Heit- wie kennt es annerschd sei-
heit werd gepreddicht iwwer de Wei-
in siwwe Punkte, uugeloche
wie Farwe hot de Reechebooche
Ich meecht mei Preddicht heit so g`schdalte,
daß ich in siwwe Punkte deet entfalte,
was de Wei, ehr liewe Leit
fer uns unn unser Zeit bedeit
Fer Groß unn klää -fer jung unn alte
werd heit mool wirrer Kerch gehalte
am Be`llplatz unner de Keschdebääm,
wu mer sich fiehlt grad wie dehäm.-
Weil drauß die Trauwe sinn am Reife,
so daß mer grad meecht nooch ne greife
unn im Keller schun gärt de neie Moschd,
wu mer als ganz gern ve`koschd.-
Weil um Sießer, Bitzler- Federweiße
mer dut in Stadt unn Land sich reiße,
drum feiern mer bei uns e Feschd
unn feierns mit viel liewe Gäschd-
Unn wie `s sich geheert werd Kerch aach gehalte
weil sunndaach heit esch fer junge unn alte
Unn weil ich -schun als klänner Buu
vun klää off Pälzisch babble du
-die Sprooch, wu mool derb esch, temp`ramentvoll- kräftisch
unn dann aach mool zart esch unn manchmool als deftich
meecht heit ich die Kerch drum so mool g`schdalte,
daß ich e Pälzisch Predicht du halte
unn wie kennt es annerschd sei:
Heit werd gepreddicht iwwer de Wei-
Ich hebb zwar schun äämool fer junge unn alte
e Wei-Preddicht g´schriwwe unn fer eich aach g´halte,
wu dem Winzer sei Ärwet ehrt
unn ganz offs Wort vun de Biwwel hii heert.
Ich hebb do schlichtweg aus de Biwwel vezehlt-
ä G`schicht noch de anner- unn ´s hot kaum was g`fehlt
vom Paradies bis zum Jesaja- so wie`s war bassiert
so wie mer`s in de Biwwel drin leest unn studiert:
wie Perle an de Schnur gereiht- orrer wie Werschd an de Stang
G`schicht fer G´schicht grad die Biwwel entlang:
G`schichte vum Weibau, wu mer drin leest unn heert
wu em Winzer sei Ärwet ehrt.
Bis hi zu Jesus seim Wort vum Weistock unn de Reewe-
mit dem er redd vun unserm Leewe:
Wie d` Reb, wu aus em Weistock treibt
unn gure Frucht bringt, Frucht wu bleibt
- Frucht ausem Weistock voll Kraft unn Saft,-
so esch en Mensch, wu Gures schafft
Mit Jesus uns Mensche es Leewe gelingt,
unn unser Gläwe gure Frucht bringt,
solang mer mit Jesus vebunde bleiwen
wie Rewe, wu am Weistock treiwen:
So wie er bei uns bleibt alle Zeit
jetzt unn aach in Ewigkeit.
Ich will`s heit nochmool ganz nei prowiere,
es biblische Wort mit eich studiere
-unn wie d` Sunn ehr Licht zeigt im Reecheboche
in siwwe Farbe -uugeloche-
so mecht ich mei Preddicht heit so g`schdalte,
daß ich in siwwe Punkte se deet entfalte
Seneechschd: Wei, des esch e Stick Lewensfrääd-
 so wie`s schun im Buch vum Prediger steht:
Du sellschd nit immer bloß schufte unn renne,
du derfschd der aach Ruh moool, was Gures genne:
Gott gennt der dei Glick, gennt Ruh der unn Friede,
drum derfschde genieße, was dir esch beschiede.
Des esch`s was im Buch vom Prediger mer lese kann
-im neinte Kabiddel, vum siwwete Vers an:
Dort werd der Weisheitssatz uns kund:
>Besser esch`s mi`me lewendische Hund
als mi`me doote Leew<- unn des will saache:
Was immer du aach muschd ertraache:
gebb dich nit off - nit dein Glääwe- nit`s Hoffe!-
So lang bleibt fer dich noch d` Zukunft offe.
Drum häßt`s an der Stell: Geh hii unn ess-
Unn nit die Frääd in deim Leewe vergeß!
En froher Sinn, der sell sei debei
wann d`eschd dei Brot unn trinkschd dein Wei.
Traach Klääder, wu gepfleecht sinn und salb dei G`sicht.
Nit preedicht die Biwel >Entsagung< - >Ve`zicht>
Mit de Frää, wu der gebb esch, sellschd `s Leewe genieße
behalt se lieb unn loß nit der vedrieße,
es Leewe, wu so korz esch -so vegänglich- nichtig.
Vun Gott esch dei Leewe, drum leeb es richtig.
Die Frääd, wu unner de Sunn der esch gewwe,
des esch dein Dääl- beide Ärwet - im Leewe,
daß de alles, was machschd, frisch aapacke duschd,
bis de am End dann im Dootereich ruhschd:
Werk, Kunschd, Venunft- Weisheit, Vestand,
des find sich doch bloß im Lewensland
Daß -wammer`s richtig mool betracht-
die Biwwel so groß es Leewe acht
hetten - ehr Leit - des all - ehrlich- erwaart?
Du werd wahrhaftig mit Worte nit g`spaart:
Sie preist de Genuß, die Lewensfrääd,
damit mer sei Leewe bejahe deet-
die gute Gab aus Gottes Hand-
daß ganz mer em Leewe bleibt zugewandt
die Fräd im Lewe nit gering acht- nit vedeiffelt-
erschd recht am Leewe nit vezweifelt.-
Ganz nichtern unn doch lewensfroh
sieht`s die Weisheit vum Prediger Salomo.
Punkt zwää: de Wei will Troschd uns bereite.
Die Biwwel schun off de erschde Seite
im erschde Buch Mose uns vun Noah vezehlt,
wie der als Ackersmann sich queelt.
Iwwerstanne war kaum die große Flut-
es Wasser war gewiche mit seiner Wut,
unn de HerrGott hot vesproche: Es sell nit weiche
Saat unn Ernt- unn des deet sich zeige:
im Reecheboche, wu -bunt- sich weit iwwers Land
vom ääne End bis zum annere hii spannt.
Unn de Noah hot also de Weibau gepfleecht,
hot als erschder de Weistock geplanzt unn geheecht.
De Noah, wu wohl jerer kennt,
nooch >Ruh unn Troschd< esch sein Name genennt
Er häßt >Treeschder<, weil er d`Reeb hot kultiviert.
Des lernt mer wammer Hebräisch studiert.-
Der Wei, wu Labsal isch deim Herz,
esch Troschd der im Kummer unn linnnert de Schmerz-
Er helft der zu me gure Schlummer
unn isch so >Treeschder< in deim Kummer
Unn doch bleibt debei fer jung unn alt
-Punkt nummer drei - en Vorbehalt
Wie die Erfahrung bekanntlich zeigt-
unn s weer nit recht, wammer`s veschweigt:
Es hot sich schun mancher - unn ich saach`s betroffe
in junge Johre dootgesoffe:
Was viele Mensche - so manchen Alte
bis siwwezich, achzig hot jung erhalte
-domit hot schun mancher sei Leewe runiert.
Was alles isch schun dorchs Saufe bassiert!
Schun vum Noah heern mers- wei jerer wohl wääß-
es war e`m in seim Rausch so häß,
daß er sich drum hot -uugeloche-
splitternackisch ausgezoche,
sich ins Zelteck gelecht, sein Rausch ausgepennt
Sein Filius - de Ham- esch dezu gerennt
unn hot sich kräfdisch amisiert
mit Schadefrääd `s Bild vun seim Vader studiert-
E schlimmes End, des war dann de Lohn:
Veflucht hot de Noah sein eigene Sohn
Unn paar Gen`ratione speeter war`s sein Nachfahr, de Lot,
wu alles annre als e gud` Beispiel uns gewwe hot:
Mer kann dodraa mit Erschrecke studiere,
zu was de Wei kann en Mensch vefiehre:
Abraham sein Neffe war`s, wu im Suff - de Lot-
sei eig`ne zwää Dechter g`schwängert hot
Seitdem hot schun so mancher- uhne Sinn unn Vestand
Vesoffe sei Haus, sein Hof, sei Land
sei Lewwer, sei Milz - unn aach sei Hern-
esch saach`s, weil`s wohr esch- ich saach`s nit gern
De Familie hot`s g`fehlt am dägliche Brot.
Es war fer all e großi Not.
Desweeche esch mool de Jesaja hiig`loffe
zu dene, wu schun frieh am Morche hän g`soffe-
unn henn um nix meh sich gekimmert-
Damit `s nit weirer sich veschlimmert
hot er ne grindlich ins Gewisse geredt,
daß sich des endlich mool ännre deet.-
Aach heit isch`s nit leicht- so nooch ner Kur:
Bloß sauer Wasser- Sprudel pur-
Mer braucht - außerm` Dokter - en Mensch, wu em stitzt-
Bloß des esch`s, was vor`m Rickfall schitzt.
Und wer des dorchhalt: Bloß noch Saft
Respekt vor dem Mensch seinre Kraft!
Mer sinn bei Punkt vier- grad in de Mitt-
ehr Leit , ich hebb e große Bitt`
Gucken nit off die Uhr- unn gucken nit bang:
ich faß mich korz jetzt unn mach nit lang:
De Weistock wu gure Trauwe bringt
weist hii offs Lewe, wu recht gelingt
So wie mer bei Weistock Trauwe sucht,
sucht mer im Leewe gure Frucht.
Drum hot Jesus uns g`saacht, mer weern wie d`Reewe,
wu kräftig treiwe unn gure Frucht geebe
solang mer mit ihm vebunde bleibt.
Die gure Frucht, wu dann aus uns treibt,
des esch die Gerechtigkäät,
wu`m Uurecht absaacht, de Schlechtigkäät-
wie mer schun beim Jesaja sieht
in seim fimfte Kabbiddel im Weibergslied,
damit mer sei Leewe nooch Gott ausricht-
umkehrt sem Leewe- nit sich selbschd lebt sem Gericht
Im allerletschde Biwelbuch
-Punkt fimf- de Offenbarung- esch die Redd vun dem Fluch-
dem verzehte Kabbiddel vum verzehte Vers an-
wie jerer sieht, wu leese kann
Do hert mer vum gettliche Zornesgericht-
heert wie die Menschhäät sich selber venicht:
Wie Trauweblut, wu aus de Kelter fließt-
streemt`s Menscheblut, wu d`Menschhät im Wahn vegießt
Weil mer bloß an sich denkt unn`s Uurecht vemehrt
off unserm HERR- Gott sein Wille nit heert:
Was sunschd isch e Bild als fer e frohi Zeit,
die Ernt, wann mer`s Getreide schneid`t
wann mer die Trauwe in de Kelter auspresse dut
werd do zu`me Abbild vun Träne unn Blut:
Es zeigt die Engel im Himmel- am Altar seine Stufe-
wie se änner dem annre sich laut dun zurufe:
Mit deim Seesel schneid die Trauwe- schneid se all off d` Erd,
Reif esch die Ernt, daß gekeltert jetzt werd`!
Die große Kelter- de Zorn vun Gott-
zeigt uns im Bild die große Not:
unn weit, weit iwwer sechzehunnert Felder
lääfts Blut fort aus de Zorneskelter.-
Mag`s uns in unser Ruh aach steere.
Mer wenn die Botschaft nit iwwerheere:
Wie Gott es will- nooch em Friede strewe
vun Ehrforcht geleit` vor allem Lewe,
damit anstatt de Schlechtigkäät
rechiert off d`Erd Gerechtigkäät-
weils` Leewe sunschd vor Gott vegeht,
vor Gott, em Richter nit besteht
Was Gott vun uns will- hot er mit Jesus gezeigt
Wie Er in Lieb esch uns zugeneigt.
so selln mer- Punkt sechs- im Liewe uns iewe
unn Gott begeechent uns ganz voller Liewe:
Um ganz mit de Mensche vebunde se sei-
hot Jesus gedäält mit`ne Brot unn Wei
sich an änn Disch mit`ne g`setzt- ob arm ob reich-
-fer ihn warn alle Mensche gleich:
Frää orrer Mann, Kinner unn Alte
stolze unn velumpte G`schdalte
ob geehrt, geschätzt, geacht
ob geächt, entehrt, velacht-
Unn all hot er se aagenumme
in de Lieb, wu von Gott dut kumme
Unn wu d`Vebindung zu Gott hii war abgebroche-
hot grad dort er Vegebung zugesproche,
Die Lieb will uns geleite
aach heit in unsre Zeite-
Drum hot Jesus beim Abschied im feschliches Saal-
beim letschde, beim Heilische Abendmahl-
-unn mer kummen zum End mit, kummen zum Schluß-
weil mer dovuu am End noch rede muß:
wie er nochämol mit de Freinde es Brot hot gebroche-
nooch em Dankgebet `s hot ausgedäält- unn die Worte g`sproche,
off die mer als unser Gedanke lenke,
wann`s Brot mer däälen zu seim Gedenke:
>Des esch mein Leib<- unn mer däälen `s Brot
erfahren Gemeinschaft- weil Gemeinschaft mit Gott.
Weil er unser Gaschd will sei,
werd`s Brot gedäält- mer däälen de Wei-
unn es veeint sein Friedensbund
uns iwwers ganze Erderund:
S Brot, wu mer däälen- de Becher Wei:
e Zäche vum Friede derf es sei:
en Vorg`schmack vun de Ewigkeit,
derf mer so spiere in unserer Zeit:
daß Gott uns all zu me Leewe will bringe,
randvoll mit Sinn, wu nit muß mißlinge,
daß wie Brot unn Becher- Leid unn Fräd mer sich däält:
unn Lieb des esch, was am End bloß zehlt.
Mecht des aach im Alldaach- dorch alle Zeite,
meecht die Lieb, wu vun Gott kummt, uns Mensche geleite,
so wahr Gott uns beschenkt mit Brot unn Wei.
So sell es sei: Amen. So sell es sei!