Vum Weistock unn de Reewe

Weil drauß` die Trauwe sinn am Reife
-so daß mer graad meecht nooch ne greife-
unn um de erschde Federweiße
die Leit in Land unn Stadt sich reiße
do feiern heit mer unser Feschd
mit viele, viele liewe Gäschd
Unn wie vesproche werd Kerch heit gehalte
fer Groß unn Klää- fer Junge unn Alte
unn wie ich`s vor me Johr schun hebb zugesaacht
heb ich fer heit aach e nei Pälzisch Preddicht gemacht-
in unsere Sprooch, wu mal laut esch unn defdisch
unn dann wirrrer zaart unn immer als kräftisch-
- zumal ich schun als klänner Bu`
vun klää off Pälzisch babble du.
Unn wie kennt`s heit annerschd sei:
Mer heern heit vum Weistock unn vum Wei.-
Drum war ich also off de Such
im dicke, dicke Biwwelbuch
nooch Worte vum Weistock unn sein`re Kraft
vum Wingert unn vum Rewesaft-
wie ich vum Weibau was kennt fenne,
was helfe uns kennt, nochsesinne
iwwer uns selwer unn iwwers Lewe
unn des wunooch mer sellten schdreewe
-
Drum hebb ich g`sucht - ehr liewe Leit-
schunn glei`of d` allererschde Seit-
Doch des was ich gsucht häb in meim Sinn:
steht dort bloß zwische de Zeile drin,
Unn `s esch jo wohr: wann Planz unn Kraut
off dere Erd werd aagebaut
weil Gott, de Herr, hot alles g`schaffe
ferd`Menschwelt- nit bloß fer`d Affe-
unn fer all des, was off`m Erdborm kriecht
unn was ind` Luft zem Himmel fliecht:
dann geheern dezu aach de Weistock, die Keschde,
wie drauße mer sieht offs Allerbeschde
Drum blätter ich weirer- ab Kabiddel zwää-
Vielleicht dut aach dort ewwes neheres stehe?
Do esch die Redd vum Lewensbääm
vun All-Erkenntnis- wie in`d Trääm
vunn Gurem unn Beesem- und wie die Schlang
des Weib ve`fiehrt, unn gar nit lang
dut se dann noch de Frucht schun greife
wu sieß dut in de Sunn drin reife.-
Gelehrte wu hänn ehr Ladein gut gekennt,
hänn d`Paradiesfrucht bekanntlich "Äppel" g`nennt.-
Weil "d`Äppel" häßt "malum" dort- gut unn recht
unn "malum" määnt aach noch"bees unn schlecht"-
unn malum malum- mißt dann sei
"en Äppel, wu de Worm esch nei"
Dogeche muß ich brodeschdiere-
Wie kann mer bloß so`n Uusinn vollfiehre
E scheenes Wortspiel mit Doppelsinn mag`s sei-
doch will mer des nit ins Hern enei:
Wie kennen bloß gelehrte Männer
aus alle Länner unn Biwwelkenner-
so denke voller Uuverstand!
Es wäß bei uns in unserm Land
bei uns schun jedes Pälzer Kend,
wu mer`s Paradies wohl fend:
Es kann doch in de Palz bloß sei
wud` Keschde wachsen unn de Wei
Ich will`s Ladein nit grad veachte
Doch braucht mer- fer`s Leewe se betrachte
meh als bloß Ladein se kenne.
Drum meecht ich jetzt en Name nenne
wu e G`schpier hot g`hat unn genung Vestand
bei uns im scheene Pälzer Land
In seinre Pälzisch Weltgeschicht
- vor 90 Johr hot Paul Münch se gedicht-
do hot der schun eiwandfrei bewiese,
weil alles bei uns so paradiesisch dut sprieße:
Daß in de Palz von jeher `s Paradies esch gewest-
wie mer bei `m ganz deitlich leest:
Do wachsen Mannle unn Melone
Feige - unn manchmool Zitrone
do wachsen Keschde- wachst de Wei
wu kennt es Leewe schenner sei?
Und d`Mitt vun de Palz- des esch bekannt
fer alle g`scheide Leit im Land-
des kann doch bloß Rhodt unnerd`Rietburg sei-
wud`Keschde wachsen unn de Wei
Drum glääb ich gar: de "Bääm vum Leewe"
des war`n dicker Stamm vun`d Rewe.-
Ob`s en Tramänner esch gewest-
wie mern noch heit zeigt seine Gäschd
Des wäß ich leirer nit ze saache
Mer lewen jo nimmi in paradiesische Daache
Doch war ich neilich off de Such
imme ur- ur- alde Weisheitsbuch,
wu mer de "äthipische Henoch" nennt,
ob des dezu nit was sache noch kennt.-
Des kann mer freilich nit velange,
daß en Pälzer Parre mißt noch mit "Äthiopisch" aafange
In Deitsch hebb ich` gelese- gut iwwersetzt:
unn was ich hebb gfunne hot mich ar`sch g`frääd unn ergetzt:
Do dut doch werklich wort- wertlich drin stehe:
de Paradies- Bääm weer als en Rebstock ze sehe:
Weil aus dem seinre Frucht beides halt kääm:
Gures unn Schlimmes- weer des der Bääm
- Nadierlich du die Reemer ich nit gänzlich mißachte
Manch Wort aus ehrm Mund muß mer respektvoll betrachte:
So henn se sich g`saacht: "in vite vita"
unn des esch wohr- drum: sic est ita:
im Rewesaft- im Saft vun d`Rewe
esch d`Lewenskraft - esch Kraft zem Lewe
Bevor freilich die Reemer des henn formuliert
hot de Noah des alles schun ausprowiert:
Weil em de Wei macht gure Mut
unn weil er `m aach schmecke dut,
Drum hot der als erschder schun Reewe g`schdeckt
-die Kraft vum Weistock fer sich entdeckt-
Es war kaum iwwerstanne die große Flut
wud`Erd vewieschd hot mit großer Wut
unn als in siwwe Farbe- uugeloche-
gezeicht sich hot de Reecheboche
als Zäche, daß Gott hot jetzt Friere gemacht
unn hot fer die ganz kinftisch Menschät g`saacht:
Es sellt wechsle Frost unn Hitzesglut
so lang die Erd beschdehe dut.
Unn Friede vun Gott aus - aus seiner Hand
sell gelte de Mensche in Stadt unn Land
Unn -nooch seim Wille -sellt unser gud Erd
nit nochemool werre so ve`wieschd unn zesteert
Do hot de Noah, dabber glei
de Reebstock g`setzt, ne gepfleecht fer de Wei,
Er war en arg geploochter Mann,
wu Troschd so manchmool brauche kann:
er schafft sich bucklich, lahm unn krumm-
die Zeit vum Paradies esch rum.-
Er esch mied g`schafft unn ramboniert-
sei Nerve sinn ar`sch schdrabedziert
Doch nemmt er owends sich- mit Keppche-
-wann er sich Ruh als gennt- e Dreppche
vun seim eigene Wei- de beschd im Land
Den schmeckt er mit Bedacht- Ve`schdand
Sauft nit -wie`s Wasser es Vieh im Stall-
sein Rhodter Piff off äämool all.-
Unn doch kann ich`s nit veschweige
weils die Biwwel uns dut zeiche-
esch des nit immer so beim gewest
-wie jerer wäß, wu sei Biwwel lest-
Äämool, do hot er - war`s off nichternen Maache?-
weit meh gsoffe als er hot kenne vetraache-
Unn des deten so erhitze,
unn er war so ar`sch am Schwitze
daß er in seim Rausch hot sich - uugeloche
splitternackisch ausgezoche-
in de Rech drauß sich geleecht- sein Rausch ausgepennt,
wie jerer wäß, wu sei Biwwel kennt
unn hot sein Sohn Ham, wu ne hot gsucht-
unn voll Schadefrääd gfunne- datsächlich veflucht
So esch`s: wu viel Licht esch- des wäß mer im Land
esch aach viel Schatte- Unn aach des esch bekannt,
daß sein Ur-Ur- urururur-ururur-Enkel de Lot
im Vollrausch sei eichene zwää Dechter g`schwängert hot:
Sie henn kän annre Mann meh g`funne
Drauß esch des Volk vun Moab kumme:
e ferchlich -grausam Volk mit Getze,
fer die se gern ehr Messer wetze.
Fer uns als e warnend Beipiel gewwe:
Wie s`Saufe ruiniert so manch e Leewe:
Schun mancher hot uhne Sinn unn Ve`stand
vesoffe sei Lewwer, Milz, Hern, Haus unn Land
Desweeche esch mool de Jesaja geloffe
zu dene, wu henn schun frieh morchens als g`soffe
unn hot se aus ehrm Suff geweckt:
unn hot` ne mol grindlich die Määnung gs`chteckt,
weil se schun frieh sinn ind`Wertschaft geloffe
unn henn Haus unn Bett -all ehrn Bettel- vesoffe-
Als deet mer nit Veantwortung traache!-
Des hot er ne grindlich misse mool saache:
Er denkt an die Mensche in ehre Not
an die aach, wu`s fehlt am dägliche Brot
Doch denkt -an und fer sich- en Jesaja nit schlecht
vun dem, wu sei Ärwet macht schlicht unn recht,
nemmt dann- denooch - sei Schoppe in die Hand
drinkt ne langsam- bedächtig- mit Genuß unn Vestand
fer sich als zem Esse- orrer in d` Owendstund
- allää orrer mit annre in gsellicher Rund
Doch manchi Frää unn mancher Mann
wu`s Trinke gar nit losse kann
esch krank unn braucht Hilf- braucht de Dokter- e Kur
derf Wasser bloß trinke -bloß Sprudel pur
Unn gebbts fer ihn noch "Saft der Reewe",
dann bloß noch uuvegore eewe
Doch wer des dorchhalt: e Leewe lang Saft:
Respekt- alle Achtung- vor so`rer Kraft
Korz- de Jesaja hot die Wohret ne gsaacht,
was mancher gar nit gut vetraacht.
Er hot se ín e Lied nei g`steckt-
unn Stick fer Stick henn se d`Wohret entdeckt:
Die Leit henn grad bei `m Weifeschd gsesse-
zum sechste Schoppe ehr Rumstick gesse-
do hot er sei Gitarr gschnappt unn schnell
se gestimmt- unn aagstimmt off de Stell
e luschdiges Liedel, was gut hot geklunge-
e Liedche vum Weiberg, des hot er ne gsunge:
Vun seim Busefreind deet er vezehle,
wu sich so arg deet mit seim Wingert rumqueele:
En scheene Wingert, den hett er dort:
E guri Lag- es siffischi Sort
- e Wingertshäisel drin- ganz schneidig!
so daß mer grad kennt werre neidisch!
Bloß daß der Wingert dort gar nit deet traache
Ehr Leit, `s weer ääfach zem Vezaache!
Es weer die Mieh grad ganz fer die Katz!
Dobei weer sei Wingert sein greischde Schatz
Unn wie iwwerall mer deet vezehle
wie er sich fer die Katz grad deet rumqueele
wie ne sein Schatz so arg entdaischt-
daß jerer droff waart, daß er saacht: "Schluß jetzt- `s reicht
Im Bauch hebb ich e stinkischi Wut-
Des mit meim Wingert, des werd nimmi gut-
Der bringt mer bloß Ärger- Kummer- Vedruß
Jetzt esch mit mei`m Wingert fer immer Schluß!
Des war e scheenes, luschdig`s Lied-
De Inhalt traurisch, wie mer sieht
Die Leit die war`n off jeren Fall
begeischdert vum -minanner all:
die warn all "des Lobes voll"
die fanden`s schlichtweg all ganz doll
Sie henn aach gemerkt noch vun Aabeginn:
Des Liedel, des hot noch en Hinnersinn:
Der Freind vun dem Bänkelsänger, der arm Tropp,
der hot e ganz anners Schätzel im Kopp
Sei "Wingert" dut Zepp unn Kettcher b`schdimmt trache
unn Ring unn en Rock- `s esch-sozesaache:
e Weibstick wu ne hot betrooche
ne ausgenitzt - raffiniert unn veloche
Statt Lieb unn Luschd unn Lewensfrääd
gebbts Stunk unn Krach unn Herzelääd-
so wie beim Nochber- den hot sein Drache,
-den hot sei Frää- erschd geschdern veschlache
Unn wie se all am Grinse sinn:
die Bawett, de Hannes unn aach die Kinn:
do dut de Sänger, de Jesajahu sich korz b`sinne
unn dut en neie Vers beginne
Mein Freind, wu`s werklich määnt so gut-
wu mer so ar`sch entdaische dut-
der Freind esch Gott selwer- de Herr vun de Welt!
Drum hot der mich doher geschdellt,
daß er heeren, was er selle-
aach wann ehrs bschdimmt jetzt gar nit welle:
Ehr, wu am liebschde deeten veschlache,.
den, wu die Wohret eich dut saache:
Es Gottesvolk- des esch sein Schatz-
Unn alle Mieh esch fer die Katz.
Gott hofft off die Gerechtigkäät
unn was er find esch: Schlechtigkäät,
weil iwwer`s Ohr haut jerermann
sein liewe Neichschde wu er kann.
Wu Gott off Gut-Dat geduldig dut hoffe-
do find sich bloß Blut-Dat- ich sach es betroffe
Drum esch sei Geduld jetzt ball am End-
en bessre Wingert sich leischde Er kennt!
Ich will jetzt nit länger bei Jesaja veweile-
sunschd dut uns die Zeit zu ar`sch enteile-
Unn des breecht im Grund mer bloß Vedruß-
Drum kummt en große Sprung zem Schluß:
Iwwer siwwe hunnert Johr am End
vom Alte ins Neie Testament
"Ich bin de Weistock- unn ehr sinn d`Reewe"
des esch die Botschaft wu Jesus hot gewwe.
Bleiwen doch in mer- unn dann bringt er Frucht,
wie weit unn brät mer lang se sucht:
Frucht, wu Gläwe esch unn `s Hoffe
wu Lieb esch, wu fer de annre esch offe:
Bleiwen in mer -wie Weistock unn Reewe-
dodrauß wachst Kraft eich fer de Alldaach, fer`s Leewe
unn lewen er so vun meim Lewenssaft
durchstreemt eich mein Geischd- dorchstreemt eich mei Kraft
So fruchtbar Reewe, des sinn selle,
wu off sei Wort als heere welle,
wu d` Ohre offsperrn- unn heern off sei Wort
dun, was se sell`n dann aach an ehrm Ort
E guri Reeb, die kummt nit zum Dreck,
die werd gebutzt, die schmeißt mer nit weg
Die werd umsorcht, die werd gepfleecht
mit viel Lieb jo en Winzer sei Reewe umheecht-
damit die Ernt ihm gut meecht gelinge
sei Rebstock em gure Frucht meecht bringe
Unn was weer des: e Ernt uhne Trauwe
Des deet doch me Winzer die Hoffnung ganz rauwe
Wie en Winzer an seim Rebstock will Frucht-
so de Herrgott se aach unnerd` Mensche sucht:
Unn des -so män ich sellt jerer sich merke.
Im Glääwe will`s uns all beschdärke:
Die Welt die braucht doch G´rechtikäät,
die peift off all die Schlechtigkäät
Weil wann jerer bloß´an sich selwer denkt
mer de Karre ganz flott in de Grawe neilenkt
Die Welt hot g`nung vun Leid unn Schmerz
braucht Mensche mit Ve`schdand, mit Herz
voll Lieb, wu de annre mittraacht unn stitzt
unn nit bloß froocht, ob`s meer was nitzt
Daß enner em annre steht bei in de Not-
des braucht mer doch wie`s dägliche Brot!
Ach deet doch bei uns, wie Jesus es will
Frucht reichlich reife- gut unn still-
daß mer all sei Wort beachte
bloß noch dem, was em Lewe dient, trachte:
daß uns kenner de Sinn deet vum Lewe rauwe
so gewiß mer jetzt drauß find gure Trauwe
Drum dun mer gut dran, uns an Jesus ze orientiere
Sei Wort will uns all zem Gure hiifiehre,
daß mer nit vegeblich sucht
in unserm Leewe gure Frucht:
"Bleiwen doch in mer - merkts eich fers`s Leewe:
Ich -Jesus- bin de Weistock- unn ehr sinn d`Reeewe"
-
Unn de Friere vun Gott, wu esch heicher als unser Ve`stand
sell bewahre uns bei Jesus- unn die Mensche im Land