Die altbekannte Weihnachtsg'schicht -
wie se Sankt Lukas uns bericht'
in Seim zwätte Kabbiddel, dort, wu es häßt
(wie jeder wäß, wu sei Biwwel leest-)
"Es begab sich awwer zu der Zeit...."
-die Botschaft wemmer heere heit!
Es esch nit so wie in 'ner "`s-war-mol-Geschicht"
nit wie imme Märche vun Mensche erdicht'
Wie Auguschdus -von Rom aus- regiert hot die Welt
mit seine Soldate- unn die Macht koschd viel Geld
do hat er seine Leit befohle,
sell vum Volk viel mäh Steire noch hole!
Mer mißt doch schließlich Friere schaffe
mit greeßre, deirere, stärkere Waffe!
Des hot wohl manchen schwer verdrosse,
daß jeder sich drum seil schätze losse
-schätze, zeehle, nummeriere,
rubriziere, registriere-
damit de Kaiser kennt wisse, wie groß wer die Pracht
von Seim Reich unn wie stark sei ganz Macht
uun wieviel Mensche 'm gehorche selle
Aach wann sie des so gar nit welle,
unn wie ER, als Herr der Welt
käm zu meeh uun noch meeh Geld
 
I
 
Die allererschd Schätzung esch das scheint`s g'west
-so wie mers in de Biwwel drin leest
uun die esch g'schehe zu der Zeit
als de Quirinius war Landpfleger iwwer die jiedische Leit
An de Stell vum Kaiser hot er dort regiert
offgebaßt wien Lux, daß nix annres bassiert
als des, wu de Kaiser hot selwer befohle
unn wie mer kennt noch meeh Geld raushole
ausem Volk, dem große, aarme
uhne Ricksicht unn Erbarme,
so daß mer kennt sich nei beschaffe
fers reemische Heer die neieschde Waffe
's war also schun in alter Zeit
nit viel annerschd als wie heit:
Hoschde die Macht, so bischde geacht
als hettschde grad noch 's Recht gepacht
Wu mer Widerspruch erblickt
werd der schun im Keim erstickt
-welcher Art weer sei Gestalt
immer droff- feschd- mit Gewalt!
Drum wie die Schätzung hot aagfange
esch jerer an den Ort hingange
-unn zwar nit weil ers hot welle
sich begebe zu der Stelle
wu er herstammt, aus der er esch kumme
-so war de Befehl- unn so hot mers venumme,
hot dort erfaßt glei oft de Stell
die Steierschuld dort, glei an de Quell.
Weil die Macht, wu ungehemmt,
nit e bissel Ricksicht nemmt
esch aach de Josef aus Galiläa
mit Marie, die wu sei Frä war
aus Nazareth fort nooch Bethlehem.
Dort war sei Familie halt frieher dehääm
Dort war se dehäm schun seit Davids Zeit...
Maria war hochschwanger unn Bethlehem weit!....
Dort hot se gebore- wohl mitte ind' Nacht
ehr erschd Kind dort offd Welt gebracht:
ä herzisches Biewelche, än richtiger Schatz
Unn doch war fern off de Erd kän Blatz -
kä Stubb!- kä Bettche! Bloß Hei unn Stroh!
Wie sinn die Mensche oft so roh!
Marie, die holt aus ehrm Reisebindel
ä Stickel Stoff, gut fer ä Windel...
Kän Blatz wie fer Mensche, bloß Blatz beim Dier!
Bei Esel, Schäflich, Rind urn Stier!
So kummts, daß fer des goldisch Kind
mer grad ä Kripp vum Viehzeich find:
Im Schatte vum Kreiz dort sei Leewe
schun steht die Lieb, wu zu uns Mensche geht
Was do -in de Kripp dort im Viebstall- beginnt
am Galge am Kreiz-dann sein Zielpunkt findt
Kän Blatz sunschd fer den, wu de Friede uns bringt!?!
Ob so de Friede bei uns aach gelingt???
Mer muß den Friede doch ernstlich erstrewe!!!
Findt sich bei uns sein Blatz im Leewe???
 
II
 
Unn do in dere Gechent- in Bethlehems Feld
-wie Jesus war gebore, de Herr vun de Welt
hän Hirte bei ehre Viehherd gewacht
im Hirtefeld bei Daach unn Nacht.
Es waren nit grad feine Leit.
So wars wohl gwest in dere Zeit:
En Hirt der hot nit viel gegolte.
Was hot mer off die Hirte gscholte!
Sie weern all grob unn roh unn herb
voll Hinnerlischd, brudal unn derb
uun kennten nit mool ehrlich sei...
"Loß bloß dich nit mi'me Hirte ei!.."
Mer hot nit viel vun-ne wisse welle:
sie weern uhne Ehrgfiehl unn all rauhe G'selle!
Unn doch esch grad dort in de Heilische Nacht
-wies Hirtevolk bei de Schäflich wacht
vun Gott än Engel, än Bote kumme
Sei gettlich Botschaft hot grad dort mer venumme.
Die waren all ganz schää vun de Socke!!
Was sinn die all so bees veschrocke!!!
Klarheit vun Gott hot um se geleicht!!!
Gottes Wort hot se erreicht:
Des Wort vun de Lieb unn de gettlich Geduld,
wu greeßer esch als alle Schuld:
Ferchten eich doch nit! Zu eich sprecht jetzt Gott
in eier Schuld nei, eirer Not
Ich saach eich all an ä gure Zeit
großi Fräd fer eich unn alle Leit:
's muß känner meeh sei off ewich ve'lore
Grad fer eich esch heit gebore
de Retter, de Erleeser Chrischdus,de Herr
in Davids Stadt! Drum heern all gut her:
"Windel unn Kripp"- du jetzt ich eich nenne
als Zeiche fer ne zu erkenne!
Mer muß nit Gott suche weit, weit hinner Sterne
Ehr selln bei dem Kind do de Friede all lerne
Unn de ganze himmlisch' Chor
singt ne Gottes Loblied vor:
Ehre Gott in de Heeh sell werde
unn Friede sell sei off de Erde
oei de Mensche all, wu Gott dun gfalle!
Fer alle Mensche, alle, alle
derf Friede sei in jeder Gstalt:
Friede zwische jung unn alt,
fer Aarme unn Reiche, im Oschde unn Weschde
-Friede, wu bloß noochem Beschde
fer die annre Mensche froocht,
wu acht off die Aarme, wu mer sunschd ploocht
Herrsche sell fer alle Zeit
Friede unn Gerechtigkeit!
Verrotte zu Staub selln ball alle Waffe!
Gott will mit uns Friede schaffe!
Jo, des will Gott! Des esch sei Ehr!
Des Wort sucht bis heit noch bei uns Geheer!
 
III
 
Unn als die Engel all war'n wirrer fort,
henn sich die Hirte- noch im Ohr war ne s Wort-
off de Weech g'macht nooch Bethlehem, um ze sehe die G'schicht,
wu Gott dorch sei Bote ne hot do bericht'
Gar nit lang hän se veweilt.
Unn was hän se sich beeilt,
sinn hii zud Marie unn zum Josef- zum Kind
wu mer in de Kripp drin find:
Gott macht wohr sei gettlich Wort-
des hän se erfahre dort.
Dun weirer aach saache, was se venumme.
Unn hän Gott so beim Wort genumme
Was hot mer do offgmerkt unn aach gestaunt,
wie änner do zem annere raunt:
Friede sell werre, weil Friede mit Gott -
Friede off d Erd in unsere Not!-
Unn kenner mißt vegesse sei unn off ewig velore
Weil de Chrischdus doch esch fer die Welt gebore!
Die Hirte hän ehr Botschaft de Leit all bericht!
Was esch draus worre aus dere Geschicht?
Hot mer geheert droff, dem Wort aach geglääbt
unn dem Friede noochgestrebt?
Gewunnert hän se sich all iwwer des Hirtewort
Doch folgt merm an seim Blatz unn Ort?
Im dägliche Leewe?- Die Geschicht,
werd uns weiters nit bericht.
Mancher vielleicht weer dran int'ressiert,
ze wisse, was dort esch weirer passiert...
Doch wichtich fer uns esch bloß des: ob MEER
schenken Gottes Wort Geheer!
Ob des Wort vum Krippekind
bei uns offne Herze findt?
Ob mer bloß druff ganz selten achte
-bloß in feschdliche Stunne mool so ä bissel betrachte-
odder ob mer im Alldaach uns wenn aach dran halte
unn in Seim Sinn aach unser Leewe gestalte?
So, daß mer helft dem, wu in Not
-nit bloß denkt ans eigne Brot
Nit bloß nooch seim Vordääl strebt
stattdessen fer de Friede unn fer Gerechtigkeit lebt.
Nit bloß froocht, was es bringt äm unn nitzt,
um die Schepfung sich sorgt- unn wie mer se schitzt
Unn schließlich unn endlich nit redd bloß vum Liewe
Guckt, wie mer werklich kennts Liewe aach iewe!
Gott will uns all mit seim Friede beschenke!
Lossen mer doch uns vun seim Friede lenke!
Die Botschaft gelt fer junge unn alte.
Maria hot des Wort behalte
Des Wort vun dem Kind wu in die Kripp esch gelegt,
des hot se ganz dief in ehrm Herz drin bewegt.
Ach, deet des Wort so uns aach all beweege
-unn begleite uns all mit seim Troschd unn seim Sege!
Unn die Hirte kehrn wirrer um- Gott dun se loowe
Weil ER nit de Herr bloß im Himmel hoch drowwe,
weil ER in unserer Mitt aach will sei
will kumme zu uns- ins Herz also- nei
unn will uns ganz nooh sei mit seim uuendlich Erbarme
ruft freindlich uns zu sich- mit weit offene Aarme
-in dem Kind in de Kripp-!- Drum dun se so preise
die Lieb, wu Gott uns dut all erweise-
Fer all des, was se hän gesehe
fer alles, wu esch dort geschehe:
daß in dem Krippekind sich zu uns gesellt
de Friedeferscht, de Herr vund' Welt!
Unn jetzt eschs an uns all, weirerzesaache
des Wort, wu uns esch zugetraache
durch menschliche Bote, nit durch Engelmund-
daß weirer mer traachen von Herzensgrund
die Botschaft wu aller Beachtung esch wert:
Gott will nit bloß sei in de Heeh geehrt.
Off de Erd, meer, die Mensche meer sellen ne preise
unn anner dem annere Lieb erweise:
Weil dort esch gebore -in dem Kind im Stall
de Retter fer die Mensche all!
Gott kummt uns so nooh- Meer wenn off ne heere
In seim Friede leewe- unn IHN so ehre!
Des was die Engel zu de Hirte dun melde,
des sell uns unn sell fer alle, sell alle Zeit gelte:
GOTT DIE EHR! UNN FRIED OFF`D ERD
uun daß FRIED UHNE END FER ALLE WERD!
So sell es sei -In Jesus seim Name(n)
So meechts aach bei uns sei!- Amen, Amen!