1.
Korinther 121.
Korinther 12
Heit feiern mer wirrer de RIETANIA ehr Feschd. Mer feiern`s mit veel liewe Gäschd Heit wemmer uns wirrer was Gures all` genne! Wie gut wammer do als veschnaufe kenne! Wu die Vechelcher peife unn die Bääm dun rausche, do wemmer offs biblische Wort aach lausche- uns bsinne iwwer unser Leewe- off des, was `s wert esch, daß mer`s erschdreewe- Unn des wemmer aach nit glei wirrer vegesse, wammer noochii beinannersitzen beim Esse- so wies uns jeed Johr wirrer vun neiem als g`fallt- weil Esse unn Trinke Leib unn Seel sammehalt- so wie es uns des alt Sprichwort saacht- unn weil an em Disch sitze aach dozu beitraacht daß de Sammehalt zwische Junge unn Alte- vun Mann, Kind unn Frää werd lewendich erhalte. Dort wu mer dält sei Brot unn de Wai, muß die G`meinschaft lewendich sei! Unn des esch heit`s Thema fer jung unn alt: was uns vebind`t unn sammehalt- was Große unn Klänne, was Kind, Frää unn Mann zu `r echte G`meinschaft vebinde kann Wie schnell als dut mer sich zerstreite! Unn dodrunner muß die G`meinschaft dann leide- unn des esch dann fer alle schlecht. Fer Chrischdemensche gelt `s erschd recht- Es sell kenner off Koschde vum annre glänze Mer sell sich ferdere unn ergänze. Des esch was uns Paulus- de Aposchdel - schreibt- daß de Sammehalt unnerd`Mensche erhalte bleibt. Er schreibt`s imme Brief- unn vun dem wäs jed` Kind, daß mer ne in de Biwwel drin find- im Neie Teschdament- ich hebb se im Kittel- D`raus wemmer betrachte es zwelfte Kabiddel- aus em erschde Korinther- Brief. Den hot er g`schriwwe weil dort so manches lag schief- Unn dovuu war de Paulus dief im Herz drin bedroffe- daß dort so viel war schief geloffe. Drum schreibt ne de Paulus, mer meecht doch beachte, was de Sammehalt ferdert- mer mecht noch dem trachte, wie mer minanner die Zweetracht dämpft unn um Ee`tracht ringt- um Veständigung kämpft. Er sprecht vun dem, was die G`meinschaft offbaut- unn vun Gott, wu sei Gawe uns all aavetraut. In Korinth, dort hot so mancher im Stille gelitte, mer war dort voller Zweetracht - zerstritte- Off Koschde vum ann`re wollt`jerer dort glänze- statt daß mer sich ausdauschd unn sich deet ergänze. Wann jerer sich offspielt- sich groß produziert. esch`s ä Wunner wann die G`meinschaft ehr Kraft veliert? "Denkt drum nooch iwwer des, was offbaut unn erlabt- saacht do de Paulus- weil Gott uns begabt- uns all mit seim Geischd- mit seiner Kraft, wu in uns de Glääwe schafft. Drum häßt`s - statt stumm se resigniere- sich aus em Glääwe engagiere." Des gilt aach fer heit, daß mer nit resigniert- daß mer als Chrischd sich engagiert- sich stark macht fer des, was die Schepfung bewahrt- was em Friede dient- unn an Kräfte nit spaart, wann es gilt, de gettlich Wille, was Gott uns sacht- aach se erfille. Do packt mer zu- lebt couraschiert, wu Gott sein Geischd uns lenkt unn fiehrt. Geischd määnt Begeischd`rung- määnt die Kraft, wu in uns es Gure schafft.- Begeischdre kann mer sich freilich fer viel: fer Audos, Mode unn Fußballspiel, fer Kunschd unn Musikk unn Kuldur- fer alles was wachst in de freie Nadur- fer des unn fer jenes- fer`s Steckeperd- fer des - korz- was lieb uns esch unn wert.- Was Begeischd`rung esch, des werd jerer wohl wisse. Mer werds drum nit lang noch erkläre misse. Aach de Paulus hot dozu nit viel Worte gemacht. Bloß hot er ne des ääne noch gsaacht, wie des war in dene Zeite, als se warn noch richt`ge Heide: In was fer e Begeischdrung se war`n domools g`schdeckt, bevor se henn Chrischdus im Glääwe entdeckt.- Was Getzedienschd mer heit noch hääßt- wie warn se do voll debei gewest! Sie henn sich misse driwwer schämme: Mer kann sich dodraa ke Vorbild nemme- Wammer vegetzt die irdische Dinge- wie sell`s Leewe dann gelinge??? Drum sellt` mer lerne unnerscheide - so zeigt äm`s Beispiel vun de Heide- was fern Geischd die Mensche treibt, weller Sach mer sich ve`schreibt. Unn drum macht er ne klar, wer en Chrischd sich nennt, daß der sich vun Herze zu Chrischdus bekennt.- unn so lebt, daß er Jesus ehrt- lebt so wie`s Jesus uns zeigt unn lehrt. So daß mer bei dem spiere kann: Es lebt als en Chrischd die Frää- der Mann. Der esch mit Gott seim Geischd beschenkt, der wu uns all sem Gure lenkt. Än Geischd esch uns gewwe- unn doch sinn veschiede die Gawe, wu uns sinn beschiede.- so schreibt de Paulus weirer fort- so stehts in unserm Biwwelwort Veschiede esch de Dienschd, in den mer sinn g`schdellt- Doch änner esch bloß Herr in de Welt- Herr - freilich nit wie annre Herre, wud` Menschheit unnerjoche, ve`sklave- beschweere. Unn der ääne Gott, wu d`Menscheherze lenkt, der hot uns mit seim Geischd beschenkt, damit mers Gure meechten waache unn Güte in unsre Herze traache. Wohr eschs- die gure Gotteskraft- des was sein Geischd do in uns schafft- will nit bloß uns stärke im Selbschdvetraue- sie will die G`meinschaft ferdre unn baue. Wann Gott mit seim gure Geischd uns lenkt- dann hot ers zum Nutze vun ne all sich gedenkt Unn weil es an Gabe dut werklich nit fehle, fangt de Paulus jetzt aa, se mool offsezehle: Weisheit nennt er - Erkenntnis vun Gott. Kraft im Glääwe- es Helfe in Not.- Kräfte wu heilen- unn manchi Daat, wu Wunner was wirkt, wie es kenner erwaat. Er sprecht vum Lobpreis mit begeischderter Zung- unn dem, wu erklärt die Begeischderung- Er nennt gettliche Weisung unn klare Sicht- wu dem Menschekind helft, wu sich denooch richt- unn er weist hii off des klärende Wort zude rechte Zeit unn am rechte Ort. Gelt des nit heit aach unn fer unser Zeit- wie in Korinth- fer jetzt unn heit?: "Es hot jerrer sei Gab unn s werd jerrer gebraucht- unn ke Gab isch so, daß se nit zu was daucht- unn kenner braucht sich mit seiner Gab se veschdecke- was in uns steckt gelt`s, se entdecke: De ääne loßt imme Chor gern sei Stimm als erklinge- lobt Gott mit de annre- mit frohem Singe enn annre wend sich zu mit re Riesegeduld, dem wu sich rumploocht mit seiner Schuld- Der hot e gut Herz unn en off`nes Ohr En annrer esch bekannt devor, daß er bei Diakonie unn Brot fer die Welt nit geizt se helfe mit Gut unn Geld- Enn annre wu hadert unn sei Schicksal beklaacht, find Troschd unn Veschdendnis- en Mensch wu`en traacht. En annre richt schlicht als en Blummestrauß unn schmickt mit aus es Gotteshaus Mancher hot sei Talent im Backe vun Kuche- unn jerer will en gern vesuche.- weil die Lieb bekanntlich geht aach dorch de Maache. Der wäß sei Gedanke klar vorsetraache- unn hot aach es Herz am rechte Fleck- Der hot Händ wu zupacken- unn die schaffen was weg! Der veschdeht unner de Mensche Bricke se schlache- helft ne so sich vesehne, sich als se vetraache. Unn`s braucht sich kenner mit seiner Gab se veschdecke. `s derf jerer fer sich sei Stärke entdecke. An Gabe fehlt`s nit- in macherlei G`schdalt schenkt Gott dorch sein Geischd, was d`G`meinschaft erhalt. Geischd vun Gott esch`s, wu die Mensche vebind- bei uns -heit- wie frieher in Korinth wu manche Gräwe warn iwwerwunne- weil Gott im Glääwe hot vebunne Jurre unn Grieche- Reiche unn Arme- Sklave unn Freie-All` gelt sei Erbaarme! Die Dääf mit Wasser esch es Zeiche, wie Gott will alle Welt erreiche- Mensche aus jerem Volk- unn Land schwarz- weiß orrer gääl- aus jerer Stand. Sein Geischd ve`äänt an jerem Ort- all die wu heern offs gettliche Wort.- macht ääns all`, wu offs Chrischduswort heere- all, wu mit ehr`m Leewe Chrischdus ehre. Er hot uns - wie mer sinn- voll Lieb all aagnumme. S derf jerer- so wie er esch- so zu Ihm kumme. Drum sell sich käner am annere steere- wie die Glieder an äm Leib simmer, wu zunanner g`heere De Paulus hots in e Gleichnis-Bild g`faßt- Vom Menscheleib, wu alles echt sammebaßt. Die Organe, die brauchen sich , dun all sich ergänze- unn käns kann off Koschde vum annere glänze Des weer jo wahrhaftig nit aussedenke -so saacht er um die Gedanke hii zum Friede se lenke- wann do ääns sich meecht geche` s annre profiliere, unn dobei so e Spektachel vollfiehre, daß de Mund so zum Beispiel deet lautstark kund "wichtig bin ich- bloß ich, ich de Mund! Unn dodruff es Ohr- frisch-frech- nit faul " Halt doch dei Gosch`, du dummes Maul Ich saach der wie`s esch: ich,ich, es Ohr, off mich - mich- kummt`s aa- meer macht kenner was vor Unn wann dodroff vielleicht deet saache die Hand- ich, ich allää bin vun edelschdem Stand- Unn de Fuß druff- Ich, ich kann bloß gehe Um mich `rum sell kinftig sich alles drehe! Was weer mit so` m Kerper- wann`s so bei`m weer? Genauso hot jerer sei Offgab - sei Ehr - sein Platz , wu er muß sich voll ei`bringe mit sein`re Begabung. Bloß so kanns gelinge! Unn iwwerall, wu mer minanner sich streit- -aach wu ääner im Stille de annre beneid- Do mään ich- mißt mer in Ruh mool betrachte was Paulus uns saacht - unn`s aach beachte. Gott will doch, daß mer besser meecht zunanner finne- unn off des, was uns äänich macht uns deeten b`sinne.- Unn wammer minanner um die Wohret dut streite- was sich wohl nit immer loßt ganz vemeide- do sell`mer nit des aus de Ääche veliere, wie Gott will uns Mensche all zunanner fiehre.- Ob Katholik, ob Prodestand iwwerall, in jerem Land: Es sinn die all ääns, wu offs Christuswort heere Was uns unnerscheid, muß dann uns nit steere! Minnanner sellmer in uns`rer Zeit- wirke im Geischd vun de Menschlichkeit. Unn des esch`s aach, was zum gure Schluß- de Aposchdel Paulus grad noch schreiwe muß: Wann alles alles muß vegehe, esch es die Lieb, wu bleibt bestehe- Es Glääwe unns Hoffe - es sinn die drei- doch die Lieb esch`s aller-heichschd debei- Unn die Lieb, wu vun Gott kummt, sell uns begleite- an unserem Ort unn dorch die Zeite. So sell es sei- in Jesus seim Name(n). So sell es sei- drum sach aach ich: Ame(n).
