Heit heern mer die altbekannt Weihnachtsg`schicht...
Heit heern mer die altbekannt Weihnachtsg`schicht
wie se Sankt Lukas uns bericht:
"Es begab sich aber zu der Zeit.."
Die Botschaft wemmer heere heit
Mer heern vum Auguschdus, wu esch Kaiser gewest
wie mer`s in de Biwwel drin leest
Und vum Quirinius- Der war- wie bekannt-
Statthalter sellmools im syrische Land
Korz: de Auguschdus off`m Kaiserthron
der fiehlt sich grad als Göttersohn,
rechiert mit Soldate vun Rom aus die Welt
unn Macht, die koschd bis heit viel Geld:
Es esch em wichtig ze beschaffe
immer deirere neiere Waffe
aach Schdroße se baue fer die reemische Heere,
falls die Leit sich doch mool wehre.
Unn wu mer Widerstand erblickt
werd der sofort im Keim erstickt
Er baut -korz gsacht- off d`Macht vun Waffe
Unn saacht, so deet mer Friede schaffe-
Unn loßt als Friedensheld sich feire-
Unn dofor braucht er Geld unn Steire
Um noch meh Steire rauszehole
do hot er seine Leit befohle
-aach wann des manchen hot vedrosse-
en jerer sell sich schätze losse.
Wieviel Mensche īm gehorche selle
hot ganz genau er wisse welle
Daß er käm zu meh unn noch meh Geld
als de Kaiser in Rom- de Herr vun`d Welt
Mit seinre Macht do dut er prahle
Unn de Birger muß bezahle
Unn weil de Kaiser mäh Geld will sehe
Drum hen die Leit all misse gehe
en jerer in des Dorf unn Stadt
wu mer e Haisel orrer`n Acker hot ghat
dorthii misse gehe, wu mer war gebore:
-unn aach wann dort mer nix velore-
zum Schätze, Zeehle, Nummeriere,
Rubriziere, Registriere-
so wies de Kaiser hot befohle,
um aach es Letzschde noch rauszehole
uhne Ricksicht unn Erbarme
aus dem Volk dem große, arme.
So hot en jerer- wie ner wisse-
off de Weech sich mache misse.
So fangt se aa die Weihnachtsg`schicht
wie de Lukas se bericht
Kä G`schicht off Goldgrund dut d`Lukas uns moole
mi`m Kaiser wud` Schätzung hot befohle
unn d Leit, wu in de Geechent mer rum buchsiert
unn drangsaliert unn schikaniert.
Unn doch muß en Auguschdus -aach geeche sein Wille
am End Gott sein Plan zum Heil erfille
So wie mers in de Biwwel drin leest
esch des die allererschd Schätzung g'west
unn die esch g'schehe zu der Zeit
als de Quirinius war Landpfleger iwwer die jiedische Leit.
Landpfleger - des klingt werklich gut
Ob ders Land aach pfleeche dut?
Er dut de Leit ehr Geld bloß hole
wie`s de Kaiser hot befohle!
Weil die Macht, wu ungehemmt,
nit e bissel Ricksicht nemmt
esch aach de Josef aus Galiläa
mit d`Marie, die wu sei Frä war
aus Nazareth fort nooch Bethlehem,
wu sei Familie war frieher dehääm
Dort war se dehäm schun seit de DavidsZeit...
Maria war hochschwanger unn Bethlehem weit!....
En Weech, so weit unn uubequem
dorchs Gebirg nooch Bethlehem!
Unn wie se endlich, endlich warn dort
War do kän Blatz am ganze Ort
Sie henn in denne schwere Stunne
ke gscheid Quadier am Ort do g`funne
Haschde kää Geld, do bleibschd halt de Dumme
Unn wie die Wehe sinn bei rer kumme
hot d` Marie dort in de Mitt vun de Nacht
-so wie`s die Weihnachtsg`schicht uns saacht-
es Kind gebore in Bethlehems`s Stall,
dem sei Geburt mer feiern all
Und hot dann- erleichtert- froh
ehr Kindche gelecht in Hei unn Stroh:
ä herzisches Biewelche, än richtiger Schatz
Unn `s war fern sunschd off d` Erd kän Blatz -
kä Stubb!- kä Bettche! Bloß Hei unn Stroh!
Wie sinn die Mensche oft so roh!
Marie, die holt aus ehrm Reisebindel
ä Stickel Stoff, gut fer ä Windel...
Kän Blatz wie fer Mensche, bloß Blatz beim Dier!
bei Esel, Schäflich, Rind unn Stier!
So kummts, daß fer des goldisch Kind
mer grad ä Kripp vum Viehzeich find:
Im Schatte vum Kreiz dort sei Leewe schun steht:
die Lieb, wu zu uns Mensche geht
II
Unn do in dere Geechent- in Bethlehems Feld
-wie Jesus war gebore, de Herr vun de Welt
hän Hirte bei ehre Viehherd gewacht
im Hirtefeld bei Daach unn Nacht
Es waren nit grad feine Leit.
So wars halt gewest in dere Zeit:
En Hirt, der hot nit viel gegolte.
Was hot mer off die Hirte gscholte!
Sie weern all grob unn roh unn herb,
voll Hinnerlischd, brudal unn derb
uun kennten nit mool ehrlich sei...
"Loß bloß dich nit mi'me Hirte ei!.."
Mer hot nit viel vun ne wisse welle:
sie weern uhne Ehrgfiehl unn all rauhe G'selle!
Unn doch esch grad dort in de Heilische Nacht
-wie`s Hirtevolk bei de Schäflich wacht-
vun Gott än Engel, än Bote kumme
Sei gettlich Botschaft hot grad dort mer venumme.
Die waren all ganz schää vun de Socke!!
Was sinn die all so bees veschrocke!!!
Klarheit vun Gott hot um se geleicht!!!
Gott Sei Wort hot se erreicht:
Des Wort vun de Lieb unn de gettlich Geduld,
wu greeßer esch als alle Schuld:
Unn die Hirte henn ghert mit offnem Mund
Daß des weer fer all e heilsame Stund:
"Ferchten eich doch nit! So saachts eich Gott
in eier Schuld nei, eirer Not
Ich saach eich all an ä gure Zeit
fer eich großi Fräd unn alle Leit:
's muß känner meeh sei off ewich ve'lore
Grad fer eich esch heit gebore
de Retter, de Erleeser: Chrischdus, de Herr
in Davids Stadt! Drum heern gut her:
"Windel unn Kripp"- du jetzt ich eich nenne
als Zääche fer ne zu erkenne!
Mer muß nit Gott suche weit, weit hinner Sterne
Ehr selln bei dem Kind do de Friede all lerne.
Der Engel, der hot Gott gepriese
Unn hot se all zum Stall gewiese
Unn de ganze himmlisch' Chor
singt ne fer Gott es Loblied vor:
Geeche alle Menschespott
preisen se die Ehr vun Gott:
Ehr sei Gott! Unn Fried off d`Erd
daß Fried`fer alle Mensche werd!
Ich denk mer, die Hirte henn sich g`froocht-
wie uns aach so manchmool de Zweifel ploocht:
Wie? Es kennt jetzt endlich werde
Friede off de aarme Erde?
Fried off d`Erd? Es kennt jetzt walte
Friede zwische Jung unn Alde?
Friede jetzt an alle Orte:
in Oschd unn Weschde, in Sied unn Norde;
so, daß die Mensche sich ve`stehn
unn Friedensweeche minanner gehn?
Unn es kennt sich durch unser Wirke unn Hannle
die Welt ehr Gsicht zum Gure hii wannle?
Unn des, weil der dort im Krippche liecht drin,
wu Heil uns bringt unn Lewenssinn
unn Friede fer d`Mensche, fer Gude unn Beese,
der wu kummt die Welt zu erleese
Der weer`s, wu uns de Friede bringt,
e neie Aafang, daß s Leewe gelingt?
Ganz annerschd als d`Auguschd vum Kaisersthron:
Kän annre als Er weer de Gottessohn??
Des alles war fer se schwer ze verstehe
Unn doch henn des Kind se gsehe
Weil- als die Engel all war'n wirrer fort,
henn sich die Hirte- noch im Ohr war ne s Wort-
off de Weech g'macht nooch Bethlehem, um ze sehe die G'schicht,
wu Gott dorch sei Bote ne hot do bericht'
Gar nit lang hän se veweilt.
Unn was hän se sich beeilt,
sinn hii zud Marie unn zum Josef- zum Kind,
wu mer in de Kripp drin find:
Unn des hän se erfahre dort:
Gott macht wohr sei gettlich Wort-
Dun weirer aach saache, was se venumme.
Unn hän Gott so beim Wort genumme
Was hot mer do offgmerkt unn aach gestaunt,
wie änner do zem annere raunt:
"Friede sell werre, weil Friede mit Gott -
Friede off d Erd in unsrer Not!-
Unn kenner mißt vegesse sei unn off ewig velore
Weil de Chrischdus doch esch fer die Welt gebore!"
III
Die Hirte hän ehr Botschaft de Leit all bericht!
Was esch draus worre aus dere Geschicht?
Hot mer geheert droff, dut em Wort mer glääwe
unn dem Friede aach noochschdreewe?
Gewunnert hän se sich all iwwer des Hirtewort
Doch folgt merm an seim Blatz unn Ort?
Im dägliche Leewe?- Die Geschicht,
werd uns weiders nit bericht.
Mancher vielleicht weer dran int'ressiert,
ze wisse, was dort esch weirer passiert...
Doch wichtich fer uns esch bloß des: ob MEER
schenken Gott Seim Wort Geheer!
Ob des Wort vum Krippekind
bei uns offne Herze findt?
Ob mer bloß druff ganz selten achte
-bloß in feschdliche Stunne `s mool so ä bissel betrachte-
orrer ob mer im Alldaach uns aach dran halte
unn in Seim Sinn unser Leewe g`schdalte?
So, daß mer helft dem Mensch in Not
-nit bloß denkt ans eigne Brot
fer de Friede unn fer d`Gerechtigkeit lebt
nit bloß nooch seim Vordääl strebt.
Nit bloß froocht, was es bringt äm unn nitzt,
um die Schepfung sich sorgt- unn wie mer se schitzt
Unn schließlich unn endlich nit redd bloß vum Liewe
Guckt, wie mer werklich kennt`s Liewe aach iewe!
Gott will uns all mit seim Friede b`schenke!
Lossen mer doch uns vun seim Friede lenke!
Die Botschaft gelt fer junge unn alte.
Maria hot des Wort behalte
Des Wort vun dem Kind wu in die Kripp esch gelegt,
des hot se ganz dief in ehrm Herz drin bewegt.
Ach, deet des Wort so uns aach all beweege
-unn begleite uns all mit seim Troschd unn seim Sege!
Froh sinn die Hirte hämwärts gsprunge
Henn leis unn laut ehr Lied sich gsunge:
De ääne `s glicklich in sich summt,
de annre s kräftisch vor sich brummt:
Se singens im Baß und im Tenor
es Lied vum Friede- vum Engelchor
Die Hirte wie se umkehrn: Gott dun se loowe
weil ER nit de Herr bloß im Himmel hoch drowwe,
weil ER in unserer Mitt aach will sei
will kumme zu uns- ins Herz also- nei
unn will uns ganz nooh sei mit seim uuendlich Erbarme,
ruft freindlich uns zu sich- mit weit offene Aarme
-in dem Kind in de Kripp- Drum dun se preise
die Lieb, wu Gott uns dut erweise-
Fer all des, was se hän gesehe
fer alles, wu esch dort geschehe:
daß in dem Krippekind sich zu uns gesellt
de Friedeferscht, de Herr vund' Welt!
Unn jetzt eschs an uns all, weirerzesaache
des Wort, wu uns esch zugetraache
durch menschliche Bote, nit durch Engelmund-
daß weirer mer traachen von Herzensgrund
die Botschaft, wu aller Beachtung esch wert:
Gott will nit bloß sei in de Heeh geehrt.
Off de Erd, meer, die Mensche meer sellen ne preise
unn änner dem annere Lieb erweise:
Weil dort esch gebore -in dem Kind im Stall
de Retter fer die Mensche all!
Fer uns unn jetzt unn alle Zeit
fer dich unn mich unn alle Leit
Des Kind will nit bloß unser Herz aariehre
Es will off gurem Weech uns fiehre.
Des was die Engel zu de Hirte dun melde,
des sell uns unn sell fer alle, sell alle Zeit gelte:
GOTT DIE EHR! UNN FRIED OFF`D ERD
uun daß FRIED FER IMMER FER DIE MENSCHE ALL WERD!
Unn so kummt Gott uns nooh- Meer wenn off ne heere
In seim Friede leewe- unn IHN so ehre!
So sell es sei -In Jesus seim Name(n)
So meechts aach bei uns sei Amen, Ame(n)
