Heit will ich mich offs Narrepult schwinge
e Loblied off de Narr eich singe:
Ich lob mer de Narr, wu feiere kann:
ob jung ob alt -ob Frää ob Mann
Unn des solang off dere Welt
nix so zehlt wie Macht unn Geld
Weil Frohsinn mer unnerd` Narre find`t
So esch es - des wäß jed klää Kind:
Humor esch, wammer trotzdem lacht.
Des gelt nit bloß an`d Fasenacht;
Unn drum- so froch ich: Kennt an de Narre ehrm Weese-
vieleicht die Welt am End genese?

Ich denk gern an de Hofnarr aus alder Zeit
So Leit, wie der, warn im Grund recht gscheid-
Grad mit ehre Narrebosse
hot mer die Wohret sich sache losse
ganz uug`schminkt unn uuvewehrt-
S` n Narr, der g`heert gefeiert- der g`heert geehrt:
Die annre henn gekuschd ganz blaß vor Schrecke,
Doch so`n Hofnarr dut kä Speichel lecke
Vor Narre-Freiheit und- Waachemut
do zieh drum bis ich noch de Hut!

Ich lob aach den Narr, wu iwwer sich lacht
unn iwwer sich selber sei Sprichel gern macht
Wu annre protzen uugehemmt
er selwer nit zu wichtig sich nemmt.

Weil ich de Humor du schätze,
hebb ich am Narre mei Ergetze,
Humor, wu offricht, nit nirrerdrickt,
wu die Dinge grad ins recht Licht rickt.
Wohl dem, wu trotz allem noch lache kann.
Den lob ich mer -die Frää, den Mann
"Wer trotzdem lacht, der hot Humor",
so rufts der alte Spruch uns ins Ohr-
Humor helft, Abschdand se gewinne
aach off `s Scheene im Lewe sich gern se b`sinne
An so Leit- so saach ich`s, eiern Parre
Hebb ich gefresse glatt en Narre

Ich zieh aach vor dem Mensch de Hut,
wu sein Mitmensch ehre dut-
Der, wu sein Neichschde schätzt unn acht.
unn weer der aach als en Narr velacht:
Aach wammer `m -vielleicht- dann gebbt se veschdehe:
daß mer aach ihn dut als en Narr kinftig sehe

Der esch aus gurem Holz geschnitzt,
der wu sich selber sacht veschmitzt
-wie ich eich`s sach, ich eiern Parre-:
"Ich will nit määh sei als wie d`Narre-
unn hebb nit äämool im Johr bloß Humor-
Mei Narredum gelts ganze Johr"

Wann Narr esch der, wu aach noch liebt
wann kenner sich im Liewe iebt,
unn wo do noch ze hoffe waacht,
do wu die ganze Welt ve`zacht
Wann en Narr esch der, wu en Lichtblick bringt:
unn wann die Welt im Dunkel vesinkt
Wann en Narr esch der, wu sich d` Hacke rennt ab
weil er sich fer es Gure halt in Trab
-so wie `s die Biwwel uns dut b`schreiwe:
So will ich gern so`n Narr sei unn bleiwe
So Mensche braucht Gott, wu do ausharre
So Mensche braucht Gott- Er braucht so "Narre"
Wann en Narr mer den nennt, wu de Friede waacht,
die Lieb dief drin im Herz als traacht
wu die Schepfung bewahrt -se schont- beschitzt
unn nit bloß froocht: Was es ihm nitzt-
Do sell mer mich gern als "Narr" betrachte:
Ei, so en Narr, den du ich hoch achte
Geebs doch noch mäh bloß vun denne Narre!
Dann weer ich glichlich, eiern Parre!

Ich weer am End jetzt- unn `s esch erledicht
fer des Johr wirrer mei Narrepredicht
mit der ich dorchbroche hebb die Schranke
vun de iebliche Sunndaags-Gedanke

Unn wann mer ab heit zu de Narre mich zehlt?
Des esch kän Gedanke, wu mich groß queelt,
weil die Welt jo braucht im Grund
Mensche, wu nit g`falle sinn off de Mund:
Mensche wie de Narr, wu die Wohret em saacht
grad wann `s so manchem nit behagt
Hut ab!, ehr Leit, vor solche Narre!
Machts gut- ehr Leit- Tschüs- eiern Parre
Ob mer uns ball schun wirrer sähne?
Kersch esch jed Woch- sunndaach morchens um zehne!