Weise mir Herr deinen Weg.....
Text: Befiehl du deine Wege: Ps 37,5

Daß mer bei uns gut wannre kann,
des wäß jed Kind unn Frää unn Mann
Unn daß es hot in unserer Mitt
unser scheene Rietaniahitt
im Klause- eck am Rand vum Wald,
wu`s uns immer wirrer g fallt:

So mancher liewe Gaschd macht Raschd
Ruht aus vum Lewe seiner Haschd,
weil mer als mool veschnaufe misse.
Unn aach des werd jerer wisse:
Mer find- des sell mer nit vegesse
dort was Gures se drinke unn se esse.
Unn aach des, des esch bekannt
-iwwerall im ganze Land-
daß Esse unn Trinke Leib unn Seel sammehalt
unn aach die Gemeinschaft lewendisch erhalt
Unn dort dun d Kerch mer heit g`schdalde
wu`d Vechelcher peifen- unn mer beim Wannre gern halte:

Ich will mei Preddicht jetzt beginne
Mer wenn uns off de Weech besinne:
unn heere off den alde Spruch
wu mer find in de Biwwel- im Psalmebuch

Was en Weech esch, des werd jerer wisse
Mer werds nit lang erschd erkläre misse:
Was en Weech esch, des erschd recht der kennt
wu`s Wannre schätzt unn sich aach gennt:
Der geht doch dorch `s Leewe mit offne Ääche
sieht off de Weech unn was newe de Weeche:

Was mer am Weech alles sehne kann
als Frää beim Wannre- als Wannersmann!
`s gebbs iwwerall was se enddecke
am Rand vum Weech in alle Ecke:
Blumme- Käferlich- Schmetterlinge,
hunnertdausend klääne Dinge
an dene mer sich frääe kann-
ob jung ob alt- Kind, Frää unn Mann

Unn des wäß jerer Wannersmann,
wie mer sich oriendiere kann:
Des esch jo wichtig, daß mer sich oriendiert
unn nit `s Ziel aus de Äache veliert
Desweeche gebbts Markierungzääche
daß mer `s Ziel find vun de Weeche:
En rote Punkt- en bloo/gelwe Strich
dodraa oriendier ich mich
Unn dut mer des Zääche mool vemisse
do esch mer ganz schää offgeschmisse
Kään Fremmer kann do weirer sehe,
wu de Weech jetzt hii sell gehe
Des gelt fer's Wannre dorch Wald unn Flur
unn aach fer`s Lewe - fer die menschlich Nadur:
unn nit bloß fer en Wannersmann,
daß mer sich oriendiere kann:

Der Weech - esch drum aach e Bild fers Leewe
fer des, was mer erhoffen unn erstreewe
- es Leewe, wie`s kummt mit Fräd unn Leid
- es Leewe im Wechsel vun de Zeit

E Bildwort esch`s, zu dem jerer schlicht
hett was ze vezehle: sei Lewensgschicht
Dut jerer doch sein Weech als gehe
sein eigne Weech vor d`Ääche sehe
Unn- ob mer jung sinn orrer alt-:
Vielfäldisch sinn unser Weeche ehr Gschdalt:
Aagenehme, brääte Wege dun vor uns stehe
unn aach enge Wege, schlecht ze begehe
Gut ausgebaute Strooße -ääfach doll
und ve`schlungne Päddelcher- geheimnisvoll
Wege- ganz hell in de Sunn ehrm Licht
vun denne mer Gures bloß bericht
unn Wege im Schatte- in Dunkel unn Not,
wu uns fehlt manch gurer Root,
Wege, wu in Diefe und in d`Heeh uns fiehre
unn Frääd und de Kummer uns lossen spiere.
So esch es mit de Weeche ewe:
mit dene beim Wannre unn mit denen vum Leewe

Manchmool dut sich drin erfille
unser Wunsch unn unnser Wille
Manchmool esch `s so, daß er Soche uns macht.
Manchmool so, daß mer froh singt, lacht
Manchmool esch mer arg gequeelt
traurig wann en Mensch uns fehlt

Manchmool geht sein Weg mer mit sicherm Schritt:
do wäß mer wu`s langgeht -do esch feschd unser Tritt,
Do sinn ve`läßliche Wegweiser um sich ze orientiere.
Do muß mer nit`s Ziel aus de Ääche veliere

Off manchem Weg meecht -wanns geht -mer umdrehe,
am liebschde nochmools ganz vun vorn ne gehe
Wie gut, wann mer kann nei beginne
wie wichtig, daß mer sich dut bsinne

Der Weg esch de richtig, wu zum Ziel hii uns fiehrt.
Wu nit sich ziellos im Dunkel ve`liert
Mer brauchen gute Wegweiser, um ne ze sehe
Mer brauchen die Kraft, ne aach se gehe.

Als e Hilf fer unser Lewe
hot Gott uns sei Gebote gewwe
unn Jesus hot gzeigt uns, wie mer sein Wille
in unserm Leewe kennten erfille:
hot uns gezeigt, wie Gott uns liebt
unn meecht, daß in de Lieb mer am annre sich iebt.
Mer brauchen Sei Wort, wu uns recht leit`t,
Mer brauchen aach Mensche an de Seit,
wu uns bestärke unn uns stitze
unn nit wie annre unser Schwäche ausnitze
Wie e Wegzehrung wichtig- wie e Stick Brot
in Zeite vun Mangel unn vun Not-
sinn Gefährtinne und Gefährte dorch die Zeit
Und aach fer annre: unser Geleit

Des braucht en Mensch doch: daß mer`n stitzt
unn nit bloß froocht, was em selber `s nitzt.
Daß kääns sich muß off die Dauer veliere
daß dief im Herz drin en jerer kann spiere:
"Ich bin nicht allää; Off Schritt un Tritt
gehn gure Mensche mit mer mit.
Leichter werd mein Weg- mei Leewe
weil `s die -fer mich- sem Glick dut gewwe!
Wie bin mit Lieb so reich ich b`schenkt,
mit Lieb, wu nit bloß an sich selwer denkt"

Wer so im Rickblick vun sich kann saache
-vun schwere unn vun gure Daache:
Dem fallts wohl leichter off Gott se baue
unn ihm als sei Weeche aavetraue
Do saacht `s sich e Stick leichter: "Mit all mei Sache
do werd´s mein HerrGott recht mer mache!"
Weil mit so Mensche an de Seit
do kummt mer besser dorch die Zeit.
So Mensche sinn en wahre Seeche-
Die b`schdärken uns off unsre Weeche,
demit es Leewe uns gelingt,
uns em Ziel entgeeche bringt:
e Leewe mit Sinn, wu nit vegeht
wu nit - wie d` Sprei- im Wind veweht

"En Mensch in seim Herz sich de Weech ausdenkt
unn wie er sem Ziel hii sei Schritte lenkt;
doch steht nit alles in seiner Macht"
Des esch`s was uns die Biwwel sacht:
Sie dut uns awwer aach noch saache,
daß Ve`antwortung mer traache:
Daß Gott uns unn aller Welt
sein gure Weech vor Ääche stellt
wie vor`m HerrGott als Mensch mer leewe kann:
Kind unn Greis -Frää unn Mann:
unn mer acht off sei Gebot
wu er uns Mensche gewwe hot
Mer sinn vekaaft unn sinn verrote
wu mer nit acht off sei Gebote-
wu off sein Weech mer nit sehn
unn nit den gure Gottes-Weech gehn:
So wie es Jesus uns beschreibt
demit mer nit ins Uuglick treibt

Unn doch esch`s so, daß mer kennt männe:
Die wu de Wech vun Gott nit kenne-
orrer wu ne kenne unn nit beachte:
die weern als glicklich ze betrachte:
Weil `s dene an gar nix scheint`s fehle dut
Dene geht s ìmmer -scheint`s- bloß gut,
wu sich um selwer drehn:
wu gar iwwer Leiche gehn
Die wern vun aller Welt geacht!
Der esch als hätt er`s Glick gepacht:
Der wu hot e große Gosch
sich offbloost wie en Ochsefrosch
Unn der esch groß in aller Welt-
wu die Macht hot unn `s groß Geld:
Und du bischd so manchmool wie`n Worm
wu sich -getrete- ringelt am Borm-
Du reibschd dich an de Welt ehre Schlechtigkäät
sehnschd dich nooch em Stick mäh Gerechtigkäät
weil `s am needische Aaschdand fehlt
unn die Menschlichkät nix zehlt
Des kann em schun de Sinn vewirre
sogar im Glaawe em beirre.

Nit annerschd war`s, ehr liewe Leit,
schun in alder Biwwelzeit:
En Mensch, wu mit Gott sein Wech will gehe
unn dut all des Iwwel sehe:
Der muß oft nei sich oriendiere
daß er nit`s gure Ziel muß fer sich veliere:
Unn dozu esch unser Psalmwort gut:
Es macht zem Leewe neie Mut:
Daß mer Gott sein Weech -den gure- beschreide
aach in dunkle, schwere Zeite:


So mancher hot`s schwer- muß sich schwer plooche
unn muß sich immer wirrer frooche:
"Ei, was sinn dann des fer Sache!
Wie? Gott - werd`es recht der mache?
Des sell gelte meer unn heit?
Fer dich unn mich unn alle Leit?
Ob jung ob alt -ob Frää ob Mann:
Des sell veschdehe, wer will unn kann"

Wer so sich mit seim Leewe ploocht
unn wer so noochdenkt unn so froocht,
Der braucht sich doomit nit se schemme:
Mer dun all gut draa, wahrsenemme,
wie unserer Psalmwort nit vorschnell saacht,
" daß unsern HerrGott es recht fer dich macht"

Wann unser Psalm den Satz do waacht
do esch`s nit uhne Iwwerleechung- so ääfach hii`g`saacht:
Do werd nit billig- fromm e Sprichel gedicht
off des mer besser grad vezicht-

Wer määnt, mer hett fer Sunne-Stunne
do ääfach fromme Worte gfunne -
wu nit aach gelten in schwerer Zeit
der hot sich geschnerrt, ehr liewe Leit!
Wer`s so määnt, machts sich gar ze leicht
unn hot sich grindlich drin gedeicht:
Der Mensch wu`s domols hot gedicht
gar alphabethisch ausgericht
hot sei Psalmgebet nit ääfach so dohiigebrabbelt
nit ääfach so bloß noochgebabbelt
Dodraus, do sprecht e Menschenlewe
mit all seim Hoffe- all seim Schdreewe
mit manchem Kampf unn manche G`fahre
-en Mensch wu manches hot erfahre:
off de Such noch me Leewe, wu gelingt
voll vun Heehe und Diefe, wu `s mit sich bringt.

Wers annerschd määnt, hot sich -wie gsaacht- gschnerrt
unn hot sich grindlich drin geerrt:
Man muß bloß des Psalmwort in seim Sammehang lese
do sieht mer wie en Mensch do -in seim innerschde Wese
verwund`t und verletzt- sein Kummer -sei Not
sein Zweifel auschütt` im Gschbräch mit seim Gott
Vor Gott bringt de Dichter ve`zweifelt sei Klage
- unn was en beweecht -des dut er`m mit saache-

Wer den Psalm im Ganze beacht
unn von doher des Wort mool genauer betracht
sieht vor sich en Mensch, wu hot Uurecht erlitte
unn hot mit seim HerrGott vezweifelt g`schdritte.

Unn des esch`s, was ne bedrickt so sehr:
Es wiegt all sei Leide doppelt schwer
wann er bedenkt, wie er sich däglich muß plooche
unn die Mensche, wu nooch Gott nit frooche
sich bloß scheint`s sunne in ehrm Glück , -

Unn wie er so blickt off sei Leewe zerick
dut aach des von de annre betrachte:
vun dene, wu Gott- und d` Mensche verachte,
vun Mensche, wu saachen "uhne mich"
unn sunschd noch machen große Sprich:
fer die Friede- Gerechtigkäät- die Schepfung nix zehlt
unn aach nit de Mitmensch- vun Sorche gequeelt:
Wie die scheint`s erlewen bloß Glick unn Frääd
wu nit sich scheeren um d` Menschlichkäät:

Des raubt `m grad schiergar de Schlummer:
Er kann faschd nit schlofe - vor Zorn unn Kummer
Des esch`s, was ne nit recht loßt schloofe:
daß mer so uugeschdroft derf Liege stroofe
die Herrschaft von seim Herr unn Gott,
-unn mer`n mißacht - veheent- vespott
statt daß mer`m vertraut in Frääd unn Sorche,
unn beim bleibt- was aach kummt- fer immer geborge
So manches esch ääfach nit gut unn nit recht:
So manches, wu sichtlich degeeche sprecht,
daß Gott sei Lieb und Gott sei Macht
iwwer uns, de Mensche, wacht:
Daß Gott es letzte Wort werd spreche
iwwer d` Mensche ehr Ve`breche
seit de Menschhäät ehrm Beginn
iwwer Wahn- und Widersinn.-
So viel esch em doch bei seim Schaffe unn Schdreewe
so als begeechent uff em Weg vun seim Lewe
vun dem, was auch uns dut widerfahre,
Krankheet- Not unn annre Gfahre
-unn aach so manchi Schlechtigkäät
wu siecht- statt de Gerechtigkäät:
Viele beese, uugure, schlimme Sache.
Die kennten em grad läädisch mache:

Unn doch loßt der sich nit vewirre
unn am End sich nit beirre
weil er "trotzdem" saache dut:
unn "Ich vetrau". "Gott määnt es gut"
"Ich heer nit off -off Gott se baue
Du mich meim HerrGott aavetraue
aach wann mein Weech fiehrt dorch Dunkel unn Nacht
unn ich nix spier vun Gott unn seinre Macht"

Gut wammer sich des se eige kann mache,
was do im Gebet sich de Dichter dut saache
geeche alle Zorn unn Wut
was em faschd raubt de Leewens- Mut.
Unn `s sinn mit -unn nooch- `m so viel Leit
wu in manch bedrängter Zeit:
wu mit dem Fromme vum Alde Teschdament,
wu beim Name mer nit kennt,
geeche alle Menschspott
ehr Vetraue setzen in Gott:
Unn des aach bis jetzt unn heit:
Jurre-Mensche - Chrischdeleit
- aach dodrin uubeiirt bestrebt,
daß mer nooch Gott seim Gebot als lebt:
unn die Lieb am Neichschde iebt,
wie mer sinn von Gott geliebt.
Des esch doch needisch alle Zeit
-weer needisch aach grad jetzt unn heit:
Das mer meid, was schlimm unn schlecht esch
Dut, was gut esch unn was recht esch-
wu mer was bessre kann, do hannelt,
weil `s needisch esch, daß so manches sich wannelt
Daß mer`s Gude so duut waache
Unn des traacht, was mer muß traache
Unn -mit Weishäät- zwische beide
lernt se trenne- unnerscheide
Drumm: "Gebb nit off- du uuvezaacht hoffe-
Du, was recht esch unn bleib offe
fer den Neechschde in deim Herz
fer sei Frääd unn fer sein Schmerz:
Bleib offem Weech vund`Gerechdigkäät
unn trotz so de Schlechtigkäät!"

Daß mer des Ziel nit veliere deet
des esch mit Recht unser Wunsch unn Gebet:
Herr -Gott, weis mer in meim Leewe die Weeche
Schenk mer doch dein gettliche Seeche

"Loß deer mich mei Wege aabefehle
-alles, was mich schmerzt, dut queele-
deer wu d`Erd, de Himmel lenkt
deer Gott, wu an mich -liewend- denkt
Du Gott, regier, ich ve`trau deim Walte,
du mei Vetraue zu Deer hii erhalte:

Mei Not zum Gure mer hiiwend
Unn setz meim Kummer so en End
Deer kann ich alles, alle saache
Laß mich zu der `s Ve`traue waache!
Dei liewend Herz, des steht mer offe
Loß mich nit vezweifle, loß mich uuverzagt hoffe!

Bleib bei uns mein Herr-Gott, off alle Wege,
Bleib bei uns mit deim gure Sege,
Mit aller Not, Herr, mach e End
stärk unser Fieß unn unser Händ
stärk uns in aller unsrer Not;
und loß uns Deer trei sei bis zum Dood

Geleit uns mit deim gure Seeche
geh, Gott, mit uns off unsre Wege
immer unn ewig- unn jetzt unn heit:
Geh mit uns durchs Leewe - durch die Zeit
So sell es sei in Jesus seim Name(n).
Heer mich, mein Herr-Gott. Amen. Amen