In drei Punkte meecht ich`s Psalmwort mit eich heit bedenke-
unn loß mei Gedanke vun de Bilder lenke,
wu unser Psalmwort uns stellt vor Aache -

Drei Bilder sinn`s wu die Botschaft uns saache :
Gott esch wie en Hirt, wu uns lenkt unn fiehrt
daß mer nit sich veirrt, veliert
fiehrt en Weech uns durch die Zeite
unn dut uns en Disch bereite
-geeche die Angst unn geeche die Not
stärkt uns mit seim Wei, seim Brot
Die drei Bilder wemmer betrachte
Off des, was se uns sache, wemmer droff achte
Hirt unn Schäflich- Weg durch die Zeit
unn daß er uns en Disch bereit
En Hirt unn sei Schäflich- e schäänes Bild:
wu uns zeigt so friedlich- mild
wie en Hirt sei Schaaf voll Lieb dut umsorge
unn se sinn bei Ihm geborche

Unn doch saacht sich mancher -verärchert: "Wie?!
Ich bin doch ke Stick Herdevieh!
Bin doch kää Schoof, wu bleekt mit de Herd!
Hebb mein eigene Kopp unn mein eigene Wert!
Hebb mein eigne Wille unn mein eich`ne Vestand
Leit, wu denken, die braucht unser Land"

Unn ich saach mer, in dem Punkt, do hot er recht.

Doch denkt mer bloß von dem Bildwort nit schlecht,
wu Gott uns zeigt als wie en Hirt,
wud` Schäflich off de Wääd als fiehrt.
Es redd doch dovu, daß de Mensch esch geacht
unn nit als e Herdevieh betracht
Fehlt en äänziges dem Hirt im Stall,
so loßt er zerick die annre all
sucht des ääne vun de hunnert
-daß mer driwwer grad sich wunnert
suchts unn suchts in de letschde Ve`stecke,
bis ers endlich dut entdecke
bis ers Schäflich, wu war veschwunne
- veirrt unn veletzt - am End hot g`funne

Ruft die Nochbre bei voll Fräd,
daß mer sich mi`m fräe deet.
So kann mer in Lukas 15 sehe
Drum loßt uns des Bild jo nit falsch ve`stehe!:

E Gleichniswort esch`s, was Jesus dort sacht,
damit mer de Wert vumme Mensch recht beacht:
weil de HerrGott grad nooch dene froocht,
wu sich schinne- wu mer ploocht
Gott esch wie`n Hirt - ganz groß im Liewe
Unn kenner esch beim vegesse unn abgeschriwwe

Iwwer jeren, wu umkehrt zu Gott hii-zem Leewe
wu waacht ze vetraue, ze hoffe - ze glääwe
iwwer jeren, wu sich nei besinnt,
wu e neies Leewe mit Gott beginnt
iwwer den esch -saacht Jesus- alle Zeit
im Himmel meh Frääd als iwwer d´ annre Leit

Unn nochmools dut Jesus `s bei Matthäus uns saache,
wie mer all fernanner Verantwortung traache

Im achtzeht Kabbiddel, do kann mers betrachte:

Daß kenner de annre sell veachte
unn kenner de annre iwwerheblich behandle
Mer sellten all -so wie Gott es will- wandle
der wu acht off se all hot- unn wie`n gurer Hirt

sei Schäfel sucht, wu sich hot veirrt
Unn im zehnte Kabbiddel- bei Sankt Johann
saacht Jesus es Hirtegleichnis dann:
damit mer s`Vetraue zu em waacht
Ich bin de gure Hirt- unn was Jesus uns saacht

esch des, daß er uns liebt unn kennt,
wie en Hirt, wu sei Schäflich beim Name nennt-
unn will daß mer heern off sei gettlich Wort

jerer an seim Platz unn Ort
Annerschd als der, wu die Schäflich dut hiete
als en Hirt bloß off Zeit - en Hirt bloß off Miete-
wu sei Herd loßt hucke in de Not
esch Er en Hirt trei bis zem Doot
So redd Jesus vum Hirt unn seiner Herd
grad weil mer ihm sinn uuendlich viel wert
unn dut an unser Ve`antwortung appelliere,
unn will uns offem Weech zem Gure hii fiehre-

Soviel jetzt zum erschde- dem Hirtebild,
wu uns begleit voll Lieb unn mild
vun Gott, wu fiehrt wie`n Hirt durch die Zeite-
uns in de Not aach dut begleite.
Wie `n Hirt, wu kennt jed Wasserstell,
wu Wasser fließt aus frischer Quell,
unn fiehrt zum Wasser unn zu saftischem Gras,
loßt ER Lewe uns finne in reichlichem Maß
Punkt zwää esch e Bild, wu jerer dut schätze,
wu sich am Wannre dut ergetze:
Es Bild vum Weech, wu`n Wandersmann
als gehe sell unn gehe kann
Des wäß jed Kind, daß Oriendierungzeiche
uns helfe wellen es Ziel ze erreiche
unn daß mer aach mool Paus macht unn raschd
sich loßt bewirte gern als en Gaschd
Unn desweeche hemmer in unsre Mitt
fers Ausruhe offem Weech- de Rietania ehr Hitt
Der Weech do mänt freilich en Bild fers Leewe
-fer des, was mer hoffen unn erstreewe
E Bildwort esch`s, zu dem jerer schlicht
hett was ze vezehle: sei Lewensgschicht
Dut jerer doch sein Weech als gehe
sein eigne Weech vor Aache sehe
Unn- ob mer jung sinn orrer alt
Vielfäldisch sinn se in ehrer Gschdalt
Aagenehm- brääte Wege dun vor uns stehe
unn aach enge Wege, schlecht zu begehe,
Strooße -gut ausgebaut- ääfach doll
und veschlungne Päddelcher- geheimnisvoll
Wege- ganz hell im Sonne- licht
unn mancher Wech off den ger mer ve`zicht:
Wege im Schatte- in Dunkel unn Not,
wu uns fehlt manch gurer Root
De Weech- des esch`s Leewe mit dem, was `s uns bringt,
mit seim Mut- seinre Frääd -wo`s uns gelingt
wu leicht mer froh esch, wu gern mer lacht
awwer mit dem aach, was Kummer uns macht
Es lohnt sich, der Frooch mool noochzespiere
Was fer en Weech dut es Lewe mich fiehre:
Manchmal geht`s steil bergnuff, unn des koschd Kraft
- mer wäß nit, ob mer des alles aach schafft.
Manchmal blick mer rab vun steilem Hang,
do werd`s em grad schier angschd unn bang
Manchmal esch unser Weg im Leewe
leicht unn grad- uubeschwert, eewe
mer geht ne leicht unn froh-beschwingt
mer fräät sich draa, mer lacht unn singt.
Und dann esch`s wirrer so daß er im Dunkel sich veliert,
Mer wääß nit, wuhii em de nächste Schritt fiehrt,
Do sinn mer voll Träne- mer kann bloß noch klage
suchen en Mensch, wu mer sei Herzlääd kann saache.
Off manchen Weg, do fiehl mer sich gut
e gure G`sellschaft, die macht em Mut
Bei manchem Weech, do vegeht em es Lache
Mancher Weech, der dut einsam uns mache
Off manchen Weg esch sicher de Schritt
do wäß mer wu`s langgeht -do esch feschd unser Tritt,
Do sinn verläßliche Wegweiser um sich ze orientiere.
Do muß mer nit`s Ziel aus de Aache veliere
Off manchem Weg meecht -wanns geht- mer umdrehe
am liebschde nochmools ganz vun vorn ne gehe
Mer sucht den Weg, wu zum Ziel hii uns fiehrt
Wu nit sich ziellos im Dunkel veliert
Uhne gute Wegweiser esch nit er ze sehe
Erschd recht braucht`s die Kraft ne aach zu gehe.
Mer braucht des Wort, was uns recht leit`t,
so wie aach Mensche an de Seit,
wu uns bestärke unn uns stitze
un nit wie annre unser Schwäche ausnitze.
Unn weil im Leewe nit kann sei,
alle Daach bloß Sunneschei
esch gut ze wisse im finschdre Daal,
wanns Lewe werd em zu ner Qual:
Gott esch aach do bei uns- wie `n Hirt,
wu uns grad do, im Dunkel fiehrt
Mit seim Stecke unn Stab er uns geleit
aach in schlimmer, schwerer Zeit.
"Du, Gott, bischd bei mer"- gut des ze wisse
wann mer durch Bittres unn Schweres durchmisse
Unn domit Punkt drei- mer kummen zem Schluß
-noch lang groß ze preddiche breecht bloß Ve`druß:
E esch e Bild vun Ruh unn Raschd
wu uns offschnaufe loßt vun uns`rer Laschd:
Des Bild vom Disch will uns beweeche
-als Bild fer de reiche Gottesseeche,
mit dem Gott selwer durch die Zeite
will uns beschenke unn begleite
weil ER uns Gures winscht unn gennt
Unn des esch`s was unser Psalmwort bekennt:
"Er bleibt aach in de Not mein gurer Hirt
en Freind, wu äm offs Beschde bewirt:
dut vor uns in Lieb en Disch bereite,
wann annre in Feindschaft mit mer streite
loßt ruhe mich vun meinre Laschd
dut mich bewirte als sein Gaschd:
mit Salbeel dut er mich bedenke
unn dut mer voll mei Glas eischenke:
randvoll mein Becher mit edelstem Wei
so veschwenderisch schenkt er, mein HerrGott, mer ei"

Ich mään, dozu breicht nit viel ich heit saache.
Mer hot`s nit vegesse in unsre Daache:
wie`s Esse unn Trinke Leib unn Seel sammehalt
unn minanner an äm Disch sitze, die Gemeinschaft erhalt
Unn wu mer däält sei Brot unn de Wei
muß die Gemeinschaft lewendisch sei
Drum dun mer- um die Gemeinschaft ze erneire
minanner als `s Heilische Awendmahl fei`re,
weil Chrischdus uns voll Lieb beschenkt,
damit änner an de annre voll Lieb aach denkt.
Wo Chrischdus selwer esch unser Gaschd
do dält mer es Glick, do dält mer die Laschd
unn wu mer däält sei Fräd unn die Sorge
do lebt en Menschekind geborge
Gures vun Gott- sei Barmherzigkeit
dut so uns begleite alle Zeit
So will des alte biblisch Lied,
wu sich dorchs ganze Leewe zieht
unser Wunsch sei fer heit unn unn unser Gebet:
daß Gott uns im Leewe fiehre deet
unn uns meecht dorch alle Zeite
mit seim gure Wort geleite:
"Bei dir, mein Gott bin ich geborge
trotz aller Not unn alle Sorche
Gott du bischd mein gurer Hirt
Bei dir hebb ichs gut, bin off gurem Weech g` fiehrt.
Offatme derf ich vun meinre Laschd
Dir bin unn bleib ich en liewer Gaschd
So leb ich offd Erd in Fräd unn Leid
unn hoff off dei Barmherzigkeit"
So sell es sei in Jesus seim Name(n)
Drum saach ich: Amen. Amen. Amen


Wer sich auf den Weg macht,
muß Abschied nehmen
von vertrauten Dingen,
von festen Meinungen,
Gewohnheiten und alten Ordnungen.
Wer sich auf den Weg macht,
muß ein Ziel vor Augen haben
Wer aufgebrochen ist, geht ein Wagnis ein.
Wer auf dem Weg ist,
darf sich nicht aufhalten lassen
Wer unterwegs ist,
muß mit Einsamkeiten rechnen,
gegen die Müdigkeit kämpfen,
mit der Unsicherheit leben.
Wer unterwegs ist, braucht Weggefährten
die ihn stärken, wenn er mutlos wird.
Wer unterwegs ist muß lernen,
auch anderen Weggefährte zu sein.
Wer unterwegs ist,
darf den Blick nicht nur nach oben richten,
weil seine Augen sonst übersehen,
was seine Füße zertreten.
Wer unterwegs ist,
muß auch Umwege annehmen.
Wer unterwegs ist,
kann sich führen lassen.