum Raschde
unn Ausruhe vum Leewe seine Laschde
heit heern mer vum Weech, dodrum dut sich`s drehe
daß mer de rechte Weech als gehe-
so wichtig des esch, ganz uhne Frooch
se ruhe vun all der Hetz unn Plooch
Desweeche esch jo de Sunndaach uns gewwe!
Uhne den fehlt was im Leewe!
Mer sell jo nit bloß hetze unn renne
mer derf sich ruhig aach was genne
Wie beim Wannre braucht mer fer`s Leewe mool Raschd
unn Ruh als vun Hektik, Schdreß unn Haschd,
wu em manchmool dozu fiehrt,
daß mers`s Ziel aus de Aache ve´liert

Doch heit wemmer betrachte ehr liewe Leit
vum Leewe mool die anner Seit:
Daß mer nit bloß raschde unn ruhn
daß mer recht hannle uns`s Rechte dun:
Heit sell die Redd sei vum Wannre- de Weeche,
wu`s Leewe uns fiehrt unn aach vum Seeche
wu im Wannre liecht, wu Gleichnis fers Leewe,
fer unser Hoffe esch, Liewe unn Gläwe.

De Weech- des esch`s Leewe mit dem, was `s uns bringt,
mit seim Mut- seinre Frääd -wu`s uns gelingt,
Manchmool esch er so, daß er Kummer uns macht.
Manchmool so, daß mer froh esch unn lacht
Unn- ob mer jung sinn orrer alt-:
Vielfäldisch sinn unser Weeche ehr Gschdalt: 
Aagenehme, brääte Wege dun vor uns stehe
unn aach enge Wege, schlecht ze begehe
Gut ausgebaute Strooße -ääfach doll
und ve`schlungne Päddelcher- geheimnisvoll
Wege- ganz hell in de Sunn ehrm Licht
vun denne mer Gures bloß bericht
unn Wege im Schatte- in Dunkel unn Not,
wu uns fehlt manch gurer Root.

Manchmal geht s steil bergnuff, unn des koschd Kraft
mer wäß nit, ob mer des noch schafft.
Manchmal blick mer rab vun steilem Hang,
do werd`s em grad schier angschd unn bang
Do werd em schwindelich unn häß,
wie des ausgeht - wer wäß, wer wäß?
Manchmal esch unser Weech im Leewe
leicht unn grad- uubeschwert, eewe,
mer geht ne leicht unn froh-beschwingt
mer fräät sich draa, unn lacht unn singt.
Und dann esch`s wirrer so, daß er im Dunkel sich ve`liert,
mer wääß nit, wuhii uns de neigschde Schritt fiehrt.

Off manchem Weg meecht mer -wanns geht -grad umdrehe,
am liebschde nochmools ganz vun vorn ne gehe
do sinn mer voll Träne- kann bloß noch klaache,
mer sucht en Mensch, fer sei Herzlääd ze saache.
Off manchen Weg, do fiehlt mer sich gut
e gure G`sellschaft, die macht em Mut.
Off manchem Weech, do ve`geht em es Lache
Mancher Weech dut uns uuglickich mache
Off manchem Weeg- unn des esch nit schää-
do sinn mer ve´losse unn scheint`s ganz allää
Off manchen Weg esch sicher mein Schritt
do wäß mer, wu`s langgeht -do esch feschd unser Tritt,
Do muß mer nit`s Ziel aus de Ääche veliere
Do sinn Wegweiser do fer zum Orientiere
Daß off rechtem Weech mer wannle
es Gure dun- mit unserm Losse unn Hannle.
Der Weg esch de richtig, wu zum Ziel hii uns fiehrt.
Wu nit sich ziellos im Dunkel ve`liert

"Ich du wannre- du wannle- ich du mich wannle"
dovuu sell also die Preddicht heit hannle
- weil die drei Worte, die g`heeren zsamme ganz feschd
wie an ääm änzige Stamm drei Äschd
-wie Gschwister, wu sich sich ganz ähnlich sehn
unn dobei aach gut ve`schdehn.

Wannre- Lewenswannel- unn Ve`wannle:
Um uns geht`s, wu mer Ruhen unn Hannle
E Gleichnisbild esch`s fer unser Leewe
bei dem, was mer hoffen unn erschdrewe
E Bild, wu grad in unsre Daache
wu so viel unnerweechs sinn, uns viel hot se saache:

Grad jetzt in de Urlaubszeit
reisen Mensche- weit- weit -weit
Unn wer raus geht aus seim Haus
unn sich off de Weech macht- naus
entdeckt die Erd, den scheene Stern:
Der geht mit de Zeit, der esch modern:

Trotzdem- wie ich saache muß:
viel gehn gar nit gern ze Fuß
dun wie am Schreibtisch- im Auto hucke
bequem in de Bahn aus em Fenschder bloß gucke,
orrer fahr`n wie de Blitz um die halb Welt
mi`m Flugzeich als fer deier Geld
Doch am Wannre zu Fuß hebb ich mei Ergetze .
Alles annre, des kann mer`s nit recht ersetze.
Iwwerall gebts was se enddecke
am Rand vum Weech in alle Ecke
hunnertdausend kläne Dinge:
Blumme- Käfer- Schmetterlinge

Wannre war in friehrer Zeit
bsonnerschd was fer junge Leit
Handwerksborsche unnerweechs als ware
in ehre "Lehr unn Wannerjahre"
ob in de Neeh- ob weit entfernt:
Unnerwegs, do henn se gelernt
es Lewe ze kenne- ehr Ärwet - die Welt,
sich aach vedient e bissel Geld
hän Ärwet sich g sucht, die Zeit nit ve gammelt
unn do debei als ehr Erfahrunge gsammelt
- hänn bschdanne debei aach so manche Gefahre
in ehre "Lehr- und Wannerjahre"
Erschd denooch hot mer kenne sich selbschdtännig mache
E schänes Lied dut vun noch heit ne saache:
>>Auf, du junger Wannersmann,
jetzt do kummt die Zeit heran..<<
des Lied, vun d`Frääd in de Wannerzeit,
Wer kennt des nit, ehr liewe Leit?
Doch heit esch schun manch Junger faul
wie en alder Schockelgaul
Unnerweg sei- esch halt jo nit bloß Vegnieche
Wer des deet behaupte, der deet glatt lieche
Schun mancher hot beim Wannre so manche G`fahre
unn manche Mieh sich als nit kenne erspare:
Wieviel Gruppe und Velker - wie ner wisse
henn wannre - auswannre - aus ehrm Land als misse
aus manchem beese, schlimme Grund:
erlebt so e manchi schwere Stund
off ehre weite, beschwerliche Weeche
rer uugewisse Zukunft entgeeche
off fremme Weeche, fremme Stroße
Wie viel Volksstämm henn als misse ve`losse
ehr Heimat, wu se gelebt henn, ehr wern`s wisse-
henn fortmisse - naus ins Uugewisse:
mit Rucksack-ve`pfleechung unn Sandale
die Gote -Burgunder unn Vandale
um mit de große Velkerwann`rung aasefange
unn sind manchmool debei aach unnergegange:
-vor 15 hundert Johr rund- ehr liewe Leite
wie die Hunne war`n kumme- vor langer Zeit

Warum es so Wanderunge gewwe hot?
Getriwwe hot manchen de Hunger- die Not,
wie gern weer so mancher in de Heimat gebliwwe
Aach weeche ehrm Glääwe hot mer die Leit als ve`triwwe:
Bischeef unn Ferschde henn Toleranz nit gekennt
unn de Mensche halt nit ehr Freihäät gegennt.
So henn zum Beispiel nooch viel schwere Schdunne
d`Hugenotte Heimat bei uns do gfunne
Unn weern so gern doch in Frankreich gebliwwe.
Unn aach annre Velker hot mer ve`folgt unn ve`triwwe:
So hänn die Wallone aus Belgie zum Beispiel gsucht als
Zuflucht bei uns in uns're scheen` Palz
Fleißige Leit warn`s, henn vediennt `s Ve´traue
henn aach gholfe bei uns´s Land offzebaue
wu voll Ruine war unn voll Ze´steere
nooch all dem Bekrieche unn Veheere,
als mer sich zu Tod hot g`siecht
und sich hot dreißig Johr lang bekriegt

Mancher Kämpfer fer d`Freihäät, hot misse drum fliehe
aus politische Grind` in e fremd Land wegziehe:
Ausgewannert sinn viel von Deitschland weit fort
nooch Amerika, orrer sunschdwo an en fremme Ort:
nooch Rumänie, Brasilie- Fer`s letzschde Geld
sinn se als naus in alle Welt:
nooch Oschde ins Baltikum, nooch Siedrußland gar gange,
um dort nooch de Not nei aasefange.
Die erschd Gen'ration hot dort meischd gfunne de Dot
die neigschd die Not- die dritte ehr Brot
Wie gern weern se doch all in de Heimat gebliwwe
erschd recht die Flichtling, wu de Krieg hot ve'triwwe.
Des esch- unn des gilt seit alde Zeite-
werklich unn wahrhaftisch nit ze bschdreite:
Wannre esch nit immer e Ve´gnieche
wer so was behaupt, der deet glatt lieche:
So unnerwechs se sei- macht's Herz em schwer:
so Wannerschaft uhne Wiederkehr.

Doch meischdens hot- wer wills beschdreite
es Wannere dorchaus als sei gure Seite
Weil mer derf nit immer ruhe.
Wannre hot's was mit de Uuruh ze due,
die -so lang mer leewen- uns treibt
-wie die Uuruh vun de Uhr, daß mer nit bleibt
so fer sich so ganz allää
uubewechlich wie en Stää-
Wie die Uuruh die Uhr macht ticke-
so braucht en Mensch, daß es Leewe kann glicke
ewwes, was ne in Beweechung setzt
ewwes, was en treibt unn ergetzt:

Des g`hert halt zem Menschsei als dezu,
daß mer nit immer pflecht sei Ruh-
esch aach ruhlos, raschdlos - wie getriwwe vum Wind
So saacht`s schun es Lied -unn des kennt schun jed Kind
»Wie die Wolke dort wannre am himmlische Zelt. . .«
so treibt em 's Wannre weit in die Welt
Wie de Strom beschdännig dut fließe,
bis er endlich dut in' s Meer sich ergieße,
so sinn mer Mensche, wann es Fernweh uns treibt
daß mer nit dehääm meeh bleibt:

Wannre dun so viel ganz gern
Treibt nit uns all oft in d` Fern
unser Herz, wu ahnt: es hat
fer uns off d'Erd do kä bleiwende Statt:
E zukinftischi dun mer suche- es ganze Leewe
Nie sinn ganz dehäm mer- dun e Ziel als erschdrewe
unn nit wie aageworrzelt ewig bleiwe,
weil d` Uuruh in uns - uns immer dut treiwe

Bewegung dut- bekanntlich- not:
Stillstand määnt -bekanntlich- Dod.
Aach wammer mool Ruh sich derf als genne
dun' er doch all es Sprichwort kenne
>>Raschd' ich, so roschd' ich<<, unn des will saache:
Es derf nit bloß bleiwe bei ruhige Daache
Des Sprichwort do will uns aatreiwe,
daß mer nit uutätig -ääfach seßhaft bloß - bleiwe
Wer sich nit offmacht, den nennt mer "lahm"
Der esch im Grund aach ganz schrecklich arm
Aach wann mer's nit immer gern dut heere .
Ruhe unn Uffbreche dun zsamme halt g'heere:
Wannerschaft des esch en Seeche
die Bewegung- es Bewege
Mancher kennt glatt gar de Dokter sich spare
deet er nit bloß mit em Audo als fahre
unn deet fer so manche Sache
efter off die Fieß sich mache
weer nit zum Lääfe viel ze strack
als weer er grad en faule Sack
fahrt grad mi`m Audo noch and`Zigarette-Automat
Esch zum Lääfe ze faul- e fauli Tomat!!
Die Krankekasse deeten en Haufe Geld spare
deeten die Leit meeh lääfe statt fahre.
Der ehr Kasselag weer nit ganz so knapp
Unn die Leit weern nit so schlapp
Im eigne Interesse muß off sei Gsundhäät mer achte
unn den Satz drum recht betrachte:
Bewechungsmangel bringt de Dod.
Bewechung -so esch`s- dut grad heit not:

Aach wann nit alle Daach esch Sunneschei
solln mer driwwer nicht traurig sei,
's geht halt off de Wanderstrooß wie im Lewe
nit alles glatt unn nit alles esch eewe.
Berg und Dal unn Fräd und Leid,
geheern halt zum Wechsel mool vun de Zeit
Begechnung und Abschied - Glick unn Schmerz
des prägt en Mensch dief drin in seim Herz.
Die dun -wer kennt des groß lang bestreite-
was Wichtiges fer uns bedeite.
Fer unser inner Entwicklung im Lewe
dun die uns wichtige Impulse als gewwe,
dun uns im Reife voran bringe
daß unser Lewe kann gelinge

Zu redde esch aach vun glickliche Stunne
wu mancher hat bei seinre Wannerschaft gfunne.
Am Grawerand sitze und die Wisse sich betrachte
oft die Blume mool dort in all ehrer Scheenheit se achte,
vom Berg rab ze schaue oder am weite Meer ze schdehe
Was gebbts beim Wannre doch alles sehe:
Blumme, Käffer, Schmetterlinge
lauter schääne klääne Dinge
Jesus hat von de Vechel und Ähre unn de Lilie offem Feld,
gern g`schbroche als Gleichnis fer die ewig Welt
weil des dut em ääfach gut
wann uns ääner do macht Mut:
daß mer sich wäß bei seim Herr-Gott geborche
getraache trotz Not unn Plooch unn Sorche
Manch äner -wann er alt werd- voll Frääd guckt serick,
of de Wannerschaft gern unn ehr Lewensglick!
Wie er war unnerweechs mit de Freinde- mit de annre
froh war- im Lewe unn beim Wannre

Doch so mancher, wu heit fer deier Geld
rausfahrt um die halwe Welt
um sich was ganz Besonnres se genne
der kann doch ke Ruh unn ke Glick dort fenne
bringt nit mit hääm e tiefe Frääd
so'n Mensch- so denk ich- der dut em lääd
Viele besuche 's Kolosseum in Rom
orrer dort de Petersdom
die Akropolis in Athen -orrer in Ägypteland
die Pyramide unn die Palme am Meeresschdrand
Manch änner rast gehetzt dorch viele Musee -
und hot am End doch gar nix Recht`s g'sehe.
Unn mancher, wu fahrt um die halb Welt
mi´m Fluchgzeit fer en Haufe Geld
der kehrt im Grund als leer serick-
vegeßt: Es g`heert zem wahre Glick
daß mer sich an de Schepfung fräät-
an ehrer Scheenhäät unn Qualideet
unn nit bloß dorch`s Leewe hetzt unn rennt:
daß mer Ruh unn Fräd sich gennt

Ich lob mer halt de Pälzer Wald
da find mer alles was em gfallt
Die Bääm- so grie- unn Ruh unn Still'
Unn des ich's, was ich brauch unn will.
"Wann ich fer mich die Wohret such,
finn ich se nit imme schlaue Buch
Ich finn se wann dorch de Wald ich geh"
unn so nochdenk iwwers Leewe unn was ich seh
- des hot vor langer Zeit schun -klug- in Avila
Theresa g`saacht -die Klosterfraa
Als Wannrer bin vum Lewe ich b`schenkt.
-unn aach des esch`s wert, daß mer's bedenkt-
schun dodrin, daß ich nit allää du wannre,
daß ich mein Weg geh meischd mit annre:
mit Mensche, wu mich kennen, wu mer helfe, mich schditze
unn nit -wie manch annre- mei Schwäche ausnitze.
Wie braucht mer -in gure unn schwere Zeite-
Mensche, wu uns off em Weech gern begleite
So Mensche sinn oft uns grad en Seeche
wu uns begleiten off unsre Weeche
beim Wannre unn aach sunschd im Leewe,
wammer nooch em rechte Ziel schdrewe
Sinn so wie d`Markierungszeiche
wu helfe uns wenn, es Ziel se erreiche
Unn wer sich dodraa oriendiert
es Ziel nit so leicht aus de Aache veliere

Unn des wääß jed Kind: daß Gott sei Gebot
dem Volk Israel beim seim Wannre einschd gewwe hot:
Die "Zeh Gebote" als Regel fer's Leewe
fer unser Hannle, unser Schdreewe
unn mer nit ins Uuglick treibt
wann mer bei seim Wort als bleibt
e Markierungshilf fer`s Hannle
fer unser Leewe - unser Wannle
Warnung aach- nit ze veachte
En Spichel fer uns aach- gut wann mer`n beachte!
fer`s Volk Israel schun, wu nooch de Sklavezeit
de Mose lange Johr durch die Wieschde hot geleit
dorch manche Not unn manche Gfahre
wie se Hunger unn Dorschd henn misse erfahre
Unn seit de Mose offem Berg ne gewwe hot
vun Gott es gure unn gettlich Gebot
esch sei gut Gebot wie Markierung, wu zeicht
wie mer`s Lewens-Ziel erreicht
unn`s gure Ziel nit aus de Aache veliert
Gut, wer sich dodraa oriendiert
Unn derf -domols wie heit- bei allem erfahre:
Gott will mich off meim Weech bewahre
mich in gure unn schwere Zeite
off meim Lewensweech geleite

Jesus -so steht`s im Neie Testament-
wie jerer wäß, wu sei Biwwel kennt
- de Biwel do des gude Buch-
der hot uns g`saacht mì`me Gleichnis-Schbruch
"Ich bin de Weech unn die Wohrhet unns Leewe"
daß mer de rechte Weech erschdrewe-
grad im Alldaach unn im dägliche Drott
de Wech zum Vadder -zu unserm Gott
Der esch mit seine Jinger viel unterwegs gewest
wie mer immer wirrer leest.
Als de große Wannrer unner d` Mensche bekannt
war er iwwerall im Land,
um die Mensche ze erreiche
unn ne de richtige Weech ze zeiche:
unn hot ne gezeicht wie sich dut erfille
in de Lieb zum Neichschde de gettliiche Wille
Unn daß mer nit bloß redde vum Liewe
daß mer am Neichschde aach s 'Liewe sell iewe
Er hot die Mensche in ehrm Leewe begleit
unn mit seim Wort dorchs Lewe geleit
um als Mensch unnerd` Mensche ganz nah ne se sei
hat er mitne gedält es Brod de Wei,
hat mit seine Gleichnisse und Rede beim Wandre
de Freinde, de Jinger unn all de annre
die gut Botschaft ne all gesacht,
damit mer's Leewe mit neiem Mut waacht
hat mit Wunnerdate unn Worte an ne so gehannelt
daß sich es Leewe wunderbar wannelt
Hat off gutem Weech se mit seim Wort all gelenkt
Wie reich hat Er all se doch b'schenkt!
Bis hii zu seim Weech nooch Jerusalem.<<
den Weech voll Leid unn uubequem
Viel leichter esch`s iwwer`s Kreiz `was se saache
als selwer es Kreiz im Leewe se traache

ER dut -aach heit noch- durch die Zeite
- in Seim Geischd - uns offem Weech begleite

Oft esch mancher- wie die Biwwel uns lehrt
anners von der Wannerschaft hämgekehrt
- als er fortgange- esch vor langer Zeit
Unn des gelt joo aach noch heit:
Daß so manches im Leewe sich do wannelt
Dovuu manch biblisch G`schicht als hannelt:
Aach heit , wu mer lernt off Jesus ze achte
unn sei Wort recht zu betrachte
als e Hilf fer unser Weeche
wannelt sich`s Leewe unn werd uns zum Seeche

Noch ään Gedanke- ich kumm gleich zum Schluß
weil lange Predicht bringt Ve`druß:
Wann mers Wannre dut aafange
will mer an e Ziel gelange
Wer wannert will doch off e Ziel zugehe
unn nit bloß ständisch im Krääs sich als drehe
-e Ziel, wu mer Ruh unn Friede kann fenne
unn schließlich aach dehääm sei kenne.
Unn desweeche esch wichtig, sich se oriendiere
daß mer des Ziel nit aus de Ääche veliere
Des gelt fer's Wannre dorch Wald unn Flur
unn aach fers' Lewe - fer die menschlich Nadur:
 
 
Wie gut wann uns der dorch s Leewe geleit
-dorch gure un durch schwere Zeit-,
wu saacht vun sich "ich bin de Weg",
do wu mer suchen Weech unn Steg-
unn es Ziel wert ze erschdrewe
"Ich bin die Wohrhet und es Lewe
Wer mer folgt, werd zum Ziel gelange
derf umkehre aus seim Irrdum unn nei aafange
den Weech wu am End zem gure Ziel fiehrt
unn nit sich off die Dauer im Dunkel veliert
-en gure Weech fer mich unn dich
Känner kommt zum Vadder- zu Gott -uhne mich.«

Wie`n gute Wegweiser, helft er de Weech uns ze sehe
unn schenkt uns die Kraft, ne aach zu gehe.
schenkt die in Seim Wort, wu uns recht leit`t.-
Daß er immer mecht bleiwe an unsre Seit,
ve`borge im Geischd in unsrer Mitt`
Des -mään ich - mißt sei aach heit unser Bitt`:

Jesu, geh voran
off de Lewensbahn
unn mer wenn nit groß ve`weile
trei der folge, der nooch- eile
in deim Geischd unn Sinn
dief im Herz uns drin

Loß in unsrer Zeit
fer Gerechtigkeit
kämpfe uns, de Friede waache
grad in schlimme, schwere Daache
Wu kän Wech mer sehn
loß mit deer uns gehn

Daß mer d`Schepfung pflecht
se bewahrt- umhecht
daß se werd fer jung unn alte
aach ind`Zukunft recht erhalte
Daß mer d` Welt umsorgt,
wu uns bloß geborgt
Unn in Fräd unn Schmerz
mach stark unser Herz,
mach so feschd du unser Tritte.
Unn wann wanken unser Schritte
hii zum Vadderland
nemm uns bei de Hand!