Wammer aafangt ze dääle esch`s immer e Wunner

Die Predicht, wu ich fer heit hebb gericht
will weirersaache ääfach- schlicht
in unsrer heimische Pälzer Sprooch
des Wort, wu vun Gott kummt- unn `s gelt immer noch
So wichtig esch`s wie`s Trinke unn`s Esse-
daß uns des Wort bleibt uuvegesse:
daß Sei Lieb uns will begleite
jetzt unn in alle Zeite.
Weil oft genung uns de Zweifel ploocht,
esch`s gut se wisse, daß Gott nooch uns froocht-
unn er uns im Leewe seechent
wann er uns im Nechschde begeechent-
im Mitmensch, aach wu nooch uns froocht,
wann Sorche, Not unn Zweifel ploocht.
Dozu hot schließlich de Mensch e Herz,
daß er fiehlt mittem annre seim Kummer unn Schmerz
Unn des gilt schun seit alder Zeit:
gedäldes Leid esch halwes Leid
unn daß vedobbeld sich die Frääd,
wammer se bloß dääle deet.
Mer sinn of dere Welt all Gaschd.
Daß drum mer däält die Fräd, die Laschd-
des esch vun Jesus - so heern mer- sein Wille.-
Dodrin dut sich`s Leewe fer uns all erfille
Mit dem Gedanke im Herz unn im Blick
wenden mer uns zu der Zeit serick,
wu die Mensche sich um Jesus -als Mensch- henn geschart
-viel Mensche in Not, wu mer nix hot erspart
Die henn beim gspiert es Erbarme
vun Gott fer die Mensche- die arme
daß Gott off die Mensche acht hot im Schatte
- nit bloß die Reiche liebt unn Satte
Unn die Mensche, was henn se sich Zeit fern`g`numme!
sinn vun weit her aus de Städt unn Derfer zu`m kumme
nooch all dem, was uns Markus in seim Evangelium saacht
Vers äns bis nein- Kabbiddel acht
Bei Jesus hen se gschbiert, was des sei kennt: sLiewe
unn daß mer selwer es Liewe mißt iewe.-
Mit Jesus warn se unnerweechs- mool geloffe, mool g`sesse
bei dem, was er g`saacht hot die Zeit glatt ve`gesse
Ganz voller Ohr unn uugeschdeert
henn se off Jesus sei Wort hiig`heert.
Minanner warn se unnerweechs- zu dem Eck im Land,
wu war als en wieschder Fleck bekannt:
Ken Bääm, ken Straach- erschd recht kän Haus-
Wie gottve`losse war`s dort draus`!
Schun längschd weer`s Zeit gewest sem Esse-
Doch hot die Zeit mer glatt vegesse.-
Doch Jesus hot g`saacht zu de Jinger um sich:
ehr Freinde, die Leit do, die dauern mich.
Wie dun se mich so herzlich liewe.
Drei Daach sinn sei bei mer gebliwwe.-
sinn um mich rum- dun zu mer stehe.-
Sie sellen nit hungrig vun mer gehe.-
Kann nit ehr Not mißachte-
Sie deeten mer glatt veschmachte.
Doch die Jinger henn g`saacht zu`m: Des esch nit drin,
Du wäschd, daß am wieschde Fleck mer sinn.-
wu esch so gottvegesse-
wie sell mer do was esse!
Wu sell mer dann hiilääfe
umm Brot fer all se kääfe.
Wu iwwerhaupt - in aller Welt-
wuher sell mer nemme des viel Geld.
Wie sellmer sich iwwer annre erbarme,
wammer selwer noch zehlt zu de Schwache unn Arme!
Daß `s Geld esch wu regiert die Welt-
des esch bekannt- unn bloß des zehlt.-
Saachtschd` noch schnell ne en Abschiedswort,
dann schickschd`se halt hääm- dann schickschd`se so fort
Du wäschd, bei so schwierige Sache,
kann unserääns nix mache.-
Macht em des nit ehrlich betroffe?
Die Jinger : fort sinn se geloffe
unn henn doch sunschd so hautnah gespiert,
wie`s Liewe wirkt Wunner- Henn die gar nix kabiert
Daß do in der Welt nit Geld - Macht- Gewalt
die Mensche- menschlich- am Leewe erhalt?
Daß zehlt, wa die Lieb kann erschaffe
unn nit unser Geize unn raffe?
Daß die Gaab, wu mer weirergebbt- unn nit dut veberge
werklich unn wahrhaftig wirkt Wunnerwerke?!
Nit annerschd war`s scheint`s wie in unserer Zeit
So sinn die Mensche- so sinn die Leit-
- so sinn aach meer selwer- mer muß `s zwäämool uns saache
bevor mer im Glääwe was Rechtes waache-
Unn manchmool dreimool unn viermool unn meehr
bis`s gettlich Wort find bei uns Geheer.
- Heit wie doomools: Voller Geduld
nemmt Jesus die Mensche- schwaach, aarm, voll Schuld-
nemmt an die Mensche in ehrer Not.-
Er wäß, wie wichtig esch es Brot-
en Bisse Brot- en gures Wort
Des braucht en Mensch an jerem Ort.-
Er loßt drum nit locker. Er kennt doch die Not.
Er froocht drum die Freinde :"was henn er an Brot?"
unn die saachen: "bloß Sticker siwwe
-s esch schiergar all- sinn iwwrich gebliwwe
unn do, der klää Buu, der hot noch zwää Fisch
Uumeechlich. Mer kann se nit bitte zu Disch"
Doch Jesus loßt sich nit steere
Er dut nit off se heere.
Er ruft die Mensche zu sich her:
"Kummt her- mit eierm Kummer schwer,
wu manchmool eich droht se erdricke!
Ich will eich stärke, erquicke!
Kummt her mit eierm Klaache!
Ich will in Lieb eich traache!"
Unn dann nemmt er es Brot-
unn er dankt seim Gott
-unn er däält unn däält aus- bis jerer hat
unn all minanner gewwen satt-
wie`s Markus uns hot beschriwwe:
Viertausend Mann- an Brot: Sticker siwwe-
Unn`s esch gar am End noch was iwwrich gewest-
wie mer am Schluß noch bei Markus leest
unn daß ne des nit sell vegammle,
hääßt Jesus in Kerb se`s neisammle.-
Unn wie mer do sammelt die iwrische Brocke:
was warn do die Mensche all vun de Socke!
Siwwe Kerb voll mit Brot- sem Weirergewwe
-Brot, wu die Mensche macht stark sem Leewe
- Brot, wu stärkt, was mied esch unn matt
-Brot, wu macht mit Hoffnung satt-
unn des als Zeiche, wie Gott`s Leewe vewandelt,
wann noch Gott seim Wille e Menschekind handelt
unn acht off so scheinbar geringe Dinge-
wie so uns `s Leewe kann gelinge
Bei de Sach mit de Brocke, wemmer e bissel ve`weile.
- So schnell dut die Zeit uns nit enteile!-
wenn bedenke, was drin esch an Wohret veschdeckt.
En Parre - vor iwwer hunnert Johr schun- der hottes entdeckt.-
Sein Name- ich saach`s esch : vun Bodelschwing-
mool spaßhaft genennt als: de Beidelschwing
weil er- um die Not vun den Mensche se wende
hot uuermiedlich geworbe um Spende
fer die aarme, kranke Mensche in de Kranke-Stadt Bethel.-
Mer hot ne ge`uzt aach: De Parre vum Bettel
-unn des in liewevollem Spott-
weeche seim Sorge fer die Mensche in Not.-
Wie er hot an`s Wort vun de Brocke gedenkt,
do war sei Bitt, daß mer en beschenkt
mit lauder Zeich wu känner mäh bracht-
mit Sach, wu scheinbar zu gar nix mäh daucht
Die kranke Leit henn`s sammeg`flickt
mit Lieb unn Phantasie unn recht geschickt-
Des war e Kloppe- Klebe, Flicke
Käänns vun de Kranke hot welle sich dricke-
unn was aus dem alde Zeich mer macht-
Schuh- Klääder, Spielzeich- wie gesaacht-
des war wie nei- unn es Herz hot gelacht-
E war - schlichtweg - e wari Pracht
Weit mäh als bloß Kerb Sticker siwwe
an Hoffnung sinn iwwrich gebliwwe.
Gut wammer es Klänne so acht unn ehrt-
unn aus em was macht- es erkennt in seim Wert-
Unn die Brockesammlung, die gebbts noch bis heit
- ehr wissens ehr Leit, gell, ehr wissens ehr Leit
Aach meer do, bei uns, bei de Kerch do in Rhodt
hänn aach was gelernt vun de "Brocke vun Brot"
Merr henn aach bei uns nit die Brocke ve`acht.
Mer hot aus de Not grad e Tugend gemacht-
Wie mer die Kerch drauß henn renoviert
do esch faschd so was wie e Wunner bassiert:
Manch Markstick beim Flohmarkt- vum Kuntäner mit Schrott
war uns e Hilf do in de Not.-
Hunnerde vun Maark- mäh als Dausend an Spende.-
Wie kann- mit so Brocke- mer so manchi Not wende!
Wann jerermann an jerem Ort
deet achte offs gettliche, gure Wort-
Wann jerer geeb ab aus seim Iwwerfluß-
unn des geeb gern- nit mit Ve`druß-
Wann jerer sich eisetzt- jung wie alt
fer die Schepfung- fer`s Leewe, daß mer`s erhalt
Wie deet sich dann - aach dorch unser Handle-
de Erd ehr G`sicht vun Grund off vewandle,
Unn `s Leewe weer mäh als bloß Geize unn Raffe
Mer det minanner e Stick Friede erschaffe.
Wann jerer geeb ab en Dääl vun seim Geld
als e Hilf fer sem Leewe - fer BROT FER DIE WELT
e Stickche vun seim Iwwerfluß
-wu Iwwerfluß bloß bringt Vedruß-
-Dann weer am End die Gerechtikäät
noch stärker als all die Schlechtigkäät.-
Des esch, was uns Markus mit seim Schluß uns lehrt,
daß offs Klääne mer acht- unn Gott mit ehrt-
dorch`s Geringe wirkt große, gure Dinge
unn s Leewe so uns mißt gelinge
weil: Bloß Schufte un Renne nooch Geld unn Gewinn
kann nit sei vum Leewe de ganze Sinn.
Wann all mer deeten off de annre achte
wann nooch Hilf in de Not mer fer`n deet trachte-
nooch Hilf wu die Not wend`t nooh unn fern.-
Was weer die Erd en gurer Stern-
Wammer`s Gure mi`m annre unns` Schweere däält
unn acht off des, was en Meschekind queelt
unn känner deet de annre beschämme-
Wann änner beim annre deet Andääl so nemme
Deed dääle minanner Frääd unn Leid
Des weer gewiß e guri Zeit!
Was wer mer do glatt vun de Socke
bei soviel gure "gure Brocke"
E Wunner deet bewirke faschd unser Handle
De Erd ehr G`sicht: wie deet sich`s vewandle!
Unn de Friede vun Gott, wu esch heicher als unser Ve`stand
sell bewahre uns in Jesus unn mit uns unser Land
So sell es sei- in Jesus seim Name(n)
Drum saach sem Schluß ich : Amen, Amen.