do wemmer offs biblische Wort heit lausche-
uns bsinne iwwer unser Leewe-
off des, was `s wert esch, daß mer`s erschdreewe-
heit, wu mer feiern mit viele Gäschd
am Be`llplatz wirrer es Blierefeschd-
unn feiern an Pingschde wie in Land unn Stadt:
daß die Kerch Gebordsdaach hat:
Die Kerch sinn
mer all- wu mer Chrischde uns nenne-
sofern mers
aach sinn unn uns bekenne
zume Leewe aus
Chrischdus seim Geischd unn Sinn
so wie es war
vun Aabeginn
Was esch ze
winsche de Kerch, wu mer feire
Bessres als
des: Gott meecht se erneire
unn aach uns
und unser Handle
daß alles
sich meecht zum Gure hii wandle
so daß
mer weern e Gemeinschaft mit Herz
wu enner mim
annre fiehlt Frääd unn Schmerz
unn wu änner
de annre wertschätzt unn acht
Doch wammer des
mool recht betracht:
wie schnell
als dut mer sich zerstreite!
Unn dodrunner
muß die G`meinschaft leide-
unn des esch
dann fer alle schlecht.
Fer`n Chrischdemensch
gelt `s erschd recht-
Es sell kenner
off Koschde vum annre glänze
Mer sell sich
ferdere unn ergänze.
Des esch was
uns Paulus- de Aposchdel - schreibt-
daß de
Sammehalt unnerd` Mensche erhalte bleibt.
Er schreibt`s
in seim erschde Brief nooch Korinth,
wie mer ne in
de Biwwel drin find-
Dort wemmer
es zwelfte Kabiddel betrachte
es ganz nei
heere unn sei Botschaft beachte.
Warum de Paulus
den Brief do schreibt?
Er will daß
die G`meinschaft erhalte bleibt.
Und die bleibt
ganz bschdimmt nit erhalte
wann Zweetracht
dut die Mensche spalte
Es war dort
so viel schief geloffe:
daß de
Paulus war dief im Herz drin bedroffe-
Drum schreibt
er ne dringlich, mer meecht doch beachte,
was de Sammehalt
ferdert- unn mer mecht noch dem trachte,
wie mer minanner
die Zweetracht dämpft
unn um Ee`tracht
ringt- um Veständigung kämpft.
Nadierlich: die
Mensche sinn unnerschiedlich
Mer kann nit
immer schiedlich - friedlich
unn uhne Konflikte
es Leewe beschdehe
Mer muß
dorch manche Krise gehe
unn es loßt
sich nit vemeide,
daß mer
aach kämpfe muß unn streite
Doch wammer
uufäär kämpft- esch`s schlecht
do werd mer
nit dem annre unn sich nit gerecht
Die Biwwel selbschd
-wer will`s beschdreide
sprecht glei`
schun off de erschde Seite,
wie des sieht
uns Mensche ähnlich
daß mer
uuääns sinn gewähnlich
sinn vestritte
noch unn noch
finnen kä
gemeinsam Sprooch-
vezehlt aach,
was de Mensch in seim Iwwermut
sich so alles
leischde dut
Wie de Mensch,
wu sich selwer vegetzt
in seinre Macht
aach sich grindlich veschätzt
unn dovuu, wie
die Mensche leiden
wann se sich
bekämpfen- streiten;
unn in Zweetracht
vun`nanner gehen
weil se sich
halt nit vestehen
Ehr kennen doch
die alt Geschicht
wu aus Babel
uns bericht
wie dMensche
um in de Himmel ze schaue
beschließen,
en riesische Turm se baue
en riesegroße
Himmelsturm
um de Himmel
se nemme im Sturm
Se wenn sich
erfille en Menschhäätsdrääm
Doch in de Himmel
do wachsen kä Bääm
"Mer wenn" -so
sagt mer - voll Selbschdvertraue,
"aus Zichelstää
en Turm uns baue,
mit dem en Name
mer sich macht
En Turm werd
gebaut- des weer doch gelacht-
so hoch - un
aach schtabil debei,
dann gugg 'mer
in de Himmel nei."
Aus Forschd hot`s
erschd neilich de Tremmels Paul
ganz nei vezehlt-
unn hot nit faul
die G´schicht
do so in Reime g´setzt,
daß jerer
gern sich draa ergetzt:
Vum Bau vezehlt
er, wie schnell der dut wachse,
unn wie de Herrgott
denkt sich: "Ach was! Faxe!
Die Kerl, die
sinn jo glaab meschugge,
die wenn wohl
in de Himmel gugge,
des deht mer
jetzt jo graad noch fehle,
waart, denne
werr ich was verzehle! "
Ehr kennen all
doch die alt Geschicht
wie se die Biwwel
uns bericht
vun de Mensche
unn ehrm Iwwermut
unn wie de Herrgott
sich iwwerlege dut,
wer er ne des
werd grindlich versaue.
daß mer
deet so en Himmels- Turm baue.
"Ab heit gebt`s-
so wehr ich dem Uuvestand
e anner Schprooch
- fer jedes Land!"
Un werklich
- schunn noch korzer Zeit,
do redden all
die viele Leit,
daß kenn
's de anner meh verschteht
un so der Bau
nit weiter geht.
Schunn lang
is do der Turm verdorwe,
Die Leit vun
doomools sinn längschd schunn g'schtorwe,
Doch aach heit
bauen mer Türm - wer wääß wie hoch
un finnen kee
gemeinsam Schprooch.
So sacht`s de
Tremmel Paul- sinniert
do driwwer still
-ganz resigniert:
"Ich glaab net
- dass es je gelingt,
en Turm der
bis zum Himmel dringt.
Dann dofor wär
Voraussetzung,
daß jeder
redd mit gleicher Zung.
Doch dovun simmer
weit entfernt,
meer henn halt
scheinbar nix gelernt!"
Wann mer des
do so dut beklaache
fer unser Zeit
unn unser Daache:
Ich denk hot
mer so uurecht nit
denkt mer mool
nooch do Schritt fer Schritt:
Mer sinn zwar
in de Technik weider
-ob mit ob uhne
Gaschdarweiter-
unn Wolkekratzer
baun mer heit
Mer baut sogar
in unsrer Zeit
Rakete, wu zum
Mond gelange:
Doch mi`m Friere
aasefange,
de Hunger bekämpfe
in de Welt
die Kranket-
do fehlts doch an Wille un Geld!
Daß mer`s
so deet weirer dreiwe
unn alles deet
beim alde bleiwe:
des esch, ehr
Leit, nit de gettlich Wille
wu sich dodrin
dut erfille:
Des kann ich
eich aach nit veheele.
Drum dut die
Biwwel uns vezehle
nit bloß
vun Bawel unn seim Himmels-turm
sie redd aach
vum Pingschde, vun Feier unn Sturm
vum Pinschdgeischd,
wu die Mensche wannelt
so daß
mer in Sinn vun Jesus hannelt
Es esch e Hoffnungsbild-
die Geschicht
wie se Lukas
uns bericht,
vun Feierzunge-
Sturmgebraus
wu erfillt es
ganze Haus
wie vun Gott
die Himmelskraft
unner uns de
Glääwe schafft
so daß
es Leewe nei gelingt,
uns Zukunft
unn uns Hoffnung bringt
Es packt do die
Jünger en frische Schwung
Voll Feier unn
Flamm unn Begeist`rung
En frische Wend
jetzt bei `ne weht
unn all ehr
Ängschdlichkäät ve`geht
Unn des spiern
all die Leit -die viele Gäschd,
wu dort sinn
in de Stadt beim Feschd.
Unn was des
Pingschde mit sich bringt
esch daß
de Funke iwwerspringt
Unn alle Welt
sich do driwwer wunnert.
wie`d Gottesgeischd
d`Mensche belebt unn ermunnert
unn wie mer
ganz nei lernt sich se vestehe
unn Wege vum
Friede minanner gehe:
weil Mensche,
wu de HerrGott im Herz drin erreicht
die leewen in
Jesus seim Sinn unn seim Geischd
Daß mer
nooch Gott seim Wille deet leewe:
dodroff recht
aach de Paulus sei Schdreewe,
daß mer
weern e gure Gemeinschaft mit Herz
unn uns vestehn
in Frääd unn Schmerz,
weil Gott sein
gure Geischd uns treibt.
Drum d`Paulus
in seim Brief uns schreibt:
"Wann Gott mit
seim gure Geischd uns lenkt-
dann hot ers
zum Nutze vun ne all sich gedenkt "
"Froocht nooch
dem, was offbaut unn erlabt-
saacht do de
Paulus- weil Gott uns begabt-
uns all mit
seim Geischd- mit seiner Kraft,
wu in uns de
Glääwe schafft.
Drum häßt`s
- statt stumm se resigniere-
sich aus em
Glääwe engagiere."
Unn des gilt
aach bis heit, daß mer nit resigniert-
daß mer
als Chrischd sich engagiert-
sich stark macht
fer des, was die Schepfung bewahrt-
was em Friede
dient- unn an Kräfte nit spaart,
wann es gilt,
de gettlich Wille,
was Gott uns
sacht- aach se erfille.
Do packt mer
zu- lebt couraschiert,
wu Gott sein
Geischd uns lenkt unn fiehrt.
so daß
mers Gure meechten waache
unn die Lieb
im Herz drin traache.
Freilich: die
die Mensche sinn ar`ch ve`schiede
unn so aach
die Gawe, wu Gott uns hot b`schiede
Doch wohr eschs-
die gure Gotteskraft-
des was sein
Geischd do in uns schafft-
will nit bloß
uns stärke im Selbschdvetraue-
des will die
G`meinschaft ferdre unn baue.
Wann Gott mit
seim gure Geischd uns b`schenkt-
dann hot ers
zum Nutze vun ne all sich gedenkt
Unn weil es
an Gabe dut werklich nit fehle,
fangt de Paulus
jetzt aa, se mool offsezehle:
Die Weishäät,
die nennt er - Erkenntnis vun Gott.
Kraft im Glääwe-
es Helfe in Not.-
Kräft wu
heilen- unn manch en ermunnert,
wu Dinge wirken,
iwwer die mer sich wunnert.
Er sprecht vum
Lobpreis mit begeischderter Zung-
unn dem, wu
erklärt die Begeischderung-
Er nennt gettliche
Weisung unn klare Sicht-
wu dem Menschekind
helft, wu sich denooch richt-
unn er weist
hii off des klärende Wort
zude rechte
Zeit unn am rechte Ort.
"Es hot jerrer
sei Gab unn s werd jerrer gebraucht-
unn ke Gab isch
so, daß se nit zu was daucht-
Gelt des nit
heit aach unn fer unser Zeit-
wie in Korinth-
fer jetzt unn heit?:
Unn s` braucht
kenner sich unn sei Gab veschdecke-
was in uns steckt,
des gelt`s, se entdecke:
De ääne
loßt imme Chor gern sei Stimm als erklinge-
lobt Gott mit
de annre- mit frohem Singe
enn annre wend
sich zu mit re Riesegeduld,
dem wu sich
rumploocht mit seiner Schuld-
Der hot e gut
Herz unn en off`nes Ohr
En annrer esch
bekannt devor,
daß er
bei Diakonie unn Brot fer die Welt
nit geizt se
helfe mit Gut unn Geld-
Enn annre wu
hadert unn sei Schicksal beklaacht,
find Troschd
unn Veschdändnis- en Mensch wu`n traacht.
En annre richt
schlicht als en Blummestrauß
unn schmickt
mit aus es Gotteshaus
Mancher zeicht
sei Talent im Backe vun Kuche-
unn jerer will
en gern vesuche.-
weil d` Lieb
bekanntlich geht aach dorch de Maache.
Der wäß
sei Gedanke klar vorsetraache-
unn hot aach
es Herz am rechte Fleck-
Der hot Händ
wu zupacken- unn die schaffen was weg!
Der veschdeht
unner de Mensche Bricke se schlache-
helft ne so
sich vesehne, sich als se vetraache.
`s derf jerer
fer sich sei Stärke entdecke.
Unn`s muß
kenner mit seiner Gab sich veschdecke.
An Gabe fehlt`s
nit- in macherlei G`schdalt
schenkt Gott
dorch sein Geischd, was d`G`meinschaft erhalt.
Damit mer sich
des gut kennt merke
unn um uns dodrin
se beschdärke
hot`s de Paulus
in e Gleichnis-Bild g`faßt-
Vom Menscheleib,
wu alles recht sammebaßt.
Off die Organe
kummt`s an, daß die sich ergänze-
Do kann käns
off Koschde vum annere glänze
Uumeechlich,
wann do ääns sich geche` s annre profiliert,
unn dobei so
e Spektachel vollfiehrt,
daß de
Mund so zum Beispiel lautstark macht kund
"wichtig bin
ich- bloß ich, ich de Mund!
Unn dodruff
es Ohr- frisch-frech- nit faul
" Halt doch
dei Gosch`, du dummes Maul
Ich saach der
wie`s esch: ich, ich, es Ohr,
off mich - mich-
kummt`s aa- meer macht kenner was vor
Unn wann dodroff
vielleicht deet saache die Hand-
ich, ich allää
bin vun edelschdem Stand-
Unn de Fuß
druff- Ich, ich kann bloß gehe
Um mich `rum
sell kinftig sich alles drehe!
Was weer mit
so` m Kerper- wann`s so bei`m weer?
Genauso hot
jerer sei Offgab - sei Ehr -
sein Platz,
wu er muß sich voll ei`bringe
mit sein`re
Begabung. Bloß so kanns gelinge!
Unn iwwerall,
wu mer minanner sich streit-
-aach wu ääner
im Stille de annre beneid-
do mään
ich- mißt mer in Ruh mool betrachte
was Paulus uns
saacht - unn`s aach beachte.
De Karre esch
schnell in de Graawe rei g`lenkt,
wann jerer an
sich selwer bloß denkt.
Doch wammer
im Sinn vun Jesus all hannle,
wie kennt do
die Welt unn es Leewe sich wannle!
Unn des breicht
doch unser Zeit
unn `s braucht
Mensche jetzt unn heit:
wu weerdaachs
wie sunndaachs nooch dem streewe,
was zeehlt unn
wichtisch esch im Leewe:
`s braucht Händ,
wu sem helfe sinn bereit,
wu zupacke dun
zu de rechte Zeit;
En Mund, wu
kann fenne des richtige Wort
unn still aach
kann schweige am rechte Ort!
E gures Wort
mer so neetisch doch hot,
Veständnis
aach unn gure Root
Daß unser
Fieß uns Weeche fiehre,
wu nit sich
im Uurecht, im Dunkle veliere;
Gut, wann mit
hellsichtige Aache mer sehn,
off die Mensche,
wu schwere Weche gehn
Mer braucht
doch en Mensch, wu än begleit
doch grad in
kritischer, schwerer Zeit
Gut, wammer
mer achthot mit offne Ohre
offd`Mensche,
wu sich fiehl`n velore
-off Mensche,
wu in unsrer Mitt-
unn off ehr
veschämte Bitt
unn sich eifiehle
kann- zu de rechte Zeit
in`s Denke vum
annre- aach bei schwierige Leit;
Unn daß
e gures Gedächtnis mer hetten,
wann annre ehr
Sorge uns saache deeten;
unn die Lieb
vun Gott uns im Herz drin regiert`,
wu uns stitzt
unn halt unn zem Gure hii fiehrt-
Des esch`s,
was unser Welt doch breicht:
Daß de
Gottesgeischd uns all erreicht
uns -ob mer
jung sinn orrer alt-
unn die Lieb
uns zammehalt.
Gott will doch,
daß mer meecht zunanner finne-
unn off des,
was uns äänich macht uns all b`sinne.-
Unn wammer minanner
um die Wohret dut streite-
was sich wohl
nit immer loßt ganz vemeide-
do sell`mer
nit des aus de Ääche veliere,
wie Gott will
uns Mensche all zunanner fiehre.-
Ob Katholik,
ob Prodestand
iwwerall, in
jerem Land:
Es sinn die
all ääns, wu offs Christuswort heere
Was uns unnerscheid,
muß dann uns nit steere!
Minnanner sellmer
in uns`re Daache
zu mäh
Menschlichäät beitraache
zum Wohl vun
de Welt unn in Jesus seim Sinn
so wie es sei
sell vun Aabeginn.
Unn drum esch`s
aach, daß de Paulus zum Schluß-
schreiwe will
unn schreiwe muß:
"Wann alles,
alles muß vegehe,
esch es die
Lieb, wu bleibt bestehe-
Es Glääwe
unns Hoffe - es sinn die drei-
doch die Lieb
esch`s aller-heichschd debei"-
Meecht die Lieb,
wu vun Gott kummt, uns Mensche begleite-
an unserem Ort
unn dorch die Zeite,
so daß
dann richdisch Pingschde werd
bei uns unn
iwwerall of d`Erd
Meecht aach
durch uns unn unser Hannle
sich die Welt
zum Gure hii wannle!
Daß des
unner uns so geschehe deet
esch unser Wunsch
unn unser Gebet
So sell es sei-
in Jesus seim Name(n).
So sell es sei-
drum sach ich: Ame(n
