Pingschde 2002
2.Tim 1,7 Denn Gott hat uns nicht einen Geist der Verzagtheit gegeben,
sondern den Geist der Kraft, der Liebe und der Besonnenheit.

Pingschde- so lernt mer in Stadt unn Land-
esch als de Kerch ehrn Gebordsdag bekannt.
Domit mään ich die Kerch nit - im Dorf - aus Stää-
was ich mään, des esch schlichtweg: die chrischdlich Gemää-
nit die Kerch, wu mer hänn- nää, die Kerch wu mer sinn
aus Fraue unn Männer - unn aach mit de Kinn
Wann Mensche im Sinn vun Jesus hannle
-so daß sich die Welt unns Leewe kann wannle-
dann esch des was, wu mer feire heit kenne
Alde mit de Junge, Große unn Klänne-

Wann lewendisch esch es Chrischdedum
-beweecht vum Evangelium-
wann en gure Geischd uns lenkt unn steiert
unn uns -unn mit uns- die Kerch erneiert,
dann esch des, ehr liewe Leit,
en Grund echt, fer zem feire- erschd recht grad heit:

Pfingste werd drum g`feiert- wie alle Johr-
am Be`llplatz in Rhodt - so wie`s Johr zuvor,
dort wu im Wind die Keschdebääm rausche.
unn wu off die biblische Botschaft mer lausche.
Wu mer feiern es Heimat- und Bliedefest
unn wu g`sorgt fer die Gäscht esch- unn vun allem gebbt`s Bescht`,
wu`s Flääschknepp unn Schbieß gebbt, Kees, Weck unn Worschd
- unn aach Wei g`nung se drinke do -geeche de Dorschd-
wu die Sorge vum Alldag mer vergesse,
beinanner sitze- unn trinke unn esse,
unner de bliehende Keschdebääm,
wu mer uns fiehlen halt grad wie dehääm,
wu am Lewe mer uns frään - mit viel Leit
beim Wei und henn aach zum Gespräch genung Zeit,
do dut en griene Dom uns ve`eine-
Mer frän uns, wann die Sunn` dut scheine.
(Schad, daß die Sunn nit mäh dut scheine)

Unn alles, was lebt in de weire Flur-
in de frische Luft - in erwachder Nadur
des sell herzlich mit uns de Schepfer, Gott, lowe
fer alle gure Gab` von owwe

Unn Kerch off Pälzisch werd heit gehalte
in d` Mundart vun uns fer Junge unn Alde

Unn weil Pfingschde meh` esch als bloß Trinke unn Esse-
unn daß was Pfingschde bedeit- mer so schnell nit vergesse,
drum sinn all`, nit bloß die Fromme,
freindlich gelade unn uns herzlich willkomme,
wu die Vechelcher peife unn die Bääm dun rausche,
unn offs biblische Wort mer lausche-

Uhne Pingschde- wer kanns beschdreide-
do weern mer b`schdimmt all` gar noch Heide,
do hett nix mer gemerkt vum Chrischdedum
unn nix vum Evangelium
Nix vun de Botschaft, wu Mut macht ze hoffe,
wu ei`ladt zu de Lieb, wu fer annre esch offe,
wu Mut mach aach zu besonnenem Hannle,
so daß die Welt derf sich zum Gure hii wannle

Unn hett nit domools de Gottesgeischd
die Jinger dief drin im Herz erreicht,
do weer heit noch -wie vor d` Pfingste - die chrischdlich Gemää
e trostloses Heifelche- vestawwert- klää,
vielleicht gar ganz vegesse -ve`schwunne.
Do weer bei uns kään Glääwe g`funne,
weil uhne den Geischd unn Kraft unn Mut
die Sorg unn die Angschd em lähme dut

Bevor mer vum Geischd war belebt und erweckt -
vor d` Pfingste, do hot mer -voll Angst- sich ve`schdeckt,
nit sich gedraut naus ins Gedränge
Do hot mer g`scheit sich vor de Menge
Do esch mer schää unner sich bloß gebliwwe
Do het em gar nix nausgetriwwe
naus in die Stadt, wu voll Mensche- voll Leit
jetzt grad war zu de pingschdlich` Zeit,
-siwwe Woche nooch Oschdre- em Passahfeschd-
wu e Feschd werd groß g´feiert mit viel Gäschd
ind` Stadt voll vun Gsang unn Erntejubel
voll Gedränge - voller Trubel.
Weil drauß die erschde Fricht dun reife
-so daß mer graad meecht noch ne greife-
do trefft dort mer sich wie alle Johr
-grad wie bei uns - wie`s Johr devor-
aus aller Herre Länner -aus`m Siede und Norde-
aus`m Oschde und Weschde- aus allerlei Orte

Doch muß all die Schwermut unn Ängschdlichkäät weiche
wu Gott mit seim Geischd dut die Mensche erreiche.
Unn alle Welt sich driwwer ve`wunnert,
wie`d Gottesgeischd d`Mensche belebt unn ermunnert
unn wie do grindlich sich was wannelt:
Dovuu em Lukas sei Pingschdg`schicht hannelt,
wie se die Biwwel uns bericht
im zwätte Kabiddel vun seinre Aposchdelgschicht:

Ab jetzt weht bei de Jinger en frische Schwung
Voll Elan -Begeischderung
Voll Hoffnung, Kraft unn Zuve`sicht
wie`m Lukas sei Pingschdgschicht `s uns bericht

Mit Kraft wie vun Feier mit Sturmgebraus
hot Gott sein Geischd erfillt ehr Haus.
Jetzt merkt mer was bei ne vum Chrischdedum!
Do heert mer`s Evangelium
unn merkt was vun de Botschaft, wu Mut macht ze Hoffe.
Do spiert mer die Lieb, wu fer annre esch offe.
Do kriecht mer aach Mut zu me b´sonne Hannle,
Unn so derf die Welt sich zem Gure hii wannle,
weil nit die Angschd em lähme dut.
Unn esch voll Geischd mer- Kraft unn Mut,
do froocht mer sich nit bloß: was denken die Leit?
do esch`s vebei mit de traurische Zeit.

Mer geht aus sich raus- rei in die Menge-
mer waacht sich mitte ins Gedränge:
mit Parter, Meder, Elamiter
wu dort sich dränge wie`s Gewitter
aus Mesopotamie, dem ferne, als Zwäästromland bekannt,
aus de Neh vun Judäa- dem jiedische Land,
aus Kappadozie, aus Pontus am schwarze Meer
unn Leit aus de Provinz Asie her,
-aus Phrygie und aus Pamphylie, wie mer lest.
Unn Ägypter sinn aach noch debei gewest,
unn Leit noh bei Zyrene -Nordafrika,
und sogar Leit vun Rom, was die Hauptstadt war
geborene Jure und Fremme, -Juregenosse-
wu sich de jidische Gemää henn aageschlosse,
Kreter- vun de Insle -am Meeresstrand,
unn Araber vum Wieschdesand-
aus aller Herre Länner -aus`m Siede und Norde-
aus`m Oschde und Weschde- aus vielererlei Orte
wenn gemeinsam se feire in froher Rund`
de Seche vom Himmel- unn de gettliche Bund

Unn dort enei -dort ins Gedränge
Do traun sich die Jinger jetzt in die Menge-
Unn dort dun se die Botschaft kund
vun Jesus -vum neie Gottesbund
Dun nit sich länger in de letschde Ecke
wie vorher ve`berge, sich vestecke,
nit starre in e finschder Loch
als weer bis heit Karfreidaachd noch-

En frische Wind jetzt bei `ne weht
unn all die Ängschdlichkeit ve`geht
So heern mer `s bei Lukas recht erbaulich
in Bilder, wu fer uns aaschaulich:
Er redd vun Feier unn Flamm und Feier- Zung
-als Bildwort fer Begeischderung,
weil ganz vun Jesus-Lieb dorchglieht
mer Lieb iebt am Neigschde; Wie mer sieht
esch jetzt e Licht ne all offgange
unn se henn ehr Leewe nei aagfange:
So esch`s: Als me Gottes-Geischdes-Kind
weht bei jerer unn jerem en frische Wind,
daß se nit unner sich bloß bleiwe,
daß se `s dut enaus jetzt treiwe
zu de Mensche in de Welt.
Unn vun Jesus mer ve`zehlt
iwwerall an jerem Ort,
unn wirkt aach nooch Seim Sinn unn Wort,
lebt in Jesus seim Sinn unn seim Geischd-
als Mensche, wu de HerrGott dief im Herz drin erreicht

Feiersflamm unn frischer Wind
- in dem Bild sich wirrer find,
was de Heilig Geischd mit Kraft
imme Menscheleewe schafft.
Unn des stimmt, ehr liebe Leit,
nit bloß fer domols- `s gelt aach heit:
De Gottesgeischd Begeischdrung bringt,
wann de Funke iwwerspringt.

Unn doch hot, was an Pingschde bassiert
domols wie heit nit en jerer kabiert:
So mancher hot nix als bloß Worte voll Spott:
unn merkt nix unn rafft nix vum Geischd aus Gott
"Die sinn bschdimmt voll vun sießem Wei
Des muß Drumänner Speetlees sei!
Zwää, drei Schoppe hänn die ganz bschdimmt getankt-
orrer vier orrer fimfe- wann des nit langt-
Des esch en Rausch bloß- des macht se froh!
Am neigschde Daach esch nix meeh d`vun do!
Do simmer drin Fachleit. Mer kennt sich do aus.
Do werd aach bschdimmt nix Rechtes draus!
"Die sind doch schlichtweg all bloß bsoffe"-
-Doch mancher b`sinnt sich- geht in sich - betroffe

Nadierlich henn sich die Spetter geerrt
unn henn sich ganz gewaldich g`schnerrt
Drum dut sich mit Recht de Petrus wehre
-so wie mer `s bei St. Lukas heere-
betont, was nit esch se beschdreite:
in alde unn fer unser Zeite:
"Mit Pingschde esch`s nit so wie beim Rausch vum Wei.
Des kann jo nit ääfach alles sei:
en frischer Wind, en frischer Schwung
-des was määnt Begeisterung:
Meer Jinger sinn zwar beglickt- ganz ve`zickt
vum Geischd, wu Gott uns selwer hot geschickt,
so wie ER`s vor Ur-Zeite seim Volk hot ve`schbroche-
Unn Gott hat sei Wort noch nie gebroche-
Unn was uns Mensche so begeischd`re dut,
was uns zem Leewe macht neie Mut,
geeche alle Menschespott:
des sinn die große Date vun Gott
Doch nit dorch Stimmung allää- nää, dorch b`sonnenes Hannle
kann die Welt sich zem Gure hii wannle!"

Des dut ne de Petrus deitlich saache
unn er dut es Wort jetzt waache:
Er- en äffache Fischersmann
de Mensche saache will unn kann:
vun Jesus, was der g`sagt hot- sei hilfreiche Worte
und was er gedan hot an viele Orte,
Sei Beispiel, wu er uns Mensche hot gewwe
als e Richtschnur, gut fer`s Leewe,
wu hilfreich esch aach jetzt unn heit
fer dich unn mich unn alle Leit.

Warum des wichtig esch, ehr Leit,
ze sache, was Gott sein Geischd bedeit?
Daß Geischd vun Gott viel mäh esch als bloß Schwung
mit Fandasie, Begeischderung?
Weil oft genung unn uhne Skrupel
mer hot Begeischd`rung, Stimmung, Jubel
ausgenitzt - die Leit beloche,
se um ehr Lewensglick betrooche
Unn weil des wichtig esch se wisse:
werd mer des deitlich saache misse:
Begeischd`rung, die esch leicht mißbraucht
unn esch der ganze Spuk verraucht:
Do hot mer sich an rer Sach berauscht-
hot voll Aadacht de Worte vumme Ve`fiehrer gelauschd,
sich draa begeischdert- stark gemacht.
Doch noochher hot mer sich dann g`saacht:
Bischd mitgeloffe mit de Herd,
doch war`s im Grund die Sach nit wert.
Grindlich hot mer dich gedeischt.
En Scherwehaufe hoschd erreicht
Nä, was die Welt kann zum Gure hii wannle
esch nit en Rausch- des esch b`sonnenes Hannle.
Bloß des dut off die Dauer de Mensche gut,
unn macht se stark unn schenkt ne Mut!

Unn off des off`ne Petruswort
sinn an d`Pingschde do vor Ort
so dreidausend Leit rund in sich gange
unn henn ehr Leewe nei aag`fange,
e Leewe, wu nit uhne Ziel sich ve´liert
wu sich an Jesus seim Wort oriendiert.
Unn ehr Leewe dut sich wannle.
In Jesus seim Sinn- in seim Geischd dun se hannle

Ach deeten die Mensche sich doch heit aach so b`sinne
unn gure Weeche nei beginne!
Meecht so doch aach bei uns so`n heller Schei
so e Licht in uns uffgehe, ins Herz uns nei!
Meecht doch bei uns der Gottesgeischd schenke,
daß mer nit bloß an uns selber denke,
als Mensche, wu de HerrGott dief im Herz erreicht drin,
wu leewen in Jesus seim Geischd unn seim Sinn

Daß der Geischd deet hersche in unsrer Mitt
weer aach heit- so män ich- e dringendi Bitt`:
daß uns, wu mer do heit an de Pingschde beisamme
en frische Wind deet nei entflamme!
Neii Kraft unn frische Mut,
ei, des deet uns all doch gut!
Unn noch weit määh als Gut unn Geld
breicht grad des unser g`schunneni Welt:
Geischd, wu Zuversicht unn Kraft,
wu in uns de Friede schafft,
wu e besser Welt kann baue
mit Hoffnung, Zuversicht, Ve`traue,
wu bringt de Welt Barmherzigkäät,
wu sunschd esch voll vun Schlechtigkäät

Mensche, wu Friede unn Ve`sehnung waache
breicht mer so Leit nit -grad in unsre Daache?
Esch`s nit so, daß so mancher sich plocht,
weil`s mer oft vegeblich froocht
nooch Spure vum Glääwe, Hoffe unn Liewe,
daß mer die annanner iewe.
So Gottesschpure ze entdecke,
was kennt des neien Mut doch wecke!

Was Schpure sinn wern ner all b`schdimmt wisse.
Mer werd`s nit lang erschd erkläre noch misse
Unn doch will aus Afrika e Gschicht ich korz vezehle
vun ääm, wu sich mi´m Glääwe dut queele:
Der kann so manches nit ve`schdehe.
Den ploocht, daß mer nit Gott kann sehe.
Unn des macht em de Glaawe schwer-
Ach, wann des doch annerschd weer!

Do nemmt en sein Freind, ehr leiwe Leit,
grad mool e bissel an die Seit
unn zeicht em, was mer gut dut sehe:
e Spur, wu um die Hitt dut gehe.
"E Spur vumme Leeb esch`s dort im Sand!
Die kennt jed Kind doch schun im Land!"
Unn er froocht ne dann: Hoschd du des g`sehe,
wie de Leeb nachts um die Hitt dut gehe?

"Nä", sacht der zu`m frank unn frei
"Ich war die Nacht do nit debei,
Ich bin heit Nacht nit offgeschreckt,
unn hebb aach nit den Leeb entdeckt
Unn doch: en Leeb war`s in de Nacht.
Mer merkts, wann off die Spur mer acht.
Die esch noch ganz frisch - gut ze entdecke,
so daß mer jetzt noch meecht ve`schrecke!"-

"Genau so" -saacht sein Freind- "esch`s mit Gott ze ve`schdehe":
Mer muß bloß off sei Spure sehe!
Wie bei de Spur vum Leeb in de Nacht
braucht`s, daß mer die Spure vum HerrGott beacht!"

Weern so die Gottesspure bei uns se entdecke,
was kennt des de Glääwe wecke!
Spure von Gott sinn`s, wann Mensche hannle
in Jesus seim Sinn- in seim Geischd wannle
unn wirke fer Chrischdus als sei Fieß unn Händ
daß alles sich zum Gure wend´t
Unn des braucht doch unser Zeit!
Braucht`s nit so Mensche jetzt unn heit:
wu weerdaachs wie sunndaachs nooch dem streewe,
was zeehlt unn wichdisch esch im Leewe:
wu mit Herze unn Händ sinn zem helfe bereit,
wu zupacke dun zu de rechte Zeit;
mi`m Mund wu dut fenne `es richtige Wort
unn still kann schweige am rechte Ort!
voll Ve`ständnis unn gure Root
E gures Wort, wie so neetisch mer`s hot!
Daß unser Fieß gure Weeche gehe
unn de Neigschde mit hellsichtige Aache mer sehe,
unn achten off die Mensche in schwerer Zeit!
Des braucht mer: en Mensch, wu uns begleit!
Unn daß offne Ohre mer hetten,
wann annre ehr Sorge uns saache deeten;
unn mer uns eifiehle kennen- zu d` rechte Zeit
in`s Denke vum annre- aach bei schwierige Leit;
unn die Lieb vun Gott uns im Herz drin regiert`,
wu uns schditzt unn halt unn zem Gure hii fiehrt-
Minnanner sellmer in uns`re Daache
zu meh` Menschlichäät beitraache!
Des esch`s, was unser Welt doch breicht:
Daß de Gottesgeischd so uns all erreicht
unn die Lieb uns zammehalt.
uns -ob mer jung sinn orrer alt-

Wie deet sich do durch unser Handle-
es Leewe hii zum Gure wandle-
So e Pingschde breicht die Welt
Des esch es doch, was letschdlich zehlt
Was mißt des fer e Pingschde sei!
So stimmt in die pingschdlich Bitt` mit mer ei:
"Du Geischd, wu Lieb esch, wu zu de Wohret uns lenkt,
Lieb, wu nit an sich selwer bloß denkt-
wu uns helft, recht unser Schritte se gehe,
du Geischd vum Friede - wu klar uns helft sehe-
damit die Welt sich kann zum Gure hi wannle
Kumm, helf uns zur B`sinnung unn helf uns beim Hannle
Kumm, Gottesgeischd, kumm - in Jesus seim Name(n)
Kumm aach zu uns -So sell es sei! Amen