Vum Weistock unn de Reewe
Weil drauß` die Trauwe sinn am Reife
- so daß mer graad meecht nooch ne greife-
unn um de erschde Federweiße
die Leit in Land unn Stadt sich reiße
do feiern heit mer unser Feschd
Unn mit uns feiern viel liewe Gäschd
Unn wie vesproche werd Kerch heit gehalte
fer Groß unn Klää- fer Junge unn Alte
in unsere Sprooch, wu mal laut esch unn defdisch
unn dann wirrrer zaart unn immer als kräftisch-
- zumal ich schun als klänner Bu`
vun klää off Pälzisch babble du.
Unn wie kennt`s heit annerschd sei:
Mer heern heit vum Weistock unn vum Wei.-
Ich denk, ehr Leit, mer kennen des Wort.
Mer find`s bei uns an manchem Ort
Es esch en schääner, alter Spruch
In gud Ladein, wie aus em Buch
Mool esch`s e Hauswand, wu er ziert-
mool esch in de Sandschdää er neigraviert
mool hot mer`n kunstvoll geschmiedt in Eise
des Wort, wu em Winzer sei Ärwet will preise:
Vum Weistock redd `s unn sein`re Kraft
vum Wingert unn vum Rewesaft-
IN VITE VITA- so esch`s ze leese-
Unn off gud Deitsch, do sell des häße:
daß mer deet fenne in de Reewe
nix wennicher als `s Leewe ewe:
Als e Symbol fer d` Leewesenskraft
ehrt so mer de Weistock, wu voll steht im Saft:
weil >IN VITE<- des esch: in de Reewe
esch >VITA> also ewe `s Leewe:
Unn wie er do steht, so voll im Saft!
Was strotzt so`n Rebstock so vor Kraft!
Wie dief ve`worzelt im Erdbor`m esch er drin!
Wie strebt hooch noch owwe sein ganze Sinn-
Wie kräftig doch em Licht er sich entgeeche- streckt
in die Freiheit, in die Luft- Richtung Himmel sich reckt!
Unn deet mern nit schneide, er deet glatt alles umschlinge!
Doch schneidt mer`n so, daß er viel Frucht meecht bringe
Mer hofft off en gute Ernteseeche:
wu drinsteckt die Kraft aus Froschd, Hitz, unn Reeche-
de Wind- die Sunn- unn wie mer wäß-
vum Winzer viel Mieh unn Sorg- unn Schwäß:
Sein Stolz, de Dank fer all sei Pfleche,
daß er`n umsorcht, dut fleißig hege:
Unn doch liegt nit alles in unsrer Hand:
aach wammer sich mieht- mit all seim Vestand:
Frucht, wu sich lohnt, die kann bloß reife
-wie jerer dut wohl gut begreife-
nit uhne vum Himmel de gettliche Seeche:
Froschd unn Sunn unn Wind unn d` Reeche
im rechte Maß zu d` rechte Zeit
Wann vum Himmel de Seeche uns Mensche geleit
unn vun Hachel unn Uuwetter mer bleiwen veschont
bloß dann hot die viel Ärwet sich werklich gelohnt:
Unn was fer Mieh unn wieviel Schwäß
steckt drin im Weibau- wie mer wäß:
Schun mitte in de Winterzeit
en Winzersmann sei Reewe schneid`t
Unn dann, wann im März die Sunn äm lacht,
werd Kamme`t im Wingert gern gemacht
Unn daß die Ernt aach recht gelingt,
wird nit gegeizt, wann`s Erdreich mer dingt
unn so ab de Pingschde, wann die Reeb dann blieht
do bleibt en Winzer ständisch bemieht,
daß er de Reebstock vor Uugeziffer schitzt
Mer hofft, daß die ganz Spritzerei was nitzt
geeche Spinn, Laus, Pilz unn Worm
Unn es Gras werd gemulcht unn mer zackert de Borm
Dann muß ab Auguschd, noch e paar Woche
in Sunn unn Reeche die Traub drin "koche"
unn soll die Ernt echt gut geroote-
noch in de letzschde Woche "broote",
muß brutzle in de Sunn- dann braucht`s kän Reeche-
Dann endlich kann mer berge de Ernteseeche
Wann mer sich saacht: Nit länger meeh waa`te
`s hot jetzt genung an Öchslegraade
Do find mer e gut Stick Leewenskraft
-IN VITE VITA- im Reewesaft
Was fer e Frääd, was fer e Leewe,
wann jetzt mer, im Speetjohr keltert >Saft vun d` Reewe<:
Was dut mer schun um de Fedderweiße
-um Sießer, Bitzler sich als reiße-
unn nennt ne gern poetisch- fein:
eigefangner Sunneschein
Kraft vum Erdborm, aus Wind unn Reeche-
eigefangner Gottesseeche.
Unn doch trifft des zu fer jung unn alt
nit gänzlich uhne Vorbehalt:
Es hot de Wei zwar manchen Alde
bis siwwezich, achtzig jung erhalte
unn mancher werd- s esch werklich wohr:
noch määner als wie neinzig Johr.
Unn doch hot sich mancher- unn ich saach`s eich betroffe
in junge Johre schun dootgesoffe:
Hot stark sich erschd g`fiehlt unn ganz famos-
kräftig wie en Leew- mer fiehlt sich groß
Unn die Probleme- ganz klää- faschd wie geleest,
wammer -beduddelt vor sich hiideest.-
Unn so hot en mancher vesoffe- Lewwer; Milz, Hern-
Hett sei Leewe bloß gstanne unnerme bess`re Stern-
Unn wie schnell hot dort sich de Ehestand
gewannelt zu me >Wehestand<
Wann de Wei de Mensch zum Saufe vefiehrt,
unn die Sucht sei Lewe vunn Grund off ruiniert.
was dann helft isch nix- als wie e Kur-
unn denooch bloß noch Wasser- bloß Sprudel pur-
e Leewe lang kän richt`ge Schoppe!
Kä bissel mehr- nit än änzige Droppe!
De Reewesaft bloß uuvegore-
sunschd esch alles schun velore!
Doch wer des meischdert, wer des schafft:
Respekt: der Mann, die Frää zeigt Kraft-
Doch weers nit fair- s weer schlicht uugerecht,
wammer de Wei`schdock defor macht schlecht:
Was kann de Rebschdock dann dezu,
saufschd` Wei so wie`s Wasser en Gaul- e Kuh!
Genieße sellschd ne- nit saufe- mit Vestand unn Maß
dein Wei, wu in deim Schoppeglas-
ne dääle mi`m annre - in froher Rund-
unn nit schun frieh am Morge - zu d`rechte Stund!
Bloß so erhaltschd der -voll Saft unn Kraft
dei Lewenskraft aus Reewesaft-
So wemmer`s Gewächs heit vum Weistock preise,
dem Winzer so sei Ehr erweise-
unn fer de Weistock unn sei Kraft,
wu strotzt for Leewe, Kraft unn Saft
de Herrgott, unsern Schepfer lowe
fer alles Gute, wu vun owwe
sich nirrersenkt als Himmelsseeche:
Sunn, Wind unn Licht- unn aach de Reeche.-
Erschd recht aach bedenke, was Jesus uns lehrt,
wann er die Ärwet vum Winzer ehrt:
Im Bild vum Weistock- dem Sinnbild fers Leewe
weil soviel Kraft steckt in de Reewe,
ladt Jesus uns ei, dut so uns saache:
Dun doch Vetraue zu mer waache,
Daß- wie de Weistock Worzel treibt,
ihr so mit mer vebunde bleibt.-
Er will, daß mer ganz off ne baue
Nit me falsche Leidtbild uns aavetraue
Was alles esch doch schun bassiert,
weil am falsche Vorbild mer sich oriendiert:
Er saachts imme Bild drum, wu en Pälzer gut faßt-
weils werklich gut zu uns Pälzer baßt:
Wer er esch unn fer uns bleibt.
Damit mer nit ins Uuglick treibt
-Johannes fuffzeh -ääns bis acht-
steht, was Jesus imme Bildwort uns sacht:
Wie er uns will lenke, sem Gure fiehre-
damit mer stets uns oriendiere
an seim Wille unn seim Wort
iwwerall- an jerem Ort,
so daß uns nix vun ihm wegtreibt
unn mer mit Jesus vebunde bleibt:
aus seim Geischd lebt- sich im Vezeihe iebt,
in de Lieb uns bewähren, weil Gott uns all liebt
-Gott, wu uns annemmt mit `rer Riesegeduld-
vezeiht unser Fehler- vegebbt uns die Schuld-
Ach uns gilt sei Wort: Halt dich an mich!
De wahre Weistock, der bin ich-
Unn was mer an me Weistock sucht,
esch gure, rechte, edle Frucht
De Winzer, wu sein Weistock pfleecht,
esch dein Gott, wu dich liebt unn heegt und trägt.-
Geiztriewe- Triewe uhne Trauwe
wu me Stock die Kraft boß rauwe-
die nemmt er weg, die dut er schneide,
so wie `n Winzer muß entscheide:
ob die Reeb treibt gure Frucht,
ob mer Frucht vegeblich sucht:
Drum dun mer gut draa off Jesus se heere
Was vun sich er uns sagt- was er uns dut lehre:
"Wer vun meer lernt, Frucht reichlich treibt-
Frucht, wu geroot, wu wachst unn bleibt-
Lebt doch - en jerer an seim Ort-
in meim Sinn unn nooch meim Wort-
bei de Ärwet, ind` Fabrik, im Hof -im Haus,
Daß nit zum enne Ohr rei- zum annere raus,
des Wort geht, wu eich Orientierung schenkt,
wu eich off gurem Weech hiilenkt-
des Wort, wu eich offricht, eich treeschde dut-
unn eich warnt, mahnt, geleit, unn sem Leewe macht Mut-
aach wanns mol wehdut, wie e Winzermesser, wu schneidt
wanns uns betroffe macht- befreit:
So hebb ich eich all rausgebutzt,
gepflecht- aach mool serechtgestutzt-
Ich hebb eich gewarnt, unn Mut gemacht,
des Wort, was ner brauchen, die Wohret, eich g`saacht-
E Reeb allää noch ke Trauwe bringt-
E Leewe -uhne mich- eich nit gelingt,
Bloß wer mit mer vebunde bleibt
traacht Frucht, wu`s bringt, wu zehlt, wu bleibt
E Reeb, wum Weistock bloß d`Kraft dut rauwe-
wu nit Frucht bringt, ke gure Trauwe,
die schneid mer weg, die vederrt, vebrennt, werd venicht-
-die muß- wie dorchs Feier- dorch`s gettlich Gericht:
En Christdemensch, wu bei mer bleibt
wie die Reb am Weistock treibt
traacht Frucht, wu reift in aller Still-
Frucht vun der Art, wie Gott se will
Unn so lebt e Menschekind seim Herrgott zur Ehr,
Drum bleiwen bei meer unn meiner Lehr:
Soweit die Worte, wie se Jesus uns saacht-
Johannes 15, ääns bis acht-
Unn ich denk mer, so Frucht die braicht mer grad heit:
Gerechtigkäät braucht unser Zeit,
braucht Mensche, wu `em Friede nochstreewe
-nit bloß fer sich selwer leewe-
wu um die Schepfung sich sorchen, daß mer se erhalt:
do braucht mer jeren - jung unn alt-
Ach, deet doch wirke es gettlich Wort
so iwwerall an jerem Ort!
Meechten alle Mensche merke,
wie`s zum Gure will uns stärke!
So daß mer spiert die gettlich Kraft,
wie beim Weistock, wu voll steht im Saft!
Mensche sinn gfroocht, wu nit bloß redden vum Liewe-
wu werklich in ehr`m Alldaach dun`s Liewe iewe:
Des braucht doch die Welt grad in unsre Daache,
daß all unser Glääwe deet gure Frucht traache,
Frucht, wu wachst unn reift unn treibt,
weil mer ganz bei Jesus bleibt:
Jesus, der ruft uns- jetzt unn heit
-ruft so fer Zeit uns unn Ewigkeit-
zu me Leewe voll Sinn, wu kann bestehe,
wann alles, alles muß ve`gehe.
Vun ihm her gilt- imme diefere Sinn-
der alde Spruch vun Aabeginn:
IN VITE VITA- in de Reeb esch`s Lewe.
Daß mer all meechten bleiwe als wie d`Reewe
vebunne mit dem Weistock - Jesus esch sein Name-
in de Still breechten Frucht- dozu helf Gott uns all. Amen
Unn de Friede vun Gott, wu esch heicher als unser Ve`stand,
sell bei Jesus uns bewahre- unn`s Dorf, Stadt unn Land
