Was er eich saacht, des selln ner mache!
Johannes 2:


Sunndaach esch heit, ehr liewe Leit,
Sunndach esch`s, do hemmer Zeit
Wer die ganz Woch als sei Ärwet schafft,
derf e Auszeit sich genne- Mer braucht doch die Kraft
Was weer, wammer kä Ruh sich gennt?
Wann Daag fer Daag mer immer bloß rennt?
Wammer Daag fer Daag bloß schuft unn schwitzt
unn nit in Ruh aach mol sammesitzt?
Unn mer dält die Fräd unn dält die Not.
wie de Wei mer dält unn mer dält es Brot.
Gedääldes Leid esch halwes Leid
-so häßt es schun seit alder Zeit:-
unn daß ve`doppelt sich die Frääd
wammer se halt dääle deet
Gut, wammer aach Zeit findt, fer sich ze bsinne,
die Ruh aach hot, fer rauszefenne,
- an was mer sich kann werklich halte,
- wie mer sei Leewe recht mißt g`schdalte.
- Wu mer zupacke mißt, weils ewe recht esch
- was mer meide sellt, weils ääfach schlecht esch -
Wie nedisch eschs doch, daß mer Pause als macht!
Drumm g'heert aach de Sunndaach, ehr Leit, nit ve' acht!
Zum Werdaach muß de Sunndaach kumme,
sunscht weer was Wichtiges uns g'numme!
Mer braucht doch Zeit , fer sich ze bsinne
unn nei fer sich als rauszefenne,
was zehlt bei uns in unserm Leewe
fer unser Hoffe, unser Streewe,
so daß mer zu sich dann als saacht:
"Des do esch gut, des werd gemacht-
unn des esch schlecht- nit se beschdreite
Ich will des Schlechte gern vemeide!
Des do loßt sich bessre -des muß sich wannle!
-off mich kummts aa unn off mei Hannle-
Des do macht Sinn- Des muß ich waache
unn des annre muß ich trache,
kann nix draa ännre- unn zwische dem beide
meecht recht ich dezwische unnerscheide!"

Unn drum werd als fer jung unn alte
Sunndaach fer Sunndaach Kerch gehalte:
damit mer heern, was Gott uns saacht-
unn off sein gure Weech sich waacht,
aus Seim Wort als sich nei holt Kraft,
mit der mer ewwes Rechtes schafft.

Damit mer nit bloß schafft unn rennt,
damit mer sich die Zeit mol gennt
unn aach vun seiner Ärwet ruht,
sich nit bloß däglich plooche dut
unn nit bloß däglich sich schind`t unn queelt
dozu werd heit uns e G`schicht vezehlt.
Die schdeht im Neie Teschdament
unn ich denk mer: `s esch so, daß se jerer schun kennt
Gern hebb ich do die G´schicht genumme
-aach drum, weil `s Fernseh esch zu uns kumme.
Unn will so aach heit fer Junge unn Alde
off Pälzisch wirrer Kerch mool halte!

Unn ich hoff, es dut sich känner draa steere
wann heit mer die Preddicht in Pälzisch heere
Ich wäß, vor zeh Johr - hebb bei uns ich am Ort
mit eich schun mool betraacht do des Biwwelwort
Die Predigt hebb ich nei dorchg`schafft- gekerzt-
se nei geordnet- nei gewerzt,
des Wort, wu uns als Botschaft saacht:
Was er uns saacht, des g`heert gemacht
Des esch doch de Grund, daß fer junge unn alte
Sunndaach fer Sunndaach Kerch werd g`halte:
damit mer heern, was Gott uns saacht
unn off sein gure Weech sich waacht,
unn aus Seim Wort mer nei holt Kraft,
mit der mer ewwes Gures schafft-
unn drum will uns Sei Wort begleite
dorchs ganze Leewe -alle Zeite

Die Ärwet -wie g`saacht- esch bloß d' Helft vum Leewe.
Drum esch fer die Ruh uns de Sunndaach gewwe.
Mer muß nit schufte bloß unn renne,
Gott will uns Ruh unn B`sinnung genne.
Mer sell nit bloß sich plooche unn schwitze,
mer derf aach mool feire unn beinanner sitze.
Wer nit sei Ruh sich gennt unn Fräd,
der aarme Dropp, der dut em läd.
So wie mer dält de Wei unn `s Brot.
sell mer däle die Fräd unn däle die Not.
Unn wollt des äner mool moniere,
sell der sei Biwwel mool besser schdudiere:

De Jesus selwer, ehr liewe Leit,
war aach kän "Freind vun Traurigkeit":
En Fresser unn Saifer hot gar mer`n mol genennt.
weil mer`m scheint`s gar nit recht hot gegennt,
wie er mit de Leit sich hot als mitg`fräd.
Doch esch er trotzdem- grad zeläd
dort hi als gange, wu mern lieb hot gewunne
unn mer dorch Ihn hot wirrergfunne
de letschde Sinn fer alles Schdreewe
-Troschd, Hoffnung, Mut- e neies Leewe.
Dort, wu mer ne hot welle heere.
Drum hot er sich nit losse schdeere
vun dene, wu ehr Sprich als kloppe
vun dene, wu saachen: Als Freind vumme Schoppe
bloß det er mit jerem an än Disch sich als setze.
Als weer nit -ganz annerschd- des sei Ergetze,
wann änner `s nei waacht, uff Gott se ve`traue,
dut uff Jesus sei Wort hii nei sei Leewe uffbaue.
Daß käner sich fiehlt wie vun Gott vegesse,
desweeche hot er mit all an em Disch als gsesse
- aach mit de Leit, wu sunschd käner hot g' wellt,
weil se nit g' lebt hän so, wie se`s hän g'sellt.
Er wollt aach die wirrer glicklich mache,
wu ehr Leewe vepuschd hän mit dumme Sache.
Ei, grad mit dene wollt er feire unn freelich sei
unn mit ne däle es Brot unn de Wei.

Korz: Jesus war gut gewest zu alle Leit
unn aach kän Freind von Traurigkeit.

Im Evangellum vun Sankt Johann,
do leest mer glei vun Aafang an,
wie Jesus esch beim Feire- beime groß` Feschd
mit viele, viele, viele Gäschd.
Im zwädde Kabbiddel dut des dort stehe,
wie jeder kann in sein`re Biwwel drin sehe,
wie zwä sich hän do lieb gewunne
unn hän als Mann unn Frä sich gfunne.
Bei de Hochzich ze Kana, do esch er dabei
esch mittedrin in de Feierei.
Warum sell er dann aach abseits stehe
wu Mensche froh dorchs Lewe gehe?
Unn g`feiert hot mer- `s veschlacht em die Sprooch-
en Hochzich dort e ganzi Woch!
Dort spielt die Mussik off zem Feschd.
Do kummen unn do gehn die Gäschd.
"Hoch sell es leewe, unser Paar!
Viel Glick! e gsundi Kinnerschaar!"
so ruft mer - unn: "Vun Gott de Seege
sell mit eich sei off alle Weeche!"
Unn dann werd als en Schluck gedrunk'
Wei esch jo do, mäh als genung!
Doch off äämool, do wern die G`sichter lang.
De Kellermäschder guckt ganz bang.
"De Wei, der langt nit", so ruft er in Raasch.
"Was fer e riesegroßi Blamasch!"
Unn de Jesus sitzt ruhig do bei de Gäschd
unn feiert mit ne do ehr Feschd.

Maria merkt glei die Veleechenheit
unn saacht em bei neigschder Gelegenheit:
"Kimmer du, Jesus, dich mol um den Fall!
Ich glääb, de Wei geht bei ne all!"
Erschd esch er dozu nit bereit.
Unn saacht rer: Fer mich eschs noch nit Zeit.
Doch zu de Knecht' , wu `s Wasser traache
in de Kriech, de große, dut se saache
-als ne vor Schreck vegeht es Lache:
Was Er eich saacht, des selln ner mache!

Unn nit lang denooch, do heern se sein Wille:
"Die Kriech do dun mit Wasser fille!"
Ehr kennen die Gschicht- unn ehr wissens jo all:
wie `s weirer geht do in dem Fall,
unn wie mer ball vezehlt sich dort:
"Wei hots do gewwe, vun de allerbeschd Sort!
Was fer en Wei hot mer do uns ei`gschenkt!
Wei an den`s em lang noch gedenkt!"

Unn des dut mer noot nit veheele,
duts immer wirrer sich vezeehle:
wie mer nooch seim Wort hot g'hannelt,
hett Wasser sich in Wei ve`wannelt
unn wie mer dann den Wei prowiert,
do hett mer sich mi`m nit blamiert!
Unn wie de Kellermäschder staunt!
Unn wie zem Braitigam er raunt:
"Du bischd mer doch en Kerl, en rechte:
Erschd gebbts doch gure, dann de schlechte!
So esch es ieblich! So muß es sei!
Wozu bringschd jetzt erschd de gure Wei?
jetzt ganz am Schluß? Du bischd mer 'n Rechte!
Erschd gebbts de gure, dann de Schlechte!"

Doch was kennt heit- fer unsere Daache
die Gschicht vun de Hochzich vun Kana uns saache?
So wemmer jetztert minanner uns frooche
unn nit uns mit falsche Gedanke plooche
Bschdimmt soll se nit lehre, wie mer d Wei kennt ve`pansche
Do werd em grad schlecht, wammer denkt, wie so manche
gezaubert hän vor Johre e lumbischi Brieh
mit Wasser unn Zucker unn viel Chemie!
Wammer droo denkt, do werd`s em grad schlecht
E groß` Sauerei war des- unn werklich nit recht
Zum Glick war`s bei uns nit - Doch esch`s schun e Schand,
wann so was bassiert aach in unserm Land!
Dut so `n Lump uns mit kriminelle Sache,
de ehrliche Winzer, noch Schade mache!
Meer Pälzer, mer wenn all en ehrliche Wei,
wu Trauwe unn sunschd nix kummt nei.

Die Gschicht, nää, so mään ich, mißt simbolisch mer sehe
als en Hiiweis fers Leewe also veschdehe:
wie do aus unserm Leewe werds Beschde gemacht,
wammer heeren off des, was Jesus uns saacht.

Des gelt aach fer heit unn fer unser Sache:
" Was Er eich saacht, des sellen ner mache!"
Was kennt sich do zem Gure hii wannle,
wann in Jesus seim Sinn mer all deeten hannle!
Ich mään, den Satz, den sellt mer sich merke,
weil der uns kann im Gläwe b`schdärke.
Wie wannelt sich `s Lewe an jerem Ort
wammer lewen im Sinn vun Jesus seim Wort!
Do helft änner dem annre, do macht mer sich Mut.
Unn aach des, was ve`kehrt esch, des werd wirrer gut!
Do zeehlt dann nimmi: wie groß esch die Schuld?
Die Lieb zehlt, wu vun Gott kummt- unn die Geduld.

"Uhne mich!"- saacht mer do nit - wie in jener Geschicht
- ich wäß nit, esch se erfunne unn gut erdicht
orrer werklich bassiert, so wie mer sich`s vezehlt-?:
Aach dort gings drum, daß die Fräd mer sich däält
wie die Laschde- So wie`s halt sell sei.
Doch so wars nit- mit de Frääd unn aach nit mi`m Wei
Mer hot aach dort zu me Hochzich-Feschd
viel Freinde gelade; unn hot gsaacht zu de Gäschd:
Wei sellt mer mitbringe, e guri Flasch
-unn nit bloß Brot fer sich in de Dasch
Zwä Schobbe mer ins Wasserfaß schitte sellt.
So kennt mer dann feire aach uhne viel Geld
unn zamme hucke unn freelich sei
sich`s gut sei losse bei Brot unn Wei!

Unn dann war es so weit! Ach, du große Not!
Warum gebbts dann nix wie pur Wasser unn Brot?
Unn was werr`n die Gsichter all lang!
Die Leit, die gehn in sich- unn gucken bang
Do esch buchstäblich`s Feschd glatt ins Wasser gfalle,
weil jerer gedenkt hot vun dene alle:
Wann soviel Leit bringen en gure Wei,
schads nix, wann ich bloß du Wasser mool nei!
So esch`s, wann jerer so denkt unn saacht:
dann esch `s Feschd ganz schnell kaputt gemacht!
Nä, `s Leewe kann bloß so gelinge
wann en jerer -nooch Kräfte- sich will eibringe
Drum sell mer däle- so wie`s sell sei
`s Leid unn die Fräd- sei Brot unn de Wei

"Was Er eich saacht, des sellen ner mache!"
Des gelt aach fer heit unn fer unsere Sache:
Den Satz drum, so män ich, denn sellt mer merke!
Der dut zum Gure hii uns b´schdärke.
Wie kann sich do unser Leewe als wandle,
wammer all, so wie Jesus `s will, dun handle.
Wammer weerdaachs wie sunndaachs nooch dem schdreewe,
was werklich wichtisch esch im Leewe:
unn unser Händ aach sinn bereit,
zu helfe zu de rechte Zeit;
unn unser Mund dut fenne des richtige Wort
unn still aach kann schweige am rechte Ort!
-e gures Wort mer so neetisch doch hot,
Ve`schdändnis aach unn gure Root-
Mer merkt`s so richtig, wann`s em mool fehlt
Drum muß mer määh achte off des, was zehlt:
daß unser Fieß uns Weeche fiehre,
wu sich nit im Uurecht, im Dunkle veliere;
unn mit hellsichtige Aache mer sieht, wu`s fehlt,
wu mer braucht unser Hilf, unn wu mer sich queelt
Gut wammer wahrnemmt mit hellheeriche Ohre,
wer veschämt uns dut bitte, unn sich fiehlt wie velore
unn mer ei`fiehle uns kennen- zu de rechte Zeit
in des Denke vum annre- aach vun schwierige Leit;
unn dann aach e gures Gedächtnis hetten,
wann annre ehr Sorge uns saache deeten;
Gut, wann bei uns aach dief im Herz drin walt
die Lieb, wu vun Gott kummt, wu uns schditzt unn halt;
unn unser Stimm Gott lobt, Ihm singt
aach wann d`Sorge unn die Angschd uns zem Schweige faschd bringt
unn en gure Geischd uns Mensche lenkt
unn die Zeit mer sich nemmt, unn mer ananner mäh denkt!?
Unser Leewe grad wie e Feschd kennt sei,
wammer dälen minanner- wie s Brot unn de Wei-
es Glick unn die Sorge- de Kummer, die Frääd,
die Hoffnung, de Glääwe unn s dut em nit läd,
wammer`m annre kann helfe- ne kann stärke unn stitze
unn dut nit bloß frooche: Dut`s meer aach was nitze?

Wammer nit bloß redd vum Neechschde, vum Liewe
Wann am annere aach werklich mers Liewe dut iewe,
unn mers` Leewe so dält- grad wie Brot unn Wei
esch uusichtbar unner uns de Jesus debei.
Er dut mit seim gure Geischd uns lenke
wammer -ehrlich- was er uns saacht bedenke

Fer uns heit dut`s aach gelte- fer all unser Sache:
"Was Er uns saacht, des sellen mer mache"
Des Wort- so män ich- des sellt mer bedenke:
Des will uns all mit Hoffnung b`schenke.
Die Hoffnung, die braucht mer- Phandasie unn Mut
sunschd werd de Schade nimmi gut!
daß die Lieb im Herz mer traachen -
im Große unn im Kläne de Friede aach wagen;
damit mer ve`antwortlich unser Leewe g`schdalte
-um die Schepfung besorgt, daß se werd erhalte.
Meer hän die Welt doch bloß geborgt!
Wie braucht ses, daß mer fer se sorgt,
se schitzt- Die dut nit uns g`heere!
Unn doch esch mer debei, se vor Leichtsinn ze ze'schdeere!
Mer muß d`Gleichgiltigkäät vun Grund off iwwerwinne,
selln Kinner unn Enkel noch Leewe finne,
wu den Name vedient, unn mutig sich wehre.
unn zamme -schdehe gege alles Ze`schdeere.
Aach do derf mer nit frooche lang: Was dut es meer nitze?
Die Schepfung, die muß mer doch ääfach schitze
daß käner mool vegewens ruft:
Sauwer Wasser! Sauweri Luft!
Unn solang die Welt noch so starrt vor Waffe,
braucht`s Mensche aach, wu Friede schaffe
unn daß all die Schlechtigkäät
ve`wannelt sich in Gerechtigkäät
unn iwwerall in Land unn Stadt
alle Mensche gewwen satt

Wann änner dem annre uuvezacht
beischdeht unn sei Laschd mit traacht
unn so mer die Fräd dält unn dält die Laschd!
Dut Jesus dort bleibe als en gure Gaschd,

Do esch uns geholfe, wann sich dut erfille
vun Jesus die Botschaft- sein heilische Wille!
Wammer uns halten an sei Wort
bei unn unn jetzt an unserm Ort
nooch dem uns richten in unserm Leewe
was er als Beispiel uns hot gewwe:
Wie kann unser Leewe sich wunnerbar wannle,
wammer gläwen unn liewen unn hoffen unn hannle
nooch Seim Wille, in alle Sache
Was Er uns saacht aach dun unn mache!

Daß sein gure Geischd uns fer immer dut lenke
-uns all- wammer schaffe unn plane unn denke.
daß des unner uns so geschehe deet!
Des esch unser Wunsch heit unn unser Gebet:
Nit bloß weil de Sunndaach heit EXAUDI sich nennt
"Erheer uns, Gott!"-`s esch Ladein, wie mer`s kennt-
wenn aach jetzt unsern Herrgott vun Herze mer bitte:
daß sein Friede weer fer immer in unsre Mitte
Sein Friede, den brauchen mer alle Zeit!
Sein Friede sell uns bleiwe in Ewigkeit!
Unn de Friede vun Gott, wu esch heicher als unser Ve`schdand
der sell bewahre uns- unser Dorf unn`s Land,
daß mer an Jesus uns halte mit unserm Sinne unn Denke.
Mit seim Friede sell Gott fer immer uns b`schenke.
Des dun mer erbitte in Jesus seim Name,
weil mer brauchen ne däglich. Drum saachen mer Amen!