Kinderevangelium
Seit lange Johr, ehr liewe Leit-
so halt ich`s schun e ganzi Zeit,
dun mer unser E`smer Gemeindefeschd
wu mer do feiern mit unsre Gäschd
domit immer als beginne,
daß mer uns off e Gschicht besinne,
wie se in de Biwwel drin schdeht-
e G`schicht als wu um de Petrus sich dreht,
wu eier E`semer Wappebild ziert-

Aach heit werd e biblische G´schicht schdudiert,
wu vun Jesus unn seinre Jinger -aach vum Petrus bericht,
Zum letschde Mool e Petrus-G`schicht
Unn die G'schicht will ich vezehle heit
fer klänne unn fer große Leit,
e G'schicht, wu sich um die Kinner dreht
-so wie se bei Markus im Evangelium drin steht
im 10 Kabbiddel, do esch die se finne.
Unn mit der G`schicht do meecht ich beginne:

`s war fer unsern Herr Jesus än lange Morche
Ständich sinn Leit zu em kumme mit ehre Neet unn Sorge
De änd war traurich, de anner nit gsund,
de dritt war ganz allää uffem Erdrund,
unn weer uhne de Jesus ganz ve`zweifelt gebliwwe
än vierte hot äbbes rumgedriwwe,
wu er käm` Mensch nit weit und breit
hot sage kenne die ganz Zeit

Unn all die Leit mit ehrm Kummer unn Schmerz
hän enner gebraucht, - en Mensch mit Herz
wu zuheere kann, wammer `m vezehlt
was em bedrickt unn was em fehlt
wu mit Lieb em aanemmt unn helfe dut
unn em fer´s Leewe schenkt gure Mut.

Unn Jesus, der hot ne g'holfe. Än ganze Morge
de Leit zugeheert bei ehre Sorche
Wie's dann so geeche zwelfe war
unn Ruh war fer Jesus unn die Jingerschar
-weil die Leit sich verzoche hän,
weil se häm in ehr Derfel, was esse we`nn-
do dut em Petrus sein Freind zu`m Jesus sache:
"Ich -de Johannes- will en Vorschlaach deer mache
unn des will ich nit vegesse:
leg doch dich hii glei nooch `m Esse.
Grad e bissel bei dem Bääm do, do vorne ins Stroh
Du machscht dich sunschd ganz kaputt - kumm sei nit so -
Des schafft em, so viel arme Leit.
Genn der dei Ruh jetzt unn nemm der die Zeit!
Genn der doch ruhig dei Middagspaus
unn ruh dich vun dene Schdrapaze mool aus!"

Unn -daß Jesus nit licht so ganz im Dreck
rennt de Petrus unn nemmt schnell e Deck
rollt se z'samme als Koppekisse;
De Jesus sell des nit ve`misse
unn so hot unser Herr Jesus sich unner den Bääm
ins Gras gelecht unn war ball in de Trääm
Die Ääache fallen em grad zu.
Dief esch er glei` ei`g'schlofe unn in Ruh

De Petrus unn sein Freind, die warn derweil bei`m g`sesse
unn hän wie immer - so nooch em Esse-
mi`nanner geplaudert iwwer "Gott unn die Welt"
unn aach -wie`s so esch- iwwers liewe Geld.-
Unn dodebei sinn se aach uff d'Kinnerles kumme
Was se bringen unn koschde- `s weern Riese- Summe:
"Kinner", sacht de Petrus, "Kinner machen äm oft viel Sorche
unn Ärcher schun am friehe Morche
Ämol sinn se krank, dann wänn se nit esse,
dei Ruh, die kannschde glatt vergesse.
Die kennen nit still sei, die gebben ke Ruh-
e änzig Gezabbel immerzu
Des unn sell- des dun se wolle,
bloß nit des als, was se solle
manchmool sinn se richtig rotzig
oftmools sinn se furchtbar trotzig
sinn uuverninfdich als gewähnlich,
unn manchmool schdur unn uuveseehnlich
Iwwerall kann mer fenne ehr siwwe Sache
Viel Durchenanner dun`se äm mache
Des muschd wisse: wann d` Kinner hoschd
daß des än Haufe Zeit unn Geld äm koschd."
De Johannes, der muß schlicke
schittelt erschd sein Kopp, unn dut dann nicke
unn ergänzt noch:"... dodebei
-unn des esch ganz zweifelsfrei-
sinn Kinner noch gar nix als im Grund
Koschden bloß Nerve -treiwens bunt
Mer kann sich nit off se velosse
Im Kopp, do hänn se lauter Bosse
Mer kann se kaum was Gscheides häße
Die känne kaum in de Biwel drin lese,
dun nit viel drum vun Relischjon verstehe.
-was uhne Zweifel muß jeder sehe-
Wäschd, was?- Ich glääb jedenfalls,
mit Kinner kann unsern Herrgott als
gar nix G`scheits anfange." "Näh", määnt er,
"Kinner, des esch s'letscht. Des sach ich deer"
Wie se so redde vun derlei Dinge
dun KinnerSchdimme aus em Därfel herdringe:
"Mamme, nemm mich mit, loß mich doch mitgehe,
ich will aach de Herr Jesu sehe!
Ehr Gschwister, raus jetzt ausem Haus,
Kummt schnell, mer rennen schun vorneraus,
Dann simmer s'erscht - er esch vorne beim Stää!-
Mer hän en e bissel fer uns jetzt! allää!"
"Halt " ruft ehr Mutter, "bleiwen schdehe, ehr Bengel
unn heern offd`Stell off mool mit eierm Gequengel-
Heern off se drängle! Her, alle siwwe!
Bis mer all geh`n, gebbt Ruh! `s werd dogebliwwe!"

Des war e Gegrisch unn war e Gezabbel,
des war e Rufe unn Gebabbel,
e Hii unn Her - weil se all erschder sei wänn
Unn wie de Petrus unn de Johannes hänn
die Weibsleit vun Weitem schun kumme sehe
unn ä Herd Kinner drumrum mit ne gehe. -
do hän die zwä Jünger sich aageguckt
und sich grad hinnerm Ohr gejuckt.
Die Köpp die schiddlen se hii unn her
unn de Petrus, der määnt- gedankeschwer:

"Die laut Zawwelg'sellschaft, do
mit ehrm Gebabbbel so munter unn froh
die werd am End uns noch unsern Jesus uffwecke.
Die werd uns de Jesus ausem Schloof noch uffschrecke
Die selln uns nit unseren Jesus steere-
Mer missen uns jetzt fer ne wehre!
Mer muß die fortjache- muß die ve`treiwe
Die kennen nit jetzt beim Jesus bleiwe!"

Die Jinger also off de Stell
gehn zu off die Fraue -zornig - schnell
lääfen dene Weibsleit unn ehre Kinner entgeche
unn sachen "Ehr kummen uugeleche"-
Was wenner dann- ehr liewe Leit-
mit dene ganze Kinner bei unserm Herr Jesus heit?
Vun seine Predigt - des missen er doch sehe,
dun die jo werklich nix verstehe"
Do sacht em ä Mutter: "Sinn doch nit so,
die Kinner sinn doch aach mit dem Jesus froh
Bleiwen nit gern dem Jesus fern.
hän de Herr Jesus doch aach gern.
Er braucht doch bloß e bissel Lieb ne schenke,
mi`me gure Wort se bloß bedenke,
wann er mit ne redd unn se an sich drickt.
So ä Kind will jo nit viel, esch so schnell schun beglickt"
Doch de Petrus sacht dodroff: "Nix esch heit",
Der Jesus esch dodmied, ehr liewe Leit
unn will jetzt schloofe unn braucht sei Ruh!
Guckt, er hot doch sei Äache zu"

Die Kinnerles, sunschd so kuraschiert:
Die Köpp lossen se hänge, ganz deprimiert
unn die Fraue henn grad -zum gure End-
se schun genumme bei de Händ
Des alles hot unsern Herr Jesus uffgeweckt,
Der hot gereckt sich unn geschdreckt
hot hergeguckt, unn` s glei ` erfaßt
Unn was do ablääft hot ihm ganz unn gar nit gebaßt

War er ve`ärchert, daß mern hot geweckt?
Ach was! Er hot noch de Kinnerles die Ärm ausg`schdreckt
hot voll Lieb se zu sich g`numme:
"Lossen die Kinner doch all zu mer kumme!"
so hot er gerufe "unn schickt mer käns fort!".
Des war sei uuvegeßlich Wort-
Mit ehrer kindliche Fräd unn ehrm Kinnerschmerz
lichen doch grad die Kinner unserm Herrgott am Herz!
Egal wie se sinn, er hot se gern!"

Wie des do die Kinner heern:
Was hän ehr G'sichter do g'schdrahlt, vor Frääd,
daß se de Herr Jesus zu sich rufe deet!!
Vun ehre Midder hän se sich losg'risse,
sinn hie zu ehrm Jesus- henne beinooh umg'schmisse
vor Frääd -,so sinn se hiigerennt,
war'n g'hange ganz ve`zickt an seine Händ
Unn wie Jesus se ganz feschd hot an sich gedrickt
was warn se so froh- so still beglickt
henn nuffgeguckt zu`m Unn was dun se`n schätze
weil er dut sich so zu ene setzte
Unn hot mit `ne so lang ve`zehlt
iwwer des, was ne guttut unn des, was ne fehlt
unn so richdich mit `ne geredt wie mit große Leit.
E gure große, lange Zeit
Unn dodebei hän se all es geschbiert,
-daß es em dief ins Herz nei riehrt-
wie unser Herr unn unser Gott
sei Kinner -egal was gewest esch - lieb immer hot,
und was immer aach kumme dut
Unn 's war fer se alles -alles - gut.

Wie dann die Midder unn die Kinner war'n wirrer fort
do hot de Petrus ergriffe fer die Jinger es Wort.
hot g'sacht zu Jesus: "Hettschd nit doch
besser g'schloofe e bissel noch?
Was machsch`d der doch noch Ärwet groß
mit dere klään G'sellschaft bloß!
Des sinn doch bloß Kinner -unn des esch bekannt:
Kinner, die hän noch kän Ve`stand,
die kennen nix - sinn`s drum nit wert!
Unn du gebbschd dich mit ne ab! s`esch uuerheert!
Des bringt doch nix, des esch nit gut
wammer mit de Kinnerles sich ve`weile so dut
Än Gottesmann, des muschd doch sehe-
Än Gottesmann- muß driwwer stehe."

Awwer do hedden ehr emol solle sehe,
wie do Jesus sich im Zorn dut seine Jünger zudrehe
guckt se all aa, daß die grad sinn ve`schrocke.
- unn waren vellig vun de Socke-
wie er ne dann -unn des mit Macht-
des ämool hot fer immer g 'sacht :
>
"Genau des esch bei eich grundverkehrt.
Ehr mänen, bei me Mensch, do wer bloß wert,
des, was er kann unn wäß - unn gelt,
was er ve`dient - was er vorschdellt in de Welt.
Awwer unser Herrgott, der dut annerschder denke!
Dun mool dodroff eier Gedanke hiilenke!
Ä ääfach Kinnerherz, des esch em recht!
Des esch em nit se gering unn schlecht.
Die Mensche, wu schwach sinn, wu mer muß stitze
anstatt ehr Schwäche aussenitze
und die Klääne, unn die wu nit g'sund sinn- die sinn wie all:
sei liewe Kinner, off jeren Fall
Unn die, wu oft als Angscht hän und die, wu mer ve`lacht-
die Kinner, wu mer kläämacht unn gern ve`acht
wu nit so g'scheit sinn in de Schul, des sinn -wie alle
sei liewe Kinner, wu`m gefalle.
Unn die, wu scheint`s gar nix ferdichbringe,
dene gar nix will gelinge
die -grad die- g`heern zu seinre Herd
unn sinn Ihm genau so lieb unn wert."
Des hot de Herr Jesus zu seine Jinger g'sacht,
damit mer des mool recht betracht.
Unn hot gemänt: "Heern zu, ehr Große,
Dun eich jo nit so uffblose!
Ehr därfen ruhich e bissel mäh
so werre wie die Kinner klää.

Ehr sinn groß, stark - g'sund unn g'scheid
Doch: henn ehr eich selwer gemacht wie ner sinn- ehr Leit?
Kän Mensch lebt -bei allem, was er schafft-
im Grund vun seinrer eig'ne Kraft.
Was mer hot unn esch -wammers mool recht bedenkt-
esch äm alles- im Grund -doch vum HerrGott g'schenkt.
Unn fer alles, was unser Herrgott hot gewwe ,
fer alles, was mer braucht im Leewe
kämmer eigentlich bloß Dankeschää sache.
Wie ä Kind es Danke waache
unn des fehlt noch, ehr Große, zu eierm Glick:
Lernen vun de Kinner e gudes Schdick!"

So saacht es Jesus- unn will aach uns ei`lade.
- ich män als -ehr Leit: des weer kän Schade,
Im Geechedääl: `s weer zu unserm Glick
wann meer all do noch deeten e gudes Schdick
dezulerne - bei Jesus fer uns im Land
Unn mit viel Lieb unn Sachve`schdand
mer deet denke an die Kinner- graad an die Schwache
-wu die Glotze- de Fernseh` so viel kabudd dud oft mache:
daß mer en Platz kreechten unn erschd recht e Herz
fer die Kinner - unn e Ohr fer ehr Frääd unn ehr`n Schmerz
Was mißt sich do ännre e gures Schdick
in unsere Familie- in de Derfelcher, unn aach in de groß` Bollidik-
do nit seletschd.- Ich glääb als, ehr Leit:
Es esch nit e G`schicht bloß aus alder Zeit:
Was kennt sich do dorch unser Hannle
so manches hii zum Gure wannle!
Unn braucht`s nit grad in unsrer Zeit
e gures Stick mäh Menschlichkeit?
Wammer bei Jesus in die Schul ging so richtig
unn mer beim lernt, off was es aakummt- was werklich esch wichtisch:
Do deet nit bloß zehle Macht unn Geld.
Do deet manches e bissel annerschd laafe in unsre Welt-
unn weer des nit gut, ehr liewe Leit
aach fer uns unn unser Zeit???
Meechts doch so sei! -in Jesus seim Name(n)
Drum saach ich: Amen, Amen, Amen