E Gemeinschaft mit Herz?

Die Predigt heute bedenkt in unserer heimischen Mundart
Worte des Apostels Paulus aus dem 1. Korintherbrief.
Diese beziehen sich
auf die Feier des heiligen Abendmahles-
des Mahles der christlichen Gemeinschaft.-
Als Mahl der Liebe- als AGAPE- FEIER hat es von
Anfang an einen zentralen Ort im Leben der Gemeinde Jesu.
Schon lange bevor es kirchliche Gebäude gab, hat man Kirche erlebt,
indem man hin und her in den Häusern sich
traf, Brot und Wein teilte und Gottes Wort
miteinander hörte-
Ich wünsche mir eine Christenheit, in der
weltweit und in den Ortsgemeinden auch heute
das Teilen von Brot und Wein - im Hl. Abendmahl
und im Alltag- und das gemeinsame Hören auf
die biblische Botschaft Zeichen der Einheit und
Kraftquelle des Lebens ist und bleibt.


Ich frää mich jed Jahr off de RIETANIA ehr Feschd
Hock gern do im Wald- so unner de Gäschd
Du gern do als sitze bei me gure Glas Wei
mit annre ve-zehle unn freehlich sei.
Da dun mer minanner trinke unn esse
Do dun mer vum Alldaach die Sorche ve`gesse
Wer immer bloß schaffe dut unn renne,
der derf unn sell sich mool ruhig was genne
Ehr wissen wie wohr des esch unn richtig
Unn doch esch heit mer was annres mool wichtig:
Daß mer heit aach fer en annre Zeit mool hetten
unn nit bloß uns seiwer was Gures deeten
-nit bloß beim Wei unn gure Esse
die eigene Sorche deeten vegesse-
daß mer dezu aach nooch em annere froocht
-acht druff. was en frääd- heert droff, was en ploocht
Unn nach des wissen er all, wie wichtig unn gut
esch, daß änner dem annre zum Leewe macht Mut
unn daß mer die Sorche unn die Not
-aach die Frääd- sich däält wie Wei unn Brot.
Es gelt doch aach heit wie fer alle Zeit:
Gedääldes Leid esch halwes Leid-
Unn daß vedobbelt sieh die Frääd
wammer se bloß dääle deet
Er wißt doch: s esch wohr' unn gut -nit schlecht
Fer Chrischdeleit gelt des erschd recht:
Wammers Brot unn de Wei dält-und die Frääd un die Sorche
esch gar e Stickche drin veborche
vun dem, was im Heilische Mahl geschieht
wie mer aus de Biwwel sieht
-Unn so- ja grad so- dut sich erfille
von Jesus die Botschaft. sein heilische Wille
So wars schon in de alte Zeit
bei de allererschde Chrischdenheit
Dort hot mer des Heilische Awendmahl
nit gfeiert in em Kerchesaal
Mer esch hii unn her in die Haiser als gange
Um Chrischdus in Brot unn Wei se empfange
Unn nit bloß e Bisse vum Brot unn en Schlickel vum Wei
hot mer s gedäält sich am Disch als debei
Es hot jerer satt kriecht, wu dorthii esch kumme
-unn viel Zeit fernanner hot mer sieh dort als genumme
Mer hot sich als zug`heert unn hot sieh vezehlt.
was em Frääd, was em Sorche macht-was em gut dut unn queelt
Gemeinsam hot mer e Mahlzeit ausgericht
Unn dozu hot sich en jerer ve`pflicht,
wu hot Blatz in seim Haus- en geraimige Saal
Mer wechselt in de Familie sich ab als fers Mahl
Unn damit des aach kenner zu arich als belaschd
traacht dozu bei en jerer Gaschd:
Was mer hot, des dut mer bringe,
damit des feschdliche Mahl kennt gelinge
Unn weil an de Lieb mer en Chrischd erkennt,
hot mers en Liewesmahl genennt.
Weil wammer minanner an Jesus denkt
sei Wort unser Gedanke zum annere lenkt
hii zu seim Neechschde, wie mer kennt iewe
vun Herzen an ihm die chrischdliche Liewe
So hot mer gedäält sein Wei unn sei Brot
die Frääd die Sorche. unn aach die Not.
Mer däält sei Glick, mer däält sein Schmerz
Mer war korz gesaacht : e Gemeinde mit Herz
Unn wanns äm gefehlt hot am däägliche Brot.
do hot mern halt gschditzt in seiner Not.
So hot mer kenne minnander loowe
minanner de Herrgott im Himmel drowwe
So denkt mer an Jesus bei Brot unn Wei-
Er esch veborge im Geischd mit debei
Wann in seim Geischd- mer Jesus so ehrt'
daß off sei Wort mer acht unn minanner druff heert
So hot mer des in Korinth aach gemacht
nooch allem, Was uns de Paulus saacht
wie mer s in seim Brief drin leest,
wu de erschd Korinther heeßt
Bloß dort war off äämool, wie mer so heert
De Worm drin unn die Gemeinschaft empfindlich gesteert:
Wie es domools esch gewest
mer dort ab dem elfte Kabbiddel leest:
Wie immer warns klänne unn dumme Dinge,
wu die gemeinsame Sach als kabutt dun bringe
So wars schun frieher, zu alte Zeite:
`s fangt oftmals als aa mit so Klännichkeite:
unn uhne daß mer groß Beeses denkt
hot mer en annre veletzt unn gekränkt
Doch wu mer bleibt blind fer dem annre sein Kummer unn Schmerz
do bleibt mer nit lang e Gemeinschaft mit Herz
Doch wenden mer nochemool unsern Blick
minanner nooch Korinth serick:
Dort macht mer wie sunscht s Feschdmahl bereit
s warn die aus Korinth wu hänn ghabt genung Zeit
Mit Obschd uun Wei unn Brot unn Fisch
richten se schun mool de Disch
Unn dun dann schließlich um de Disch schun rum sitze,
als die annre dun bei de Ärwet noch Schwitze
-s dut jo kenner sich erbaarme
iwwer Sklave unn die Aarme
Noch speet am Owend hääßt s dort: schufte unn renne
Dann endlich dut mer ehr Ruh ne mool genne
Die erschde, die waarten dun die Zeit sich vetreiwe
-Wu dun blof die anore bleiwe
Unn enner nooch em annre fangt aa se murre:
Mensch, dut mier de Maache knurre!
Wann ich do seehn die gure Sache
Wie dun die Abbedid mer mache!
Unn Wei esch do- meh als genung
Kumm s werd mol en Schluek Schun gedrunk(e)
Unn schließlich fangt mer aa se esse.
Hot mer die Aarme dann glatt vegesse?
Mer nemmt sich s Schenschd unn s Greeschd unns Beschde
unn iwwrisch bleiwen bloß noch Reschde
So war des Beschde schun genumme
wie die Aarme sinn speet vun de Ärwet kumme
Bloß Broeke warn noch iwwrich fer sich se nemme
Wie kann mer die Aarme bloß so bees beschämme
Unn die henn noch nit mool getraut was se saache
mit ehr`m hungriche unn leere Maache
Unn beschemmt henn se gehockt- so neewe de Satte
Dene aarme Leit hot des es Herz schwer gemacht-
kä Wunner ,wann änner do sich dann saacht:
Dorthii gehn mer nimmi esse
Mer dot uns doch dodal vegesse
Scheints eschs so, die fiehln sich gschdeert,
wammer zu de Ärmschde gheert-
Se bleiwen liewer unner sich
-uhne uns - allää am Disch
Besser eschs :mer bleiwen fort!
Was sell mer noch bei dene dort
Gebbts-.dort nix wie frumme Sprich,
sach ich mer : Nää! unn: Uhne mich!
Unn des esch scheints so nit bloß äämool bassiert
daß mer die Aarme so schlimm hot blemiert
statt daß mer deet feschd sammehalte
war druff unn draa mer, die Gemeinschaft se spalte!
Was des bloß alles noch gewwe hett,
hett ne de Paulus nit dringlich ins Gewisse geredt'
Off die Dauer het mer so des nit kenne treiwe
Drum wollt er des in em Brief ne mool schreiwe
Er saacht es ne ganz deitlich unn scharf wie nie
-unn bissig, unn voll Ironie:
`s weer grad gut, wann bei ne die Gemeinschaft sich spalt
Do kennt mer dann sehe, wer am Glääwe noch halt
Unn wer statt dessen de annere ploocht
Doo det sich grad zeige, wer nooch Jesus noch froocht
Damit nit zesteert werd die Gemeinschaft beim Esse -
sein Sinn unn sein Wert nit dodal werd vegesse -
hot de Paulus se also erinnere welle
an des was se dabei bedenke selle
Unn so lenkt er drum ehrn Blick
off Jesus sei letschdes Mahl serick
Wie es Jesus hot gefeiert als Abschiedsmahl
mit seine Freinde im feschdliche Saal
Wie Er -um ne fer immer vebunnde se sei
gedält hott sei Brot unn aach de Wei. -
Daß mer sich endlich mool grindlich bedenkt
-hot dodruff de Paulus ehrn Sinn hiigelenkt
Es werd uns freilich nit bericht,
was de Paulus hot damit ausgericht
Doch ich denk: mer hat sich gschemmt-
esch in sich gange, hot noochgedenkt,
nei aagefange so daß mer Ordnung hot gemacht
unn hot sich endlich jetzt gesaacht:
Doodruff wemmer uns all vepflichte
Donnooch wemmer uns all kinftig richte:
Mer wenn nit von de Aarme de Hunger vegesse
Nit denke allää bloß an uns als beim Esse
Wie sell sunschd die Gemeinschaft erhalte bleiwe
So kennen mer des doch nit langer meeh treiwe
Ab jetzt wemmer dääle- so wie es sell sei
die Frääd unn die Laschde unn- Brot unn Wei.
Wie gut dot des Paulus vor Aache uns mole,
wie Jesus des Mahl uns hot doomols befohle
in der Nacht, wu mern verrot hot- un wie er hot gsesse
mit de Jinger an am Disch um mit ne se esse
-wie er do s Brot hot gebroche unn gedäät aach de Wei
Nit annerschd so sell es bei uns kinftig sei
Mer feiern s Gedächtnis vun IHM unn seim Doot
wammer däälen de Wei unn däälen es Brot -
dann er esch zu Gaschd, dann, wann minanner mer essen
wammer danken- sBrot brechen- sei Wort nit vegessen
Dann eschs sei Leib uns, wammer brechen Sei Brot
-sein Leib, wu mer mit seim Sterwe gebroche hot
Unn wammer däälen minanner de Becher voll Wei
sell des uns en Bund mit Jesus sei-
Sein Bund fer uns unn mit all geschlosse
fer die Er bei seim Sterwe sei Blut hot vogosse
Bei uns war io grad de Daifel los,
mer henn gedenkt an uns selwer bloß
An Jesus sei Wort wemmer in Zukunft uns halte
unn dann kann nix unser Gemeinschaft meh spalte
Dann sinn mer- in frohe unn schwere Stunnde
wie en äänzige Leib all minanner vebunnde
Als veschworne Gemeinschaft derf mer dann uns betrache
in der änner de annre dut schätze unn achte
S hot doch jeder sei Gabe unn`s werd jerer gebraucht
Unn kenner esch do, wu do nit zu was daucht
Wie gut fer uns, wammer dabei bleiwe
-was de Paulus uns dut so deitlich schreiwe
Drum mit Hand unn Fieß mit Mund unn Aache
mit Fantasie unn Begeischd`rung uns draa waache
damit s gettliche Wbrt de Mensche werd kund
Dozu braucht uns doch Jesus- als sein Mund
Sei Fieß selln mer sei- zu de Mensche gehe
sei Aache, wu fer all nooch em Rechte dun sehe
Als sei Ohr sinn mer gfroocht, wu off de annre heert
als sei Hand, wu mit zupackt, dem Iwwel aach wehrt
Unn jerer an seim Platz unn Ort
sell weirertraache sei gettliches Wort
Unn dun an seim Wort minanner mer bleiwe
dann werd unser Glääwe aach gure Frucht treiwe:
Die Frucht, die wu zehlt, des esch die Liewe-
daß mer Geduld am annre iewe:
Es waarten off e gures Wort
so viel Mensche an unserm Ort
Unn wieviel hungern, daß mer se vesteht,
-ne zuheert, se baucht um zu ene geht
Off en offnes Ohr unn Herz unn Hand
soviel waarten die Mensche in Stadt unn Land-
Iwwerall off de Erd die Menscheit schreit
nooch Friede unn Brot unn Gerechtigkeit
Iwwerall dut des not, daß mer deet iewe
ob nah- ob fern die Neechschdeliewe
Dozu- so denk ich- war jetzt mer bereit
Unn des zeehlt aach jetzt unn fer uns unn fer heit:
Wu Jesus sein Geischd uns Mensche dut treiwe
do kanns nit bei fromme Worte bloß bleiwe:
Wer liebt, der esch freindlich- mittem annre er fiehlt
Der ereifert sich nit- s werd nit sich offgspielt -
Nit taktlos esch mer dort- nit off sein Vordääl bestrebt
nit empfindlich orrer bitter, wu mer Schlechtes erlebt
-Wer liebt, traacht nit nooch mit Schadefrääd
Waat nit ,daß de annre sich schade deet
winschd werklich aach kam des Schlimme, Schlechte
fräät sich mit jerem iwwers Gure unn Rechte
gebbt ken Mensch off- bleibt aach dann fer ne offe
unn vetraut em wann sunschd esch nix meeh se hoffe
Unn traacht- weer aach noch so schwer die Schuld
de anner, wus em schwer macht, mit Lieb unn Geduld
Alles muß emool vegehe
de Gääwe, die Hoffnung bleibt bestehe
Unn die Lieb- es stimmt- es sinn die drei
doch die Lieb - die es esch `s heichschd dabei!
Ich frooch eich, ehr Leit- was de Paulus do saacht:
Esch des nit wert, daß mers zu eiche sich macht?
So loßt uns- wammer beinanner jetzt sitzen, dann esse
die biblische Botschaft nit glei wirrer vegesse
Wammer essen minanner unn sitzen beim Wei
wenn in chrischdlicher Lieb mer vebunde all sei
unn dääle minnanner die Frääd unn de Schmerz
Gott will uns doch all als Gemeinschaft mit Herz