Psalm 86,11

Weise mir Herr, deinen Weg, daß ich wandle in deiner Wahrheit

(= ich will ihn gehen in Treue zu dir)

erhalte mein Herz bei dem einen, daß ich deinen Namen fürchte

----------
Daß mer bei uns gut Wannre kann,
des wäß jed Kind unn Frää unn Mann
unn daß mer debei als ve schnaufe mool misse
des werd aach en jerer wisse
Desweeche hot s do in unserer Mitt
unser scheene Rietaniahitt
im Klausedäälche am Rand vum Wald
wu s uns immer wirrer g fallt
Dort wu d Vechelcher peifen- unn mer d Kerch heit g schdalde
du dut mer gern beim Wannre halte:
So macher liewe Gaschd macht Raschd
Ruht aus vum Lewe seiner Haschd
Wer mied esch, find do e scheenes Plätzel
fer sich, sei Freinde unn sei Schätzel -
unn des sell mer nit vegesse
was Gures se drinke unn se esse
Wie gut, daß mer do was Rechtes find
fer sich, sei Mann, sei Frää unn Kind,
Weil Esse unn Trinke Leib unn Seel sammehalt
unn aach die Gemeinschaft lewendisch erhalt
Heit heern mer freilich nit bloß vum Raschde
unn Ruhe vum Lewe seine Laschde
so wichtig des esch, en Feierdaach
sem Ruhe vun de Hetz unn Plaach
Desweeche esch jo de Sunndaach uns gewwe
daß mer nit s Ziel vefehlt im Leewe
Daß mer beim Hetze unn beim Renne
uns aach die needisch Ruh als genne
Heit sell die Redd sei vum Wannre- de Weeche,
wu s Leewe uns fiehrt unn aach vum Seeche
wu im Wannre liecht- als me Gleichnis fers Leewe
fer unser Hoffe, Liewe -Gläwe
Markierung dut em zeiche
wie mer kann es Ziel erreiche
daß mer kann e Stick weit sehe
wie de Weeg dut weirer gehe
Mer kann sich dodraa oriendiere
daß mer nit dfe Weech veliere
"Ich wandre- ich wandle- ich du mich wandle"
dovuu sell die Predicht handle
die drei Worte die g heeren zsamm(e)
wie drei Äschd vun ääm änzige Stamm
wie drei Gschwister in ääm Haus
Wer sich off de Weech macht- geht rauß
entdeckt die Erd, den scheene Stern,
geht mit de Zeit, der esch modern:
Grad jetzt in de Ulaubszeit
reisen Mensche- weit-weit -weit
Trotzdem- ich des saache muß
viel gehn gar nit gern ze Fuß
hucken wie am Schreibtisch- im Auto -de Bahn
Nadierlich: mer kummt schneller und bequemer voran
Un will mer in annre Kontinente fahre
do dut mer gar nit lang meeh spare:
unn esch mi me Flugzeich viel
schneller am erschdrebte Ziel
Doch am Wannre zu Fuß hebb ich mei Ergetze
alles annre kann mer des nit recht ersetze.
Iwwerall gebts was se enddecke
am Rand vum Weech in alle Ecke
Blumme- Käfer- Schmetterlinge
hunnertdausend kläne Dinge
Wannre war in friehrer Zeit
bsonnerschd was fer junge Leit
Handwerksborsche- unnerweechs als ware
in ehre "Lehr unn Wanderjahre"
ob in de Hee- o weit entfernt:
Sie henn unterwegs gelernt
es Lewe kenne- ehr Ärwet - die Welt,
sich vedient e bissel Geld
Arwet sich g sucht, die Zeit nit ve gammelt
ehr Erfahrunge henn se so gsammelt
bestanne aach so mancherlei Gefahre
in ehre "Lehr- und Wanderjahre"
Erschd denooch henn se kenne sich selbständig mache
E schänes Lied dut vun ne saache:
>>Auf, du junger Wandersmann,
jetzo kommt die Zeit heran,
die Wanderzeit, die gibt uns Freud. . . <<
Wer kennt des nit, ehr liewe Leit?
Doch heit, do esch manch Junger faul
wie en alder Schockelgaul
Unnerweg sei- esch freilich nit bloß Vegnieche
Wer des behaupt, der deet glatt lieche
Schun ganze Gruppe und Velker - wie ner wisse
henn wandre - auswannre - aus ehrm Land als misse
aus manchem schlimme Grund:
erlebt e manchi schwere Stund
off ehre weite, weite Weeche
rer uugewisse Zukunft entgeeche
off fremme Weeche fremme Stroße
Wie viel Volksstämm henn misse ehr Heimat ve losse
vun de große Völkerwand rung aagfange
-vor 15 hundert Johr rund- sind unnergegange:
die Gote -Burgunder unn Vandale
mit Rucksack vepfleechung unn Sandale
Warum es so Wanderunge gewwe hot?
Getriwwe hot se de Hunger- die Not,
wie gern weer so mancher in de Heimat gebliwwe
Aach weeche ehrm Glääwe henn Ferschde ehr Leit vetriwwe.
Die Hugenotte aus Frankreich henn Heimat bei uns gfunne
noch viel harte schwere Stunne
Aach die Wallone aus Belgie, die henn als
Zuflucht gsucht in uns're Palz
Mancher hot fer die Freiheit gekämpft un drum misse fliehe
aus politischem Grund in fremme Länner wegziehe
Ausgewannert sinn viel annen fremme Ort
nach Amerika, Rumänie, Brasilie, vun Deitschland weit fort
sinn ins Baltikum, nach Südrußland gar gange,
um dort e nei Leewe aasefange.
Die erschd Gen'ration hot dort gfunne de Dot
die neischd die Not- die dritte ehr Brot
Wie gern weern se doch in de Heimat gebliwwe
erschd recht die Flichtling, wu de Krieg hot ve'triwwe.
So unnerwechs se sei- macht's Herz em schwer:
so Wannerschaft uhne Wiederkehr.
Doch meischdens hot- wer wills beschdreite
es Wannere sei gure Seite
Weil mer derf nit immer ruhe.
hot's Wannre was mit de Uuruh ze due
so lang mer leewen: Ruhlos mer sinn
raschdlos unn wie getriwwe vum Wind
Es treibt em 's Wannre dorch die weit Welt
»Wie die Wolken dort wandern am himmlischen Zelt. . .«
Wie der Strom beständig dut fließe,
bis er endlich in' s Meer sich dut ergieße,
so sinn mer Mensche wann's Fernweh uns treibt
daß mer nit dehääm mäh bleibt:
Eichendorff dut doovuu dichte unn singe:
»Wohin du auch in wilder Lust magst dringen,
du findest nirgends Ruh. . .«
Des saacht es Dichterwort dezu
Wannre dun so viel ganz gern
Es treibt uns all doch in die Fern
unser Herz, wu ahnt: es hat
fer uns off d'Erd kä bleiwende Statt
e zukünftigi dun mer suche- e Ziel erstrewe.
Daß mer nie ganz dehäm sinn- im Leewe
Weil die Uuruh uns stets treibt
wie Hölderlin, de Dichter schreibt
saacht so scheen »Uns ist gegeben,
auf keiner Stätte zu ruhen« -Uuraschd im Leewe,
.Vun der Wanderschaft -en Seeche
ist die Bewegung- es Bewege
Bewegung dut-bekanntlich- not:
Stillstand ist-bekanntlich-Tod.
Aach wammer Ruh sich derf als genne
dun'er doch all es Sprichwort kenne
>>Rast' ich, so rost' ich<<, unn des will saache
Es derf nit bloß bleiwe bei ruhige Daache
Des Sprichwort do. des will uns treiwe,
daß mer nit uutätig -ääfach seßhaft bloß - bleiwe
Wer sich nit offmacht, den nennt mer "lahm"
unn esch im Grund ganz schrecklich arm
Ruh unn Aufbruch dun zsamme g'heere
Aach wann mer's nit immer gern dut heere .
Aach wann nit alle Daach esch Sunneschei
solln mer driwwer nicht traurig sei,
's geht off de Wanderstrooß vum Lewe
nit alles glatt unn nit alles esch ewe.
Berg und Tal, Fräd und Leid,
geheern zum Wechsel vun de Zeit
Begegnung und Abschied - Glick unn Schmerz
prägen en Mensch dief drin in seim Herz
-wer kennt des noch lang bestreite:
se dun was Wichtiges bedeite
fer die inner Entwicklung vun unserem Lebe
dun wichtige Impulse uns gewwe
dun voran uns im Reife bringe
UNSER Lewe- es sell doch gelinge
Unn aach des esch wert, daß mer's bedenkt:
Als Wanderer bin ich vum Lewe beschenkt
schun dodrin, daß ich nit alleä du wannre,
sondern meinen Weg geh in de Gemeinschaft mit annre
Mensche, wu mich kennen, mer helfe, mich stitze
unn nit-wie annre- mei Schwäche ausnitze.
Mensche, wu off meim Weech mich begleite
dorch gure unnd dorch schwere Zeite
wu mit mir unnerweechs sinn off meim Leewe sei Wege,
sie werrn mer manchmal grad en Seeche
Oft ist änner von der Wanderschaft- wie die Biwwel lehrt
anners - als er esch fortgange- hämgekehrt
Schun's Volk Israel -wu nooch de Sklavezeit
de Mose lange Johr hot durch die Wieschde geleit
wu se die Not unn manche Gfahre
de Hunger, de Dorschd henn misse erfahre
unn de Mose offem Berg ne gewwe hot
vun Gott es gure unn gettlich Gebot
unn se henn derfe bei allem erfahre:
Gott dut mich off meim Weech bewahre
Jesus -so stehts im Neie Testament
wie jerer wäß, wu sei Biwwel kennt
ist mit seinen Jüngern viel unterwegs gewest
wie mer immer wirrer leest.
Als der große Wanderer war er bekannt
iwwerall im ganze Land
Er hat die Mensche in ehrm Leewe begleit
unn mit seim Wort dorchs Lewe geleit
um als Mensch unnerd Mensche ganz nah ne se sei
hat er mitne gedält es Brod de Wei,
hat mit seine Gleichnisse und Rede beim Wandre
vum ääne Ort zem annre
zu seim Volk und seine Jünger gute Botschaft gesagt
damit mer's Leewe mit neiem Mut waacht
hat seine Wunder getan- hat an ne so gehandelt
daß sich es Leewe wunderbar wandelt
Hat oft gutem Weech se mit seim Wort gelenkt
Wie reich hat Er all se debei doch b'schenktl
Und immer weiter und weiter sein Weg geht
bis zum Kreuz hii :Unn er saacht »Seht,
wir gehen hinauf nach Jerusalem.<<
en Weech voll Leid unn uubequem
viel leichter esch vum Kreiz se saache
als seiwer es Kreiz im Leewe se traache
ER dut -aach heit noch- durch die Zeite
in Seim Geischd aach uns offem Weech begleite
Zu redde esch aach vun glickliche Stunne
wu mancher hat bei seinre Wannerschaft gfunne.
Am Graberand sitze und die Wiese sich betrachte
oft die Blume dort in all ehrer Scheenheit se achte,
vom Berg rab ze schaue oder am weite Meer ze stehe
Was gebbts beim Wannre doch alles sehe.
Jesus hat von de Vögel und Ähren und Lilien offem Feld,
gesproche als Gleichnis für die ewige Welt:
daß mer trotz Not unn aller Sorche
bei seim Herr-Gott sich wäß getraache- geborche
Manch ener blickt im Alter voll Frääd serick,
oft de Wanderschaft ehr Lewensglick!
Wu er unnerweechs war mit de Freinde- mit annre
froh mit ne war- im Lewe unn beim Wannre
Doch so mancher wu heit fer deier Geld
rausfahrt um die halwe Welt
um sich was ganz Besonnres se genne
der kann doch ke Ruh unn ke Glick dort fenne
bringt nit mit hääm e tiefe Frääd
so'n Mensch- so denk ich- der dut em lääd
Viele besuche 's Kolosseum in Rom
orrer de dortige Petersdom,
die Akropolis in Athen -orrer in Ägypteland
die Pyramide unn die Palme am Meeresstrand
und rasen gehetzt durch die viele Musee -
und henn doch am End nix Recht's g'sehe.
orrer fahren um die ganze Welt
fer en Haufe, Haufe Geld
Unn se kehren leer serick
Weil doch g'heert zum wahre Glück
daß mer an der Schönheit vun de Schöpfung sich fräät.
Was zehlt esch nit die Menge, sich d'Qualideet
Da lob ich mer de Pälzer Wald
da find mer alles was em gfallt
Die Bääm- so grien- unn Ruh unn Still'
Unn des ich's was ich brauch unn will.
"Wann ich fer mich die Wohret such,
find ich.se nit imme schlaue Buch
Ich finde se wann ich im Wald mich ergeh"
denk nooch iwwers Leewe .unn was ich seh
so saacht die kluge Klosterfraa
Teresa - von Avila
Schließlich will alle Wanderschaft zu me Ziel higehe
nit sich als im Krääs bloß drehe
sondern meecht den Punkt erreiche,
wu mit käm annre esch ze vegleiche:
wo mer Ruh unn Friede kann fenne
werd schließlich auch daheim sei kenne.
Unn desweeche esch wichtig, sich se oriendiere
daß mer es Ziel nit aus de Ääche veliere
Des gelt fer's Wannre dorch Wald unn Flur
unn aach fers'Lewe - fer die menschlich Nadur:
Unn.des wääß jed Kind: daß Gott sei Gebot
dem Volk Israel beim Seim Wannre einschd gewwe hat:
Die "Zeh Gebote" als Regel fer's Leewe
fer unser Hannle unser Streewe
unn daß Jesus hat gsaacht: 'S deet sich erfille
in de Lieb zum Neichschde de gettliiche Wille
Unn daß mer nit bloß redde vum Liewe
daß mer am Neichschde aach s 'Liewe seil iewe
Daß mer es Ziel nit veliere deet
des esch unser Wunsch unn unser Gebet:
Herr -Gott, weis mer in meim Leewe die Weeche
Schenk mer doch dein gettliche Seeche
Laß mich wandle in Ehrfurcht vor deim Name.
'Heer mich, mein Herr-Gott. Amen. Amen

Christus spricht: Ich bin der Weg, die Wahrheit und das Leben, niemand kommt zum Vater denn durch mich.«