Pfingsten- nach Matthäus 16

Pingschde in Rhodt unner d` Keschdebääm!
Mer fiehlt sich do grad wie dehääm-
jeed Johr beim Heimat- und Blierefeschd!
Es werd gefeiert mit viele Gäschd
Unn Weck sinn do unn Steaks unn Worschd
genung se drinke fer de Dorschd
Dampnudle hot mer unn Fläschknepp gericht
Unn ich hebb e neii Preddicht gedicht
Doch aach jed Johr geeche Pingschde, du im Stille ich bange:
Es werd mer doch bloß nit se reechne aafange!
Mer brauchen grad jetzt doch fer jung unn Alt
nix mäh als des, daß `s Wetter halt!
Dort, wu de Wind loßt die Keschdebääm rausche,
dort wemmer minanner off `s Biwwelwort lausche,
de Herrgott aach bitte fer sein Seeche!-
jetzt breicht mer kä Kelt nit - jetzt aach kenn Reeche!-
Ich will aach`s gut Wedder nit bloß fer mich!
Petrus, sei ken Frosch, loß nit uns im Stich!-
Mer wenn doch all feire bei Worschd, Weck und Wei-
Petrus du mischd en Rhodter sei! -
Do dann greif ich an de Kopp mer unn fang aa se lache:
Seit wann dut de Petrus dann`s Wetter mache?
Denk doch nit mit Uuvestand
an sein Schlissel in de Hand!
Die Großwetterlag isch doch an allem schuld-
waart`s halt ab -bleib gelasse- traachs mit Geduld
Wemm helfts, daß vor Kummer de Schädel der brummt-
nemm doch es Leewe so, wie`s kummt!
Wie gut, daß heit die Sunn uns jetzt scheint,
wann en griene Dom uns minanner ve`eint
Vum Alldag wenn heit`mer die Sorche vergesse
beinanner sitze , `was trinke unn esse.
Abschalte vun dem, was uns dut vedrieße-
Beim Wei unn im G`schpräch so`s Leewe genieße
Des Feschd do werd g`feiert mit gurem Recht.-
En Schelm, wer dovu gering denkt unn schlecht!
Bloß ääns sellt` mer nit ganz aus de Ääche veliere
-und des sell mer e Stick weit unserm Feire abschpiere-
daß heit`s sichs um viel meh als e Weifeschd bloß dreht-
daß es uns heit ums "Pingschdfeschd" geht-
Unn des esch weit mäh als bloß `s Trinke unn`s Esse
aach wann `s so viel- so schnell - vegesse
Pingschde - so lernt mer in Land unn Stadt-
määnt, daß die Kerch ehrn Gebordsdaach heit hat-
Durch sein Geischd will Gott sei Kerch erneire-
Unn esch des nit en Grund zum Feire?.
Mit Feier unn Flamm- unn besgeischdertem Schwung
will Sein Geischd in uns wirke Begeischderung
Was Begeischdrung esch, werd jerer wisse,
-mer werd`s nit lang noch erkläre erschd misse-
Wann Geischd vun Gott die Mensche treibt
esch klar, daß nit alles beim Alte bleibt
Weil doch Gott mit seim Geischt- mit großer Kraft,
in de Welt es Gure schafft.-
Sein gettliche Wille, des esch jo `s Liewe
wu mer sell dach-dächlich iewe
Geischd esch wie de Wind, den kann mer nit sehe
und doch dut er große Windräder drehe
Dann merkt er was vun sein`re Kraft:
Was die Windkraft alles schafft!
En große, schwere Mahlstää sich sogar dreht
wann de Wind in`s Windrad weht
E weitres Bild vun ganz annerer Art,
zeigt uns: Sei Kraft dut gut, esch zart:
esch wie d`Hauch vun`d Mamme, mit dem se ehr`m Kind
-damit`s Troschd in seim Kummer- unn Mut wirrer find-
iwwer sei Weh ganz zaart dut bloße,
wann `s sich hot an ewwes g`schdoße
So derf mer spiere in dem Mut, wu er schafft
bei uns vum Geischd die hilfreich Kraft,
wu d`Mensche beweecht meh wie Hauch unn Wind
wann Friede mer schafft unn Friede find`t
Sein Geischd, wu bewegt Herz unn Vestand
esch aach wie`n Schlissel in unsrer Hand
Uff den Schlissel wemmer unser Gedanke jetzt lenke
unn des, was des määnt, in de Preddicht bedenke
Unn domit simmer wirrer bei de Petrusg`schicht,
zu der ich mei Preddicht hebb gedicht-
den Petrus, wu mer gern zeicht in Stadt unn Land
mimme große, große Schlissel in de Hand
Was en Schlissel bedeit`, des werd jerer wohl wisse
erschd recht wammern schmerzlich dut vemisse
Esch des aach eich nit schun mool bassiert:
daß enner sein Schlissel veleecht / velieert?
Wie en Ochs vorm Scheierdoor
stehtschd dann uhne Schlissel vor de Hausdier devoor
Ausgerechent jetzt muß des der bassiere!
Wie kannschd dann grad jetzt bloß dein Schlissel veliere?!
Hoschden veschafft- vielleecht wem geleehnt- ei Gewiddel
hoschden vielleicht imme annere Kittel?
Orrrer hot mer`n der gar g`schdole?
Muschde de Schlosser mi`m Dietrich gar hole?
Uhne`n stehdschd machtlos vor veschlossene Diere
Mer sellt halt nit sein Schlissel veliere-
Unn kummt nit die Sach ball zu me gure Schluß.
schdehschd e Ewichkäät drauß- was fern Vedruß-
Doch hoschde am End ne noch gfunne/ entdeckt
unns fallt der ei, wu er die ganz Zeit war veschdeckt:
Dann endlich kannschd rei unn kumme und gehe
Dann brauchschd nimmi länger bleed drauß noch rumschdehe
Schlissel hot`s in manchrer G`schdaldt
-wie jerer wäß- ob jung ob alt-:
große, klänne, dicke, dinne
unn mer muß de richt`ge finne
S geht kenner mi`me Schlissel vun seim Klavier
zum Beispiel an`s Schloß vun de Kerchedier
weil jerer Schlissel- ob klää orrer groß
muß basse -bekanntlich- ins richtige Schloß
Doch de koschdbarschd` Schlissel in de Welt
denn kann mer nit kääfe fer Gold unn Geld:
Der Schlissel esch des gure Wort
zu d`rechte Zeit am rechte Ort
wann änner dem annre in Fräd unn Schmerz
vun sich aus offschließt sei Menscheherz
Unn vun so`re Art Schlissel am rechte Ort
vezehlt uns heit es biblisch Wort-
Vun Jesus vezehlt`s unn seim Weech dorch die Zeit
als Mensch unner Mensche, wie er d` Mensche begleit
mit seiner Lehr unn seim gure Wort
unnerwechs mit de Jinger vun Ort se Ort-
wie er sich stark macht fer d`Mensche voll Kummer -im Schatte
vun de Reiche -Stolze- Satte
Die Mensche wu sunschd ke Erbarme finne,
die derfen bei Jesus - nei´s Leewe beginne
"Ganz noh"- so spier`n ses -"ganz noh esch mer Gott
wann Jesus mich schditzt in meinre Not"
Aach wanns e Gschicht esch aus alte Dache,
will se jetzt unn heit uns all `was saache:
Aach deeten viel Mensche in ehrm Kummer unn Not
genau so heit spiere die Hilf vun Gott
So daß heit wie damals die Mensche deeten staune
unn ennr`s em annre deet heimlich zuraune:
"Der Mensch- der Jesus- der kummt doch vun Gott
So helft uns kenn anrre in unsre Not-
Du`s Leewe nit endlich en Sinn uns bringe?-
e Hoffnung, e Zukunft wu uns nit dut zerrinne?
Er schenkt uns e Ziel- `s esch wert, daß mers erschdreebt-
Bei dem Ziel, do lohnt sich`s, doch daß mer lebt!"
Unn was do die Mensche so unner sich saache,
des werd schließlich aach Jesus se Ohre getraache.
Der esch mit seine Jinger offem Weech zu der Stell
wu mer nennt die Jordan- Quell
Unn weil `s em nit kalt loßt, was die Mensche sich saachen
unn die Gedanke, wu se sich machen,
so saacht er : "Ehr Freinde all, heern mool guud heer:
Was saacht mer im Land, was de Menschesohn weer"-
Unn ich denk mer, des weer aach heit int`ressant,
deet mer befrooche die Leit rings im Land,
was se so denken, was se vum saache:
ob ER aach heit noch- fer unser Daache
ne wichtig esch fer ihr Hoffe unn Gläwe-
ob Jesus was zehlt in ehr`m dägliche Leewe
orrer ob mer`n hot ganz aus`m Sinn ve`lore
als weer er erschd gar nit als Mensch gebore
Unn`s muß jerer droff sei Antwort gewwe
fer des, was zehlt - was zehlt im Leewe
"Was denken vun Jesus dann die Leit?"
Die Frooch esch wichtig fer `n bis heit
Es licht aach mit an uns, ob nooch Jesus mer froocht-
odder mudderseele- allää sich im Leewe abploocht!
 
Wie soll mer erfahre, daß Christus uns liebt,
wenn känner am annre im Liewe sich iebt-
wann jeder am End denkt bloß an sich
Unn sunschd mer nix heert wie große Sprich
Unn kenner off des acht`, was Jesus uns sacht
unn kenner in Seim Sinn es Leewe waacht-
Es braucht Mensche, wu of Jesus heere
unn leewen so, daß se ne ehre-
des braucht es grad -bei uns unn heit!
Menschlichkät- braucht` unser Zeit!!
So daß aach heit mer wie damals vun Jesus saacht:
"Wie gut, wammer off sei Wort hi`s Leewe nei waacht:
Er kummt wie gerufe- Gott selbschd hot ne g`sand`t
So `n Mensch- wie Jesus - den braucht unser Land
Wu nit vebei geht an deinre Not-
Unn saacht der, was wohr esch- den schickt uns Gott"
All des hot mer ääfach schlicht
Jesus wort- wertlich ausgericht-
all die Gedanke, wu die Mensche sich machen
unn die Worte, wu se sich saachen:
"Er weer wohl d` Johannes, wu de Dääfer sich nennt-
Sein Merder -hett scheint`s nit vehinnre gekennt,
daß er weer erschdanne vum Dootereich-
annre: Er weer dem Elia gleich-
der wu de Mensche deet helfe -an de Zeit ehrm End-
daß änner dem annre sei Herz zuwend`.
Unn annre die saachen: Er weer der Prophet,
bei dem en jeder in sich geht
Unn als mer des Jesus hot zugetraache
froocht er droff sei Freinde: Was dun ehr dezu saache?
Unn es steckt drin de Schlissel fers Himmelreich
in de Frooch vun Jesus "Wer bin ich fer eich"
Aach heit gilt sei Frooch uns -ganz frei -uhne Sprich:
"Wer bin ich Jesus dann fer dich?"
Unn Simon- s´sch de Petrus- es Wort glei ergreift-
sprecht aus den Gedanke, wu schun lang in em reift:
unn dut ne de Chrischdus -de G`salbte- nenne
unn so sich zum als sein Retter bekenne
Du bischd gesalbt mit de Kraft aus Gott
Die macht mich voll Mut im dägliche Drott-
Des bin ich gewiß: daß du des bischd:
de Erleeser, off den mer waarten- unser Heiland- de Chrischd
--
Und wie do de Simon sich zu Jesus bekennt
ne de Jesus mit neiem Name benennt:
"Dich nenn ich Petrus- den Fels, off den ich bau
die Kerch- mei Volk ich der aavetrau
off Fels gebaut- wu nix dra schwankt-
e solid Fundament, wu nit wankt-
Unn so viel kann doch erschittre em im Glääwe
So viel stermt doch als off en imme Menscheleewe:
off die Mensche, wu sich nooch meim Wort ausrichte
unn doch sell nix mei Sach venichte
Nix sell se zersteere in de Welt ehrm Getimmel-
selbschd de Doot nit, nit die Hell- unn die Schlissel vum Himmel
gebb in dei Hand ich- den Schlissel- es Wort,
wu wirkt an de Mensche dorch die Zeite hii fort
De Schlissel fer den Weech, wu zum Leewe hiifiehrt,
wu nit sich im Dunkle - uhne Hoffnung- veliert"
---
Simon, en Fels, dem Jesus vertraut-
E Bauwerk offem Fels- solid gebaut
zu dem Bildwort kennt noch manches mer sache
-zu dem alää schun e ganz Predicht mache:
E Haus vun Mensche -fer d`Mensche offe
-wu Raum gebbt fer`s Gläwe unn`s Liewe unn`s Hoffe!
Daß die Mensche weern zu`nanner wie lewendische Stää
unn enner nit loßt sein Neichschde allää:
Daß enner de annre traacht und stitzt
unn nit bloß off des acht`t, was em selwer nitzt-
Ich kann mer- ehr Leit- nix besseres denke,
als Präsent zum Gebortsdaach- um die Kerch se beschenke,
wu dodrin besteht unn nit sammefallt-
daß enner de annre bestärkt unn halt:.
Daß se e Bauwerk fer d`Mensche weer- fer alle Leit:
mit Fenschder unn Diere, wu weit off sinn- weit
Unn kenn Mensch mißt sich saache- off die Dauer vedrosse:
"Mir esch`s unn bleibt`s fer immer veschlosse":
Daß e Baustell se weer, wu alles gelingt-
weil jerer- mit seine Gawe- sich selwer eibringt,
Unn des wäß doch jerer: um e Haus se erhalte
do muß mer`s ständisch umgeschdaldte:
es pfleeche unn`s erneire- renoviere-
was kabutt esch ergänze- restauriere
Des gilt aach fer des Gottes- unn Menschehaus,
fer die Kerch, wu mer sieht -am Kerchplatz drauß-
unn fer die, wu mer sinn- aus lewendische Stää:
Mir all: die Mensche- groß unn klää
- unn in - mit- unn trotz unserm Mache unn G`schdalde
will Christus sei Kerch lewendisch erhalte
Doch kääm ich dobei wohl kaum zum Schluß
- unn kreecht mit nix als wie Vedruß-
Drumm will ich feschd beim Thema jetzt bleiwe
beim Schlissel-Wort bloß- unn nix annres treiwe
Weil gut esch, wammer des, was de Petrus do saacht
mit eichene Worte zu eiche sich macht-
weil dann uns - mit dem Petrus en Schlissel esch gewwe
wu uns offschließt fer des, was esch wichtig im Leewe-
der Schlissel, vun dem Jesus dut speeter noch saache,
er hett ne all de Mensche iwwertraache,
wu nit bloß mit Worte sich Chrischde dun nenne,
wu mit ehr`m Dun und ehrm Lasse sich als Chrischde bekenne-
de Schlissel, wu die Mensche -dief im Herz drin- erreicht
se befreit vun de Fessle, daß ehr Laschd werd leicht
unn aach se -vebindlich - zu`me Lewe vepflicht
voll Kraft in seim Geischd unn voll Zuversicht.-
So duts im achtzeht Kabiddel bei Matthäus stehe,
wie jeder, wu leest, ganz deitlich kann sehe:
Was zehlt esch, daß mer lernen zu Jesus se saache:
"Mit dir will ich es Leewe waache-
Unn such ich e Ziel fer mich im Leewe
frooch nooch em Sinn vun all meim Streewe:
unn du mich nooch de Wohret frooche
Du muß ich nit umsunschd mich plooche:
Unn hett ich mich noch so ar`sch veirrt
es Ziel velore- dodal vewirrt:
so sell mich doch fer alle Zeite
es Wort vun Jesus zum Ziel hii geleite
Mit Jesus seim Wort esch en Schlissel mer gewwe!
wie gut der mer eschließt mei Leewe!
Ich kann ehrlich mich selwer uhne Illusione sehe
kann trotzdem zu mer selwer stehe
-mich aanemme wie ich bin - de gure Seite
wie aach mit de Schwäche, wu in mer noch streite-
Wann ich spier, wie mich Gott traacht in Lieb unn Geduld
-sich nit loßt beirre vun Vesache unn Schuld-:
Do eschs als deet e Dier offgehe
unn känner - uhne Schlissel- muß drauße stehe
Ich derf- wie ich bin- zum meim Gott häämkumme
Ich bin beim - herzlich - offgenumme
Mit Seim Geischd -Seinre Kraft- will Gott mich nei b`schenke
unn off de rechte Weech hiilenke-
unn wann die Mensche -so wie`s Jesus saacht- handle,
kann die Welt unns Leewe sich vun Grund off vewandle"
Unn weern aach noch zaghaft unn klää unser Tritte
so bleibt `s doch debei: In viele Schritte-
-vun viele Mensche, an viele Orte-
dort, wu`s nit bleibt bei große Worte,
wu aus em Denke werd es Handle-
dut de Erd ehr Gsicht sich zum Gure hii wandle-
`s braucht Mensche d`rum, wu statt geize unn raffe,
de Friede suche, Gerchtigkäät schaffe-
wu sich zum Gure lossen lenke-
wu aach an die Mensche denke
wu vezweifelt kämpfe um `s Recht
Unn viele Mensche geht`s heit schlecht
daß `s Uurecht grad sem Himmel schreit!
Menschlichkäät braucht unser Zeit!-
Unn Mensche wu nit bloß denken an sich-
unn nit bloß machen große Sprich-
wu de Schöpfung se diene bleiwen beschdrebt-
in Ehrfurcht vebunne mit allem, was lebt.
Wann so Jesus sein Geischd meecht wirkte fort-
heit unn bei jedem - an jedem Ort,
was kennt des fer e Pingschde sei?!-
So stimmt mit mir in die Bitt`drum mit ei:
"Du Geischd, wu zu de Wohret uns lenkt,
unn Lieb` esch, wu nit an sich selwer bloß denkt-
mach stark uns, recht unser Schritte se gehe
Du Geischd vum Friede, wu uns helft klar sehe-
bestärk` in de Lieb uns, mach stark uns im Glääwe
unn in de Hoffnung, wu mer brauchen fers Leewe-
Kumm zu uns, in`s Leewe- in unser Handle
Kumm aach zu uns, du uns vewandle!-
Weil dort sich`s Leewe wirrer lohnt,
wu so`n Geischd unner d` Mensche wohnt
So sell es sei- in Jesus seim Name
Drum saach ich: Amen, Amen, Amen"