Bevor offs biblische Wort mer uns bsinne
meecht ich heit mool mit rer G`schicht beginne-
vun äm off de Audobahn, wu nachts ganz ve`schdeert
im Radio die dringliche Noochricht heert:
en Geischderfahrer kääm -ganz links- glei`entgeeche
unn -so häßt`s dann- : "Desweche
baßt gud off: fahn ganz rechts! sunschd eschs bassiert!
Der Mann do am Steier raisoniert-
unn schittelt de Kopp unn saacht sich vewunnert:
Was änner? Nä 20- was 50- schier hunnert!
Schunn zwäämool hett`s beinooh gekracht!
Aach wammer schmunzelt orrer lacht:
En diefe Sinn hot unser G`schicht
e Moral, wu saacht uns: äffach- schlicht:
Wer sich nooch de annre- de Mehrheit richt-
der esch als meischd ganz gut beroote
unn was er macht, dut recht gerote
Unn doch esch`s manchmool neetisch- unn dezu brauchts Mut-
daß mer nit des, was die annre dun, dut;
nit immer esch des, was die määnschde dun recht.-
Drum muß mer sich briefe: esch`s gut orrer schlecht?
Aach wann die annre em velache:
Mer muß des mit seim Gewisse ausmache:
Gott will jo, daß mer Friede dut halte
die Welt zum Gure hii meecht gschdalte
Unn des gebbt`s jo dadsächlich, daß em die Mehrheit vefiehrt.
Des lernt mer, wammer sei Biwwel schdudiert.
Aus alter Zeit stammt die biblisch` Geschicht,
wu uns vum Josaphat bericht`t
unn vum Ahab, die wu Keenich sinn gewest
-wie jerer wäß, wu sei Biwwel leest-
im Siedreich, in Juda unn in dem Land,
wu esch als Israel bekannt-
Die zwää henn die Macht ghatt unn alle Gewalt.
Mer heern dezu vun re Prophetegschdalt:
Micha ben Jimla hot der ghäse-
Des kann mer im erschde Keenichs-Buch leese
Es 22. Kabiddel fiehrt uns in Gedanke nooch Jerusalem
Dorthii, wu de Josaphat war dehäm-
Dort war de Tempel offem Berg- dem heichschde
unns Keenigschloß stand offem neichschde
mit seine goldene Gemächer
hoch iwwer de annre Leid ehr Dächer.-
Der Keenich do war vun Vestandt
unn drum beliebt im ganze Land:
Damit die Stadt nit werd beläschdigt
hot er mit Maure se befeschdigt.
Vor Welf unn Raiwer, Merder, Diewe
esch sei seitdem veschont gebliwwe-
Unn macht mer nachts es Stadtdoor zu
schlooft jerer Mensch mit Fried unn Ruh-
Unn falls mool kääm e deier Zeit
halt er in de Schei`re Vorrät bereit
Korn, Eel unn Wai hot er so off Laacher-
Die Leit sinn gut genährt- nit maacher-
Drum saacht de Keenisch Josaphat:
mei Volk hot Ruh- mei Volk esch satt-
unn doch eschs äns noch, was mich queelt-
satt sei isch gut- doch was meim Volk fehlt
esch Bildung- Wisse unn Vestand.-
Dodran sell es nit fehle -in unserm Land.
Ich will nit spare am falsche Fleck:
Glei nooch em Herbschd- so saacht er keck-
beginnt fer all de Unnericht-
unn er halt was er vespricht:
Er sucht sich drum gelehrte Männer-
mit Herz unn Veschdand- unn Biwwelkenner
Mer lernt leese unn schreibe, lernt Spruch fer Spruch,
was alles drinsteht im Biwwelbuch,
damit mer frieh lernt, was gut esch, was recht esch
unn des se vemeide, was schlimm unn was schlecht esch
Unn Gottesfurcht unn Duchend
find sich bei Ald` unn Jugend:
Drum sacht mer sich -in Land unn Stadt:
Was hemmer doch Glick mit dem Josaphat!
Bis dann de Keenich, dem nix Schlimmes schwant
e Räs noch em Norde, ins Nochberland plant-
So packt er schnell sei siwe Sache
um in Samarie sein B`such se mache,
dorthii, wu de Keenich Ahab wohnt,
seit langer Zeit reschiert unn thront:
Die zwää warn zimmlich unnerschiedlich:
De än war wild- de annre friedlich-
Doch henn ehr Kinner- junge Leid-
schun lang bussiert - e ganz Zeit-
henn sich geliebt unn warn sogar
inzwische schun e Ehepaar
Unn wann zwä Keenisch sich besuche:
Do dischd mer off- do backt mer Kuche
Do gebbts e großes Feschdbanket-
vun dem ich gar nit groß erschd redd-
sunschd muß ich schlicke, liewe Leid-
do dischd mer off- die ganze Zeit:
Fläschknepp mit rer Zwiwwelsoß
Rollbrote mit Servietteklos
Hecht unn Zander- alles frisch
Forelle, Lachs kummt off de Disch-
Sahne-kerschdort- Quetschekuche-
alles gebbts dort se vesuche
un dezu de beschde Wai-
ke Bumbes- Speetles muß es sei-
do werd nit gspart-egal wie deier:
Feierberg- Meerspinn- Uugeheier-
Wei aus aller Herre Länner-
unn zum Schluß aus Rhodt: Dramänner-
Unn zwische Supp unn Wei unn Brote
dun Diplomate sich berote
Wie do de Ahab beim Esse schwitzt
unn de Wei ne schun erhitzt-
-wanns annerschd weer, dann weers geloche:
de Wei hot ne ins Hern nei g`stoche
-Bei vollem -orrer leerem- Maache
sauft oft mancher mehr als er dut ve`traache-
So saacht er: "Freind, heer, was mich queelt:
De Ruhm vum Schlachtfeld zu meim Ruhm mer noch fehlt
Wann ich geh ei ins >>Buch der Geschichte<<
da sell mer- mei Wort droff- zu meim Ruhm aach berichte:
Ich hett große Date unn Schlachte gedan
als Feldherr unn als Kriegersmann
"Ich hau die Syrer korz unn klää"
muß stehe off meim Denkmoolsstää-
"Ich, Ahab, in alle Länner unn Breite-
de greeschdee Feldherr vun alle Zeite."
Ich kämpf um Ramoth in Gilead,
des war mool frieher unser Stadt-
lang, lang esch`s heer. In dere Zeit,
do warn die Grenze nit wie heit.-
Unn du- so wahr du an meim Disch duschd sitze-
du muschd mich dobei unnerstitze.
Der Josaphat war vun de Socke-
war schiergar bis zum Doot ve`schrocke.
Er war beduddelt- doch nit bsoffe-
uns denkt so bei sich- entsetzt- betroffe:
"Hett ich doch en Brief bloß g`schriwwe
Unn weer -fer mich- dehämgebliwwe-
Weil: so en Kriech fer Landgewinn-
der esch partout nit nooch meim Sinn.
Ich lieb zwar aach mei Volk unn Land
mit Leib unn Seel- doch mit Veschdand"
De Ahab dängt: "Nit lang gezeechert-
Denk dro- meer zwä, mer sinn ve`schweechert!"
"Schun gut" -sachd de Josaphat ritterlich:
"Ich loß ganz bschdimmt dich nit im Stich-
Doch - gläb mer - besser wers, fer beide,
mer kennten am End so `n Kriech vemeide.
Sinnlos Blut se vegieße -im Grund alles Hasse-
scheint zum gettliche Wille mer nit grad se basse"-
Droff saacht de Ahab: "Gut, simmer fromm-
Froche mer die Prophete, kumm Schwoocher, komm!"
Vor de Palaschd - dort bei de Treppe-
dorthii dut mer schnell die zwää Thronsesssel schleppe
Unn jerer, wu Prophet sich nennt
kummt off de Stell glei` aagerennt-
Am Markt dort esch fer all se Platz:
De änd, der riehrt im Kaffeesatz-
De annre dut e Spektakel vollfiere
dut juble unn zapple unn geschdikuliere
unn mancher leegt sei Stern in Falte-
Prophete -viel: junge unn alte
Unn Josaphat, der zeehlt vewunnert-
zeh- zwanzig- dreißig- mäh: e paar hunnert-
sacht zu seim Schwoocher: So viel Prophete?
Der sacht: "Ke Problem- Des macht die Kneete:
esotherisch- kreativ
hochphilopisch- spekulativ
volksnah orrer elitär-
Prophete se finne esch nit schwer:
Merk der äns: staatliche Kneete
stattlich genung- dann hoschd dei Prophete-
Unn saacht glei druff noch: Schweigen all still,
weil ich eich jetzt befrooche will:
"Ehr, wu ner eich Prophete nenne
unn drum de Gotteswille kenne:
Ehr kennen mein Wille unn Velange:
de Kriech um Ramoth aasefange-
Sacht mer doch was die Zukunft bringt-
sell ich es losse? - orrer gelingt
mein Plan um Ramoth in Gilead
weil doch mool unser war die Stadt?"
Die Frooch vum Keenisch war noch nit se End
Schun reißt de erschde hoch sei Händ
dut winke, kreische "Heil unn Sieg-
Fiehr uns ins Feld- Gott will den Kriech!"
Unn kenner will jetzt letschder sei
Unn laut unn lauter werd eehr Gschrei:
G`sund kummschd du bschdimmt ganz schnell serick-
Hurra- und Proschd - unn aach: viel Glick
Aus vollem Hals erklingt ehrn Jubel-
unn Ahab lacht bei all dem Trubel.-
Bloß Josaphat guckt ganz betrete
bei soviel Sieg- und Heilsprophete:
"Bei Gott! Mer esch nit wohl debei
bei soviel Heil unn Sieg- Geschrei"
Doch Ahab, der faucht ärgerlich:
"Wer weissagt, des beschdimm noch ich!
Du siehschd vor dir alle Prophete veeint-
bis off den äne, unn der esch mein Feind:
Micha ben Jimla, der esch mer vehaßt-
weil: der sacht bloß, was mer nit baßt-
Doch Josaphat saacht zum "Redd nit so,
wann der dich nit aaliecht- dann sei im Grund froh!"
So hot mer sem Schluß doch noch befohle,
den Micha ben Jimla dezu se hole:
"Micha- Es geht um Kopp unn Kraache
Du nix ann`res als die annre zum Keenich sache!"
So dut de keenigleiche Bote
dem Micha ganz entschiede roote
Doch d`Micha saacht zum "dein Root in Ehre:
Gott sein Wille. De Keenisch sell`n heere."
Inzwische do vorne beim Keenich am Door-
was war dort en Tumult devor!
En Mann -Zedekia- zeigt sei Fauschd feschd geballt-
hot Eiserne Herner sich umgeschnallt-
huppst rum als weer er e wildes Dier-
unn brillt so laut als wie en Schdier-
"Du machschd se klää- mit so ner Wucht
treibschd du die Syrer in die Flucht"
Doch wie d`Micha kummt, missen die viele Prophete
still unn leis off die Seit all wegtrete:
unn de Keenich saacht zu`m: "In aller Still,
saach du uns, was Gott jetzt will"
Unn Micha saacht zum "Mach doch dein Krieg
Mer kreischen gehorsam all Heil Dir unn Sieg!"
Doch Ahab saacht zu`m ärgerlich:
"Was sell des? Mei Wort droff- Des will ich,
daß nix als die Wohret du mir profezeischd-
nit des, was die annre kreischen, schreischd."
De Micha, der nickt lang unn schweer:
"Die Zukunft seh ich - glääb es meer:
Ganz Israel- so hebb ichs vor mer g`seh-
war voll vun Heile unn Klaache dort off de Heeh.-
Sie warn wie die Schäflich uhne Hirt-
vestreit iwwerall hii- unn ganz vewirrt.
Laut war ehr Rufe- >>ab hääm- Richtung Siede-
Gehn hääm- als hääm- un gehn in Friede!<<
De Keenich Ahab werd blaß statt heiter
Doch Micha vestummt nit- er redd noch weiter:
"Mir war als ob -so sacht er laut-
ich Gott hett off seim Thron geschaut
wie vumme ganze Himmelsheer
um sein gettliche Thron rum umlagert er weer:
Die Stimm vun Gott heb ich geheert:
"Wer eschs wu de Ahab mer beteert?
damit er de Vestand veliert
sein Kriech um Ramath in Gilead fiehrt?"
Do springt hervor off leichtem Fuß
de Himmelswind unn saacht: "Ich du`s:
All die Prophete dort im Land
bebloß ich jetzt mit Uuvestand
Unn Liechewort kummt aus de Minder
vunn alle Sieg-unn Heilsvekinder!"
Unn schun eschs geschehe- do heert mer´s laut-
mit Händ se greife, was ich hebb g`schaut:
En Liegewind hot all beteert
Nit s gettlich Wort hoschd du geheert
Ehr Juble esch dein Unnergang-
noch hoschde Zeit- doch nimmi lang!
Doch Ahab ruft: "Nemmt ne in Haft!
Ins Burgverließ werd er geschafft!
Dort bleibt er bis ich wieder kehr
gesund unn reich an Ruhm unn Ehr!"
So kummt`s dann am End, wie`s kumme muß
Am End heert Micha- unn ich kumm jetzt zum Schluß-
de miede Schritt vun viele Leit
noch lange Woche- banger Zeit:
"Gehn still devu- gehn still noch Haus-
Ahab esch doot- s esch alles aus!"
So war ehr Rufe:" Gott hot entschiede
Gehn hääm, all hääm unn gehn in Friede"
unn dann holt mer ne aus seim Kerker raus
unn Micha derf hääm, geht still in sei Haus.
Was heert mer vum Keenich vum Josaphat?
Ob die bitter Lehr er veschdanne hat?
Was mer vum leest im Buch der Geschichte
esch ganz ääfach se berichte:
Er hert off Gott wie zu friehere Zeite
loßt nit meh sich zu me Kriech veleite
Unn so war Juda Glick beschiede
unn gute Zeit voll Ruh unn Friede-
Meecht aach so bei uns Gerechtigkäät
unn Friede siege -Nit d`Schlechtigkäät
die Mensche in ehrm Herz drin vefiehre
Meecht Gott doch uns Mensche sem Gure hiifiehre-
in unsre Welt wu mer meischd denkt bloß an sich-
unn macht statt se helfe gern große Sprich-
Des braucht doch die Welt, daß mit aller Kraft
mer sucht noch dem, was de Friede schafft
-daß jerer dort, wu Veantwortung er traacht
en gud Stick mehr an Menschlichkäät mool waacht
-aach, daß mer d` Schepfung erhalt, bewahrt-
mit seine Kräft`debei nit spart,
so daß de gure, gettliche Wille
deet sich aach durch uns erfille:
Was weer, wann die Mensche an viele Orte
sich nit deeten begnieche mit große Worte-
wann se werklich den neichschde, den klänne Schritt gehe?
Deet do die Welt nit ganz annerschd aussehe?
Wann do dorch zeh`, zwanzig, fuffzig orrer hunnert
odder tausend orrer weit mehr noch- so daß mer sich wunnert-
sich deet ve`wandle es G`sicht vun de Erd
daß Menschlichkäät drin sichtbar werd?
Meecht drum doch sich en jerer beständisch iewe
in dem- wu`s druf aakummt: sein Neeschde se liewe-
statt sich se hasse- sich se ve`schdehe
mit Gott en gure Weech se gehe:
so daß mer sich froocht vun Aabeginn:
esch`s in Jesus seim Geischd? in Jesus seim Sinn?-
Meecht so de Friede vun Gott- wu isch heicher als unser Ve`schdand
uns bewahre in Dorf unn Stadt unn Land.-