Ich lese diese Verse in einer ökumenischen Übertragung unserer Tage, der Gute- Nachricht-Bibel
Lk 10,38-42- Jesus bei Maria und Marta
38 Als Jesus mit seinen Jüngern* weiterzog, kam er in ein Dorf. Dort nahm ihn eine Frau namens Marta gastlich auf.
39 Sie hatte eine Schwester mit Namen Maria, die setzte sich zu Füßen des Herrn nieder und hörte ihm zu.
40 Marta dagegen war überbeschäftigt mit der Vorbereitung des Essens.
Schließlich trat Marta vor Jesus hin und sagte: »Herr, kümmert es dich nicht, daß mich meine Schwester die ganze Arbeit allein tun läßt? Sag ihr doch, daß sie mir helfen soll!«
41 Der Herr antwortete ihr: »Marta, Marta, du machst dir so viele Sorgen und verlierst dich an vielerlei,
42 aber nur eines ist notwendig. Maria hat die gute Wahl getroffen; sie hat sich für das unverlierbar Gute entschieden, das ihr nicht genommen werden kann.«

----------

Am Schießhaus, do im Rho`rer Wald
do esch e Plätzel wu mers g' fallt.
Ich frä mich jed' Johr off d` Rietania ehr Fest
unn du gern feire mit frohe Gäst.
Unn dort werd aach fer jung unn alte
wanns Werrer mitmacht- Kerch gehalte
Im Griene esch Kerch heit- an dem scheene Ort
dort wemmer heere offs gettliche Wort.
Unn hän aach denooch noch fernanner Zeit,
weil Esse unn Drinke genung steht bereit.
Heit kammer`s Koche glatt ve`gesse.
Es fehlt am Drinke nit unn Esse.
So kammer aach heit beime gure Glas Wei
minanner vezehle unn freelich sei.
Wer die ganz Woch als sei Ärwet schafft,
derf Ruh sich genne- Aus der kummt die Kraft
Die Ärwet esch bloß d' Helft vum Leewe
Drum esch fer die Ruh uns de Sunndaach gewwe.
Was weer, wammer nit als mol feire kennt?
Wann Daag fer Daag mer immer bloß rennt?
Wammer Daag fer Daag bloß schuft unn schwitzt
unn nit in Ruh aach mol sammesitzt?
unn mer dält die Fräd unn dält die Not.
wie de Wei mer dält unn`s Brot.
Gedääldes Leid esch halwes Leid
-so häßt es schun seit alder Zeit:-
unn daß vedoppelt sich die Frääd
wammer se doch dääle deet
Gut, daß mer aach Zeit hot, fer sich ze bsinne,
die Ruh aach hot, fer rauszefenne,
wie mer sei Leewe mißt geschdalte.
Wu mer zupacke mißt, weils ewe recht esch
was mer meide sellt, weils ääfach schlecht esch -
Wie needisch eschs doch, daß mer Pause als macht!
Drumm g'heert aach de Sunndaach nit ve' acht!
Wer nit sei Ruh sich gennt unn Fräd,
der aarme Dropp, der dut em läd.
Zum Werdaach muß de Sunndaach kumme,
sunscht weer was Wichtiges uns g'numme.
Mer braucht doch Zeit , fer sich ze bsinne
unn nei fer sich als rauszefenne
was zehlt bei uns in unserm Leewe
fer unser Hoffe, unser Streewe,
so daß mer zu sich dann als saacht:
"Des do esch gut, des werd gewaacht-
unn des esch schlecht- nit ze beschdreite
Ich will des Schlechte gern vemeide!
Des loßt sich bessre -des muß sich wannle
-off mich kummts aa unn off mei Hannle-
unn des muß ich trache, s loßt nit sich vemeire
-meecht recht dezwische unnerscheide!"
Unn drum werd als fer jung unn alte
Sunndaach fer Sunndaach Kerch gehalte:
damit mer heern, was Gott uns saacht
unn off sein gure Weech sich waacht,
aus Seim Wort als sich nei schepft Kraft,
mit der mer ewwes Rechtes schafft.
Damit mer nit bloß schafft unn rennt,
damit mer sich die Zeit mol gennt
fer froh ze sei unn mer sich ze bsinnt,
de rechte Weg dann aach beginnt
unn aach vun seiner Ärwet ruht,
sich nit bloß däglich plooche dut
unn nit bloß däglich sich schind`t unn queelt
dozu werd heit uns e G`schicht vezehlt
als die gure christliche Lehre
wie mer se bei St. Lukas heere -
Im 10. Kabiddel dut se stehe
wie jerer kann ganz leicht noochsehe
Von zwää Schwestre se bericht
unser biblische Geschicht
unn vun Jesus, wu in Betanie weilt,
Zum Marktplatz aach die Marta eilt.
Dort esch viel Volk: Die Nochberinne,
Bummler, Hännler, Wäscherinne,
aach leichte Mädcher, Strooßekehrer,
Gendarme, Baure, Schieler, Lehrer;
Aach Leit vum Zoll sehn Jesus gern;
Selbschd Rabbi Simon steht vun fern
mit Mardochai, dem Pharisäer.
Unn Jesus grießt se: "Kummt doch neeher!"
Die Kinnerles kummen aagerennt,
Off die leecht sechnend er sei Händ.
Erwachsene unn klänne Geere
wern still wie`s Maische, wenn ne heere.
De kluche Mann, die weise Frää,
unn aach die Kinerles so klää,
die schbitzen die Ohre, wern schdill, - ganz schdill,
weil jerer Jesus heere will.
Vum Liewe sprecht er, unn vum Brout,
vum Dääle unn vum nahe Gott.
Im Gleichnis stellt er vieles dar,
so werd es ne all sunneklar.
Mensche, geploocht vun schwerer Schuld-
denne wend`t er zu- mit rer Riese- Geduld,
So mancher, wu hot sei Lewe ve`fehlt,
werd los bei Jesus, was en queelt,
Fer jeren änzelne nemmt Jesus sich Zeit,
macht vun Schuldgfiehle frei- unn linnert sei Leid.
En Daawe - lange Johr geploocht
hot nooch Jesus voll Eifer gfrocht
hot ne verstanne, heert off sei Wort.
unn jerer ve`wunnert sich am Ort
Den Blinde hot Jesus aageriehrt,
Er lernt wirrer `s Seh(n)e wie er`ne spiert
Zum Lahme sprecht Jesus bloß e Wort
unn schun schmeißt der sei Kricke fort.
Er treeschd so herzlich- mitterlich,
vertreibt die Ängschd all väderlich.
So herrscht bei Jesus Lewe voll Truuwel,
Hoffe unn Zweifle, Staune unn Juwel.
Doch Marta denkt: "Der Mann muß esse,
Es Esse derf mer nit vegesse.
Dut doch Esse unn Trinke Leib unn Seel sammehalte.
Bei meiner Ehr: Do muß ich schalte:
Ich lad' ne glei zu uns ins Haus,
sonst stecht mich em Levi sei Sarah noch aus!"
Unn Jesus sagt rer dankbar zu,
denn nooch em Wirke braucht mer Ruh'.
>Rasch rennt die Marta em Jesus voraus,
macht sauwer noch fix Hof unn Haus.
Des isch ehr`n Stolz, daß ehre Gäst
se bietet nix wie`s Allerbest.
Mit Äämer, Lappe, Bese se handiert.
E groß Spektakel se vollfiehrt.
Was schafft se unn werkelt -unn se schafft was weg,
als weer ehr Haus voll Stääb unn Dreck
Fenschder butze, unn de Borm schnell noch wische,
frische Blumme off die Dische!
Unn se holt gar off de Stell
Wasser frisch weg vun de Quell,
weil, wann mer als drauße schwitzt
unn em die Sunn so ar`ch erhitzt
mer so richtig wohl sich fiehlt,
wann in Ruh sei Fieß mer kiehlt.-
Schnell vor die Deer noch die Wasserkriech!
Aach neie Kisse off die Liech,
Unn -ich wett:- sie backt noch Kuche,
-den sell Jesus aach ve`suche-.
In die gut Stubb se ne glei fiehrt
se selwer ab in ehr Kichereich schwirrt
Was klappert se mit Tepp unn Kanne,
riehrt Soße aa, erhitzt die Panne.
Se lääft zud` Kammer, in de Keller,
se odemt schwer, ehrn Puls werd schneller
Off äämol, do fallt ehr die Schwester ei -
Wo kennt die bloß die ganz Zeit sei?
Die sitzt derweil in aller Ruh
unn heert Jesus, dem Määschder, voll Aadacht zu:
Esch fer Jesus ganz Ohr, vegeßt ganz die Zeit
Unn wie es Heere se befreit!
Des Wort vun Gott, wu d`Mensche all liebt
unn will, daß d`Neechschedelieb mer iebt
Un wied` Martha noch klappert mit de Tepp am Herd
lauscht se de Botschaft vum Mensch unn seim Wert.
Se heere sei Wort -wie gut ehr des dut!
`s macht stark se im Herz drin und schenkt rer Mut!
Die Stub, ach die ganz Welt vesinkt
bis hart es vun de Kich her klingt:
"Ich kann des alles allää nit schaffe
ach Määster, kann des känner raffe?
Sag doch mool d`Marie, se sell schnell flitze
unn nit do bei deer so gemietlich rumsitze!"
Er hot b`schdimmt e Schmunzle unnerdrickt,
de Määschder, unn se aageblickt:
"Ach Marta, Marta, voll Fleiß unn Schwääß
willschde mer diene, wie ich wääß.
Du kannschd nit ruhe unn nit rasche,
nemmschd off dich immer neie Laschte.
hoschd ganz de Ärwet dich hiigewwe.
Kennschd nix wie`d Ärwet in deim Leewe.
Ich wäß dei Lieb unn Mieh ze schätze-
Doch du mer` d` Ärwet nit vegetze
als kennschd gar`s ew'ge Heil erwerwe
mit Ärwet, Ärwet bis zum Sterwe
Aach in de Drääm noch die Pflicht dich queelt,
froochscht do bekimmert noch, wu`s fehlt.
Guck, wie d`Marie nemmt sich Zeit!
Se esch wie vun rer Laschd befreit.
Bschimmt werd se jetzt aach- off Ehr unn Gewisse-
was Praktisches ze schaffe wisse.
Ä gure Ärwet esch ze schätze
Doch sell mer känner se vegetze.
 Bevor mer sich mit Laschde dut plooche:
Zeerst es Heere, Ruhe, Frooche
Des braucht`s doch, daß mer sich besinnt,
bevor sei Ärwet mer beginnt."
De Marta scheint`s, daß an dem Daach
ehr Welt fallt samme mit äm Schlag
De Ärwet war vun Kindheit an
dorch Pflicht unn Not se unnerdan.
War jetzt ehr Leewe manchi Streck
am End gar uhne Sinn unn Zweck?
Macht em Jesus sei Lehr am End gar bereit
zu d` Flucht in e bequeme Zeit?
Du Jesus gar d`Liederlichkäät unnerschditze
wu zu gar nix Gurem kann nitze?
Dut Jesus am End gar die Ärwet mißachte,
unn nit se als en Offgab fer en jeren betrachte?
Ach, d` Marta muß noch viel bedenke,
bis se dem Wort kann Glääwe schenke.
Doch wie noch Jesus die Marta belehrt,
kimmert sich d`Marie beschdimmt um de Herd.
Die Mahlzeit esch dann ball gericht.
unn voller Lieb werd offgedischt:
was mer find in Speicher unn Keller
Des bringen die Schwestre off Disch unn Deller:
So eßt mer Flääsch unn frisches Brot
unn trinkt sein Wei unn dankt seim Gott
unn wechselt manch e gures Wort.
Unn gure Freinde wern se dort
Ehr Sinn isch frohgemut unn heiter.
Am neichschde Daach zieht Jesus weiter.
----------
Soweit, liebe Leit, aus dere Geschicht,
wie se die Biwwel uns bericht.
Muß lang mehr noch frooche, was uns kennt sache
des biblisch Wort in unsere Dache?
Fer den, wu wie d`Martha die Ärwet bloß kennt
se deitlich genung beim Name nennt:
Ärwet esch bloß es halwe Leewe;
Gott hot es Leewe doch der gewwe,
daß es määh weer als bloß die Pflicht-
Gott will doch määh als bloß Vezicht
Du brauchschd nit hetze bloß unn renne
Gott will der doch was Gures genne
Bei all deim Hetze, Wiehle, Streewe
Vergeß die Frääd doch nit am Leewe!
Aach d`Besinnung nit, wu in Ruh bedenkt,
wie dich dein Gott so reich beschenkt
Das isch es andere Dääl- so wichtig
Vergeß es nit- es weer nit richtig!
Zud Ruh derfschd kumme- die gure Gab
die gelt der jetzt- nit erschd am Grab.
Zum Ruhe will dich Gott eilare-
unn heerschd des nit- so esch ´s dein Schade:
S Leewe muß mäh sei als bloß Schufte unn Renne
Gebet unn Ärwet -des sell mer nit trenne
Des Wort, des zehlt seit alder Zeit-
unn es gelt jetzt- fer dich unn heit!
Do wu mehr rasten, unn wu mer uns reeche
meecht Gott uns beschenke mit seim Seche
Gott meecht uns seechne unser Dun
- unn`s Orem-hole- unser Ruhn,
aus dem die Kraft zem Leewe quillt
wo mer bedenke es Wort, wu de Hunger uns stillt
Doch geeche ääns muß ich mich wehre,
Es esch nit genung, allää ze heere
Als breicht mer -wie d`Marie einschd- bloß ruhn-
als käm es nit aach an off unser Dun
Wer so was määnt- in unsern Land
der zeicht demit bloß Uuve`stand-
Des, was es gelt vun Jesus seim Lehre
fer uns unn heit` und jetzt ze heere
ischgrad dann aach die G`schicht, wu uns vekind`t
wie mer des braucht, daß sein Neichschder mer findt
unn daß selwer mer zeigen Menschlichkäät
in rer Welt voll Schlechtichkäät:
Die steht e paar Verse bloß vorn an
wie jerer leicht do sähne kann:
Es isch die altbekannt Gleichnisgeschicht
wu uns vun dem Mann bericht,
wu Reiwer iwwerfalle henn- herzlos roh-
offem Weech nooch Jericho
ne zammegschlache voller Wut
und do liecht er in seim Blut:
Vum Mann am Weg, dem Mann, dem arme
unn vun dem wu`m zeicht Erbarme-
wu alle annre voriwwergehe
unn nit nooch dem Verletzte sehe-
unn das isch werklich schlimm unn bitter:
Allää de Fremme, en Samariter,
isch`s, wu sich barmherzich zeigt-
unn hilfreich isch em zugeneigt.
Unn doch esch`s was es braucht off`d` Erd,
daß änner dem annre en Neechschder werd-
en Helfer in de greeschde Not
Des esch -sagt uns Jesus- de Wille vun Gott:
daß mer liewen unn nit hasse
So will ichs nochmools sammenfasse:
Meecht Gott uns seechne unser Heere unn Dun
unn uns schenke sein Seeche, wu mer ruhn
unn uns in Ruh als offs Daachwerk bsinne
wie do wu `s Gure mer beginne
Unn de Friere vun Gott, heicher als unsern Ve`schdand
sell uns bewahre unn unser Land
So sell es sei- in Jesus seim Name
und domit schließ ich: Amen. Amen.