Lukas 14

s Leewe, wie ä Feschd, wu sell gelinge

Am Bellplatz- unner de Keschdebääm
grieß ich gern die, wu do dehääm
im goldene Schmuckkästche vun de Palz
unn all die Leit, wu saachen: Meer g'fallts
unn drum in Rhodt, bei uns sinn Gäschd
unn mit uns feiern s Gemeindefeschd.
Weils Werrer so esch, wie es sell
so brauchen mer nit in die Turnhall nei.
Ich winsch dem Feschd, daß es gelingt
unn aach äm jedem ewwes bringt:
Wammer Zeit uns nemmen beime gure Glas Wei
minanner vezehlen unn freelich wenn sei.
Awwer zuerschd wemmer mit Junge unn Alte
minanner den Gottesdienst gestalte
lossen in Pälzer Mundart uns s biblisch Wort saache
-froochen, was es bedeit fer unsere Daache
heern, daß mer all weern zu me Feschd gelade
zu dem Gott selwer uns ruft; unn wies weer unser Schade
wammer nit druff heern, wammer sei Rufe mißachte.
Die biblisch Botschaft wenn heit mer betrachte
-so wie es bei Sankt Lukas dut stehe.
Im verzehte Kabiddel kammer dort sehe,
wie Jesus esch do gelade zum Mahl
-gelare zem Feschd in de große Saal
vumme vornemme, reiche unn fromme Mann,
wu so ä Feschd sich aach leischde kann,
wu nit wie so annre muß leide groß Not.
Bischd heit mein Gaschd! Eschd bei meer heit s Brot!
Dich, Jesus, lad ich ei! Duschd mich nit vegesse!
Kummschd zu mer zu Bsuch! Kummschd zu mer zum Esse!
Ich lad dich ei zu me gure Drunk
zum Feschddaagsesse, ich häb jo genung!"
Vum Hausherr viel Freinde dun aach dorthi gehe.
All wenn se beim mool dene Jesus do sehe.
Wie`s so beim zugeht, was ER so dut mache,
des wenn se sehe- off all so die Sache
wu do bassiern beim im ganze Land
dun neigierisch se laure, wie sinn se so gspannt!
Unn wie se so lauernd voll Neigier hi-sehe
do dut so än Mensch do zum Jesus hi-gehe
unn steht jetzt do vor em: ä Elendshaifel,
än aame Dropp, ganz uhne Zweifel
ganz hilflos esch er, nit lewensdichtisch
krank esch er schun lang- esch wassersichdisch.
Ä Menschekind, wu so ganz lebt im Schadde,
wu steert bei som Feschd fer die Reiche unn Satte.
Er gheert nit dezu, der Dropp, der aame!
Mer loßt ne grad stehn- so uhne Erbaame
'Derf mer- froocht Jesus- om Feierdaach
so-n Menschekind heile vun seiner Plaach?"
`s traut sich käner, dezu was ze saache.
So faßt Jesus den aa unn vun all seine Plaache
dut er ne heile- Loßt gsund ne fortgehe
unn er saacht zu dene, wu drumrum stehe:
Wer vun eich wann sein Ochs orrer Buu
fallt in de Brunne, guckt zu in Ruh?
Packt nit zu? holt'n nit ne schnell raus?.
Aach am Feirrdaach? Wer bleibt do im Haus?
Unn känner vunne dut es waache,
dem Jesus Antwort druff ze saache.
Se sitzen blamiert unn schweigen stumm
um de ganze Disch erum
Unn so sitzt Jesus bei en am Disch
beobacht die Leit, unn acht off ehr Sprich.
Er sieht, wie mer do als dut sich dränge,
wie so änner de annre drickt in die Enge:
Än jeder will do renommiere
unn jeder dut fer sich prowiere,
ob de Ehreplatz er kreecht.
Unn jeder gonz nooch owwe meecht.
Jeder will de Greeschde sei,
will de erschde Schluck vum Wei,
will vum Fläsch des beschde Stick.
Gonz owwe sei, des esch ehr Glick!!!
Wie Er do sieht, wie so als die Gäschd
nooch ein beschde Platz vum Feschd
sich do drängen, nemmt er s Wort,
ve'zeehlt grad am rechte Ort
ä Gleichnis vumme Hochzichfeschd,
zu dem mer ladt viel reiche Gäschd
Wie do s Feschd nit kann gelinge,
obwohls sell jedem ewwes bringe,
weil mer dort so renommiert
unn sich kräftisch aach blamiert
unn vum Ehreplatz muß weiche
wann als kummt än greeßre Reiche.
Unnehi setz dich- s esch nit dein Schade!
Dann kummt der, wu dich gelade
saacht zu deer:'Mei Freind, mei Schatz,
kumm hoch zu meer off de Ehreplatz!
Fer dich selln se den Platz do leere!
Kumm hoch zu meer! Dich will ich ehre!'
-Unn wer off ein Vordäl bloß spekuliert
unn sich selwer groß macht, werd blamiert.
Doch wer sich selwer nit iwwerschätzt,
werd off de Ehreplatz gesetzt!
Wer sei Schwäche nit kennt, hannelt schnell vemesse.
Drum sellschd dei Grenze nit vegesse!"
Unn zum Hausherr, wu ne gelade,
saacht er: Willschde zum Mittaach lade
deer dei Gäschd zu deer ind Saal
-orrer zum feschdliche Owendmahl:
Denk nit bloß on die Reiche,Satte!
Vegeß nit die Mensche, wu im Schatte!
Lad nit bloß Freinde ei unn Reiche
-Brierer Nochber, wu dir gleiche,
nit Vewandte bloß , aach Aame
lad zum Esse, häb Erbaame
aach mit de Krippel, Lahme,Blinde
wu sunschd kän Erbaame finde!
Aach wonn dirs käner kann vegelte,
sell mer doch dich nit drum schelte!
Unn sell dich glicklich- jo seelisch- preise!
Vegeltung will dir Gott erweise,
wann die Gerechte ufferstehe
Gott will dir Dank devor ersehe!
Als er noch so redd do im große Saal
vum feschdlich-große Owendmahl
-unn daß mer sell an die Aame aach denke
unn nit sich selwer bloß beschenke-,
loßt äner fer sich des so nit ganz gelte,
unn dut sich glei zu Wort aach melde,
weil er sich denkt: DER Ehreplatz
esch unser, esch de beschde Schatz
fer alle Gure, alle Fromme,
wie meer, wu in de Himmel kumme.
De Ehreplatz esch uns dort g'wiß.
Meer hän ä Recht offs Paradies.
So dut er f asse sich de Mut
unn saacht än Spruch, wu recht unn gut:

"Seelisch werd sei unn uuvegesse,
wer bei Gott in seim Reich des Brot derf esse!"

Unn nochemool sprecht Jesus vum feschdliche Mahl
am Owend fer viel Gäschd im Saal
-vumme Feschd, wu mer hofft, es meecht gelinge
unn deet äm jedem ewwes bringe
Er redd -vumme Mensch, unn redd doch vun Gott,
den mer vegißt im däägliche Drott,
wie mer vegißt sich zu erbaame
in de Not iwwer de Aame.

Die G`schicht fangt gut aa, doch werd mer sehe,
wie se dann dut weirer gehe:
Än reiche Hausherr dut do bedenke,
wie er sei Freinde all kennt beschenke:
Ich mach än keschdliches Owendmohl,
eich lad ich ei, in de feschdliche Saal!
Ehr sinn gelade, ich bin so frei!
Ihr sinn willkumme- sinn mit debei!
Ich gebb mer die Ehr unn aach eich will ich ehre!
Unser Fräd, unser Feschd sell gaanix mäh steere!
Mit eich will ich feire des große Feschd!
Ihr all, mei Freinde, ihr sinn jetzt mei Gäschd!

Schun frieh hot er se all gelade,
doch was jetzt kummt, dodrum esch s grad schade:
Wie es so langsam zum Feire werd Zeit,
loßt er ne saache: s esch jetzt alles bereit!
Gericht't esch schun de große Saal!
Jetzt feiern mer ä keschdliches Owendmahl`!
Doch als er schickt zu en sein Knecht,
do esch es käm vun dene recht:

Gern wellt ich mit meim B`such dir huldige,
doch muschde leider mich entschuldige!
Mein Acker muß ich meer besehe,
wu ich grad käft häb, kann drum nit gehe
zu dir, zum große , schäne Feschd!
Ich winsch der dozu s Allerbeschd!
Doch muß ich leider druff vezichtel
Des sagschd deim Herr- des du ein berichte!
De zwäte, jo der loßt em saache,
daß ne jetzt annre Sorche plaache:
Zeh Ochse wollt ich grad jetzt mer bsorche,
wie mer se braucht fer hunnertachzich Morche!
Die Ochse muß ich jetzt mer bsehe!
Kann jetzt nit mit der zum Felre gehe!
Gern weer ich kumme zu deiner Ehr!
Doch gehts nit unn mein Platz bleibt leer!
De dritte vun de viele Gäschd
bleibt aach dehäm, geht nit zum Feschd.
"Ich bin ve`hinnert, kann nit kumme!
Du wäschd, ich hebb ä Frä genumme."

Unn änner noochem annre dut so absaache.
Ach, was dut des de Huusherr plooche
"Um mei Feschd, wie esch des so schade!
Ich häb se all doch so frieh schun gelade!
Zum Feschd esch alles jetzt bereit!
Jetzt esch es grad zum Feire Zeit!
Brot unn Wei unn Obschd unn Fisch,
Fläsch unn Worschd stehn offem Disch!
Doch wills jetzt känner mit mer esse?
Hän se mich grad all vegesse?
Will känner dann kumme vun dene alle?
Ja, sell dann mei Feschd glatt ins Wasser falle?
Dun se mich all dann so mißachte?
Bloß noch nooch annere Dinge trachte?
Alles annre esch ne- ach! doch so wichtig!
Esch ne mei Ehr dann grad null unn nichtisch?
Doch s gure Esse sell nit mer ve'derwe
solang noch Mensche vor Hunger sterwe!"
So dut er im Zorn sich rufe losse
aus de Ecke, aus de Strooße
all die Aame, wu mer hot vegesse.
Die selln jetzt schnell kumme- zum gure Esse.

Unn so hot er seim Knecht befohle,
er sell schnell aus de Stadt sich hole
alle Bettler, Krippel, Lahme
unn die Blinde unn die Aame.
Sie weern gelade heit zu seim Feschd
sie weern jetzt grad sei liewe Gäschd!
Gradis weern se zum Feschd beim gelade
weern freindlich willkumme- mit Lieb unn mit Gnade!
Unn zum Feire weers jetzt grad die Zeit!
Alles, alles weer bereit!
-So sellt er jetzt zu alle saache,
wu sich mit Not unn Elend plooche.

Ach, wie frän die sich, wie doll!
Doch de Feschdsaal werd nit voll!
De Hausherr dut seim Knecht offtraache,
er sell es weirer unn weirer saache!
Weil noch viel Platz weer im feschdliche Saal,
sellt er weirer noch lade zum keschdliche Mahl.
"Geh jetzt offs Lond, geh raus aus de Stadt,
geh dorthi, wu s viel Mensche hot,
aach an die Landstrooß- on die Hecke
-Hol aach die, wu sich velstecke!
Iwwer all die Leit, die aame
will ich so mich jetzt erbaame!
Doch vun dene, wu mich hän so ve`gesse
känner sell mäh mit meer esse!"
Soweit vun Jesus die Gleichnisgeschicht,
wu er beim Gaschdmahl do hot erdicht't,
damit se all mol in sich gehen
unn sich mit neie Ääche sehen:
ä Gschicht vum me Hausherr-ä Geschicht aach vun Gott,
den mit seim Leewe mer so leicht macht zu Spott
vun Gott, wu aach heit noch loßt ruf e in Gnade
-wu däglich uns ruft- loßt uns däglich eilade
vun Gott, den mer vegißt zum eigene Schade,
obwohl er uns zum Feschd dut lade -
vun Gott unn seim große gettlich Erbaame
den mer vegißt, so leicht wie die Aame.
Nemmen mer sei Rufe fer uns werklich wichtisch?
Orrer dun aach meer so,als weers null un nichtisch
Lossen mer uns vum, wann es not dut aach steere?
Dun mer sei Rufe aach werklich heere?
Heern mer des Wort vun de Umkehr zum Leewe?
Dun mer uns b'sinne- noochem Rechte aach strewe?
Mit neie Gedanke unser Leewe betrachte?
Orrer sei Rufe- sträflich- mißachte?
Heern mer sei Botschaft- heern mer druff richtisch?
Orrer esch uns bloß anneres groß unn wichtisch?
Heern mers:wie Gott unser Heil liegt am Herze!
Unn daß mers nit aus Leichtsinn velscherze!
Denken mer bloß dran uns dorchs Lewe zu boxe?
`s missen bei uns nit Äcker unn Ochse,
die Frää sei, de Mann- unn unser Vegnieche
wu uns so arisch om Herz do dun liche
nit bloß de Wei uns gure Esse,
bei dem mer de Hergott dodal dun ve`gesse?
Die Ärwet unns Streewe nooch Gut unn Ehr
-de Eigesinn- unn vieles mehr
-Bequemlichkeit- kann uns ve`leite,
daß mer off sei Feschd uns nit vorbereite!
's hot jeder so sei schwache Stelle.
Ach, daß mer jo jetzt kän Urteil fälle
iwwer de annre, wu er ve`saacht!
Daß mer sich selwer mol ehrlich betracht!
Sich selwer mol froocht- unn in sich dut gehe
unn nit bloß beim annre die schwach' Stell dut sehe:
wie mer selwer sinn dääb als fer Gott unn sei Wort,
wann Er uns ruft an unserm Ort:
Wie mer blind sinn fer die, wu dorchs Lewe sich plooche
unn hänn oftmools grad fer uns selber noch Aache!
Wie aach bei uns of t Fieß unn Aarm
wanns gilt, ze helfe, sinn viel zu lahm!
Unn wie aach meer leicht vegesse: Gott will uns beschenke
uns lade zum Feschd- unn dun nit bedenke:
Er hot uns gerufe unn all unser Strewe
sell Umkehr zu Gott sei- Umkehr zum Leewe:
daß mer ve`antwortlich unser Leewe gestalte
um de Friede besorgt, daß er bleibt aach erhalte
-daß Ehrfurcht vor de Schepfung unn allem Leewe
uns bschdimme dut in unserm Streewe
daß die Lieb uns lenkt, wu de annere stitzt
unn nit bloß froocht: obs meer aach was nitzt?
-daß Gott uns all eiladt zu me Feschd,
wu gelingt unn jedem Fräd unn Gures bringt.
Meer sinn gelade vun Gott als sei Gäschd!
Meer selln debei sei- bei Ihm - bei seim Feschd!
Heern mers: die Geschicht esch bis heit noch gonz offe.
Meer sinn jo selwer mitbetroffe!
Unn drum heert mer aach heit noch vun Gott die Klage,
daß so wenig mit Ihm- echt- duns Leewe waache,
wie all, Mann,Frä unn Kind weern gelade
unn wie mers als ausschlaacht zum eigene Schade
Wie mer sei Rufe deet glatt mißachte
unn bloß nooch annere Dinge deet trachte
saacht-. "Deet schun gern,Gott dir huldige,
doch muschd mich -leider- halt entschuldige!
Häb grad im Moment fer dich kä Zeit,
bin speeter-vielleicht- fer dei Feschd bereit!"

Gott schickt jo bis heit noch in alle Stroße
unn will aach heit noch rufe losse
die Mensche all, wu mer so find,
wu aam, ve'kribbelt, lahm unn blind.
Er dut sei Bote aach heit noch sende
in alle Welt- an alle Ende,
hot aach uns minanner all offgetraache,
die gure Nochricht weirer ze saache:
Die Botschaft vun Jesus, wu Mut macht zum Leewe
des Wort, wu äm saacht: Gott will der vegewwe.
Mit Lieb nemmt er dich aa unn mit großer Geduld,
will, daß de dem annre vezeihst aach sei Schuld.
-Gott häßt aach uns off de Weech ze gehe
unn häßt aach uns nooch de Mensche sehe:
nooch alle Mensche, wu mer so find,
wu aam, vekribbelt, lahm unn blind
die wu mit ihre blinde Aache
nix sehne dun wie Laschd unn Plaache
wu, fer de rechte Schritt zu lahm
nit riehre kennen Fuß unn Aam,
sich ze helfe aus de Not
annre brauchen Hilf unn Brot
unn oft genung ä gures Wort,
damit en gholfe werd an ehrm Ort.
Unn iwwerall in Land unn Stadt
selln all die Miansche kriege satt
-alle Mensche, wu in Not
hungre dun nooch Recht unn Brot
nooch Friede hungren unn Menschlichkeit,
daß end die Uugerechtigkeit
-unn die, wu velsklavt sinn, unnerdrickt unn ve`knecht,
endlich kreechten mol ehr Recht
-unn daß mer endlich hett Erbame
iwwerall- fer alle Aame -
daß mer aach beischdeht, noh unn fern
iwwerall dem annre gern!

Was braucht mer dozu gure Ääche
fer all, wu suchen gure Weeche
unn Fieß wu gern zum annre gehn
unn bei em nooch em Rechte sehn
unn Händ zum Helfe stets bereit
am rechte Ort zu de rechte Zeitl
unn aach ä riesegroßi Geduld,
wu mit long froocht, wie groß die Schuld
-unn daß mer nit bloß redd vum Liewe,
daß mer am annre die Lieb dut iewe!
Mer braucht än gure Geischd-braucht Kraft,
damit des gure Werk mer schafft
unn nit vegeßt im dägliche Drott
de Ruf zum Feschd, de Ruf vun Gott
unn nit vegeßt sei groß Erbaame
fer groß unn klää -fer reich unn Aame.
Meer sinn sei Bote-- unn gelare zum Feschd!
Selln sei sei Rufer- gerufe als Gäschd!
Daß mer sein Ruf nit dun mißachte!
Nit bloß nooch Ehr unn Reichdum trachte!
Esch uns des annre bloß noch wichtisch,
werd schnell sei Wort uns null unn nichtisch!

Gott loßt uns rufe- sei Wort loßt er heere!
Meer wenn druff achte- zu Ihm uns kehre!
Meer sinn gelare zum feschdliche Mahl!
s hot Platz genung in seim himmlische Saal!
Daß mer sei Rufe doch bloß nit ve`basse!
Daß mer liewe dun unn nit hasse!
Unn weern im Herz drin fer annere offe!
Unn daß mer gläwen urn liewen unn hoffe!
Unn so Antwort gewwen off sei gettliches Wort,
wu uns jetzt ruft, on unserm Ort!
Donooch wemmer uns richte in unserm Streewe
umkehre zu Gott- uns hi-wende zum Leewe!
Unser Leewe derf wie ä Feschd sei, wu aach dut gelinge!
Uns all ladt Gott ei- Er dut bloß kän zwinge
Meer sinn aach heit dezu gelade!
Wammers ve'spielen eschs unsern Schade!
Meer sinn gelade in Jesus seim Name!
Gott waat off unser Jo unn Amen!