Feschdredd
zum 100- jährige Jubiläum
vum Pälzerwaldverei(n) Rhodt
(von Pfr. H. Priester, ehemals Rhodt)

Ehr liewe Leit, ve`ehrte Gäschd,
willkumme bei uns, bei unserm Feschd!
100 Johr Pälzerwaldve`ei(n)
des will mit Recht gefeiert sei(n)
Do ladt mer Gäschd vun noh unn vun fern:
Willkumme in Rhodt, ehr Dame unn Herrn!
 
Unn weil mer bei uns halt Pälzisch schwätzt
unn unser Muddersprooch so schätzt
-wie`s schun immer esch gewest
nooch dem, was mer in de Protokolle drin leest-
drum du heit mei Grußwort fer Junge unn Alde
ich aach mit Recht in Pälzisch halte,
weil: Pälzerwäldler sinn so schlau
-laut Brodokoll vum PeWeVau.
Unn wer vun de Gäschd des nit recht schafft
unn nit so unser Pälzisch "rafft"
der muß halt in die Feschdschrift sehe,
do dut so etwa des selwe in Hochdeitsch drin schdehe.
Vielleicht lernt er -so ganz newebei,
so denk ich mer unn bin so frei-
aach Pälzisch noch- des weer ganz nett.
Er find mei Redd im Internet,
er muß bloß off mei Webseit geh`
im Wörld-Weit-Web -mit www.
unner rhodt-suew.de- dort PWV
Ehr finnen`s schun, ehr sinn so schlau
 
Wie mer sei Feschdredd sell beginne?
Mer muß off`s Thema sich besinne.
Es Thema esch de PWV!
Drum machen `s so wie ich genau,
wann ich was du in Pälzisch dichte:
Dun schunemool eiern Schoppe richte.
Unn loßt uns `s Schoppeglas erhebe:
De PWV- hoch sell er leewe.
Unn schdimmt all froh jetzt mit mer ei(n):
100 Johr Pälzerwaldverei(n)
100 Johr unn doch voll Schwung.
100 Johr unn richdisch jung.
Des muß en Grund zum Feiere sei:
E Hoch dem Pälzerwaldverei!
En dreifache Schluck unn e dreifaches Hoch!
unn "ehl" mer schnell mool so die Schbroch,
weil mit dem Pälzer Reewesaft
hot unser Pälzer Schbrooch viel Kraft-
unn rufen mit mer jetzt all- genau!-
e dreifach Hoch dem PeWeVau!

 
Daß heit ich die Feschdredd halte soll
des find ich eigentlich ganz doll!
Ich bin zwar so gut wie im Ruheschdand
unn doch de meischde noch bekannt-
zumindeschd de meischde aus unn um Rhodt-
obwohls dort en neie Parre jetztert hot.
Daß meer zwä ganz gut uns veschdehe,
das kammer ahne unn kammer sehe.
 
Korz: Ich kumm der Bitt gern noch,
halt aach mei Redd in Pälzer Schbrooch,
 
obwohl sich`s im Grund faschd hot erledigt
mit Pälzisch Grußwort, Pälzer Preddicht.
Awwer wer sei Pälzisch liebt,
der esch nie so ganz uugeiebt-
unn bleibt des aach als Pensionär.
Drum denkt mer sich: Dem fallt´s   nit schwer.
Der hot fer sei Verscher jetzt reichlich Zeit
unn Muße unn Gelegenheit.
 
Mer gebbt mer aach`s alde Protokoll,
do wäß mer, was mer redde soll-
Gut lesbar hot mer`s abgeschriwwe-
wie gut, daß mer`s hot offgetriwwe
unn mit dem all die alde Gschichte
wu vun de Grindungszeit berichte!
 
Weil, wammer was redde sell unn muß,
do braucht des ääfach "Hand unn Fuß"
Es esch doch so: Wer bloß  redd Schduß,
der macht schun am Aafang am beschde Schluß!
 
So hebb ich grindlich schdudiert -ehr Leit,
die Schrifte aus de alde Zeit,
wies vun Aafang aa gewest,
wie mer`s in de Prodokolle drin lest:
Wie de Verei` war sellmools gegrindt,
wie`s die Chronik uns vekind`t
 
Treffpunkt war die Wertschaft- de große Saal.
Was war des fer e "Qual der Wahl"!
-was ich so noch heit empfind:
beim Adler, beim Rebschdock, im Leew, bei de Lind`
unn nit se ve`gesse -bsunnerschd im Schwane.
Die Wertschafte warn reichlich in de Zeit vun de Ahne
 
Was freilich will mer aarme Dropp
so ganz unn gar nit in de Kopp:
Warum hot mer in die Parrscheier sich nit sellmools getraut?
Klar!- Die war halt ääfach noch nit gebaut!
Dodrin war em Parre sei Frucht, Hei unn Schdroh.
Die Zeite waren halt mool so.
Des waren domools in unsre Breite-
werklich unn wahrhaftig annere Zeite!
Es war- aach wammer`s so saache dut-
die "gut alt Zeit" nit immer gut.
 
Die Leit warn arm. Doch oft zufriede
mit dem, was ne so war beschiede.
Die Leit, die waren noch bescheide
in dene arme alde Zeite.
Stadt Vollernter hänn die Herbschdmääd sich ääns g`sunge
unn all helfen se mit, die alde, die junge!
Kä Weschmaschien hot mer sellmools gekennt-
Ich hett die ne werklich  vun Herze gegennt.
Mer hot vekääft de gure Wei
unn mußt mit "Mops" halt glicklich sei!
Warum vekääft mer als de deire?
Me muß jo schließlich zahle Schdeire
fer Kaiser unn Reich- fer "Wilhelm zwo"-
die Zeide waren halt mool so.
 
So war`s bei uns mool jerenfalls.
Unn zu Bayern g´heert die Palz.
De Prinzregent hot noochem Keenich in Minchen regiert
-unn uns in Rhodt e Bank schbendiert!-
aus de keenigliche Kasse.-
Ich find des ääfach "schbitze, klasse!",
dass in Minche die allerheechschd Majestät
de PWV so ehre deet.
Ich find des gut,  unn find des schlau:
das so mer ehrt de PeWeVau:
Wer beim Wannre draus in de Sunn dut schwitze
der brauch e Bank fer droff zu sitze!
Drum trink ich noch änner unn saach mer schlau:
"Hoch Wittelsbach unn PWV!"
 
Sellmools gab`s noch ke Audos unn -"ach du Schreck!"
do gab`s noch nit emool die "Schneck!"
Wollschd in die Schdadt, mool was eikääfe,
hoschd misse nooch Landääch, noch Neischdadt lääfe!
Unn wer sem Lääfe halt war se faul
spannt aa- de Ochs? sei Kuh? de Gaul?
Macher Gutsherr nämmt sei Kutsch, esch schlauer
fahrt schneidig mit zwä PeeS in seim "Landauer"
 
 
Unn wer nit hot misse am Fahrgeld schbare,
hot kenne ab E`sem mittem Ziiechel mitfahre.
Aach hot`s sellmools kä Radio  gewwe,
Mer hot misse ganz uhne Fernseh lewe.
Unn wollt mer sich mool unnerhalde
do hot`s gehäße: "Selwer gschdalde!,
selwer schbiele, selwer singe,
wann`d deer unn wann d`annre Frääd willschd bringe!"
Kä Wunner daß mancher bei sich entdeckt,
was an Begaawunge bei ihm sinn veschdeckt.
Do schbielt mer manch e Theaterstick,
vun Leid unn Frääd, vum große Glick.
Unn merkt so recht,. daß manche Sache
mer kann ganz gut aach selwer mache!
Unn weil meer Pälzer Leit sinn schlau,
schbielt mer Theater beim PeWeVau.
Unn mancher staunt in Land unn Schdadt,
was mer so alles in sich hat
Unn alle Dame, alle Herrn,
sinn kumme zum Theater gern,
weil Pälzerwäldler mit Frääd and` Nadur,
die dun aach was fer die Kuldur!
Mer wannerd nit bloß so dorch de Wald,
mer ferdert die Kuldur aach halt.
Unn weil des alles gut gelingt,
des aach was in die Kass neibringt:
In die Wertschaft ladt mer ei- unn bringt dort Gedichte,
in Hochdeitsch, in Pälzisch unn manche Gschichte,
weil Pälzerwäldler sinn so schlau.
Drum: dreifach Hoch dem PeWeVau!
 
Mer hett manch Schdargaschd sich gegennt,
hett mer`n bezahle aach gekennt.
 
Mer hot de Paul Minch zum Beischbiel g`schätzt,
vun dem manch Gedicht aach mich ergetzt.
Doch gscheidert esch`s - ich saach`s wie war-
glatt an de Frooch vum Honorar.
Unn weil die Zeite aarme ware,
do hots halt g`hässe: "Schbare, schbare!"
Unn weil mer so in Land unn Schdadt,
so gar nix im sein Säckel hot ghatt,
braucht mer Leit, wie mich- zufriede mi`me Schoppe-
Hauptsach: `s esch e Pälzer Troppe!
 
Mit Phandasie unn Muschkelkraft
henn d`Pälzerwäldler viel als gschafft
Mer baut im Rhodter Vorderwald
e Rodelbahn fer Jung unn alt.
Unn mer heeert vun Weidem Jodle,
weil mer dort so gern dut rodle!
 
Doch aach do gelt: Uhne Moos?
Uhne Moos, do esch nix los!
Doch wer nix bezahle kann,
zahlt mit seinre Kraft als Mann
orrer dut ser Verfiegung schdelle
als Arweider änner vun seine G`selle
Unn kann dann ganz "fer umme" fahre-
dut so pro Saison e Mark fuffzich sich schbare.
 
Unn aach die Fremme derfen jodle
unn off de Bahn enunner rodle.
Zwanzig Penning koschd die Fahrt.
Des blieb de Fremme nit erschbart.
 
Unn so kummt, was werklich klasse!-
beim PWV was in die Kasse!
En Rodeldiener werd feschd aagschdellt
als fer e klännes Daschdegeld.
Er kriecht e ganzi Mark am Daach.
Unn macht sei Ärwet uhne Klaach!
Mer esch zufriede so- s`esch wohr!-
unn nemmt ne noch so manches Johr.
 
 
Aach dut mer markiere so manchen Wech,
daß mer aach find noch Weg unn Schdeg-
unn nit sich ganz im Wald ve`errt,
hot mer beim Wannre sich mol g`schnerrt.
Die Rhodter kennen sich aus- die sinn so schlau,
zumindeschd die vum PeWeVau,
Doch wie esch des mit de annre,
wu aach bei uns so gern dun wannre?
So wählt mer sich en rode Schdern
fer all die fremme Dame unn Herrn
mit drei Buchschdabe ergänzt-genau!
e Pe- Punkt- We-Punkt unn e Vau!
 
Unn dut off rechtem Weech so fiehre,
dut Blättersberg unn Haag markiere.
Unn was fallt mer dozu ei:
en Hoch dem Pälzeraldverei,
der noch heit die Weech markiert,
daß mer nit sei Ziel ve`liert.
 
Dreifach Hoch em Pälzerwaldverei`,
des muß aach heit gesaach noch sei,
weil mer dort die Landschaft hegt
unn die Umwelt also pfleecht.
 
So war`s schun domools, wer die Heimat liebt,
aach im Umweltschutz sich iebt,
nemmt Ricksicht aach off all die annre,
wu bei uns als Gäschd dun wannre.
Mer sorgt fer Bääm unn so fer Schatte
fer die Miede un die Matte,
so daß- wer en Wingert hett-
am Weech zu de Villa pflanze deet
- wie schää aach fer die Vechelcher- sich en Bääm
fer die Freme ä Fräd unn fer die wu dehääm.
Bääm fer drunner zu Ve`schnaufe, fer Raschd
fer manchen Fremme unn manchen Gaschd.
So eschs halt mool, ehr liewe Leit
gar nit annerschd als noch heit!
do richt mer manch schää Plätzel zum Sitze
zum Ausruhe beim Wannre unn vum Schwitze-
en Platz fer zum Sähne: "So schää isch die Palz!"
unn fer de Gedanke: "Ach, Gott, erhalt`s!"
 
Doch schreibt en Klaach mer immer wirrer
in de Protokolle nirrer:
Mer breicht meh Familie mit frischem Schwung-
Wo esch die Jugend? Wu Leit, wu jung?
Unn ich glääb als- ehr liewe Leit?
Esch`s so nit aach in unsre Zeit?
 
Zwar ve`miss ich nit de Schwung!
Doch ve`mißt mer manch Familie, wu jung
unn aach hett wie die viele annre
Schbaß am Lääfe unn am Wannre-
am Wannre mit de Pälzerwäldler unn am Raschde
unn Ruhelosse die Alldaachslaschde.
Unn wer wannerd- des muß mer wisse,
werd als emool ve`schnaufe misse
unn wäß, wie`s esch unn wie`s sell sei:
Gut geeche de Dorschd esch Pälzer Wei
unn was de Wei esch fer de Dorschd
esch fer de Hunger Weck unn Worschd,
was imme Mensch halt Kräfte weckt
unn was mi`nanner doppelt schmeckt.
Drum fallt mer nochmool mei Schbrichelche ei:
E Hoch dem Pälzerwaldverei
unn du mei Schdimm so nochmool eele,
unn mich nit "drucke" weirerquehle!
Drum sach ich, weil mer des so gfallt:
En Hooch off unsern Pälzer Wald!
en Hooch ve`dient wie der genau
aach unser Rhodter PeWeVau!
--------
Doch annerschd als in unsre Daache
esch heit ken Grund mäh groß ze klaache:
Mer breecht de Saal partout nit voll.
Des find ich ääfach super! doll!
 
Des liegt -so denk ich- am Weck nit unn Worschd
unn was se drinke fer de Dorschd,
wann heit mer im Protokoll als leest:
`s esch wirrer alles voll gewest!
Voll war b`setzt de ganze Saal.
Mer kummt- wie doll!- in großer Zahl!
Ich denk, mer wäß: "Seit hunnert Johr
fahrt mer gut mit Verei(n)- s esch werklich wohr!
Unn der Verei` esch gut unn nitzt,
wu mer aach kräfdisch unerschditzt!
 
Dozu brauchts Leit, wu sich engagiere,
wu gern unn mit Verantwortung ehr Ehreamt fiehre.
Applaus fer so Leit, weil die sinn klasse-
unn achten gut aach off die Kasse!
 
So wie bei uns die Vorschdandschaft,
wu sich eisetzt mit ganzer Kraft:
De Bachtler Heinz will ich als erschde mool nenne,
unn die Lilli Kempf, wu ner sicher aach all kenne,
die dut aach  schun länger die Kass als gut fiehre,
-do esch nix se beaaschdanne beim Inschbiziere!-,
- Wer aach an Lieb unn Mieh nit schbard
esch d` Werner`s Karl als Wann(d)erwart
Der traacht aach vor als mit druckenem Humor
die Schdadistik vun den Wannrunge alle Johr.
Letscht Johr esch do- wie mer heert unn lest-
„Wachablesung“ grad gewest
mit Willi Wach, wu als Schriftfiehrer aach schreibt`s Protokoll,
daß mers in hunnerd Johr noch lese kenne soll.
Ludwig Baumann als Wegewart nooch de Weche dut sehe,
daß mer se kann werklich gehe-
unn er nit ausem Aach ve`liert,
daß se all sinn gud markiert,
 
Gerhard Müller kimmert im Ve´ein sich  um d` Kuldur
unn als Nadurschutzward aach um d` Nadur.
Vier Beisitzer sinn noch zu nenne,
die wer`n er bschdimmt aach all gut kenne:
Wilma Baumann  unn Helmut Hahn
geheeren mit em Vorschdand an,
Hans Hamann, Gerhard Ochsenkühn, nenn` ich uhne Vedruß
in de Reih vum Alphabet – unn drum jetzt am Schluß-
unn denk aach an all die viele annre
wu gut als fiehren beim monatliche  Wannre
Applaus fer all, wu sich engagiere,
wu gern unn gut ehr Ehreamt fiehre!
 
Domols zu de Grindungszeit,
do warens`s freilich annre Leit:
Do warens`s, wie mer in de Chronik drin leest,
folgende Persone gewest:
Lehrer Candidus, der hot im Vorsitz präsidiert,
Einämmergehilfe Helm hot die Kass als gut g`fiehrt,
Es Protokoll dut Lehrer Hauber gut fiehre-
drum kammer des noch heit schdudiere.
Ab 1912 esch`s, wie mer lest
de Lehrer Bollebach gewest.
Unn es waren, ehr liewe Leit,
71 Mitglieder in seller Zeit.
41 Leit henn de Ve`ein gegrind`t
aach des die Chronik uns vekind`t
- nennt im Wannerausschuß als gute Geischder:
Karl Seitz- sellemols Altberjermeischder,
Jakob Friedrich Schdeigelmann
an seinre Seit mer finne kann-
-Gutsbesitzer esch sein Titel-
Ich denk, er war nit uhne Mittel.
Unn dann steht do- bei meiner Ehr!-
Jakob Meyer, Wei`kommisionär,
Michael Wamsganz esch noch genennt,
Krämer vun Beruf, damit mer`n erkennt-
unn als negschden schreibt mer nieder:
Philipp Leonhard Schdeigelmann, Essigsieder
 
Unn so blickt mer off 100 Johr serick:
off e Johrhunnert voll Kummer und Glick,
- off so manche beese Zeit
mit zwää Kriege voll Herzeleid
 
Gegrindt zu de Kaiserzeit noch in Friedensdaache-
Mer kennt die bloß noch vum Heere-sache
-und nooch em Krieg die schwere Zeit
geprägt von Arwetslosigkeit,
vun hartem Kampf ums dägliche Brot-
vum Alltag  seiner Plooch und Not-
Wie gut, daß mer am Wannre hot sei Luschd
Aus voller Seel und frischer Bruschd
esch mer sunntags als `naus in Wald und Flur
- de  Schäänheit vum Leewe off de Schbur-
und wannert gern so dorch die Welt
hat Frääd määh draa wie Gut und Geld
 
So manch Johr lud mer im Verei`
aach zum Theaterschbiele ei-
hat so manch  Laieschbiel ei`schdudiert
und mit Erfolg aach offgefiehrt.-
  `s war domals -wäß Gott- kä gure Zeit,
bei soviel` Arwetslosigkeit mit harter Ärwet, kargem Lohn
verzehrt meh unn meh vun de` Inflation
Des was der g`schbart hoscht, hoscht kenne ve`gesse:
Die Inflation hot`s glatt offg`fresse!
Millione - Milliarde- des war schrecklich!-
zahlschd fer e  Briefmark-  fer e Wecklich!    
Kää Wunner, wann dem Rattenfänger mer hot  ve`traut  
die ganz Hoffnung off den offgebaut-
im Taumel mitgekrische „Heil unn Sieg!“
 
Unn kumme esch mit seim Graue de zwätte Krieg
 
Kaum war mer dem Krieg unn seim Schrecke entronne,
do hot mer wirrer nei begonne:
hot wieder gegrindt nei den Verei`
unn find sich minanner zum Wannre ei
 
Die Welt werd langsam wirrer bunter
Und es kummt es Wertschaftwunner
Man muß nit mäh an allem schbare
Mer kann zum Wannre jetzt gar fahre
Und mer nitzt fer sich ganz hell
die nei entdeckte Reisewell`
So fallt mer`s ei zum guren Schluß
fahrt quer dorch Deitschland mit`m Omnibus
zuneigschd fer än Dag - dann zwää dann drei
sletzschd finf- sinn d`Pälzerwäldler mit debei
 
Was fallt mer noch beim Noochdenke ei
zum Rhodter Pfälzerwaldverei`?
Kaffee und Kuche beim Bliedefeschd
um zu versorche die viele Gäschd
Was bekanntlich esch aach klasse
fer `m Verei` sei leere Kasse,
weil der manches unnerschditzt,
was de Allgemeinheit nitzt
Und will wer guten Kuchen esse,
darf d` Pfälzerwäldler nit vergesse,
die  sinn jo im ganze Land
fer ehr Backkunst wohlbekannt
Und wann äm heit die Punde   queele,
kanns  Wannere dann mer  gut empfehle;
Die Weeche sinn all gut markiert,
so daß beim Wannre nix bassiert
So kannmer aach allää gut wannre
Doch schänner esch`s doch im Verei` mit annre
 
Woran ich als Parre gern denk zurick
-und manchmal geht serick mein Blick-
Beim Gemeindefest- bei uns der Verei`
stellt nach dem Wannre sich gern ei-
-ausgehungert- unn des war es Beschde:
esst gern mer alle, alle Reschde-
Nix ist ve`gammelt und ve`dorwe,
was Pälzerwälder sich erworbe!
 
So war mer`s auch lieb und war kä Last
warn  Pälzerwäldler bei uns zu Gast
in unserm Gemeindehaus, der Pfarrscheier,
wu uns esch lieb und wert und deier.
Mich fräd aach, daß seit letschd Johr im Mai
10 km Fußmarsch sinn im Programm beim Verei`,
wu do zu de Rietburg zum Waldgottesdienschd fiehrt.
Frää mich iwwer jeren, wu do mitmarschiert.
-mitmarschiert beim große Haufe
E macht mäh Schbaß –als bloß allää zu laufe-
Mer tankt viel Frischluft im Verei`-
des macht  de Kopp aach klar unn  frei!
Wie hot en schlauer Mann mool gesagt?
Der  hot den schääne Schbruch gewagt:
Unn jed Kind wäß, wir recht er hot
Es gebt nix bessres newe der Gnade vun Gott,
unn nix Wichteres aach- als frische Luft
Gut, daß mer`s in Erinrung ruft
Weil frische Luft braucht unser Land,
weil die ferdert de Ve`schdand.
Unn dofor -derf ehrlich mer berichte-
sinn Pälzerwäldler Schbezialischde
Weil Pälzerwäldler sinn so schlau:
E dreifach Hoch dem PWV!
 
Unn jetzt heer ich off mit dichte.
Vieles weer noch se berichte-
weil hunnert Johr sinn e lange Zeit.
Doch mäh Details noch fiehrt zu weit:
 
Bloß noch ääns, des muß ich saache-
wills an dere Schdell noochtraache:
Wie mer heert unn wie mer lest,
esch schdeets  mer mit seim Vorschand zufriede gewest:
So eschs bis heit- so kummt mer`s vor:
Hett sunschd mer dann in hunnert Johr,
iwwer die ich mei Verscher gedrechselt,
viermool bloß de Vorschdand gewechselt???
Vier Vorsitzende bloß -in hunnert Johr???
Des esch doch SUPER!- ääfach kloor!
 
Mit Michael Krapp, wu folgt off Auguschd Candidus,
unn Werner Wilhelm - zum gure Schluß,
esch`s Bachtler Heinz jetzt- wu seit 20 Johr
-so lang esch`s schun -s`esch werklich wohr-
sich eisetzt bis heit mit ganzer Kraft
in seim Amt in d` Vorschdandsschaft-
 
 
So will e großes Lob ich saache,
all wu dozu dun beitraache,
daß die gut Sach kann weirergehe,
wu um`s Wannre sich dut drehe
drauß in Feld unn Wald unn Flur-
in unserm Herrgott sei scheener Nadur,
wu er hot uns Mensche gschenkt,
daß mer se pfleecht - unn an se denkt-
nit bloß froocht, wie mer se nitzt-
aach: wie mer se acht unn schitzt
So war`s- so esch`s- so sell es sei-
Reschbekt vorm Pälzeraldverei!
 
100 Johr Pälzerwaldverein,
des muß en Grund zum Feiere sein-
unn ehr Leit, s esch werklich wohr:
Des weer doch gut noch hunnert Johr,
daß mer ferdert bei Jung unn Alt,
`s Wannre im schäne Pälzer Wald-
was aach Gsundhäät unnerschditzt-
schad nix wammer beim Wannre mool schwitzt
unn schätzt unn schitzt mit Lieb unn Ve`schdand
unser schän deitsch Vaderland
unn acht unn schitzt Feld, Wald unn Flur
unn heegt die Nadur unn pfleecht die Kuldur.
Seit 100 Johr- seit 19 hunnert siewe
esch mer bei uns in dem Geischd sammegebliwwe.
 
So`n Jubilar- so voller Schwung!
Der mißt nochmools hunnert Johr so jung
in unser Mitt aach kinftig bleiwe
unn die gut Sach so weirer  treiwe
unn Freinde finne, wu gern mitwannre
unn mitraschde mit de annre-
aach junge Familie, wu do mithalte
froh mit de Junge unn de Alde.
 
Drum leer ich jetzt mei Schoppeglas
mit dem gure Pälzer Naß
unn trink`s jetzt leer off jeren Fall
off eier Wohl unn fer eich all:
Es esch doch so: en Pälzer Schoppe,
des esch en werklich gurer Droppe.
Ich leer`s -was fallt mer Bessres ei:
Offs Wohl vum Pälzerwaldverei`!

07. Januar Speyerdorf Mussbach Speyerdorf - 9 km
04. Februar Rund um Sonderheim- 12 km
04. März Stumpfwald Elswoog Gericht 9 Stühle- 12 km
15. April Neckarsulm, Um den Scheuerberg- 10 km
12. Mai Festakt 100 Jahre PWV Rhodt-
17. Mai Zum Gottesdienst auf die Rietburg- 10 km
10. 14 Juni Mehrtagesfahrt nach Bad Sachsa/Südharz
24. Juni Hauptwanderung Maria Rosenberg- 12 km
O1. Juli Sternwanderung zur Lambertskreuzhütte- 12 km
08. Juli Kaltenbronn Wildsee Grünhütte Wildbad- 14 km
05. August Felsenwanderweg bei Rodalben- 15 km
18. August Abendwanderung zum Waldfest der Rietania- 6 km
09. September Rheinsteig Lahnstein Braubach Osterspai - 10 km
07 Oktober Stüterhof Weltachs Sandtal Stüterhof- 11 km
04. November Lachen Fronmühle Wasserhaus Lachen- 11 km
01. Dezember Schlachtfest
09. Dezember Nikolauswanderung mit Adventsfeier- 6 km

Unsere Vorstandschaft:
1. Vorsitzender: Heinz Bachtler, Kronacher Str. 6
76835 Rhodt Tel.: 06323 6664
2. Vorsitzende: Lilli Kempf
Rechnerin: Lilli Kempf
Wanderwart: Karl Werner
Schriftführer: Willi Wach
Wegewart Ludwig Baumann
Kultur u. Naturschutzwart: Gerhard Müller.
Beisitzer: Wilma Baumann; Helmut Hahn; Hans Hammann; Gerhard Ochsenkühn.

"Ein besonders gelungenes Jubiläumsfest!"- so sagte sich mancher der einheimischen und fremden Gäste, die der Einladung des Pfälzerwaldvereins Rhodt zu seinem 100-jährigen Bestehen am Samstag, den 12.5.07 in die Turnhalle  gefolgt waren. In der Tat wurde ein sehr abwechslungsreiches Festprogramm geboten.

Umrahmt vom Mandolinenorchester Rietania (Schwarze Augen, Nabucco, "kleine Lachmusik" frei nach Mozart) waren die Grußworte der Ehrengäste Dr Klaus Weichel, Vorsitzender des Hauptvereins, der Landrätin Theresia Riedmaier, von Verbandsbürgemeister Olaf Gouasé, der Ortsbürgermeisterin Irmgard Gromöller und der Rhodter Weinhoheit Juliane I.

Auch die Rhodter Ortsvereine meldeten sich mit Grußworten und originellen Geschenken zu Wort.

Heinz Bachtler als 1. Vorsitzender begrüßte besonders die Hainfelder Wanderfreunde aus dem Nachbarbezirk und die Vertreter der Ortsgruppen des Bezirkes Hardt- Süd

Mit launischen Worten in gereimter Mundart gab der frühere Ortspfarrer Helmut Priester 100 Jahre Vereinsgeschichte zum Besten.

Im zweiten Teil nach der Pause umrahmten die Rietburgsänger die Ehrungen durch den Vorsitzenden Klaus Weichel. Geehrt wurde für 25-jährige Mitgliedschaft Gerhard Ochsenkühn. Mit der silbernene Ehrennadel ausgezeichnet wurden Ludwig Baumann und Klaus Werner und zu seiner großen Überraschung der vierte der Vorsitzenden in 100-jähriger Vereinsgeschichte,  Heinz Bachtler.

Die inzwischen etwas in die Jahre gekommene ehemalige Deutsche Wanderjugend zeigte in ihren Volkstänzen, daß sie noch nicht zum alten Eisen gehört.

Mit den Dankesworten des 1. Vorsitzenden und dem gemeinsam gesungenen Schlußlied vom Pfälzer Wind, sozusagen der Nationalhymne der Pfälzerwäldler, schloß eine gut gelungende abwechslungsreiche Jubiläumsveranstaltung, die zeigt, daß der Jubilar mit seinen 100 Jahren noch bei besten Kräften ist.